Purba Mira Otro Hende Manera Yehova Ta Mira Nan

“Dios no ta mira manera hende ta mira.”—1 SAMUEL 16:7.

1, 2. Den ki manera Yehova su punto di bista di Eliab ta distinto for di esun di Samuel, i kiko nos por siña di esaki?

DURANTE siglo 11 promé ku nos era, Yehova a manda profeta Samuel riba un mishon sekreto. El a bisa e profeta p’e bai kas di un hòmber ku yama Isaí (Yesé) i ungi un di Isaí su yu hòmbernan komo e futuro rei di Israel. Ora Samuel a mira Eliab, e yu mayó di Isaí, el a kere sigur ku el a haña esun ku Dios a skohe. Pero Yehova a bis’é: “No wak su aparensia ni e haltura di su estatura, pasobra mi a rechas’é; pasobra Dios no ta mira manera hende ta mira, pasobra hende ta wak aparensia di pafó, ma SEÑOR ta wak kurason.” (1 Samuel 16:6, 7) Samuel no a mira Eliab manera Yehova a mir’é.a

² Ta masha fásil pa hende faya ora di evaluá otro. Di un banda, nos por ser engañá dor di hendenan ku di pafó ta parse masha bon i agradabel, miéntras ku di paden nan ta hende sin ningun prinsipio moral. Di otro banda, nos por ta masha severo i estrikto den e manera ku nos ta evaluá hende sinsero ku tin rasgonan di personalidat ku ta molestiá nos.

3, 4. (a) Si dos kristian tin problema ku otro, kiko kada un mester ta determiná pa hasi? (b) Ki preguntanan nos mester hasi nos mes ora nos tin un desakuerdo serio ku un kompañero kreyente?

³ Nos por haña nos ku problema ora nos ta lihé pa husga otronan, asta esnan ku nos konosé pa hopi aña. Podisé bo tabatin un pleitu serio ku un kristian ku un tempu tabata bo amigu será. Lo bo kier drecha e relashon ei? Kiko lo yuda bo logra esaki?

⁴ Pakiko no purba haña un punto di bista mas profundo i positivo di bo ruman kristian? I hasi esaki ku e palabranan aki di Hesus na mente: “Ni un hende no por bin serka mi, si no ta e Tata ku a manda mi a hal’é.” (Huan 6:44) Anto puntra bo mes: ‘Dikon Yehova a hala e persona aki serka Su Yu? Ki kualidatnan agradabel e persona aki tin? Mi ta lubidando riba e kualidatnan aki òf ta konsiderá nan insignifikante? Dikon nos a bira amigu na prinsipio? Kiko a hala mi serka e persona aki?’ Na prinsipio kisas bo no ta kai mes riba su bon kualidatnan, foral si bo tin algun tempu kaba ta karga renkor. Sin embargo, esaki ta un paso importante pa drecha e relashon entre boso dos. Pa mustra kon lo bo por hasi esaki, laga nos ban buska algun karakterístika positivo den dos hòmber ku de bes en kuando ta bini padilanti den un lus negativo. Nan ta profeta Yónas i apòstel Pedro.

Un Bista Sin Prehuisio Riba Yónas

 5. Ki tarea Yehova a duna Yónas i kon el a reakshoná?

⁵ Yónas a sirbi komo profeta p’e reino di nort di Israel den e dianan di Rei Jeroboam II, yu hòmber di Joas. (2 Reinan 14:23-25) Un dia Yehova a duna Yónas òrdu p’e bandoná Israel i biaha bai Ninive, e kapital di e poderoso Imperio di Asiria. Kiko e mester a bai hasi einan? Avisá e habitantenan ku nan stat grandi ta bai wòrdu destruí. (Yónas 1:1, 2) En bes di sigui Yehova su instrukshon, Yónas a hui! El a subi un barku ku tabata bai Tarsis, un sitio leu for di Ninive.—Yónas 1:3.

 6. Dikon Yehova a skohe Yónas pa bai Ninive?

⁶ Kiko ta bini na bo mente ora bo pensa riba Yónas? Bo ta pensa ku e tabata un profeta desobediente? Si bo djis wak e aribariba, en bèrdat bo por pensa asina. Pero ta pasobra Yónas tabata desobediente Yehova a nombr’é komo profeta? Klaro ku nò! Yónas lo mester tabatin kualidatnan ku Dios a gusta. Pensa riba tur e kosnan ku el a hasi komo profeta.

 7. Bou di ki sirkunstansia Yónas tabata sirbi Yehova na Israel, i kon e echo ku bo sa esaki mester influensiá bo punto di bista tokante dje?

⁷ Realidat ta ku Yónas tabata un trahadó fiel na Israel, un teritorio masha inhospitalario. Profeta Ámos, kende a biba rònt di e mesun tempu ku Yónas, a deskribí e israelitanan di e tempu ei komo hende materialista ku a stima plaser.b Tabatin kosnan malu ta tuma lugá den e pais, pero e israelitanan no tabata preokupá mes ku e kosnan ei. (Ámos 3:13-15; 4:4; 6:4-6) Apesar di esei, dia tras dia Yónas a kumpli fielmente ku su tarea di prediká na e hendenan aki. Si bo ta un proklamadó di e bon nobo, bo sa kon difísil ta pa papia ku hende indiferente i ku ta kontentu ku nan situashon. Pues anto, ounke nos ta rekonosé ku Yónas tabatin debilidat, laga nos no pasa por haltu di su bon kualidatnan, esta, e fieldat i perseveransia ku el a manifestá ora e tabata prediká na e israelitanan infiel.

 8. Ki desafionan un profeta israelita lo a hañ’é kuné na Ninive?

⁸ E asignashon pa bai Ninive a enserá un tarea asta mas difísil ainda. Pa yega e stat, Yónas lo mester a biaha 800 kilometer na pia, un biahe difísil ku lo a dura rònt di un luna. Una bes einan, e profeta lo mester a prediká n’e asirionan, kendenan tabata konosí pa nan krueldat. Den nan gueranan nan tabata gusta torturá hende na un manera sadista. Nan tabata asta broma tokante nan echonan salbahe. P’esei no ta un sorpresa ku Beibel a yama Ninive “e stat tur na sanger.”—Nahum 3:1, 7.

 9. Kua kualidatnan Yónas a desplegá ora un tormenta violento a menasá e marineronan?

⁹ Dor ku Yónas no kier a obedesé Yehova su mandamentu, el a subi un barku ku a hib’é mas i mas leu for di su asignashon. Sin embargo, Yehova no a pèrdè konfiansa den su profeta ni laga un otro hende remplas’é. En bes di esei, Yehova a kuminsá tuma akshon pa laga Yónas bolbe na su sano huisio. Di promé, Yehova a laga un tormenta fuerte bini riba laman. E olanan brutu tabata kastigá e boto ku Yónas tabata aden. Hòmbernan inosente tabata bai pèrdè nan bida, i tur esei pa motibu di Yónas! (Yónas 1:4) Kon Yónas a reakshoná? Dor ku e no tabata kier pa e marineronan abordo di e barku pèrdè nan bida pa su motibu, el a bisa nan: “Hisa mi benta na laman. E ora ei laman lo kalma pa boso.” (Yónas 1:12) E no tabatin niun motibu pa pensa ku ora e marineronan bent’é na awa, Yehova lo a salb’é for di laman. (Yónas 1:15) Tòg, Yónas tabata dispuesto pa paga ku su bida, pa e marineronan no muri. Nos no ta ripará den e kaso aki ku el a desplegá kualidatnan manera kurashi, humildat i amor?

10. Kiko a sosodé ora Yehova a bolbe duna Yónas e mesun tarea?

¹⁰ Finalmente Yehova a reskatá Yónas. E último aktonan ei di Yónas a pone ku nunka mas e no por a sirbi atrobe komo representante di Dios? Nò, yen di miserikòrdia i amor Yehova a bolbe duna e profeta e tarea pa bai prediká n’e ninivitanan. Ora Yónas a yega Ninive, ku kurashi el a bisa e habitantenan ku nan gran maldat a yega na Dios su atenshon i ku nan stat ta bai ser destruí denter di 40 dia. (Yónas 1:2; 3:4) Despues ku e ninivitanan a tende e mensahe franko di Yónas, nan a repentí i nan stat a keda di spar.

11. Kiko ta indiká ku Yónas a siña un lès balioso?

¹¹ Ainda Yónas no tabatin e punto di bista korekto. Sin embargo, mediante un lès práktiko, ku pasenshi Yehova a yuda Yónas komprondé ku E ta wak mas aleu ku aparensia. E ta eksaminá kurason. (Yónas 4:5-11) E relato franko ku Yónas mes a skirbi ta duna prueba ku el a komprondé e lès balioso. E echo ku e tabata dispuesto pa skirbi di su fayonan ku detayenan ku lo a dun’é bèrgwensa ta duna mas prueba di su humildat. Ademas, un hende mester tin kurashi p’e atmití su fayo!

12. (a) Kon nos por sa ku Hesus ta mira hende meskos ku Yehova ta mira nan? (b) Kon nos mester mira e hendenan na ken nos ta prediká e bon nobo? (Wak kuadro na página 18.)

¹² Siglonan despues, Hesukristu a hasi un remarke positivo tokante un suseso den bida di Yónas. El a bisa: “Meskos ku Yónas tabata tres dia i tres anochi den barika di e mònster di laman, asina e Yu di Hende lo ta tres dia i tres anochi den kurason di tera.” (Mateo 12:40) Despues ku Yónas resusitá, lo e haña sa ku Hesus a kompará e tempu ku E a pasa den graf ku e periodo di inaktividat aki den bida di e profeta. Nos no ta kontentu pa sirbi un Dios ku no ta rechasá su sirbidónan ora nan kometé fayo? E salmista a skirbi: “Meskos ku un tata tin kompashon ku su yunan, asina SEÑOR tin kompashon ku esnan ku ta tem’é. Pasobra e sa di kiko nos ta trahá; E ta kòrda ku ta stòf nos ta.” (Salmo 103:13, 14) Sí, e “stòf” aki—inkluso hende imperfekto awe—por logra hopi kos ku e apoyo di Dios su spiritu santu!

Un Punto di Bista Balansá di Pedro

13. Kua karakterístikanan di Pedro por bini na bo mente, pero pakiko Hesus a skoh’é komo apòstel?

¹³ Awor laga nos brevemente konsiderá un di dos ehèmpel, esun di apòstel Pedro. Si bo mester splika ken ta Pedro, lo bo pensa mesora riba karakterískanan manera deskabeyá, impulsivo i asta arogante? De bes en kuando, Pedro a manifestá e kualidatnan aki. Sin embargo, Hesus lo a skohe Pedro komo un di su 12 apòstelnan si realmente e tabata un persona deskabeyá, impulsivo òf arogante? (Lukas 6:12-14) Klaro ku nò! Hesus a wak mas aleu ku e fayonan aki i a mira ku Pedro tabatin bon kualidat.

14. (a) Kiko por ta un splikashon p’e echo ku Pedro tabata kla pa hiba palabra? (b) Dikon nos mester ta gradisidu ku Pedro a hasi pregunta frekuentemente?

¹⁴ De bes en kuando Pedro a aktua komo bosero di e otro apòstelnan. Tin hende por konsiderá esaki komo evidensia di falta di modestia. Pero esaki nesesariamente mester ta asina? Algun hende ta bisa ku podisé Pedro tabata mas grandi ku e otro apòstelnan, i kisas asta mas grandi ku Hesus mes. Si esei ta korekto, esaki lo por ta un splikashon pakiko hopi bes Pedro tabata esun ku a hiba palabra. (Mateo 16:22) Sin embargo, tin un otro faktor pa tene kuenta kuné. Pedro tabata un hòmber spiritual. Su set pa konosementu a motiv’é pa hasi pregunta. I e preguntanan aki a benefisiá nos. Hesus a duna algun kontesta balioso riba Pedro su preguntanan, i esakinan a keda konservá den Beibel. Por ehèmpel, ta ora Hesus tabata kontestá un pregunta di Pedro el a papia tokante ‘e fiel mayordomo.’ (Lukas 12:41-44) I pensa riba e pregunta aki ku Pedro a hasi: “Ata nos a bandoná tur kos i a sigui bo; kiko anto nos lo haña?” Esaki a hiba na e promesa fortalesedor di Hesus: “Tur hende ku a bandoná kasnan òf ruman hòmbernan òf ruman muhénan òf tata òf mama òf yunan òf kunukunan pa kousa di mi nòmber, lo risibí hopi bes mas tantu, i lo heredá bida eterno.” (Mateo 15:15; 18:21, 22; 19:27-29)

15. Dikon nos por bisa ku Pedro en bèrdat tabata leal?

¹⁵ Pedro tabatin un otro kualidat ekselente: e tabata leal. Ora ku hopi di Hesus su disipelnan a stòp di siguié pasobra nan no a komprondé un di su siñansanan, ta Pedro tabata esun ku a tribi di papia na nòmber di e 12 apòstelnan i a bisa: “Señor, serka ken nos lo bai? Abo tin e palabranan di bida eterno.” (Huan 6:66-68) E palabranan aki mester a emoshoná Hesus su kurason! Despues ora un multitut desordená a bini pa arestá e Doño, mayoria di e apòstelnan a hui. Sin embargo, Pedro a sigui e multitut na un distansia i a drenta te den e plenchi di e sumo saserdote. Ta kurashi i no kobardia a pone ku el a yega te einan. Miéntras nan tabata interogá Hesus, Pedro a djòin un grupo di hudiu ku tabata keinta nan kurpa na un kandela intenso. Un di e esklabonan di e sumo saserdote a rekonos’é i a akus’é di tabata huntu ku Hesus. Sí, Pedro a nenga su Doño, pero laga nos no lubidá ku ta lealtat i interes den Hesus a pone Pedro den e situashon peligroso ei, un situashon ku mayoria apòstel no a tribi di enfrentá.—Huan 18:15-27.

16. Pa ki motibu práktiko nos a konsiderá e kualidatnan positivo di Yónas i Pedro?

¹⁶ Pedro su bon kualidatnan ta surpasá su debilidatnan. Esei ta e kaso tambe ku Yónas. Meskos ku nos a tira un bista mas positivo riba Yónas i Pedro ku normalmente nos lo a hasi, asina tambe nos tin ku entrená nos mes pa ta mas positivo den e manera ku nos ta konsiderá òf evaluá nos rumannan spiritual. Dor di esei nos por tin un mihó relashon ku nan. Dikon ta ègt nesesario pa nos tin un punto di bista positivo di nos rumannan?

Aplikando e Lès Awe

17, 18. (a) Ki frikshon por desaroyá entre kristiannan? (b) Ki konseho di Beibel por yuda nos resolvé problemanan ku kompañeronan kreyente?

¹⁷ Awendia tin hòmber, muhé i muchanan di tur rasa, di tur nivel ekonómiko i ku tur tipo di edukashon ta sirbi Yehova unídamente. (Revelashon 7:9, 10) Tin un variedat masha grandi di personalidat den e kongregashon kristian! Ya ku nos tur ta sirbi Dios den kontakto estrecho ku otro, ta inevitabel ku nos ta haña nos ku frikshon de bes en kuando.—Romanonan 12:10; Filipensenan 2:3.

¹⁸ Ounke nos no ta sera wowo pa e debilidatnan di nos rumannan, nos no ta enfoká riba esakinan. Nos ta hasi esfuerso pa imitá Yehova, di kende e salmista a kanta: “Si abo, SEÑOR, tuma inikidatnan na kuenta, o Señor, ken lo por a keda para?” (Salmo 130:3) En bes di konsentrá riba rasgonan di personalidat ku lo por dividí nos, nos ta “buska e kosnan ku ta trese pas i edifikashon di otro.” (Romanonan 14:19) Nos ta hasi esfuerso pa mira hende manera Yehova ta mira nan dor di pasa por haltu di nan faltanan i enfoká riba nan bon kualidatnan. Ora nos hasi esei, e ta yuda nos sigui “soportá otro.” (Kolosensenan 3:13)

19. Menshoná algun paso práktiko ku un kristian por dal pa resolvé desakuerdonan serio.

¹⁹ Pero kiko nos lo hasi si surgi un mal komprondementu ku nos no por simplemente resolvé den nos kurason so? (Salmo 4:4) Esaki a sosodé entre abo i un kompañero di fe? Pakiko no trata di drecha e asuntu? (Génesis 32:13-15) Di promé, aserká Yehova den orashon i pidié su guia. Anto ku e persona su bon kualidatnan na mente, aserk’é “den suavedat di sabiduria.” (Santiago 3:13) Bis’é ku bo kier hasi pas kuné. Kòrda e konseho inspirá ku ta mustra ku nos mester “ta lihé pa tende, no lihé pa papia i no lihé pa rabia.” (Santiago 1:19) E konseho pa no ta “lihé pa rabia” ta indiká indirektamente ku e otro persona lo por hasi òf bisa algu ku lo por pone bo rabia. Si esei sosodé, pidi Yehova yuda bo pa bo dominá bo mes. (Galationan 5:22, 23) Laga bo ruman bisa loke e tin di bisa, i abo skuch’é ku atenshon. No interumpié, ni maske bo no ta akuerdo ku tur loke e ta bisa. Su punto di bista por ta robes, pero ta esei ta loke e ta pensa. Purba mira e problema for di su punto di bista. Esaki lo por nifiká ku bo tin ku mira bo mes manera bo ruman ta mira bo.—Proverbionan 18:17.

20. Ora di resolvé desakuerdo, ki otro pasonan probablemente por resultá den un rekonsiliashon?

²⁰ Ora ta bo turno pa papia, hasié ku grasia. (Kolosensenan 4:6) Bisa bo ruman loke bo ta gusta di dje. Pidi despensa pa kualkier kos ku bo por a hasi ku a kousa e mal komprondementu. Si bo esfuersonan humilde hiba na un rekonsiliashon, gradisí Yehova. Si esei no ta e kaso, sigui pidi Yehova guia miéntras bo ta buska otro oportunidatnan pa hasi pas.—Romanonan 12:18.

21. Kon e konsiderashon aki a yuda bo mira otronan manera Yehova ta mira nan?

²¹ Yehova ta stima tur su sirbidónan. E ta kontentu pa usa nos tur den su sirbishi apesar di nos imperfekshonnan. Segun ku nos ta siña mas tokante e manera ku e ta mira otro hende, nos amor pa nos rumannan lo sigui krese. Si nos amor pa un kompañero kristian a fria, e por lanta atrobe. Nos lo risibí hopi bendishon si nos hasi un esfuerso determiná pa mira otro hende ku un punto di bista positivo, sí, pa mira nan manera Yehova ta mira nan!

[Nota]

Kon Lo Bo Kontestá?

• Kon Yehova ta mira fayo di su sirbidónan fiel?

• Kua kualidatnan positivo di Yónas i Pedro bo por menshoná?

• Ki punto di bista di bo rumannan kristian bo ta determiná pa keda kuné?

[Kuadro na página 18]

Pensa Kon Dios Ta Mira Otro Hende

Ora bo meditá riba e relato bíbliko di Yónas, bo no ta sinti ku bo tin ku haña un otro punto di bista di e personanan na ken bo ta prediká e bon nobo regularmente? Podisé nan ta parse di ta kontentu ku nan situashon òf indiferente meskos ku e israelitanan, òf nan ta kontra e mensahe di Dios. Pero kon Yehova Dios ta mira nan? Meskos ku e rei di Ninive a repentí komo resultado di e predikashon di Yónas, asta algun hende ku ta prominente den e sistema di kosnan aki por kuminsá buska Dios un dia.—Yónas 3:6, 7.

[Plachi na página 15]

Bo ta mira otro hende manera Yehova ta mira nan?

[Plachi na página 16, 17]

Hesus a saka algu positivo for dje eksperensia di Yónas