“Tur e Tesoronan di Sabiduria”

1-3. Kiko tabata e marko di sirkunstansia di e sermon ku Hesus a duna riba un dia den lènte di aña 31, i dikon su oyentenan a keda masha asombrá?

TABATA un dia den lènte di aña 31 di nos era. Hesukristu tabata pegá ku Kapernaum, un stat yen di aktividat na kosta nortwèst di Laman di Galilea. Riba un seru den bisindario, Hesus a pasa henter anochi su so ta hasi orashon. Ora ku di dia a habri, el a yama su disipelnan i a skohe 12 for di entre nan ku el a duna e nòmber apòstel. Miéntras tantu, gruponan grandi di hende—tin di nan for di lugánan basta leu—a sigui Hesus na e sitio aki i a reuní na un lugá plat riba e seru. Nan tabata ansioso pa tende kiko e tabatin di bisa i p’e kura nan di nan malesanan. Hesus no a desapuntá nan.—Lukas 6:12-19.

² Hesus a aserká e multitut i a kura tur hende ku tabata malu. Finalmente, ora ku ningun di nan no tabata sinti e doló di un malesa grave mas, el a kai sinta i kuminsá siña nan.a E palabranan ku el a papia e dia fresku ei di lènte lo mester a sorprendé su oyentenan. Nunka nan no a tende un hende siña nan manera el a hasi. Pa duna peso na su siñansa, e no a referí na tradishonnan oral ni na rabinan hudiu bon konosí. Mas bien, el a sita bes tras bes for di e Skritura Hebreo inspirá. E mensahe ku el a duna tabata stret, ku palabranan simpel i e nifikashon tabata bon kla. Ora ku el a kaba, e hendenan a keda masha asombrá. I ku bon motibu, ya ku nan a kaba di skucha e hòmber di mas sabí ku a yega di biba!—Mateo 7:28, 29.

³ E sermon ei huntu ku hopi otro kos ku Hesus a bisa i hasi ta pará skirbí den e Palabra di Dios. Ta bon pa nos investigá kiko e registro inspirá ei ta bisa di Hesus, pasobra den Hesus tin “tur e tesoronan di sabiduria.” (Kolosensenan 2:3) Di unda Hesus a haña e sabiduria ei, esta, e abilidat di apliká konosementu i komprondementu na un manera práktiko? Kon el a desplegá sabiduria, i kon nos por sigui su ehèmpel?

 4. Ki pregunta e oyentenan di Hesus a hasi, i dikon?

⁴ Durante un di Hesus su rekoridonan pa prediká, el a bishitá Názarèt, e pueblo kaminda el a lanta, i a kuminsá siña hende den e snoa ku tin einan. Hopi di su oyentenan a keda masha asombrá i a puntra nan mes: “Di unda e hòmber aki a haña e sabiduria aki?” Nan tabata konosé su famia—su mayornan i su rumannan—i nan tabata sa ku el a bin di un ambiente humilde. (Mateo 13:54-56; Marko 6:1-3) Sin duda nan tabata sa tambe ku e karpinté elokuente aki no a bai ningun di e skolnan rabíniko prestigioso. (Juan 7:15) Pues nan pregunta por a parse lógiko.

 5. Segun Hesus, su sabiduria tabata di ki fuente?

⁵ E sabiduria ku Hesus a desplegá no tabata simplemente produkto di su mente perfekto. Mas despues den su ministerio, ora e tabata siña abiertamente den tèmpel, Hesus a revelá ku su sabiduria tabata di un fuente hopi mas elevá. E di: “Mi siñansa no ta di mi, ma di esun ku a manda mi.” (Juan 7:16) Sí, e Tata, esun ku a manda e Yu, tabata e berdadero fuente di Hesus su sabiduria. (Juan 12:49) Pero kon Hesus a haña sabiduria for di Yehova?

6, 7. Den ki maneranan Hesus a haña sabiduria for di su Tata?

⁶ Tabata e spiritu santu di Yehova ku a obra den Hesus su kurason i mente. Isaias a profetisá di Hesus komo e Mesias primintí: “E spiritu di SEÑOR lo keda riba dje, e spiritu di sabiduria i komprondementu, e spiritu di konseho i poder, e spiritu di konosementu i temor di SEÑOR.” (Isaias 11:2) Komo Yehova su spiritu tabata riba dje i a guia su pensamentu- i desishonnan, no ta nada straño ku tur loke Hesus a bisa i hasi a reflehá un sabiduria eksepshonal.

⁷ Hesus a haña sabiduria for di su Tata den un otro manera mas ku ta masha profundo. Manera nos a mira den Kapítulo 2, durante Hesus su eksistensia prehumano—ku a abarká un periodo inmenso—el a haña e oportunidat di siña mira kosnan for di e punto di bista di Yehova. Nos no por ni imaginá kon profundo e sabiduria ku e Yu a haña na lado di su Tata tabata, trahando duru komo Dios su “trahadó eksperto” den e kreashon di tur otro kos, tantu e kosnan ku tin bida komo esnan sin bida. Ku bon motibu anto, Beibel ta deskribí e Yu den su eksistensia prehumano komo sabiduria personifiká. (Proverbionan 8:22-31; Kolosensenan 1:15, 16) Durante henter Hesus su ministerio, e por a usa e sabiduria ku el a haña na lado di su Tata den shelu.b (Juan 8:26, 28, 38) P’esei nos no mester keda sorprendí pa e kantidat di konosementu i e profundidat di komprondementu ku e palabranan di Hesus a reflehá òf pa e sano huisio ku tabata bisto den tur loke el a hasi.

 8. Komo siguidó di Hesus, kon nos por haña sabiduria?

⁸ Komo siguidó di Hesus, nos tambe tin ku akudí na Yehova komo e fuente di sabiduria. (Proverbionan 2:6) Klaru ku Yehova no ta duna nos sabiduria milagrosamente. Pero sí e ta kontestá nos orashonnan sinsero den kua nos ta pidi e sabiduria nesesario pa trata ku éksito ku e difikultatnan di bida. (Santiago 1:5) Pa nos haña e sabiduria ei, nos tin ku hasi hopi esfuerso. Nos tin ku sigui busk’é “manera tesoro skondí.” (Proverbionan 2:1-6) Sí, nos tin ku sigui koba bai hundu den e Palabra di Dios, kaminda su sabiduria ta ser revelá, i pone nos bida na armonia ku loke nos ta siña. Spesialmente e ehèmpel di Yehova su Yu ta balioso pa yuda nos haña sabiduria. Laga nos analisá vários área den kua Hesus a desplegá sabiduria i siña kon nos por imit’é.

 9. Kiko a pone ku e siñansanan di Hesus tabata asina sabí?

⁹ Gran kantidat di hende a basha bai serka Hesus djis pa nan tend’é papia. (Marko 6:31-34; Lukas 5:1-3) I esaki no tabata straño, pasobra ora Hesus a habri su boka, palabranan di sabiduria sin igual tabata sali! Su siñansanan a reflehá un konosementu profundo di e Palabra di Dios i un abilidat inkomparabel di bai na rais di un asuntu. Su siñansanan ta atraé hende di tur parti di mundu i ta semper válido. Konsiderá algun ehèmpel di e sabiduria ku nos ta haña den e palabranan di Hesus, kende ta e “Konsehero Maravioso” profetisá.—Isaias 9:6.

10. Ki kualidatnan positivo Hesus a urgi nos pa kultivá, i dikon?

¹⁰ E Sermon Riba Seru, menshoná na prinsipio, ta e kolekshon mas grandi di siñansa di Hesus sin interupshon di un narashon òf di palabranan di otro hende. Den e sermon aki, Hesus no a djis konsehá nos pa papia loke ta korekto i komportá nos bon. Su konseho ta bai hopi mas profundo ku esei. Komo ku Hesus tabata sa ku pensamentu i sintimentu ta hiba na palabra i akshon, el a urgi nos pa kultivá kualidatnan positivo di mente i kurason, manera humildat, hamber pa hustisia, e inklinashon pa ta miserikòrdioso i pa hasi pas, i amor pa otro hende. (Mateo 5:5-9, 43-48) Segun ku nos ta desaroyá e tipo di kualidatnan ei den nos kurason, nos abla i komportashon lo bira mas sano, lokual no solamente ta agradá Yehova sino tambe ta promové bon relashon ku otro hende.—Mateo 5:16.

11. Ora di duna konseho tokante komportashon pekaminoso, kon Hesus a bai na rais di e asuntu?

¹¹ Ora Hesus a duna konseho tokante komportashon pekaminoso, el a bai na rais di e asuntu. E no a djis bisa nos keda leu for di aktonan violento. Mas bien, el a spièrta nos pa no laga rabia keda kushi den nos kurason. (Mateo 5:21, 22; 1 Juan 3:15) Hesus no a prohibí e akto di adulterio so. El a spièrta tambe kontra e pashon ku ta kuminsá den kurason i ku ta hiba na tal traishon. El a spièrta nos pa no laga nos wowonan lanta mal deseo i stimulá pashon. (Mateo 5:27-30) Hesus a dirigí atenshon na e kousa, no djis na e síntomanan. El a papia di e aktitutnan i deseonan ku ta hiba na aktonan pekaminoso.—Salmo 7:14.

12. Kon siguidónan di Hesus ta mira su konseho, i dikon?

¹² Ki un gran sabiduria tin den e palabranan di Hesus! Nada straño ku “e multitutnan a keda asombrá di su siñansa.” (Mateo 7:28) Komo su siguidó, nos ta mira su konseho sabí komo un guia pa nos bida. Nos ta trata na kultivá e kualidatnan positivo ku el a rekomendá—entre otro, miserikòrdia, pas i amor—sabiendo ku asina nos ta poniendo un fundeshi pa kondukta ku ta agradá Yehova. Nos ta hasi esfuerso pa saka e sintimentu- i deseonan negativo ku el a spièrta kontra dje for di nos kurason—kosnan manera rabia, amargura i deseonan inmoral—sabiendo ku esei lo yuda nos evitá kondukta pekaminoso.—Santiago 1:14, 15.

13, 14. Kiko ta mustra ku Hesus a usa bon huisio ora el a skohe e rumbo di su bida?

¹³ Hesus a desplegá sabiduria no solamente ku palabra sino tambe ku echo. Henter su manera di biba—su desishonnan, e manera ku el a mira su mes i su trato ku otro hende—a demostrá hopi faseta bunita di sabiduria. Konsiderá algun ehèmpel ku ta mustra ku “sabiduria sano i diskreshon” ta loke a dirigí Hesus su bida.—Proverbionan 3:21.

¹⁴ Sabiduria ta inkluí sano huisio. Hesus a usa bon huisio ora el a skoge su rumbo den bida. Bo por imaginá e klase di bida ku Hesus lo por tabatin: e kas ku e por a traha, e negoshi ku e por a lanta òf e fama mundial ku e por a logra? Hesus tabata sa ku un bida dediká na e aktividatnan ei “ta banidat i korementu tras di bientu.” (Eklesiastés 4:4; 5:10) Un rumbo asina ta bobedat, lo kontrario di sabiduria. Hesus a skohe pa tene su bida simpel. E no tabata interesá den traha plaka ni akumulá poseshon material. (Mateo 8:20) Na armonia ku loke el a siña hende, el a tene su wowo simpel, esta, enfoká riba un solo propósito: hasimentu di e boluntat di Dios. (Mateo 6:22, NW) Hesus sabiamente a dediká su tempu i energia na interesnan di Reino, lokual ta hopi mas importante i benefisioso ku kosnan material. (Mateo 6:19-21) Pues, el a laga atras un ehèmpel digno di imitá.

15. Kon siguidónan di Hesus por demostrá ku nan ta tene nan wowo simpel, i dikon esaki ta e rumbo di sabiduria?

¹⁵ Siguidónan di Hesus djawe ta mira e sabiduria di tene un wowo simpel. P’esei nan ta evitá di karga nan mes ku debe innesesario i ku aktividatnan mundano ku ta eksigí demasiado tempu i energia. (1 Timoteo 6:9, 10) Hopi di nan a dal paso pa simplifiká nan estilo di bida di manera ku nan por dediká mas tempu na e ministerio kristian, podisé asta sirbiendo komo proklamadó di Reino di tempu kompletu. No tin un rumbo mas sabí pa sigui, pasobra ora nos ta mantené interesnan di Reino na nan debido lugá, esei ta resultá den e felisidat i satisfakshon di mas grandi.—Mateo 6:33.

16, 17. (a) Den ki maneranan Hesus a demostrá ku e tabata modesto i realístiko den loke el a spera di su mes? (b) Kon nos por demostrá ku nos ta modesto i realístiko den loke nos ta spera di nos mes?

¹⁶ Beibel ta konektá sabiduria ku modestia. Ser modesto ta enserá ser konsiente di nos limitashonnan. (Proverbionan 11:2, NW) Hesus tabata modesto i realístiko den loke el a spera di su mes. E tabata sa ku lo e no a kombertí tur hende ku a tende su mensahe. (Mateo 10:32-39) El a realisá tambe ku lo e por a prediká na un kantidat limitá di hende. P’esei sabiamente el a konfia e trabou di hasi disipel na su siguidónan. (Mateo 28:18-20) Ku modestia el a rekonosé ku nan lo hasi “obranan mas grandi ku” esnan di dje, pasobra nan lo alkansá mas hende riba un área mas grandi i pa un periodo di tempu mas largu. (Juan 14:12) Ademas, Hesus a rekonosé ku e tambe tin mester di yudansa. El a aseptá yudansa di e angelnan ku a bin sirbié den desierto i di e angel ku a fortales’é den Getsemané. Den su momento di mas nesesidat, e Yu di Dios a sklama pa yudansa.—Mateo 4:11; Lukas 22:43; Hebreonan 5:7.

¹⁷ Nos tambe mester ta modesto i realístiko den loke nos ta spera di nos mes. Definitivamente nos lo ke traha di henter nos kurason i hasi tur esfuerso den e trabou di prediká i hasi disipel. (Lukas 13:24; Kolosensenan 3:23) Na mes momento, nos tin ku kòrda ku Yehova no ta kompará nos un ku otro, ni nos tampoko no mester hasi esei. (Galationan 6:4) Sabiduria práktiko lo yuda nos fiha metanan realístiko di akuerdo ku nos abilidat- i sirkunstansianan. Ademas, sabiduria lo guia esnan den puesto di responsabilidat pa rekonosé ku nan tin nan limitashonnan i ku de bes en kuando nan tin mester di yudansa i sosten. Modestia lo pone personanan asina aseptá e yudansa ku gratitut, rekonosiendo ku Yehova por usa un ruman den fe pa bira “un enkurashamentu” pa nan.—Kolosensenan 4:11.

18, 19. (a) Kiko ta mustra ku Hesus tabata rasonabel i positivo ora el a trata ku su disipelnan? (b) Dikon nos tin bon motibu pa trata otro na un manera rasonabel i positivo, i kon nos por hasi esei?

¹⁸ Santiago 3:17 ta bisa: “E sabiduria di ariba [ta] rasonabel.” Hesus tabata rasonabel i positivo den su trato ku su disipelnan. E tabata bon na haltura di nan faltanan, sin embargo el a buska e bon den nan. (Juan 1:47) E tabata sa ku nan lo a bandon’é e anochi di su aresto, pero e no a duda di nan lealtat. (Mateo 26:31-35; Lukas 22:28-30) Pedro a nenga tres biaha di asta konosé Hesus. Tòg Hesus a hasi orashon na fabor di Pedro i a ekspresá konfiansa den su fieldat. (Lukas 22:31-34) Riba e último anochi di su bida terenal, Hesus den orashon na su Tata no a enfoká riba e erornan ku su disipelnan a hasi. Mas bien, el a papia positivamente di nan manera di anda te ku e anochi ei, bisando: “Nan a warda bo palabra.” (Juan 17:6) Apesar di nan imperfekshonnan, el a enkargá nan ku e trabou di prediká e Reino i di hasi disipel. (Mateo 25:14, 15; Lukas 12:42-44) E konfiansa i fe ku el a ekspresá den nan sin duda a fortalesé nan pa sigui ku e trabou ku el a manda nan hasi.

¹⁹ Siguidónan di Hesus tin motibu pa imitá su ehèmpel den esaki. Si Dios su Yu perfekto mes a trata ku pasenshi ku su disipelnan imperfekto, kuantu mas nos komo hende pekaminoso mester ta rasonabel ora nos ta trata ku otro! (Filipensenan 4:5, NW) En bes di enfoká riba e imperfekshonnan di nos rumannan den fe, nos ta hasi bon di buska e bon den nan. Ta sabí di nos parti pa kòrda ku ta Yehova a atraé nan na dje. (Juan 6:44) Pues, siguramente e mester ta mira algu bon den nan, i nos tambe mester hasi meskos. Un aktitut positivo lo yuda nos pa no solamente “laga un ofensa pasa,” sino tambe pa buska den ki área mas nos por elogiá otro hende. (Proverbionan 19:11) Ora nos ta ekspresá konfiansa den nos rumannan kristian, nos ta yuda nan hasi nan bèst pa sirbi Yehova i pa haña goso den e sirbishi ei.—1 Tesalonisensenan 5:11.

20. Kiko nos lo mester hasi ku e tesoro di sabiduria ku tin den e relatonan di Evangelio, i dikon?

²⁰ E relatonan di Evangelio tokante e bida i ministerio di Hesus ta realmente un tesoro di sabiduria! Kiko nos lo mester hasi ku e regalo sumamente balioso aki? Na konklushon di e Sermon Riba Seru, Hesus a urgi su oyentenan pa no djis tende su palabranan sabí sino tambe hasi òf apliká nan. (Mateo 7:24-27) Si nos moldia òf forma nos pensamentunan, motivashonnan i akshonnan na armonia ku e palabra- i akshonnan sabí di Hesus, esei lo yuda nos haña e mihó bida ku ta posibel awor i tambe keda riba e kaminda ku ta hiba na bida eterno. (Mateo 7:13, 14) Definitivamente no tin un kaminda mas mihó òf mas sabí pa sigui!