“E Kaminda, i e Bèrdat, i e Bida”

1, 2. Dikon lo ta imposibel pa nos yega serka Yehova riba nos mes, i kiko Hesukristu a hasi pa nos relashoná ku esaki?

BO A yega di pèrdè kaminda? Kisas bo ta kòrda un biaha ku bo tabata bai bishitá un amigu òf famia i bo no por a haña e adrès. Segun ku bo tabata bai riba un kaminda deskonosí, bo a para i puntra un hende kon pa yega? Imaginá bo kon lo bo a sinti si, en bes di djis bisa bo kua kaminda pa sigui, un persona bondadoso a bisa: “Djis sigui mi. Lo mi hiba bo einan.” Esta un alivio lo bo a sinti!

² Den un sentido, Hesukristu ta hasi algu similar pa nos. Riba nos mes, lo ta imposibel pa yega serka Dios. Debí na imperfekshon i piká heredá, mundu di humanidat a dual i ta “ekskluí di e bida di Dios.” (Efesionan 4:17, 18) Nos tin mester di yudansa pa haña e kaminda pa yega serka Dios. Hesus, nos bondadoso Gran Ehèmpel, no ta djis duna konseho i instrukshon; e ta hasi mas. Manera nos a mira den Kapítulo 1, Hesus ta invitá nos, bisando: “Bin, sigui mi.” (Marko 10:21) Sin embargo, e ta duna nos motibu konvinsente tambe pa aseptá e invitashon ei. Na un okashon Hesus a bisa: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:6) Laga nos analisá algun motibu dikon ta pa medio di e Yu so nos por yega serka e Tata. Anto ku e motibunan ei na mente, nos lo konsiderá kon Hesus en bèrdat ta “e kaminda, i e bèrdat, i e bida.”

 3. Dikon nos mester pasa via Hesus pa yega serka Dios?

³ Na promé lugá, pa yega serka Dios nos mester pasa via Hesus pasobra Yehova a haña ta bon pa duna su Yu e papel sumamente importante ei.a E Tata a hasié e personahe sentral den e realisashon di tur Su propósitonan. (2 Korintionan 1:20; Kolosensenan 1:18-20) Pa por komprondé e papel sumamente importante ku e Yu tin, nos mester konsiderá loke a pasa den hòfi di Edén, kaminda e promé pareha humano a djòin Satanas den su rebelion kontra Yehova.—Génesis 2:16, 17; 3:1-6.

 4. E rebelion den Edén a lanta kua kuestion, i kiko Yehova a disidí di hasi pa resolvé e kuestion ei?

⁴ E rebelion den Edén a lanta un kuestion di importansia universal: Yehova Dios ta goberná su kriaturanan na e manera korekto? Pa resolvé e kuestion sumamente importante aki, Yehova a disidí ku un yu spiritual perfekto mester a baha na tera. No por tabatin un mishon mas importante: e yu lo mester a entregá su bida pa vindiká Yehova su soberania i fungi komo un reskate pa salba humanidat. Kedando fiel te na morto, e yu skohí lo a hasi posibel pa resolvé tur e problemanan ku Satanas su rebelion a krea. (Hebreonan 2:14, 15; 1 Juan 3:8) Pero Yehova tabatin míles di miónes di yu spiritual perfekto. (Daniel 7:9, 10) Kua di nan el a skohe pa kumpli ku e asignashon sumamente importante aki? Yehova a skohe su “Yu unigénito,” esun ku despues a bira konosí komo Hesukristu.—Juan 3:16.

5, 6. Kon Yehova a demostrá ku e tabatin konfiansa den su Yu, i riba kiko e konfiansa aki tabata basá?

⁵ E eskoho ku Yehova a hasi mester sorprendé nos? Definitivamente ku nò! E Tata tabatin tur konfiansa den su Yu unigénito. Siglonan promé ku yegada di su Yu riba tera, Yehova a profetisá ku e Yu aki lo keda fiel apesar ku lo e pasa den tur sorto di sufrimentu. (Isaias 53:3-7, 10-12; Echonan 8:32-35) Konsiderá kiko e echo ku Yehova a profetisá tur esei a indiká. E Yu tabatin boluntat liber i por a skohe su propio rumbo, meskos ku tur otro kriatura inteligente. Sin embargo, Yehova tabatin asina tantu konfiansa den dje ku el a profetisá ku e Yu lo a keda fiel na dje. Riba kiko e konfiansa aki tabata basá? Den un solo palabra: konosementu. Yehova konosé su Yu íntimamente i e sa kuantu su Yu ke agrad’é. (Juan 8:29; 14:31) E Yu stima su Tata, i Yehova na su turno tambe ta stima su Yu. (Juan 3:35) E amor ku Tata i Yu tin pa otro ta forma entre nan un laso di union i konfiansa ku ta inkebrantabel.—Kolosensenan 3:14.

⁶ En bista di e papel importante di e Yu, e konfiansa ku e Tata tin den dje i e amor ku ta uni e Tata ku e Yu, no ta nada straño ku ta pa medio di Hesus so nos por yega serka Dios. Pero tin un otro motibu mas pakiko ta e Yu so por hiba nos na e Tata.

7, 8. Dikon Hesus por a bisa korektamente ku ningun hende no konosé e Tata plenamente “sino e Yu so”?

⁷ Pa nos por haña akseso na Yehova tin sierto rekisitonan ku nos mester kumpli kuné. (Salmo 15:1-5) Ken por sa mas mihó ku e Yu kiko ta nesesario pa kumpli ku e normanan di Dios i haña Su aprobashon? Hesus a bisa: “Tur kos a wòrdu entregá na mi dor di mi Tata; i ningun hende no konosé e Yu [“plenamente,” NW], sino e Tata so; ni ningun hende no konosé e Tata [“plenamente,” NW], sino e Yu so, i esun na kende e Yu kier revel’é.” (Mateo 11:27) Laga nos wak dikon Hesus por a bisa, korektamente i sin eksagerá, ku ningun hende no konosé e Tata plenamente “sino e Yu so.”

⁸ Komo “e primogénito di henter kreashon,” e Yu tin un intimidat úniko ku Yehova. (Kolosensenan 1:15) Imaginá bo e relashon íntimo ku a desaroyá entre Tata ku Yu durante e miónes i miónes di aña ku nan dos so tabata eksistí, for di prinsipio di kreashon te ora ku a krea e otro kriaturanan spiritual. (Juan 1:3; Kolosensenan 1:16, 17) Djis pensa riba e oportunidat presioso ku e Yu tabatin na lado di su Tata, familiarisando su mes ku e pensamentunan di su Tata i siñando Su boluntat, normanan i manera di aktua. De echo, no ta un eksagerashon pa bisa ku Hesus konosé su Tata mas mihó ku kualke otro persona. E intimidat aki sigur a hasi posibel ku Hesus por a revelá e personalidat di su Tata na un manera úniko. Ningun otro persona lo por a hasié meskos.

9, 10. (a) Den ki maneranan Hesus a revelá e personalidat di su Tata? (b) Pa nos por tin Yehova su aprobashon, kiko nos tin ku hasi?

⁹ E siñansanan di Hesus a demostrá ku e tabata bon na haltura di e manera ku Yehova ta pensa i sinti i kiko Yehova ta rekerí di Su adoradónan.b Pero Hesus a revelá kon su Tata ta den un otro manera mas ku ta masha profundo. El a bisa: “Esun ku a mira mi a mira e Tata.” (Juan 14:9) Hesus a imitá su Tata perfektamente den tur loke el a bisa i hasi. P’esei ora nos ta lesa den Beibel tokante Hesus—e palabranan potente i agradabel ku el a usa den su siñansa, e kompashon ku a motiv’é pa kura otro hende i e empatia ku a pon’é yora—ta fásil pa nos imaginá ku Yehova lo a bisa i hasi presis meskos. (Mateo 7:28, 29; Marko 1:40-42; Juan 11:32-36) E manera di aktua i e boluntat di e Tata ta ser revelá perfektamente den e palabranan i akshonnan di e Yu. (Juan 5:19; 8:28; 12:49, 50) Pues, pa nos por tin Yehova su aprobashon, nos mester hasi kaso di e siñansanan di Hesus i sigui su ehèmpel.—Juan 14:23.

¹⁰ Komo ku Hesus konosé Yehova íntimamente i ta imit’é perfektamente, no ta un sorpresa ku Yehova a disidí ku ta e Yu ta e medio pa yega serka e Tata. Awor ku nos tin e base pa komprondé dikon nos por yega serka Yehova solamente pa medio di Hesus, laga nos konsiderá e nifikashon di e palabranan di Hesus: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.”—Juan 14:6.

11. (a) Dikon ta pa medio di Hesus so nos por drenta den un relashon aprobá ku Dios? (b) Kon e palabranan na Juan 14:6 ta enfatisá Hesus su posishon úniko? (Wak nota na pia di página.)

¹¹ Nos a siña kaba ku hende no por yega serka Dios si no ta pa medio di Hesus. Ban wak kiko spesífikamente esaki ta nifiká pa nos. Hesus ta “e kaminda” den e sentido ku ta pa medio di dje so nos por drenta den un relashon aprobá ku Dios. Dikon ta asina? Hesus a keda fiel te na morto i asina el a duna su bida komo un sakrifisio di reskate. (Mateo 20:28) Sin e provishon di reskate aki, lo tabata imposibel pa nos tin akseso na Dios. Piká ta krea un barera entre hende i Dios pasobra Yehova ta santu, i p’esei nunka e no por aprobá piká. (Isaias 6:3; 59:2) Pero e sakrifisio di Hesus a eliminá e barera; e sakrifisio ei a proveé loke tabata nesesario pa ekspiá, es desir, pa kubri piká. (Hebreonan 10:12; 1 Juan 1:7) Si nos aseptá loke Dios a proveé pa medio di Kristu i pone fe den esei, nos por haña Yehova su fabor. Simplemente no tin un otro manera pa nos “rekonsiliá ku Dios.”c—Romanonan 5:6-11.

12. Den ki otro sentido mas Hesus ta “e kaminda”?

¹² Hesus ta “e kaminda” pa loke ta trata orashon. Pa medio di Hesus so nos por akudí na Yehova den orashon ku e siguransa ku nos petishonnan sinsero lo ser skuchá faborablemente. (1 Juan 5:13, 14) Hesus mes a bisa: “Kiko ku boso pidi e Tata, e lo duna boso den mi nòmber. . . . Pidi, i boso lo risibí, pa boso goso por ta kompletu.” (Juan 16:23, 24) P’esei ta na su lugá ku den nòmber di Hesus, nos por aserká Yehova den orashon i yam’é “nos Tata.” (Mateo 6:9) Hesus ta “e kaminda” den un otro sentido mas: pa medio di su ehèmpel. Manera a keda menshoná kaba, Hesus a imitá su Tata perfektamente. Pues Hesus su ehèmpel ta mustra nos kon pa hiba nos bida di e manera ku ta agradá Yehova. Pa yega serka Yehova, anto, nos tin ku kana den e pasonan di Hesus.—1 Pedro 2:21.

13, 14. (a) Kon Hesus a papia e bèrdat? (b) Pa Hesus por ta “e bèrdat,” kiko e tabatin ku hasi, i dikon?

¹³ Hesus semper a papia e bèrdat tokante e palabra profétiko di su Tata. (Juan 8:40, 45, 46) Hamas a haña mentira den Hesus su boka. (1 Pedro 2:22) Asta su opositornan a rekonosé ku el a siña “e kaminda di Dios den bèrdat.” (Marko 12:13, 14) Sin embargo, ora Hesus a bisa ku “ami ta . . . e bèrdat,” e no tabata referí simplemente na e echo ku el a hasi e bèrdat konosí ora ku el a papia, prediká i siña hende. Esei a enserá hopi mas kos, mas ku papia so.

¹⁴ Kòrda ku siglonan di antemano, Yehova a inspirá eskritornan bíbliko pa registrá hopi profesia tokante e Mesias òf Kristu. E profesianan aki a papia di detayenan di su bida, ministerio i morto. Ademas, e Lei di Moisés a kontené sombra, òf patronchinan profétiko, ku a señalá na e Mesias. (Hebreonan 10:1) Akaso Hesus lo a demostrá di ta fiel te na morto, i asina kumpli ku tur loke a ser profetisá tokante dje? Ta e ora ei numa Yehova lo a ser vindiká komo e Dios di berdadero profesia. E responsabilidat inmenso ei tabata riba Hesus su skouder. Na e manera ku Hesus a biba—tur loke el a papia i tur loke el a hasi—el a duna prueba ku e patronchinan profétiko ei tabata bèrdat. (2 Korintionan 1:20) Pues, Hesus tabata “e bèrdat.” Ta komo si fuera e bèrdat di Yehova su palabra profétiko a bira realidat ku e yegada di Hesus.—Juan 1:17; Kolosensenan 2:16, 17.

15. Kiko kere den e Yu ta nifiká, i na kiko esei por hiba?

¹⁵ Hesus ta “e bida,” pasobra ta pa medio di dje so nos por haña bida, esta, e “bida berdadero.” (1 Timoteo 6:19) Beibel ta bisa: “Esun ku kere den e Yu tin bida eterno; ma esun ku no obedesé e Yu lo no mira bida, ma e furia di Dios ta keda riba dje.” (Juan 3:36) Kiko ta nifiká kere den e Yu di Dios? Esei ta nifiká ku nos tin e konvikshon ku nos no por haña bida sin dje. Es mas, e ta nifiká ku nos ta demostrá nos fe pa medio di nos obranan, ku nos ta keda siña for di Hesus i ku nos ta hasi nos bèst pa sigui su siñansanan i ehèmpel. (Santiago 2:26) Pues, kere den e Yu di Dios ta hiba na bida eterno, esta, bida spiritual inmortal den shelu pa un “tou chikitu” di kristiannan ungí pa spiritu santu i bida humano perfekto den un paradeis riba tera pa “un multitut grandi” di ‘otro karné.’—Lukas 12:32; 23:43; Revelashon 7:9-17; Juan 10:16.

16, 17. (a) Kon Hesus lo resultá di ta “e bida” asta pa hende ku a muri? (b) Ki konfiansa nos por tin?

¹⁶ Kiko di e hendenan ku a muri kaba? Hesus ta “e bida” pa nan tambe. Poko promé ku Hesus a lanta su amigu Lázaro for di morto, el a bisa Marta, ruman muhé di Lázaro: “Ami ta e resurekshon i e bida; esun ku kere den mi lo biba, maske e muri.” (Juan 11:25) Yehova a konfia su Yu ku “e yabinan di morto i di Hades,” dunand’e poder pa resusitá hende. (Revelashon 1:17, 18) Ku e yabinan ei, Hesus glorifiká lo habri e portanan di Hades i asina libra tur e hendenan prezu den e graf komun di humanidat.—Juan 5:28, 29.

¹⁷ “Ami ta e kaminda, i e bèrdat, i e bida.” Ku e deklarashon simpel aki, Hesus a resumí e propósito di su bida i ministerio riba tera. E palabranan ei ta yen di nifikashon pa nos awe. Kòrda ku despues di e deklarashon ei Hesus a sigui bisa: “Ni un hende no ta bin serka e Tata, sino pa medio di mi.” (Juan 14:6) Hesus su palabranan ta mes relevante awe ku nan tabata tempu ku el a ekspresá nan. P’esei nos por tin e pleno konfiansa ku si nos sigui Hesus, nunka nos lo no pèrdè kaminda. Ta Hesus so lo mustra nos e kaminda pa “bin serka e Tata.”

18. Kiko ser un berdadero siguidó di Hesus ta enserá?

¹⁸ En bista di e papel sumamente importante ku Hesus tin i su konosementu íntimo di e Tata, nos tin bon motibu pa sigui e Yu. Manera nos a mira den e kapítulo anterior, ser un berdadero siguidó di Hesus ta enserá akshon, no simplemente palabra òf sintimentu. Sigui Kristu ta enserá hiba nos bida segun su siñansa i ehèmpel. (Juan 13:15) E buki di estudio aki ku bo ta lesando por yuda bo den esaki.

19, 20. Kiko e buki di estudio aki ta kontené ku por yuda bo den bo esfuerso pa sigui Kristu?

¹⁹ Den e kapítulonan ku ta bai sigui, nos lo studia Hesus su bida i ministerio kuidadosamente. E kapítulonan aki ta partí den tres sekshon. Den e promé sekshon nos lo haña un bista general di su kualidatnan i manera di aktua. Den e di dos, nos lo analisá su ehèmpel seloso di prediká i siña hende. Den e di tres, nos lo konsiderá kon el a manifestá amor. Kuminsando ku Kapítulo 3, tin un kuadro di siñansa titulá “Kon Bo Por Sigui Hesus?” E tekstonan bíbliko i e preguntanan den e kuadro aki ta spesial pa yuda nos meditá riba e manera ku nos por imitá Hesus ku echo i palabra.

²⁰ Ku Yehova Dios su yudansa, bo no tin nodi ta di dual, ekskluí di tin un bon relashon kuné debí na piká heredá. Hasiendo un sakrifisio grandi, Yehova amorosamente a manda su Yu pa mustra nos e kaminda pa yega den un relashon aprobá ku Dios. (1 Juan 4:9, 10) Nos ta spera ku lo bo ser konmoví, sí impulsá, pa reakshoná riba e gran amor ei dor di aseptá i aktua riba Hesus su invitashon: “Sigui mi.”—Juan 1:43.