LÈS 44
Tur Selebrashon i Dia di Fiesta Ta Bon den Bista di Dios?
Yehova ke pa nos disfrutá di bida i asta pa nos selebrá sierto okashon. Pero Yehova ta haña tur selebrashon i dia di fiesta bon? Kon nos por demostrá ku nos ta stima Yehova ora ta trata di selebrashon i dia di fiesta?
1. Dikon hopi selebrashon i dia di fiesta no ta agradá Yehova?
Kisas lo bo keda sorprendí pa sa ku hopi selebrashon i dia di fiesta tin orígen pagano òf ta basá riba siñansa ku no ta kuadra ku Beibel. E selebrashonnan ei por tin di haber ku religion falsu, ku spiritismo òf ku e idea ku alma ta sigui biba despues ku un persona muri. Tin algun otro selebrashon ku tin di haber ku superstishon i suerte. (Isaías 65:11) Yehova ta spièrta su sirbidónan pa ‘separá nan mes i stòp di mishi ku loke ta impuru.’—2 Korintionan 6:17.a
2. Kiko Yehova ta pensa di dia di fiesta ku ta duna demasiado onor na hende?
Yehova ta spièrta nos pa nos no “konfia den hende.” (Lesa Yeremías 17:5.) Tin dia di fiesta ta duna onor na gobernante òf na sòldá. Tin otro dia di fiesta den kua hende ta selebrá independensia òf símbolo nashonal, manera bandera. (1 Huan 5:21) Anto tin dia di fiesta ku ta selebrá un suseso polítiko òf un movementu sosial. Kon Yehova lo sinti si nos duna demasiado onor na un hende òf organisashon, spesialmente si nan ta promové idea ku ta bai kontra Su propósito?
3. Ki komportashon ta hasi un selebrashon inaseptabel?
Beibel ta kondená “buracheria, paranda, [i] fiestanan di bebementu.” (1 Pedro 4:3) Na algun selebrashon, hende ta sali for di kontrol i ta hasi kos inmoral. Pa nos por keda amigu di Yehova, nos mester keda leu di tur e práktikanan impuru ei.
KIKO MAS NOS POR SIÑA?
Haña sa kon bo por hasi Yehova kontentu ora bo ta tuma bon desishon enkuanto dia di fiesta òf selebrashon.
4. No partisipá na selebrashon ku no ta agradá Yehova
Lesa Efesionan 5:10. Despues, analisá e siguiente preguntanan:
Kiko nos tin ku hasi sigur di dje promé ku nos skohe pa partisipá na un selebrashon?
Kiko hopi hende ta selebrá kaminda bo ta biba?
Bo ta kere ku e dianan di fiesta ei ta agradá Yehova?
Por ehèmpel, bo a yega di puntra bo mes kiko Yehova ta pensa tokante selebrashon di hasimentu di aña? Beibel no ta menshoná sirbidó di Yehova ku a selebrá nan hasimentu di aña. Loke sí Beibel ta menshoná ta dos hasimentu di aña di hende ku no tabata sirbi Yehova. Lesa Génesis 40:20-22 i Mateo 14:6-10. Despues, analisá e siguiente preguntanan:
Kiko a sosodé na tur dos fiesta di hasimentu di aña?
Despues ku bo a kaba di lesa e dos relatonan akí, kiko bo ta kere Yehova ta pensa tokante selebrashon di hasimentu di aña?
Kisas bo ta puntra bo mes: ‘Di bèrdat Yehova ta wòri si mi partisipá na selebrashon di hasimentu di aña òf un otro selebrashon ku Beibel no ta apoyá?’ Lesa Éksodo 32:1-8. Despues, pasa e VIDIO i analisá e siguiente preguntanan:
Dikon nos mester hasi sigur di loke ta agradá Yehova?
Kon nos por hasi esei?
Kon nos por sa si un selebrashon no ta agradá Dios?
E selebrashon ta basá riba siñansa no bíbliko? Pa bo por sa esei, bo tin ku investigá orígen di e dia di fiesta.
E selebrashon ta duna demasiado onor na hende, organisashon òf símbolo nashonal di un pais? Nos ke duna tur onor na Yehova i konfia ku e por resolvé tur e problemanan ku tin na mundu.
E kustumber- i práktikanan mará na e selebrashon akí ta bai kontra loke Beibel ta bisa? Nos mester keda moralmente limpi.
5. Yuda otro hende komprondé i respetá bo kreensianan
Tin biaha, por ta difísil pa bisa nò ora hende purba di preshoná bo pa selebrá algu ku no ta agradá Yehova. Ku pasenshi i takto, bo por splika nan dikon bo no ta partisipá na sierto selebrashon. Pa wak un ehèmpel kon bo por hasi esaki, pasa e VIDIO.
Lesa Mateo 7:12. Despues, analisá e siguiente preguntanan:
Segun e teksto akí, ta bon pa bo bisa bo famianan ku no tin e mesun kreensianan ku bo pa no selebrá un dia di fiesta?
Kon bo por mustra bo famia ku bo ta stima nan i balorá nan aunke bo no ta selebrá huntu ku nan?
6. Yehova ke pa nos ta felis
Yehova ke pa nos disfrutá di e tempu ku nos ta pasa huntu ku nos famia- i amigunan. Lesa Eklesiástes 8:15. Despues, analisá e siguiente pregunta:
Kon e teksto akí ta mustra ku Yehova ke pa nos ta felis?
Yehova ke pa su sirbidónan disfrutá di e tempu ku nan ta pasa huntu. Pasa e VIDIO pa wak kon esaki ta bisto na nos kongresonan internashonal.
Lesa Galationan 6:10. Despues, analisá e siguiente preguntanan:
Nos mester selebrá dia di fiesta pa nos por hasi algu bon pa hende?
Kiko lo hasi bo mas felis: duna un hende regalo riba un dia di fiesta pasobra bo ta sinti bo obligá pa hasi esei òf duna un hende algu pasobra bo mes ke hasi esei?
Hopi Testigu sa organisá aktividat leuk pa nan yunan i sa asta duna nan yunan regalo ora nan no ta spera esei. Si bo tin yu, kiko ta algun kos leuk ku bo por hasi pa nan?
LOKE HENDE SA BISA: “No ta importá ki orígen un fiesta tin. Loke ta importá ta ku bo ta pasa tempu ku bo famia- i amigunan.”
Kiko lo bo kontestá?
RESÚMEN
Yehova ke pa nos disfrutá ora nos ta pasa tempu ku nos famia- i amigunan. Pero, e no ke pa nos partisipá na selebrashon i dia di fiesta ku no ta agrad’é.
Repaso
Ki pregunta nos por hasi nos mes pa wak si un selebrashon ta agradá Yehova òf nò?
Kon nos por splika nos famia- i amigunan ku nos no ta selebrá dia di fiesta?
Kon bo por sa ku Yehova ke pa nos ta felis i disfrutá di bida?
MAS INFORMASHON INTERESANTE
Wak algun dia di fiesta ku kristian no ta selebrá.
“Dikon Testigunan di Yehova No Ta Selebrá Sierto Dia di Fiesta?” (artíkulo na spañó riba jw.org)
Wak kuater motibu ku ta indiká ku selebrashon di hasimentu di aña no ta agradá Dios.
“Dikon Testigunan di Yehova No Ta Selebrá Kumpleaño?” (artíkulo riba jw.org)
Wak kon mucha ku ta stima Yehova por hasié kontentu durante dia di fiesta.
Miónes di kristian a skohe pa no selebrá Pasku. Kiko nan ta pensa tokante e desishon ku nan a tuma?
“Nan A Haña Algu Mihó ku Pasku” (E Toren di Vigilansia di 1 di desèmber 2012)