Desaroyo di e Tema

ORADÓNAN ku eksperensia sa e balor di tin un tema. Ora nan ta prepará un diskurso, e tema ta yuda nan konsentrá riba un asuntu en partikular i profundisá nan mes den dje. E ouditorio ta benefisiá mas di nan diskurso dor ku nan no ta menshoná un kantidat di punto aribariba. Ta mas fásil tambe pa e ouditorio kòrda e puntonan prinsipal i mira nan balor si e oradó konektá nan tur direktamente ku e tema, anto laga e puntonan ei yuda desaroyá e tema.

Maske bo tema ta referí na e tópiko ku bo ta bai papia ariba, e kalidat di bo diskursonan lo mehorá si bo mira bo tema komo e ángulo spesífiko for di kua bo ta bai desaroyá bo tópiko. Por ehèmpel, e Reino, Beibel i resurekshon ta tópikonan masha general, i bo por desaroyá vários tema a base di nan. At’akí algun ehèmpel: “E Reino Ta un Berdadero Gobièrnu,” “E Reino di Dios Lo Hasi e Tera un Paradeis,” “Beibel Ta Inspirá pa Dios,” “Beibel Ta un Guia Práktiko pa Nos Tempu,” “Resurekshon Ta Duna Speransa na Esnan Tristu” i “E Speransa di Resurekshon Ta Yuda Nos Para Firme Ora di Persekushon.” Kada un di e temanan aki tin ku wòrdu desaroyá for di un otro ángulo.

E tema di Hesukristu su predikashon durante su sirbishi riba tera—na armonia ku e tema dominante di Beibel—tabata: “E reino di shelu ta serka.” (Mat. 4:17) Kon el a desaroyá e tema ei? E Reino ta ser menshoná mas ku 110 biaha den e kuater Evangelionan. Pero Hesus a hasi mas ku djis ripití e palabra “reino.” Tantu e siñansa ku el a duna komo e milagernan ku el a hasi a mustra bon kla ku e hòmber ku tabata riba tera na e momentu ei tabata e Yu di Dios, e Mesias, esun ku Yehova lo a duna e Reino. Tambe Hesus a mustra ku ta mediante dje e kaminda a habri pa mas hende forma parti di e gobièrnu aki i el a menshoná e kualidatnan ku e hendenan ei mester tin pa nan risibí tal privilegio. Via loke el a siña hende i ku su obranan poderoso, el a mustra bon kla ki efekto e Reino di Dios lo tin den bida di hende. El a indiká tambe ku e echo ku el a saka demoño pa medio di e spiritu di Dios a duna prueba ku di bèrdat “e reino di Dios a yega serka” di su oyentenan. (Luk. 11:20) Ta tokante e Reino ei Hesus a manda su siguidónan duna testimonio.—Mat. 10:7; 24:14.

Usa un Tema Apropiá. Klaru ku abo no tin nodi desaroyá un tema asina amplio manera Beibel ta hasi, pero ta masha importante sí pa bo tin un tema apropiá.

Si ta bo mes tin ku skohe bo tema, pensa promé riba e meta di bo presentashon. Despues skohe e puntonan prinsipal ku lo forma bo skema òf boskeho, i hasi sigur ku nan realmente ta apoyá e idea sentral di bo parti, esta, bo tema.

Ora e tema ta asigná kaba, bo tin ku analisá kuidadosamente ta for di ki ángulo e tema ta indiká ku bo mester desaroyá bo informashon. Kisas bo tin ku hasi un esfuerso pa mira e balor i e posibilidatnan ku e tema ei por tin. Si ta abo tin ku skohe e informashon pa desaroyá e tema asigná, sòru skohe bon pa bo no pèrdè e punto sentral for di bista. Di otro banda, si bo tin e informashon kaba, tòg lo bo tin ku analis’é pa wak kon bo por us’é na armonia ku e tema. Tambe bo tin ku reflekshoná riba pakiko e informashon ta importante pa bo ouditorio i ku ki meta bo mester present’é, pasobra ta asina lo bo por determiná kiko bo mester enfatisá den bo presentashon.

Kon pa Enfatisá e Tema. Pa logra esei bo tin ku pone e fundeshi for di kuminsamentu: ora di skohe i organisá bo informashon. Si bo usa solamente loke ta apoyá bo tema i bo prepará un bon boskeho manera e buki aki ta splika, lo bo enfatisá bo tema kasi outomátikamente.

Ripitishon ta yuda enfatisá e tema. Den muzik klásiko, e tema ta e melodia ku ta ser ripití durante henter e komposishon i ku ta karakteris’é. Pero e melodia no ta keda aparesé den e mesun forma. Tin biaha bo ta tende djis un pida di dje, un otro biaha un variashon kompletu di e tema; pero di un manera òf otro, e kompositor ta hinka e melodia maestralmente den otro i hasi esaki rekonosibel den su komposishon for di kuminsamentu te final. Asina mester ta ku e tema di un diskurso: e ripitishon di palabranan klave ta manera e melodia ku ta keda bin bèk den un komposishon musikal. Uso di sinónimo òf e mesun palabranan den un otro órden ta sirbi komo variashon di e tema. E téknikanan aki lo hasi e tema e idea prinsipal ku e ouditorio ta keda kòrda.

E prinsipionan aki ta konta no solamente pa diskursonan for di plataforma; por apliká nan tambe den sirbishi di vèlt. Sea ta un kòmbersashon breve òf e siñansa duná durante un studio di Beibel, e persona lo kòrda e informashon ku mas fasilidat si bo enfatisá e tema. Pues, e esfuerso ku bo ta hasi pa skohe i desaroyá temanan adekuá lo kontribuí hopi na mehorá bo abilidat komo oradó i komo maestro di e Palabra di Dios.