Ken Ta Influensiá Bo Manera di Pensa?

1, 2. (a) Kiko tabata Hesus su kontesta ora Pedro a bis’é pa e ta bondadoso ku su mes? (Wak e promé plachi.) (b) Dikon Hesus a kontestá asina?

E DISIPELNAN no por a kere loke nan a kaba di tende. Hesus, esun ku nan a spera ku lo a restorá e reino di Israel, a bisa ku pronto lo el a sufri i muri. Apòstel Pedro tabata e promé ku a bisa algu. El a bisa Hesus: “Sea bondadoso ku bo mes, Señor; esei sigur lo no pasa ku bo.” Pero Hesus a kontest’é: “Kita for di mi dilanti, Satanas! Bo ta un piedra di trompeká pa mi, pasobra bo no tin e pensamentu di Dios, sino di hende.”—Mat. 16:21-23; Echo. 1:6.

² Ku e palabranan akí, Hesus a hasi un distinshon entre e pensamentu di Dios i e pensamentu di e mundu akí ku ta bou di kontrol di Satanas. (1 Huan 5:19) Loke Pedro a bisa Hesus a reflehá e aktitut egoista di e mundu akí. Pero Hesus tabata sa ku e manera di pensa di su Tata tabata diferente. E tabata sa ku Dios tabata ke p’e prepará su mes pa e sufrimentu i morto ku tabata sper’é. P’esei, loke Hesus a kontestá Pedro a mustra bon kla ku Hesus a aseptá Yehova su manera di pensa i a rechasá esun di mundu.

 3. Dikon ta fásil pa pensa manera e mundu akí ta pensa ma difísil pa pensa manera Yehova ta pensa?

³ Awor, kiko di nos? Nos ta pensa manera Dios ta pensa òf manera e mundu akí ta pensa? Klaru, komo kristian, nos ta hasi esfuerso pa nos kondukta ta na armonia ku Dios su rekisitonan. Pero kiko di nos manera di pensa? Nos ta hasi nos bèst pa pensa meskos ku Yehova, esta, pa mira kos manera Yehova ta mira nan? Esaki ta eksigí hopi esfuerso. Di otro banda, ta masha fásil pa pensa manera mundu ta pensa. Dikon? Pasobra e spiritu di mundu ta tur kaminda. (Efe. 2:2) Ademas, mundu su manera di pensa por atraé nos pasobra e ta animá nos pa pensa riba nos mes. Sí, ta masha fásil pa pensa manera e mundu akí ta pensa ma difísil pa pensa manera Yehova ta pensa.

 4. (a) Kiko lo pasa si nos permití e mundu akí influensiá nos manera di pensa? (b) Kon e artíkulo akí ta bai yuda nos?

⁴ Sinembargo, si nos permití e mundu akí influensiá, òf forma, nos manera di pensa, probablemente, nos lo tin e tendensia di ta egoista i di disidí pa nos mes loke ta bon i loke ta malu. (Mar. 7:21, 22) P’esei, ta importante pa nos hasi esfuerso pa nos tin e “pensamentu di Dios” i no esun “di hende.” E artíkulo akí lo yuda nos hasi esei. Nos lo mira pakiko ta bon pa nos pensa meskos ku Yehova. Nos lo mira tambe ku Yehova su manera di pensa no ta restringí nos di mas; de echo, e ta benefisiá nos. Ademas, nos lo siña kon pa evitá ku e mundu akí ta influensiá nos manera di pensa. E siguiente artíkulo lo siña nos kon pa haña Yehova su punto di bista riba diferente asuntu i kon nos por pensa meskos ku n’e.

 5. Dikon algun hende no ke pa otro hende influensiá nan manera di pensa?

⁵ Algun hende ta bisa: “Mi por pensa pa mi mes.” Nan no ke pa ningun hende influensiá nan manera di pensa. Probablemente, loke nan ke men ta ku nan ta tuma nan mes desishon, i ku nan tin e derecho di hasi esei. Nan no ke pa otro hende bisa nan kiko pa hasi ni fòrsa nan pa ta meskos ku tur otro hende.a

 6. (a) Ki libertat Yehova ta duna nos? (b) E libertat akí ta sin límite?

⁶ Sinembargo, e echo ku nos ta kuminsá pensa meskos ku Yehova no ta nifiká ku nos ta pèrdè nos kapasidat di pensa òf ku nos no por tin nos mes opinion. Na 2 Korintionan 3:17, Beibel ta bisa: “Kaminda e spiritu santu di Yehova ta, ei tin libertat.” Pues, Yehova ta duna nos e libertat di tin nos mes personalidat. Nos por tin nos preferensianan i nos por skohe loke ta interesá nos. Yehova a krea nos asina. Sinembargo, nos libertat tin límite. (Lesa 1 Pedro 2:16.) Ora nos tin ku disidí si algu ta bon òf malu, Yehova ke pa nos laga su pensamentunan, ku tin den su Palabra, guia nos. Akaso esaki ta muchu restriktivo, òf e ta benefisiá nos?

7, 8. Dikon Yehova su norma- i balornan no ta muchu restriktivo? Splika esei.

⁷ Laga nos wak un ehèmpel. Mayornan ta hasi esfuerso pa siña nan yunan bon norma i balor. Kisas nan ta siña nan pa ta onesto, pa traha duru i pa tene konsiderashon ku otro hende. Esaki no ta muchu restriktivo. Mas bien, e mayornan ta prepará nan yunan pa nan por tin éksito den bida. Unabes e muchanan bira grandi i bai for di kas, nan lo ta liber pa tuma nan mes desishon. Si e yunan skohe pa biba segun e norma- i balornan ku nan a siña for di nan mayornan, probablemente nan lo evitá di tuma desishonnan ku despues nan lo lamentá. Komo resultado, nan lo evitá hopi problema i preokupashon.

⁸ Di mes manera, Yehova ke pa su yunan tin e mihó bida posibel. (Isa. 48:17, 18) P’esei, e ta siña nos prinsipionan básiko di kondukta moral i kon nos tin ku trata otro hende. E ta invitá nos pa pensa manera e ta pensa i pa biba segun su norma- i balornan. Esaki no ta muchu restriktivo, mas bien, ora nos pensa meskos ku Yehova, nos lo rasoná na un manera korekto. (Sal. 92:5; Pro. 2:1-5; Isa. 55:9) Asina nos por tuma desishon korekto ku ta hasi nos felis i tòg tin nos mes preferensianan. (Sal. 1:2, 3) Sí, tin hopi benefisio ora nos ta pensa meskos ku Yehova.

9, 10. Kiko ta mustra ku Yehova su manera di pensa ta superior na esun di mundu?

⁹ Un otro motibu pakiko Yehova su sirbidónan ke pensa meskos ku n’e ta pasobra su manera di pensa ta mas superior na esun di e mundu akí. Mundu ta duna konseho tokante kondukta moral, relashon di famia, trabou satisfaktorio i otro aspektonan di bida. Ma hopi di e konsehonan akí no ta kuadra ku Yehova su manera di pensa. Por ehèmpel, hopi biaha mundu ta enkurashá hende pa pensa solamente riba nan mes, i pa mira inmoralidat seksual komo algu normal. E mundu ta asta sugerí parehanan kasá pa separá òf divorsiá sin un bon motibu tanten ku esei ta hasi nan felis. E tipo di konsehonan ei ta kontra loke Beibel ta siña. Pero, akaso e konsehonan ei ta mas práktiko pa nos awe ku e konsehonan di Beibel?

¹⁰ Hesus a bisa: “Sabiduria ta demostrá pa medio di su obranan ku e ta hustu.” (Mat. 11:19) Aunke e mundu akí a hasi hopi progreso riba tereno di teknologia, e no a logra solushoná e problemanan grandi ku ta stroba hende di ta felis, manera guera, rasismo i krímen. Ademas, mundu ta mira inmoralidat seksual komo algu aseptabel. Pero, hopi hende ta atmití ku esaki ta kousa problema den famia, problema di salú i hopi otro konsekuensia. Di otro banda, kristiannan ku ta aseptá Yehova su punto di bista tin un bida di famia felis, nan ta evitá e konsekuensianan di un bida inmoral i nan ta disfrutá di pas ku nan rumannan rònt mundu. (Isa. 2:4; Echo. 10:34, 35; 1 Kor. 6:9-11) Esaki ta mustra klaramente ku Yehova su manera di pensa ta superior na esun di mundu.

11. Ken su manera di pensa a guia Moises, i kiko tabata e resultado?

¹¹ Fiel sirbidónan di Yehova di tempu bíbliko a rekonosé ku Yehova su manera di pensa ta superior. Por ehèmpel, aunke Moises a ser eduká “den tur e sabiduria di e egipsionan,” e tabata sa ku ta serka Yehova so e por a haña “un kurason yen di sabiduria.” (Echo. 7:22; Sal. 90:12) P’esei, el a pidi Yehova: “Laga mi konosé bo kamindanan.” (Éks. 33:13) Debí ku Moises a laga Yehova su manera di pensa gui’é, Yehova a us’é pa kumpli ku Su propósito. Ademas, Yehova a onra Moises ora el a referí na dje den Beibel komo un hòmber di fe ekstraordinario.—Heb. 11:24-27.

12. Riba kiko apòstel Pablo a basa su rasonamentu?

¹² Apòstel Pablo tabata inteligente i bon studiá; e tabata sa tantu hebreo komo griego. (Echo. 5:34; 21:37, 39; 22:2, 3) Sinembargo, ora e mester a disidí si algu ta bon òf malu, el a rechasá e sabiduria di mundu. En bes di esei, el a basa su rasonamentu riba e Skritura. (Lesa Echonan 17:2; 1 Korintionan 2:6, 7, 13.) Komo resultado, Pablo tabatin un sirbishi eksitoso i tabata spera riba un rekompensa ku lo dura pa semper.—2 Tim. 4:8.

13. Ken mester sòru pa nos pensamentu ta meskos ku esun di Yehova?

¹³ Pues, no tin duda, Dios su manera di pensa ta superior na esun di e mundu djawe. Si nos biba na armonia ku Yehova su pensamentunan, nos lo ta realmente felis i eksitoso. Ma Yehova no ta fòrsa nos pa pensa meskos kuné. “E esklabo fiel i prudente” i e ansianonan tampoko no ta hasi esei. (Mat. 24:45; 2 Kor. 1:24) Mas bien, kada kristian tin e responsabilidat di kambia su manera di pensa i lag’é kuadra ku esun di Dios. Kon nos por hasi esei?

14, 15. (a) Kiko nos tin ku hasi pa nos tin e punto di bista di Yehova? (b) Segun Romanonan 12:2, pakiko nos tin ku stòp di kontaminá nos mes ku e pensamentunan di mundu? Duna un ehèmpel.

¹⁴ Na Romanonan 12:2, Beibel ta konsehá nos: “Stòp di laga e mundu akí forma boso, ma transformá boso mes dor di renobá boso mente, pa boso por komprobá pa boso mes kiko ta e boluntat di Dios, ku ta bon, agradabel i perfekto.” Kiko e palabranan inspirá ei ta mustra nos? Wèl, sea loke sea a forma, òf influensiá, nos manera di pensa promé ku nos a siña e bèrdat, ta posibel pa nos kambia nos manera di pensa i lag’é kuadra ku esun di Dios. Ta bèrdat ku sierto faktor genétiko i e eksperensianan di pasado ta influensiá nos manera di pensa te na sierto grado. Pero, nos mente ta fleksibel i e por sigui kambia. E kambionan akí ta dependé prinsipalmente di loke nos ta permití nos mes pensa riba dje. Pues, ora nos ta sigui meditá riba Yehova su manera di pensa, nos lo komprobá pa nos mes ku su punto di bista ta korekto. Esaki lo motivá nos pa pensa meskos ku Yehova.

¹⁵ Pero, pa nos por pensa meskos ku Yehova, nos mester “stòp di laga e mundu akí forma [nos].” Esaki ta enserá ku nos tin ku stòp di wak, lesa i skucha kualke kos ku ta kontra Dios su manera di pensa. Dikon e promé stap akí ta importante? Ban wak un ehèmpel. Un persona ku ke mehorá su salú kisas ta kuminsá kome kuminda saludabel. Pero tur esaki lo ta inútil si e ta sigui kome kuminda ku ta kontaminá, òf putrí. Di mes manera, lo ta inútil si nos ta alimentá nos mes ku Yehova su pensamentunan miéntras nos ta sigui kontaminá nos mente ku e pensamentunan di e mundu akí.

16. Di kiko nos mester protehá nos mes?

¹⁶ Nos no por evitá e mundu su manera di pensa kompletamente pasobra nos no por saka nos mes for di mundu. (1 Kor. 5:9, 10) Asta ora nos ta prediká, nos ta topa hende ku tin idea robes i kreensia falsu. Aunke nos no por evitá kompletamente e pensamentunan di mundu, nos no mester sigui pensa riba nan ni aseptá nan. Meskos ku Hesus, mesora nos mester rechasá e pensamentunan ku Satanas ke inkulká den nos. Es mas, si nos evitá di laga e manera di pensa di mundu influensiá nos innesesariamente, nos lo warda, òf protehá, nos kurason.—Lesa Proverbionan 4:23.

17. Kon nos por evitá di laga e manera di pensa di mundu influensiá nos innesesariamente?

¹⁷ Por ehèmpel, nos mester wak bon ken nos ta skohe komo amigu. Beibel ta spièrta nos pa no anda ku hende ku no ta sirbi Yehova pa nos no kuminsá pensa manera nan. (Pro. 13:20; 1 Kor. 15:12, 32, 33) Ademas, nos mester wak ki entretenimentu nos ta skohe. Nos tin ku rechasá entretenimentu ku ta promové evolushon, violensia òf inmoralidat. Si nos hasi esei, nos ta evitá di kontaminá nos manera di pensa ku idea ku ta “kontra e konosementu di Dios.”—2 Kor. 10:5.

18, 19. (a) Pakiko nos mester protehá nos mes kontra e manera di pensa di mundu asta ora e ta sutil? (b) Ki pregunta nos tin ku hasi nos mes, i dikon?

¹⁸ Nos tin ku ta alerta tambe pa rekonosé i rechasá e manera di pensa di mundu asta ora e ta den forma sutil. Por ehèmpel, kisas nos ta skucha òf wak un notisia ku ta apoyá sierto opinion polítiko òf algun programa ku ta promové meta i logro ku mundu ta atmirá. Tin pelíkula i buki ku ta promové e aktitut di “ami promé” òf “mi famia promé” i ta laga parse ku e ideanan ei ta rasonabel, atraktivo i asta korekto. E punto di bista ei no ta kuadra ku esun di Yehova. Pasobra Beibel ta bisa ku nos i nos famia lo ta realmente felis si nos ta stima Yehova mas ku tur kos. (Mat. 22:36-39) Ademas, aunke algun kuenta pa mucha ta parse ku nan no ta kontené nada malu, kisas, na un manera sutil, nan ta influensiá mente di mucha pa aseptá kondukta inmoral.

¹⁹ Esaki no ta nifiká ku ta malu pa disfrutá di entretenimentu sano. Tòg, ta bon pa nos puntra nos mes: ‘Nos ta rekonosé e pensamentu di mundu asta ora e ta den un forma sutil? Nos ta evitá di wak, lesa i skucha sierto informashon? Nos ta pone e mes limitashonnan pa nos yunan? Nos ta korigí idea robes ku nos yunan ta wak òf skucha i ta yuda nan mira kiko ta e punto di bista di Yehova?’ Sí, ora nos ta rekonosé e diferensia entre Dios su manera di pensa i esun di mundu, nos lo no “laga e mundu akí forma [nos].”

20. Kiko ta determiná ken ta influensiá nos?

²⁰ Kòrda, básikamente tin dos fuente di informashon: Yehova i e mundu bou di kontrol di Satanas. Ken bo ta laga influensiá bo? Esei ta dependé for di ken bo ta haña informashon. Si bo laga mundu influensia bo manera di pensa, lo bo tin e mes punto di bista i kondukta ku e mundu akí tin. P’esei ta importante pa nos paga bon tinu na loke nos ta wak, lesa, skucha i pensa riba dje.

21. Kiko nos lo siña den e siguiente artíkulo?

²¹ Manera a ser menshoná anteriormente, pa nos por pensa meskos ku Yehova, nos mester hasi mas ku djis evitá di kontaminá nos mente ku pensamentu di mundu. Nos mester alimentá nos mes ku Dios su pensamentu pa asina nos por pensa manera e ta pensa. E siguiente artíkulo lo sigui mustra nos kon nos por hasi esei.