Kiko Tabata Permití Riba Sabat?

Riba un otro sabat ku Hesus a bai snoa, probablemente na Galilea, el a topa un hòmber kende su man drechi tabata mankaron. (Lukas 6:6) E eskribanan i e fariseonan tabata opservá Hesus atentamente. Dikon? Nan a revelá kiko tabata nan intenshon ora nan a puntra Hesus: “Tin mag di kura hende riba sabat?”—Mateo 12:10.

E lidernan religioso hudiu tabata kere ku por a kura un hende riba sabat solamente si su bida tabata na peliger. Por ehèmpel, si un hende su wesu a sali for di lugá, no tabatin mag di pon’é bèk na su lugá. Òf si e persona a suek su ènkel, no tabatin mag di verbant e pia. Dikon? Pasobra den niun di e kasonan akí e persona su bida no tabata na peliger. Ta bisto anto ku e eskribanan i e fariseonan ku a hasi Hesus e pregunta no tabata realmente interesá den bienestar di e pober hòmber ku tabata sufriendo. Mas bien, nan tabata purba di haña un preteksto pa kondená Hesus.

Sinembargo, Hesus tabata sa kiko nan tabata pensa. E tabata sa ku nan punto di bista tokante sabat tabata eksagerá i no tabata basá riba e Skritura. (Éksodo 20:8-10) P’esei, pa konfrontá su akusadónan, Hesus a bisa e hòmber ku man mankaron: “Lanta bin para meimei.”—Marko 3:3.

I dirigiendo su mes na e eskribanan i e fariseonan, Hesus a puntra: ‘Kua di boso ku tin ún karné i e karné ei kai den un buraku riba sabat lo no gar’é i sak’é?’ (Mateo 12:11) Un karné tabata un invershon finansiero, pues nan lo no a lag’é den e buraku te su manisé pasobra lo e por a muri i nan lo a sufri pèrdida. Ademas, e Skritura ta bisa: “Un hende hustu ta kuida bida di su bestia.”—Proverbionan 12:10.

P’esei, Hesus a rasoná ku nan i bisa: “Un hende no ta bal mas ku un karné? Pues, tin mag di hasi un bon obra riba sabat.” (Mateo 12:12) Pues, Hesus no a kibra e lei di sabat ora el a kura e hòmber. E rasonamentu di Hesus tabata lógiko i a reflehá kompashon. P’esei, e lidernan religioso no por a bisa nada.

Disgustá pero tambe ku duele pa motibu di nan manera robes di pensa, Hesus a bira wak tur esnan ku tabata rònt di dje. Despues, el a bisa e hòmber: “Rèk bo man.” (Mateo 12:13) E hòmber a rèk su man i su man a kura. E hòmber a keda masha kontentu. Pero kon e hendenan ku kier a kue Hesus den trampa a reakshoná?

En bes di keda kontentu ku e hòmber su man a kura, nan a sali bai i a traha plan ‘ku e partidarionan di Heródes pa mata Hesus.’ (Marko 3:6) Ta parse ku entre e partidarionan akí tabatin miembro di e grupo religioso saduseo tambe. Normalmente, e saduseonan i e fariseonan tabata den konflikto ku otro. Pero awor, nan a sera kabes pa bai kontra di Hesus.