Hesus A Kura Dos Hòmber Siegu i A Yuda Zakeo

Hesus i e hendenan ku tabata biaha huntu kuné a yega Yériko; e biahe for di Yériko pa Herúsalèm lo a dura un dia. Aparentemente, Yériko tabata konsistí di dos stat: un stat nobo romano i e stat bieu ku tabata keda mas o ménos 1,6 kilometer for di e nobo. Awor, despues ku Hesus i e multitut a sali for di un di e statnan akí i tabata yegando e otro, dos limosnero siegu a tende e zonido di e gran kantidat di hende. Un di e limosneronan akí tabata yama Bartimeo.

Ora Bartimeo i su kompañero a tende ku ta Hesus tabata pasando, nan a kuminsá grita: “Señor, Yu di David, tene miserikòrdia di nos!” (Mateo 20:30) Algun di e hendenan den e multitut a manda nan keda ketu na mal òrdu. Pero nan a kuminsá grita mas duru. Ora Hesus a tende e gritamentu, el a para i a pidi e hendenan ku tabata huntu kuné pa yama e personanan ku tabata grita. Nan a bai serka e limosneronan i a bisa un di nan: “Ánimo! Lanta ariba! E ta yama bo.” (Marko 10:49) Emoshoná, e hòmber a benta su mantel un banda, bula lanta i bai serka Hesus.

Hesus a puntra nan: “Kiko boso ke pa mi hasi pa boso?” Tur e dos hòmbernan a roga Hesus: “Señor, duna nos nos bista.” (Mateo 20:32, 33) Hesus, kende a sinti duele di nan, a mishi ku nan wowo i a bisa un di nan: “Bai numa. Bo fe a kura bo.” (Marko 10:52) E dos hòmbernan a haña nan bista, i siguramente nan a kuminsá duna gloria na Dios. I e multitut ku a mira loke a pasa tambe a duna gloria na Dios. E hòmbernan, ku ántes tabata siegu, a kuminsá sigui Hesus.

Pues, tabatin un multitut grandi di hende huntu ku Hesus ora e tabata pasando via Yériko pa bai Herúsalèm. Tur hende tabata ke mira ta ken a kura e hòmbernan siegu. Nan tabata pèrta riba otro pa mira Hesus, ma algun di nan no por a mir’é. Esei tabata e kaso ku Zakeo. Zakeo tabata hefe di e kobradónan di belasting na Yériko i bisindario. Komo ku e tabata un hòmber chikitu, e no por a mira loke tabata pasando. P’esei, el a kore bai dilanti i a subi un palu di figu shimaron ku tabata riba e ruta kaminda Hesus lo a pasa. For di einan sí Zakeo por a mira tur kos. Ora Hesus tabata yegando kaminda e palu tabata, el a mira Zakeo i a bis’é: “Zakeo, baha abou lihé, pasobra awe mi mester keda na bo kas.” (Lukas 19:5) Zakeo a baha for di e palu i a kore bai kas pa e risibí su huéspet di onor.

Ora e hendenan a mira kiko tabata pasando, nan a kuminsá murmurá. Pa nan, Zakeo tabata un pekadó i Hesus no mester a bai bishit’é. Zakeo a bira riku na un manera desonesto: E tabata estafá e hendenan ku e tabata kobra belasting.

Ora Hesus a drenta kas di Zakeo, e hendenan tabata keha i bisa: “El a bai keda na kas di un hòmber pekadó.” Pero Hesus a mira ku Zakeo lo por a arepentí. I Hesus no a keda desapuntá. Zakeo a lanta para i a bis’é: “Wak, Señor, mitar di mi pertenensianan mi ta bai duna hende pober, i tur loke mi a ranka for di hende bou di akusashon falsu, mi ta bai paga nan kuater biaha mas tantu bèk.”—Lukas 19:7, 8.

Esei sigur tabata un manera ekselente ku Zakeo a demostrá ku di bèrdat el a arepentí! Muy probablemente el a usa su registronan di belasting pa kalkulá eksaktamente kuantu sèn el a risibí di diferente hudiu, i el a primintí ku lo el a paga nan bèk kuater biaha mas tantu. Esei tabata mas di loke e Lei di Dios a rekerí. (Éksodo 22:1; Levítiko 6:2-5) Zakeo a asta primintí ku lo el a duna mitar di su pertenensianan na hende pober.

Hesus a keda kontentu ku e manera ku Zakeo a demostrá ku el a arepentí. El a bisa Zakeo: “Awe salbashon a yega na e kas akí, pasobra bo tambe ta un yu di Abraham. De echo, e Yu di hende a bini pa buska i salba esnan ku ta pèrdí.”—Lukas 19:9, 10.

Un poko tempu promé, Hesus a konta e ilustrashon tokante e yu pèrdí pa dirigí atenshon na e situashon di hende ku bandoná Yehova. (Lukas 15:11-24) Pero awor, el a usa Zakeo komo un ehèmpel bibu pa ilustrá kon un persona ku tabata pèrdí a ser hañá atrobe. Kisas, e lidernan religioso i nan kompinchinan a reklamá i kritiká Hesus debí ku e tabata mustra interes den personanan manera Zakeo. Ma Hesus a sigui buska i trese e yunan pèrdí di Abraham kas bèk.