Liberacion pa Drenta den un Hustu Mundu Nobo
“Berdaderamente nan lo haña nan deleite exkisito den e abundancia di pas.”—SALMO 37:11.
1, 2. (a) Con Jehova su liberacion den nos tempu lo diferenciá for dje liberacionnan den antigwedad? (b) Den ki clase di mundu Jehova lo trece su pueblo?
JEHOVA ta un Dios di liberacion. Den antigwedad, el a libra su pueblo na hopi ocasion. E liberacionnan ei tabata temporal, pasobra den ningun dje casonan ei Jehova a ehecutá su huicionan permanentemente contra henter e mundu di Satanas. Pero den nos tempu, pronto Jehova lo realisá e liberacion di mas grandi pa tur su sirbidornan. E biaha aki lo e destruí tur rastro dje sistema di Satanas rond mundu, i lo e trece su sirbidornan den un mundu nobo permanente i hustu.—2 Pedro 2:9; 3:10-13.
2 Jehova ta primintí: “Solamente un poco tempu mas, i e malbado lo no t’ei mas . . . Pero e mansunan mes lo poseé e tera, i berdaderamente nan lo haña nan deleite exkisito den e abundancia di pas.” (Salmo 37:10, 11) Pa cuantu tempu? “E hustunan mes lo poseé e tera, i nan lo biba pa semper riba dje.” (Salmo 37:29; Mateo 5:5) Sin embargo, promé cu esei sosodé, e mundu aki lo experenciá e tempu di mas difícil cu el a yega di conocé.
E “Tribulacion Grandi”
3. Con Jesus a describí e “tribulacion grandi”?
3 Na 1914 e mundu aki a drenta su “último dianan.” (2 Timoteo 3:1-5, 13) Awor aki nos tin 83 aña den e periodo ei i ta acercando su fin ora, manera Jesus a predicí, lo siguiente lo tuma lugá: “Lo tin un tribulacion grandi tal como no a sosodé desde principio di mundu te awor, no, ni lo no sosodé atrobe.” (Mateo 24:21) Sí, pió cu asta Guera Mundial II, ora rond di 50 miyon hende a perde nan bida. Ki un tempu cu lo sagudí mundu ta acercando rápidamente!
4. Pakico Dios su huicio ta bini riba “Babilonia e Grandi”?
4 E “tribulacion grandi” lo bini asombrosamente di ripiente, “den un solo ora.” (Revelacion 18:10) Lo e cuminsá cu Dios su huicio ehecutá riba tur religion falsu, cu e Palabra di Dios ta yama “Babilonia e Grandi.” (Revelacion 17:1-6, 15) E rasgo predominante di Babilonia di antigwedad tabata religion falsu. Babilonia moderno ta mescos cu su paralelo antiguo i ta representá e imperio mundial di religion falsu. El a hunga e papel di muher di mala bida dor di comprometé cu elementonan político. El a apoyá nan gueranan i a bendicioná ehércitonan na ámbos banda, cu e resultado cu hende dje mésun religion a mata otro. (Mateo 26:51, 52; 1 Juan 4:20, 21) El a ignorá e prácticanan corupto di su apoyadornan i a persiguí cristiannan berdadero.—Revelacion 18:5, 24.
5. Con e “tribulacion grandi” ta cuminsá?
5 E “tribulacion grandi” ta cuminsá ora e elementonan político atacá “Babilonia e Grandi” di ripiente. Nan “lo odia e muher di mala bida i lo hacié desolá i sunú, i lo come su partinan carnal i lo kim’é completamente cu candela.” (Revelacion 17:16) Despues di esei, su ex-apoyadornan “lo yora i bati nan mes den desconsuelo riba dje.” (Revelacion 18:9-19) Pero Jehova su sirbidornan a spera esaki pa hopi tempu, i nan lo sclama: “Alabá Jah, . . . pasobra el a ehecutá huicio riba e gran muher di mala bida cu a corumpí e tera cu su fornicacion, i el a venga e sanger di su esclabonan na su man.”—Revelacion 19:1, 2.
Dios Su Sirbidornan Ta Ser Atacá
6, 7. Pakico Jehova su sirbidornan por tin confiansa ora nan ser atacá durante e “tribulacion grandi”?
6 Despues cu nan caba di destruí religion falsu, e elementonan político lo atacá Jehova su sirbidornan. Satanas, “Gog dje tera di Magog” den profecia, ta bisa: “Lo mi bini riba esnan cu ta sin disturbio, cu ta biba den siguridad.” Pensando cu nan ta víctima fácil, e ta atacá nan cu “un forsa militar numeroso . . . , manera nubia pa cubri e tera.” (Ezekiel 38:2, 10-16) Jehova su pueblo sa cu e atake aki lo fracasá pasobra nan ta confia den Jehova.
7 Ora Fárao i su ehército a sinti cu nan a atrapá e sirbidornan di Dios na Laman Corá, Jehova milagrosamente a libra su pueblo i a destruí e ehército di Egipto. (Exodo 14:26-28) Durante e “tribulacion grandi,” ora e nacionnan kere cu nan a atrapá Jehova su pueblo, atrobe e ta bini milagrosamente pa rescatá nan: “Den e dia ei . . . mi furia lo subi den mi nanishi. I den mi ardor, den e candela di mi furor, lo mi tin cu papia.” (Ezekiel 38:18, 19) E culminacion dje “tribulacion grandi” lo ta inminente e ora ei!
8. Ki sucesonan sobrenatural ta tuma lugá promé cu Jehova ehecutá e malbadonan, i cu ki resultado?
8 Na un dado momento despues cu e “tribulacion grandi” cuminsá, pero promé cu Jehova ehecutá su huicio riba e resto dje mundu aki, sucesonan sobrenatural lo tuma lugá. Nota e efecto cu nan lo tin. “E ora ei e señal dje Yu di hende [Cristo] lo aparecé den shelu, i e ora ei tur e tribunan dje tera lo bati nan mes den lamentacion, i nan lo mira e Yu di hende biniendo riba nubia di shelu cu poder i gran gloria.” (Mateo 24:29, 30) “Lo tin señalnan den solo i luna i streanan, . . . miéntras cu hende ta desmayá di miedu i expectativa dje cosnan cu ta bini riba e tera habitá.”—Lucas 21:25, 26.
“Boso Liberacion Ta Yegando Cerca”
9. Pakico Jehova su sirbidornan por ‘hisa nan cabes’ ora sucesonan sobrenatural tuma lugá?
9 Precisamente n’e tempu ei, e profecia di Lucas 21:28 ta haña su cumplimentu. Jesus a bisa: “Ora e cosnan aki cuminsá sosodé, lanta stret boso mes i hisa boso cabes, pasobra boso liberacion ta yegando cerca.” E enemigunan di Dios lo ta temblando di miedu pasobra nan lo sa cu e sucesonan sobrenatural cu ta tuma lugá ta bini di Jehova. Pero Jehova su sirbidornan lo alegrá pasobra nan lo sa cu nan liberacion ta yegando cerca.
10. Con e Palabra di Dios ta describí e culminacion dje “tribulacion grandi”?
10 E ora ei Jehova ta dal e sistema di Satanas e golpi mortal: “Lo mi trece mi mes den huicio cu [Gog], cu pest i cu sanger; i un awaceru inundante i hagel, candela i swafel lo mi haci yobe riba dje i riba su partidonan . . . I nan lo tin cu sa cu ami ta Jehova.” (Ezekiel 38:22, 23) Tur rastro dje sistema di Satanas lo ser destruí. Henter e sociedad humano di hende cu ta ignorá Dios ta ser eliminá. Esei ta e culminacion dje “tribulacion grandi” na Armagedon.—Jeremías 25:31-33; 2 Tesalonicensenan 1:6-8; Revelacion 16:14, 16; 19:11-21.
11. Pakico sirbidornan di Jehova ta ser protehá atrabes dje “tribulacion grandi”?
11 E miyones di adoradornan di Jehova rond mundu lo ser protehá atrabes dje “tribulacion grandi.” Esakinan ta forma e “multitud grandi” cu a sali “for di tur nacion i tribu i pueblo i lenga.” Pakico nan ta ser librá den un manera asina impresionante? Pasobra nan ta rindi “sirbishi sagrado na [Jehova] di dia i anochi.” Pues nan ta sobrebibí e fin dje mundu aki i ta ser introducí den un hustu mundu nobo. (Revelacion 7:9-15) Asina, nan ta testigo dje cumplimentu di Jehova su promesa: “Spera den Jehova i warda su caminda, i lo e halsá bo pa tuma posesion dje tera. Ora e malbadonan ta ser cortá, lo bo mir’é.”—Salmo 37:34.
E Mundu Nobo
12. Kico sobrebibientenan di Armagedon por spera cu anhelo?
12 Ki un tempu emocionante esei lo ta—e eliminacion di maldad i e cuminsamentu dje era di mas glorioso den henter historia humano! (Revelacion 20:1-4) Ki gradicidu na Jehova sobrebibientenan di Armagedon lo ta pa a drenta un civilisacion limpi i briyante cu Dios a producí, un mundu nobo, riba un tera cu lo ser transformá den un paradijs! (Lucas 23:43) I nan lo no tin nodi muri nunca mas! (Juan 11:26) En berdad, for dje punto ei padilanti, nan lo tin e prospecto maraviyoso i asombroso di biba mes largu cu Jehova ta biba!
13. Con Jesus ta reanudá e trabou di curacion cu el a cuminsá riba tera?
13 Jesus, kende Jehova a nombra como Rey celestial, lo supervisá e bendicionnan maraviyoso cu esnan librá lo disfrutá di dje. Ora Jesus tabata riba tera, el a habri wowo ciegu i orea surdu i a cura “tur sorto di malesa i tur sorto di enfermedad.” (Mateo 9:35; 15:30, 31) Den e mundu nobo, lo e reanudá e gran trabou di curacion ei riba un escala mundial. Como Agente di Dios, lo e cumpli cu e promesa: “[Dios] lo . . . seca tur lágrima di nan wowo, i morto lo no t’ei mas, ni lo tin mas lamento ni sclamacion ni dolor. E cosnan anterior a pasa bai.” (Revelacion 21:4) Nunca mas lo tin mester di dokter of agencianan funerario!—Isaías 25:8; 33:24.
14. Ki liberacion lo bini pa Jehova su sirbidornan cu a muri caba?
14 Librá tambe lo ta tur e fiel sirbidornan di Dios cu a muri den pasado. Den e mundu nobo, nan lo ser rescatá for dje garanan di graf. Jehova ta garantisá: “Lo bai tin un resureccion di tantu e hustunan como e inhustunan.” (Echonan 24:15) Probablemente, e “hustunan” lo ser resucitá mas promé i lo contribuí n’e Paradijs den expansion. Ki fasinante lo ta pa sobrebibientenan di Armagedon tende e experencianan di e mortonan fiel ei di hopi tempu pasá, awor resucitá na bida!—Juan 5:28, 29.
15. Describí algun dje condicionnan cu lo tin den e mundu nobo.
15 Tur esnan cu ta na bida e tempu ei lo experenciá loke e salmista a bisa di Jehova: “Bo ta habriendo bo man i ta satisfaciendo e deseo di tur cos bibiente.” (Salmo 145:16) Lo no tin hamber mas: E tera lo ser restorá na un balansa ecológico i lo producí na abundancia. (Salmo 72:16) Lo no tin hende desampará mas: “Nan siguramente lo construí casnan i ocupá nan,” i cada un lo sinta “bou di su mata di wijndruif i bou di su palu di figu, i lo no tin ningun hende cu ta haci nan tembla.” (Isaías 65:21, 22; Mikéas 4:4) Lo no tin miedu mas: Lo no tin guera, ni violencia ni crímen. (Salmo 46:8, 9; Proverbionan 2:22) “Henter e tera a drenta den descanso, a bira liber di disturbio. Hende a bira alegre cu gritunan gososo.”—Isaías 14:7.
16. Pakico lo tin husticia na tur parti den e mundu nobo?
16 Den e mundu nobo, Satanas su medio di propagá su ideanan lo a ser eliminá. Na lugá di esei, “husticia ta loke e habitantenan dje tera productivo siguramente lo siña.” (Isaías 26:9; 54:13) Cu instruccion spiritual saludabel aña tras aña, “e tera siguramente lo ta yená cu e conocimentu di Jehova mescos cu e awanan ta cubri laman mes.” (Isaías 11:9) Tur hende lo tin pensamentu i accionnan edificante. (Filipensenan 4:8) Imaginá bo, un sociedad mundial di hende liber di crímen, egotismo, yaluzí—un hermandad internacional unda tur hende ta producí e fruta dje spiritu di Dios. En berdad, asta awor cualidadnan asina ta ser cultivá dor dje multitud grandi.—Galationan 5:22, 23.
Pakico Jehova A Warda Asina Tantu?
17. Pakico Jehova a warda asina tantu pa pone fin na maldad?
17 Sin embargo, pakico Jehova a warda asina tantu pa eliminá maldad i libra su pueblo pa drenta den e mundu nobo? Considerá loke mester a ser lográ. Di mayor importancia ta e vindicacion di Jehova su soberania, su derecho pa goberná. Dor di laga suficiente tempu pasa, el a demostrá fuera di tur duda cu mando humano ignorando su soberania a resultá di ta un fracaso colosal. (Jeremías 10:23) Pues awor Jehova ta completamente hustificá pa reemplasá mando humano cu e mando di su Reino celestial bou di Cristo.—Daniel 2:44; Mateo 6:9, 10.
18. Na ki tempu e desendientenan di Abraham a heredá e tera di Canan?
18 Loke a tuma lugá durante tur e siglonan aki ta similar cu loke a sosodé den tempu di Abraham. Jehova a bisa Abraham cu su desendientenan lo heredá e tera di Canan—pero nan tabatin cu spera cuatershen aña “pasobra e eror dje amoreonan no a ser completá ainda.” (Génesis 12:1-5; 15:13-16) Aki e término “amoreonan” (un tribu dominante) probablemente ta representá e pueblonan di Canan den nan totalidad. Pues aproximadamente cuater siglo lo a pasa promé cu Jehova lo a permití su pueblo tuma posesion di Canan. Miéntras tantu Jehova a laga e nacionnan na Canan desaroyá nan sociedadnan. Cu ki resultado?
19, 20. Ki sorto di sociedadnan e cananeonan a desaroyá?
19 Bible Handbook, di Henry H. Halley, ta mencioná cu na Megido, arkeólogonan a haña e ruinanan di un tempel di Astoret, e diosa-esposa di Baal. E ta skirbi: “Djis un par di stap for dje tempel aki tabatin un santana, unda hopi poron a ser hañá, conteniendo e restonan di muchanan chikitu cu a ser sacrificá den e tempel aki . . . Profetanan di Baal i Astoret tabata asesinonan oficial di mucha chikitu.” “Un otro custumber horibel tabata [loke] nan a yama ‘sacrificionan di fundeshi.’ Ora nan mester a traha un cas, nan a sacrificá un mucha, i forma su curpa den e muraya.”
20 Halley ta comentá: “E adoracion di Baal, Astoret i otro diosnan cananeo tabata consistí dje orgianan di mas extravagante; nan tempelnan tabata centronan di bicio. . . . Cananeonan tabata adorá, dor di satisfacé nan deseonan inmoral, . . . i despues, dor di mata nan yunan primogénito, como un sacrificio na e mésun diosnan aki. Ta parce cu, na un gran grado, e tera di Canan a bira un sorto di Sódoma i Gomora riba un escala nacional. . . . Un civilisacion di un sushedad abominabel i brutalidad asina tabatin derecho di sigui existí? . . . Arkeólogonan cu ta coba den e ruinanan di stadnan cananeo ta haña straño di con Dios no a destruí nan mas promé.”—Compará cu 1 Reynan 21:25, 26.
21. Ki similaridad tin entre e situacion dje cananeonan i esun di nos tempu?
21 E maldad dje amoreonan a “ser completá.” Pues Jehova tabata completamente hustificá awor pa exterminá nan. Mescos ta cierto awe. E mundu aki ta yená cu violencia, inmoralidad i desprecio p’e leynan di Dios. I siendo cu ta cu bon motibu nos ta hororisá p’e sacrificionan repugnante di mucha den Canan di antigwedad, kico dje sacrificio di dies di miyones di hende yong den e gueranan dje mundu aki, hopi mas pió cu cualkier cos den Canan? Siguramente, Jehova ta completamente hustificá awor pa trece un fin n’e mundu malbado aki.
Logrando Algu Mas
22. Kico ta ser lográ dor dje pacenshi di Jehova den nos tempu?
22 Jehova su pacenshi den e último dianan aki ta logrando algu mas. E ta permitiendo tempu pa recogé i educá e multitud grandi, ya caba alcansando mas cu cincu miyon. Bou dje direccion di Jehova, nan a ser formá den un organisacion progresivo. Homber, muher i hóbennan ta ser entrená pa siña otronan berdadnan bíblico. Mediante nan reunionnan i publicacionnan bíblico, nan ta siña e camindanan amoroso di Dios. (Juan 13:34, 35; Colosensenan 3:14; Hebreonan 10:24, 25) Ademas, nan ta desaroyando abilidadnan den construccion, electrónica, imprenta i otro camponan pa apoyá e predicacion dje “bon nobo.” (Mateo 24:14) Probablemente tal abilidadnan di siña i di construí lo ser usá ampliamente den e mundu nobo.
23. Pakico ta un privilegio pa ta na bida den e tempu aki?
23 Sí, awe Jehova ta preparando su sirbidornan pa pasa dor dje “tribulacion grandi” pa drenta den un hustu mundu nobo. E ora ei lo no tin Satanas ni su mundu malbado pa lucha cuné, lo no tin enfermedad, tristesa ni morto. Cu gran entusiasmo i goso, e pueblo di Dios lo dal bai cu e tarea felis di edificá un paradijs, unda tur dia lo ta un “deleite exkisito.” Ta ki un privilegio pa experenciá e culminacion aki dje épocanan, pa conocé i sirbi Jehova, i pa realisá cu masha pronto nos lo ‘hisa nos cabes pasobra nos liberacion ta yegando cerca’!—Lucas 21:28; Salmo 146:5.
Preguntanan di Repaso
◻ Kico ta e “tribulacion grandi,” i con e ta cuminsá?
◻ Pakico e atake di Gog riba Jehova su sirbidornan lo fracasá?
◻ Con e “tribulacion grandi” lo caba?
◻ Ki beneficionan maraviyoso e mundu nobo lo percurá?
◻ Pakico Jehova a warda asina tantu promé cu e trece un fin n’e sistema aki?
[Plachi na página 16]
Henter e tera lo ser transformá den un paradijs