BO TABATA SA?

Hende tabata usa mulina di man pa mula grano pa haña hariña i despues traha pan kuné. Mulamentu di grano tabata parti di e rutina diario di kriá òf ama di kas den kasi tur famia. P’esei e zonido di mulina di man tabata algu komun den e bida di tur dia den tempu bíbliko.—Éksodo 11:5; Yeremías 25:10.

Vários artefakto di Egipto di antigwedat ta mustra kon e trabou akí tabata tuma lugá. E mulina di man tabata parse un sia. E tabata konsistí di dos piedra: esun djabou, ku tabata un poko hòl i ta subi un tiki parti patras, i esun djariba, ku tabata mas chikitu. E trahadó tabata hinka rudia tras di e mulina i tene e piedra mas chikitu ku tur dos man. Kaba e tabata pusha e piedra akí bai-bin riba e piedra mas grandi pa e mula e grano. Segun un referensia, e piedra djariba tabata pisa entre dos pa kuater kilo. Si un hende a dal un otro ku e piedra akí, lo e por a kousa su morto.—Huesnan 9:50-54.

Mulamentu di grano tabata asina importante pa bienestar di un famia ku tabatin un lei den Beibel ku a prohibí hende di tuma un mulina di man komo garantia pa un fiansa. Deuteronomio 24:6 ta bisa: “Ningun hende no mag tuma un mulina di man òf e piedra di mulina di mas ariba komo garantia, pasobra ta un bida e ta tuma komo garantia.”

Beibel ta bisa ku Hesus ta “sintá banda di e Tata.” (Huan 1:18) E ekspreshon akí ta referí na un puesto di fabor spesial ku Hesus tin serka Dios. E palabranan akí ta referí tambe na e kustumber ku e hudiunan tabatin ora di kome huntu.

Den tempu di Hesus, e hudiunan tabata lèn riba un sofá rònt di un mesa di komedor. Kada hende tabata lèn riba nan èlebog na man robes riba un kusinchi, ku nan kabes den direkshon di e mesa di tal manera ku nan man drechi tabata keda liber. Segun un referensia, ya ku tur hende rònt di e mesa tabata lèn banda di otro riba nan banda robes, “e kabes di un persona tabata serka di e pechu di esun ku tabata di lèn tras di dje,” lokual a indiká ku nan tabata será ku otro.

Tabata un onor òf privilegio mas grandi ainda pa sinta banda di e kabes di famia òf e anfitrion di un bankete. Na e último Pasku Hudiu ku Hesus a selebrá ku su disipelnan, ta e disipel ku “Hesus tabata stima,” esta apòstel Huan, tabata sintá banda di Hesus. Pues, Huan ta esun ku por a lèn yega te mas serka di Hesus pa hasié un pregunta.​—⁠Huan 13:​23-25; 21:20.