Kon Nos Por Haña Berdadero Libertat?

1, 2. (a) Kiko hende ta hasiendo pa haña libertat? (b) Kiko ta e resultado di nan lucha?

AWENDIA, hende na hopi parti di mundu ta papia di igualdat i libertat. Algun di nan ta lucha pa un bida liber di opreshon, diskriminashon i pobresa. I otronan ta eksigí libertat di ekspreshon i di eskoho, i nan mes ke disidí kon pa hiba nan bida. Sí, rònt mundu hende ke tin libertat.

² Pero, pa kumpli ku e deseonan akí ta un otro asuntu. Pa hende por haña libertat, nan ta organisá manifestashon, wèlga i asta revolushon. Pero e akshonnan akí ta yuda nan haña e libertat ku nan ta deseá? Nò, al kontrario, hopi biaha esakinan ta hiba na tragedia i morto. Tur esakinan ta duna prueba un biaha mas ku loke Rei Sálomon a bisa bou di inspirashon ta bèrdat. El a bisa: “Hende a ehersé outoridat riba un otro hende pa su daño.”—Ekl. 8:9.

 3. Kiko nos mester hasi pa haña berdadero felisidat i satisfakshon?

³ Disipel Santiago a splika kiko nos mester hasi pa nos haña berdadero felisidat i libertat. El a skirbi: ‘Esun ku ta wak kuidadosamente den e lei perfekto ku ta trese libertat, i ta persistí den hasi esei, lo ta felis hasiendo esei.’ (Sant. 1:25) Yehova, kende a duna e lei perfekto ei, sa mihó kiko hende mester hasi pa nan por haña berdadero felisidat i satisfakshon. El a duna e promé pareha tur loke nan tabatin mester pa nan por tabata felis, inkluso berdadero libertat.

 4. Ki tipo di libertat Adam ku Eva tabatin? (Wak e promé plachi.)

⁴ E promé dos kapítulonan di Génesis ta mustra bon kla ku den Paradeis no tabatin pobresa, miedu ni opreshon. Adam ku Eva tabatin e tipo di libertat ku ta parse imposibel pa nos logra den e mundu djawe. Nan no mester a preokupá ku kuminda, trabou, malesa ni morto. (Gén. 1:27-29; 2:8, 9, 15) Esei ta nifiká ku Adam ku Eva tabatin libertat apsoluto, òf sin límite? Laga nos ban wak.

 5. Apesar di loke hopi hende ta pensa, kiko ta nesesario pa hende por tin libertat?

⁵ Awe hopi hende ta pensa ku berdadero libertat ta nifiká ku nan por hasi kiko ku nan ke sin importá e konsekuensianan. Segun The World Book Encyclopedia, “libertat ta e kapasidat pa tuma desishon i kumpli ku nan.” Sinembargo, e ta agregá: “Legalmente, hende ta liber si sosiedat no ta imponé límitenan inhustu, innesesario òf irasonabel riba nan.” Esaki ta nifiká ku den práktika, sierto límitenan ta nesesario pa tur hende den un sosiedat por tin libertat. P’esei, e pregunta ta: Ken tin e derecho pa determiná ki límitenan ta hustu, nesesario i rasonabel?

 6. (a) Dikon ta Yehova so tin libertat apsoluto? (b) Ki tipo di libertat hende por tin, i dikon?

⁶ Algu importante ku nos mester tene na mente ta: Yehova Dios so tin libertat apsoluto, òf sin límite. Dikon? Pasobra ta é ta Kreador di tur kos i e Soberano todopoderoso di universo. (1 Tim. 1:17; Rev. 4:11) Kòrda e palabranan bunita ku Rei David a usa ora el a deskribí e posishon úniko i elevá ku Yehova so tin. (Lesa 1 Krónikanan 29:11, 12.) En kambio, e libertat ku tur kriatura den shelu i riba tera tin ta algu relativo i no apsoluto. Yehova Dios ke pa nos komprondé ku ta é so tin e derecho di disidí ki límitenan ta hustu, nesesario i rasonabel. De echo, ta for di prinsipio Yehova a pone límite pa su kreashon.

 7. Kiko ta algun kos ku hende ta hasi di naturalesa ku ta hasi nos felis?

⁷ Aunke na prinsipio Adam ku Eva tabata disfrutá di libertat den diferente manera, nan libertat tabatin límite. Algun di e límitenan akí tabata di naturalesa, pero nan ta keda límite. Por ehèmpel, pa Adam ku Eva por a keda na bida, nan mester a hala rosea, kome i drumi. E kosnan akí a kita nan libertat? Nò, pasobra Yehova a hasi sigur ku asta ora nan tabata hasi e kosnan akí nan por haña goso i satisfakshon. (Sal. 104:14, 15; Ekl. 3:12, 13) Ken no ta gusta inhalá aire fresku, kome nan kuminda faborito òf drumi dushi? E kosnan nesesario akí no ta un karga ni peso pa nos; mas bien, nos ta disfrutá di nan. Sin duda, Adam ku Eva a sinti meskos.

 8. Ki mandamentu spesífiko Yehova a duna Adam ku Eva, i ku ki propósito?

⁸ Yehova a duna Adam ku Eva un mandamentu spesífiko. El a bisa nan pa yena Tera i kuid’é. (Gén. 1:28) E mandamentu akí a kita nan libertat? Klaru ku nò. Mas bien, el a duna nan e oportunidat di hasi e Tera un paradeis kaminda nan i nan yunan perfekto lo por a biba pa semper. Esei tabata Dios su propósito. (Isa. 45:18) Awe, Yehova no ta eksigí pa hende kasa ni haña yu. Ma mayoria di hende ta skohe pa kasa i haña yu aunke nan sa ku esaki por trese algun difikultat kuné. (1 Kor. 7:36-38) Dikon? Pasobra bou di sirkunstansia normal, e desishonnan akí ta hiba na felisidat i satisfakshon. (Sal. 127:3) Si Adam ku Eva lo a obedesé Yehova, nan lo por tabatin un bida di famia felis pa semper.

 9. Dikon e mandamentu di Dios na Génesis 2:17 no ta inhustu, innesesario òf irasonabel?

⁹ Yehova a duna Adam ku Eva un otro mandamentu i a indiká bon kla kiko lo tabata e kastigu si nan a desobedesé. El a bisa: “Di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Gén. 2: 17) E mandamentu akí tabata inhustu, innesesario òf irasonabel? El a kita Adam ku Eva su libertat? Di ningun manera! De echo, algun eksperto riba tereno di Beibel a bisa ku e mandamentu ei tin sentido i ta lógiko. Por ehèmpel, un eksperto a bisa: “E konklushon ku nos por saka for di Dios su mandamentu na [Génesis 2:16 i 17] ta ku Dios so sa kiko ta bon . . . pa hende i kiko no ta bon . . . pa nan. Pa disfrutá di loke ta ‘bon,’ hende mester konfia Dios i obedes’é. Si nan desobedesé, nan mester disidí riba nan mes kiko ta bon . .  i kiko no ta bon.” Esei ta algu ku hende no por hasi riba nan mes.

10. Dikon nos no mester konfundí boluntat liber ku e derecho di disidí loke ta bon i loke ta malu?

¹⁰ Awendia hopi hende ta bisa ku e mandamentu ku Dios a duna Adam a kita su libertat pa e hasi loke e ke. Hende ku ta bisa asina ta konfundí boluntat liber ku e derecho di disidí loke ta bon i loke ta malu. Adam ku Eva tabata liber pa skohe si nan tabata ke obedesé Dios òf nò. Sinembargo, ta Yehova so tin e derecho apsoluto di disidí loke ta bon i loke ta malu, manera e “palu di konosementu di bon i malu” den hòfi di Edén a simbolisá. (Gén. 2:9) Nos mester atmití ku no ta semper nos sa kiko lo ta e resultado di nos desishonnan ni ku nan lo benefisiá nos. P’esei, hopi bes desishonnan ku hende ta tuma ku bon intenshon ta resultá den sufrimentu, desaster òf tragedia. (Pro. 14:12) Sí, hende ta limitá den loke nan por hasi. Ora Yehova a duna Adam ku Eva e mandato pa no kome for di e palu, Yehova tabata siña nan ku nan mester a obedes’é pa nan por tabatin berdadero libertat. Kon Adam ku Eva a reakshoná?

11, 12. Dikon Adam ku Eva su desishon a hiba na desaster? Ilustrá esei.

¹¹ Manera nos sa, nos promé mayornan a skohe pa desobedesé. Eva no por a resistí e tentashon ora ku Satanas a primintié: “Boso wowo lo habri i boso lo ta manera Dios, konosiendo bon i malu.” (Gén. 3:5) Adam ku Eva a haña mas libertat manera Satanas a primintí nan? Nò. De echo, no a dura mashá ku nan a komprondé ku debí ku nan a desobedesé e guia di Yehova, esaki a hiba na desaster. (Gén. 3:16-19) Dikon? Simplemente pasobra Yehova no a duna hende e libertat pa disidí pa nan mes loke ta bon i loke ta malu.—Lesa Proverbionan 20:24; Yeremías 10:23.

¹² Den e kaso akí, nos por kompará hende ku un piloto ku ta bula un avion. Pa e piloto yega su destinashon sano i salvo, generalmente e tin ku sigui un ruta ku a ser aprobá di antemano. Ademas, e ta usa e instrumentonan moderno di nabegashon den e avion pa e por keda den kontakto ku e kontroladónan di tráfiko aéreo. Sinembargo, si e piloto skohe pa no sigui e guia ei i sigui e ruta ku e ke, esaki por hiba na desaster. Adam ku Eva a hasi algu similar. Nan a rechasá e guia ku Dios a duna nan. E resultado tabata desastroso: piká i morto pa nan mes i nan futuro desendientenan. (Rom. 5:12) En bes di haña mas libertat, Adam ku Eva a pèrdè e berdadero libertat ku nan tabatin.

13, 14. Kon nos por haña berdadero libertat?

¹³ Tin hende ta pensa ku mas libertat nan tin ta mihó pa nan. Pero en realidat, libertat sin límite ta manera un spada ku ta kòrta tur dos banda. Ta bèrdat ku libertat ta trese hopi benefisio; pero, nos kurpa ta kue rel ora nos pensa kon mundu lo tabata si no tabatin ningun restrikshon. Pa e motibu akí, The World Book Encyclopedia ta bisa: “E leinan di tur sosiedat organisá ta forma un patronchi kompliká di libertat i restrikshon ku ta balansá otro.” No tin duda, “kompliká” ta e palabra korekto. Djis pensa riba e gran kantidat di lei ku hende a skirbi, i no papia mes di e multitut di abogado i hues ku mester pa splika i apliká e leinan akí.

¹⁴ Na kontraste, Hesukristu a mustra un manera simpel pa haña berdadero libertat. El a bisa: “Si boso keda fiel na mi palabranan, boso realmente ta mi disipelnan, i boso lo konosé e bèrdat, i e bèrdat lo hasi boso liber.” (Huan 8:31, 32) Segun e guia di Hesus, pa nos haña berdadero libertat nos mester hasi dos kos. Promé, nos mester aseptá e bèrdat ku el a siña nos. Di dos, nos mester bira su disipel. Di e manera ei, nos lo haña berdadero libertat. Pero for di kiko nos lo haña libertat? Hesus a sigui splika: “Tur hende ku ta hasi piká ta esklabo di piká. . . . Si e Yu hasi boso liber, boso lo ta realmente liber.”—Huan 8:34, 36.

15. Dikon e libertat ku Hesus a primintí por hasi nos “realmente liber”?

¹⁵ E libertat ku Hesus a primintí su disipelnan ta muchu mas mihó ku kualke tipo di libertat ku mayoria di hende ta anhelá awe. Ora Hesus a bisa: “Si e Yu hasi boso liber, boso lo ta realmente liber,” e tabata papia di libertat for di e pió sklabitut i opreshon ku ta eksistí, esta, sklabitut na piká. Den ki sentido nos ta esklabo di piká? Piká por pone nos hasi loke ta malu, stroba nos di hasi loke nos sa ku ta korekto òf di hasi tur loke nos por. I e resultado ta frustrashon, doló, sufrimentu i finalmente morto. (Rom. 6:23) Apòstel Pablo a sinti e doló i agonia ei profundamente. (Lesa Romanonan 7:21-25.) Ta solamente ora nos ser librá di piká, nos por haña e berdadero libertat ku Adam ku Eva a pèrdè.

16. Kon nos por ta realmente liber?

¹⁶ Ora Hesus a bisa: “Si boso keda fiel na mi palabranan,” el a indiká ku tin sierto rekisito òf límite ku nos mester tene kuenta kuné pa e libra nos. Komo kristiannan dediká, nos a nenga nos mes i a skohe pa biba denter di e límitenan ku Kristu a pone pa su disipelnan. (Mat. 16:24) Manera Hesus a primintí, nos lo ta realmente liber ora nos haña tur e benefisionan di e sakrifisio di reskate.

17. (a) Kon nos por ta realmente felis i satisfecho? (b) Kiko nos lo siña den e siguiente artíkulo?

¹⁷ Pa nos por ta realmente felis i satisfecho, komo disipel di Hesus, nos tin ku obedesé su siñansanan. Si nos hasi asina, ku tempu nos lo ser librá kompletamente for di sklabitut na piká i morto. (Lesa Romanonan 8:1, 2, 20, 21.) Den e siguiente artíkulo, nos lo siña kon nos por usa nos libertat na un manera sabí i asina onra Yehova, e Dios di berdadero libertat, pa semper.