E Fariseonan A Konfrontá e Hòmber Ku Tabata Siegu

E fariseonan no kier a aseptá ku ta Hesus a laga e hòmber ku a nase siegu haña su bista; p’esei, nan a manda yama e hòmber su mayornan. E mayornan tabata sa ku nan tabata kore e riesgo di ser “ekspulsá for di snoa.” (Huan 9:22) E ekspulshon akí lo tabatin konsekuensianan serio pa nan famia, tantu riba tereno ekonómiko komo sosial.

E fariseonan a hasi e mayornan dos pregunta: “Ta boso yu esaki, esun ku boso ta bisa a nase siegu? Kon por ta anto ku awor sí e ta mira?” E mayornan a kontestá: “Nos sa ku esaki ta nos yu i ku el a nase siegu. Ma nos no sa kon bini awor sí e ta mira, ni nos no sa ta ken a lag’é haña su bista.” E mayornan tabata wak bon kiko nan tabata kontestá aunke kisas e yu lo a konta nan kaba loke a sosodé. Nan a bisa: “Puntra e mes. E ta mayor di edat. E tin ku papia pa su mes.”—Huan 9:19-21.

E ora ei, e fariseonan a manda yama e hòmber atrobe. I pa intimid’é, nan a papia kuné komo si fuera nan tabatin prueba palpabel kontra Hesus. Nan a bis’é: “Papia bèrdat i asina duna gloria na Dios; nos sa ku e hòmber ei ta un pekadó.” E hòmber no a hasi kaso di nan akusashon i a bisa nan: “Un kos sí mi sa: Mi tabata siegu, i awor mi por mira.”—Huan 9:24, 25.

Pero e fariseonan no kier a laga e asuntu te ei; nan a puntr’é: “Kiko el a hasi ku bo? Kon el a laga bo haña bo bista?” Ku kurashi, el a kontestá: “Mi a konta boso esei kaba, ma boso no a skucha. Pakiko boso ke bolbe tende e mesun kos? Akaso boso tambe ke bira su disipel?” E fariseonan a rabia mashá i a kuminsá zundr’é: “Abo ta disipel di e hòmber ei, ma nos ta disipel di Moises. Nos sa ku Dios a papia ku Moises, ma pa loke ta e hòmber ei, nos no sa di unda el a bini.”—Huan 9:26-29.

Sorprendí e hòmber a bisa nan: “Esaki sí ta straño! Boso no sa di unda el a bini, ma el a laga mi haña mi bista.” Anto e hòmber a rasoná na un manera lógiko ku nan pa mustra ken Dios ta skucha i ken tin Dios su aprobashon. El a bisa: “Nos sa ku Dios no ta skucha orashon di pekadó, ma si un hende ta teme Dios i ta hasi su boluntat, Dios ta skuch’é. Nunka ántes hende a yega di tende ku un hende a duna bista na un persona ku a nase siegu.” Anto su konklushon tabata: “Si e hòmber akí no tabata di Dios, lo e no por a hasi nada.”—Huan 9:30-33.

E fariseonan no tabata sa kiko pa bisa. P’esei nan a kuminsá insultá e hòmber i bisa: “Bo a nase yen di piká, anto abo ke bin siña nos?” I nan a sak’é afó.—Huan 9:34.

Hesus a tende loke a pasa. Ora el a topa e hòmber, el a puntr’é: “Bo ta pone fe den e Yu di hende?” E hòmber, ku awor por a mira, a kontest’é: “Ta ken e ta, Señor? Bisa mi pa mi por pone fe den dje?” Pa kita tur duda ku e hòmber lo por tabatin, Hesus a bis’é: “Bo a mir’é; de echo, t’e ta papia ku bo aki.”—Huan 9:35-37.

E hòmber a kontestá: “Señor, mi ta pone fe den dje.” I pa demostrá su fe i rèspèt, el a bùig dilanti di Hesus. I Hesus a bisa e palabranan profundo akí: “Mi a bini na mundu pa Dios por husga mundu: pa esnan ku no ta mira por mira, i pa esnan ku ta mira bira siegu.”—Huan 9:38, 39.

Algun fariseo, kendenan pa kasualidat tabata einan, tabata bon konsiente ku nan no tabata siegu literalmente. Pero kiko di nan papel komo supuesto guia religioso? Nan a puntra Hesus: “Akaso nos tambe ta siegu?” Hesus a bisa nan: “Si boso tabata siegu, boso lo no tabatin piká. Ma awor ku boso ta bisa: ‘Nos ta mira,’ boso piká ta keda.” (Huan 9:40, 41) Sí, si nan no tabata maestro na Israel, hende lo por a komprondé dikon nan a rechasá Hesus komo e Mesías. Pero komo ku nan tabata konosé e Lei, nan piká, esta, e echo ku nan a rechasá e Mesías, tabata un piká serio.