Un Guia Konfiabel pa Felisidat

E REDAKTORNAN di e Deklarashon di Independensia di Merka tabata di opinion ku tur hende tin derecho di buska felisidat. Pero e echo ku un persona ta buska algu no ta nifiká ku e ta hañ’é tambe. Ounke hopi hende hóben ta buska kareranan den e mundu di entretenimentu i deporte, kuantu di nan bo konosé ku en bèrdat a logra e éksito tan deseá? Un kantante di fama ku sa kiko ke men lucha pa bira un músiko eksitoso a bisa: “Probablemente bo no ta bai logra.”

Si bo tin e mesun punto di bista ei, tin bon motibu pa bo no pèrdè ánimo. Si bo ta buska felisidat den e manera korekto, lo bo logr’é. Pakiko nos por bisa esei? E artíkulo anterior a papia di “e Dios felis,” Yehova. (1 Timoteo 1:11, NW) Den Beibel, Dios ta perkurá guia pa bo búskeda di felisidat no kaba na desilushon. Yehova por yuda bo vense e kousanan komun di tristesa. Por ehèmpel, pensa riba e konsuelo ku e ta duna bo ora un ser kerí di bo muri.

Ora un Ser Kerí Muri

Tin algu bon ku nos por bisa tokante morto? Morto ta ranka mayornan for di yunan i yunan for di mayornan. E ta separá amigunan íntimo i ta trese insiguridat den komunidatnan ku ta hopi será ku otro. Ora morto kai den un famia felis, e por kousa un tristesa profundo.

Niun hende no tin nodi bisa bo ku morto ta un sla duru. Sin embargo, algun hende ta nenga e realidat ei i ta pinta morto komo un bendishon. Wak kiko a pasa despues ku Orkan Katrina a suta Golfo di Mexico na ougùstùs 2005. Na e entiero di un di e víktimanan, e pastor a bisa: “No ta Katrina a mat’é. Ta Dios a tum’é den shelu.” Na un otro okashon, un ofisinista di hospital, ku tur su bon intenshon, a bisa yu muhé di un señora ku a muri pa e no wòri pasobra Dios a tuma su mama den shelu. E yu muhé a reakshoná yorando: “Pakiko, pakiko el a kit’é fo’i mi?”

Ta bon kla anto ku e konseptonan eróneo ei tokante morto hopi bes no ta konsolá esnan ku a keda atras. Pakiko nò? Pasobra e ideanan ei no ta basá riba e bèrdat tokante morto. Pió ainda, nan ta pinta Dios komo esun ku ta ranka sernan kerí for di famia i amigu na un manera kruel i doloroso. E konseptonan ei ta laga parse ku ta Dios ta e kulpabel pa e tragedia di morto, en bes di ta un fuente di konsuelo pa hende. Pero e Palabra di Dios ta deklará e bèrdat tokante morto.

Beibel ta yama morto un enemigu. E ta kompará morto ku un rei ku a goberná riba humanidat. (Romanonan 5:17; 1 Korintionan 15:26) Morto ta un enemigu asina poderoso ku niun hende no por resistié, i tur ser kerí ku muri ta djis un víktima mas di e kantidat inkontabel di víktimanan di morto. E bèrdat di Beibel aki ta yuda nos komprondé e tristesa i impotensia ku nos ta sinti ora un ser kerí muri. E ta konfirmá ku e sintimentunan ei ta normal. Pero, ta keda e pregunta: Dios ta usa e enemigu morto komo un medio pa tuma nos sernan kerí den shelu? Laga Beibel kontestá e pregunta ei.

Eklesiastés 9:5 i 10 ta deklará: “E mortonan no sa nada . . . No tin ni aktividat ni planifikashon ni sabiduria den Seol, kaminda bo ta bai.” Kiko ta Seol? Esei ta e graf komun di humanidat den kua hende ta bai ora nan muri. Den graf e mortonan ta kompletamente inaktivo; nan no ta move, no ta pensa ni no ta sinti nada. Ta komo si fuera nan ta den un soño profundo.a Pues Beibel ta mustra bon kla ku Dios no ta tuma nos sernan kerí pa nan ta huntu kuné den shelu. E efektonan di morto ta laga nan sin bida den graf.

Hesus a konfirmá e bèrdat aki despues ku su amigu Lázaro a muri. El a kompará morto ku un soño. Si Lázaro a bai shelu pa ta huntu ku Dios Todopoderoso, Hesus lo no a hasi Lázaro niun fabor dor di tres’é bèk na tera pa despues e muri atrobe. E relato inspirá ta deklará ku na e graf Hesus a bisa na bos haltu: “Lázaro, bin pafó!” Anto segun Beibel, “esun ku a muri a bin pafó.” Lázaro a kuminsá biba atrobe. Hesus tabata sa ku niun ora so Lázaro no a bandoná tera. E tabata drumí sin bida den un graf.—Juan 11:11-14, 34, 38-44.

E insidente aki registrá den Beibel ta yuda nos komprondé ku morto no ta un medio ku Dios ta usa pa transferí hende for di tera pa shelu. P’esei nos por hala serka Dios, sabiendo ku no ta é ta hinka nos den tristesa. Nos por tin e konfiansa tambe ku e ta komprondé kompletamente kuantu tristesa i daño e enemigu morto ta kousa nos. I e bèrdat di Beibel tokante e kondishon di e mortonan ta proba ku e mortonan no ta sufri den kandela di fièrnu òf purgatorio pero ta sin bida den graf. Pues, e rekuerdo di nos sernan stimá no tin nodi bai akompañá ku repudio kontra Dios òf miedu di un mundu deskonosí. Ademas, den Beibel Yehova ta duna nos un konsuelo adishonal.

Speransa Ta Hiba na Felisidat

E tekstonan ku nos a konsiderá ta indiká ku pa un hende ta berdaderamente felis, e mester tin un speransa. E palabra “speransa” den e sentido ku Beibel ta us’é ta enserá spera ku konfiansa riba loke ta bon. Awor, pa mira kon speransa por hiba na felisidat, laga nos bai bèk na e relato kaminda Hesus a resusitá Lázaro.

Tin por lo ménos dos motibu pakiko Hesus a hasi e milager ei. Un di nan tabata pa pone fin na e tristesa di Marta, Maria i nan amigunan deskonsolá. Nan lo por a bolbe disfrutá di e kompania di nan ser kerí. Pero Hesus a menshoná un di dos motibu mas importante na Marta: “Mi no a bisa bo, si bo kere, lo bo mira e gloria di Dios?” (Juan 11:40) The New Testament in Modern English di J. B. Phillips a tradusí e último frase komo “e milager di loke Dios por hasi.” Ku e resurekshon di Lázaro, Hesus a duna un bista adelantá di loke Yehova Dios por i lo hasi den futuro. Aki tin mas detaye tokante “e milager [aki] di loke Dios por hasi.”

Segun Juan 5:28 i 29, Hesus a bisa: “No straña boso di esaki, pasobra e ora lo yega den kua tur ku ta den graf lo tende su bos, i lo sali.” Esaki ta nifiká ku tur e mortonan den Seol, inkluso nos sernan kerí, lo bolbe haña bida. Echonan 24:15 ta revelá mas tokante e suseso maravioso aki, bisando: “Lo tin un resurekshon di tantu e hustunan komo e malbadonan.” Pues, asta “e malbadonan,” hopi hende ku no a konosé ni sirbi Yehova, lo risibí oportunidat den futuro pa haña e fabor di Dios.

Unda e resurekshon aki lo tuma lugá? Salmo 37:29 ta deklará: “E hustunan lo heredá e tera, i lo biba den dje pa semper.” Pensa kiko esei ta nifiká! Famia- i amigunan separá for di otro pa motibu di morto lo ta huntu atrobe aki riba tera. Ora bo pensa riba e dushi tempu ku lo bo disfrutá di dje den kompania di bo sernan kerí ku lo bini bèk den resurekshon, di mes bo kurason ta yena ku felisidat.

Yehova Ke pa Bo Ta Felis

Nos a konsiderá dos manera den kua Yehova por oumentá bo felisidat apesar di problema. Na promé lugá, pa medio di Beibel, e ta perkurá konosementu i guia pa yuda bo enfrentá difikultat ku éksito. Ademas di yuda nos biba ku e tristesa profundo di morto, konseho di Beibel por yuda nos tambe pa trata ku problemanan ekonómiko i di salú. E por duna bo e forsa pa soportá inhustisia sosial i disturbionan polítiko. I si bo apliká su guia den bo bida, e por yuda bo trata ku otro problemanan personal tambe.

Na di dos lugá, un estudio di Beibel por duna bo un speransa ku ta hopi mas balioso ku kualke kos ku sosiedat humano ta ofresé. Resurekshon di amigu i famia ta parti di e speransa ku Beibel ta siña. Revelashon 21:3 i 4 ta duna mas detaye: “Dios mes lo ta meimei di [humanidat], i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” Esaki ta nifiká ku kualke kousa di tristesa den bo bida lo disparsé pronto i pa semper. Loke Beibel ta primintí lo bira realidat, i abo por tin e deleite di mira esei kumpli. E solo echo ku bo sa ku lo tin un mihó tempu den futuro ta un alivio. E echo ku bo sa ku lo bo no sufri pa tempu indefiní despues di morto ta un motibu pa ta felis.

E siguiente eksperensia ta ilustrá esaki. Hopi aña pasá Maria a mira kon su esposo a muri un morto doloroso pa motibu di kanser. Miéntras ku ainda e tabata yora morto di su kasá, problemanan finansiero a obligá e i su tres yu muhénan sali for di e kas di famia. Dos aña despues, Maria a haña sa ku e tabatin kanser. El a hasi dos operashon grandi i tur dia e ta sufri di dolónan fuerte. Apesar di e problemanan aki, e tin un aktitut asina optimista ku e ta animá otro hende. Kon e ta mantené su felisidat?

Maria ta bisa: “Ora mi tin un problema, mi ta purba pa no pensa muchu riba mi mes. Mi ta evitá preguntanan manera: ‘Pakiko ami? Pakiko mi tin ku sufri asina aki? Pakiko mi tabatin ku bira malu?’ Pensamentu negativo ta gasta tur energia. Na lugá di esei, mi ta usa mi energia pa sirbi Yehova i yuda otro hende. Esei ta hasi mi felis.”

Kon speransa ta yuda Maria? El a fiha su kurason riba e futuro ora Yehova eliminá enfermedat i otro problemanan for di humanidat. Ora e bai hospital pa risibí tratamentu, e ta kompartí e speransa ei ku otro pashèntnan ku tin kanser i ku kisas ta deprimí. Kon importante speransa ta pa Maria? E ta bisa: “Hopi biaha mi ta pensa riba loke Beibel ta bisa na Hebreonan 6:19, kaminda Pablo ta deskribí speransa komo un anker pa e alma. Sin e anker ei, lo bo drif manera un boto sin rumbo den un tormenta. Pero si bo ta mará na e anker ei, lo bo ta safe apesar di e problemanan tempestuoso ku bo ta enfrentá.” E “speransa di bida eterno, ku Dios, kende no por gaña, a primintí,” ta yuda Maria keda felis. E speransa ei por yuda abo tambe.—Tito 1:2.

Pa medio di un estudio di Beibel, bo por haña berdadero felisidat apesar di bo problemanan. Pero kisas bo tin bo dudanan tokante e aspektonan práktiko di esaki. Testigunan di Yehova gustosamente lo mustra bo e kontestanan bíbliko ku bo mester sa si bo kier ta berdaderamente felis. Segun ku bo ta warda e speransa ku Yehova ta ofresé kumpli, bo por ta entre e hendenan deskribí den e manera aki: “Nan lo haña alegria i goso, i tristesa i suspiro lo hui bai.”—Isaias 35:10.

[Nota]

[Plachi na página 5]

Ta e bèrdat di Beibel so por aliviá tristesa

[Plachi na página 7]

E speransa bíbliko di resurekshon por kontribuí na felisidat