“Ni Un Hende No Tin Amor Mas Grandi ku Esaki”

1-4. (a) Kiko a sosodé ora Pilato a presentá Hesus na un multitut rabiá pará pafó di palasio di gobernadó? (b) Kon Hesus a reakshoná riba e humiashon i sufrimentu, i ki preguntanan importante ta surgi?

“ATA e hòmber!” Ku e palabranan aki e gobernadó romano Ponsio Pilato a presentá Hesukristu na e multitut rabiá pará pafó di palasio di gobernadó e mainta trempan di e Pasku Hudiu di aña 33. (Juan 19:5) Apénas algun dia promé, un multitut di hende a aklamá Hesus ora ku el a hasi su entrada triunfal den Yerusalèm komo e Rei apuntá pa Dios. Sin embargo, e anochi aki e multitut rabiá tabatin kompletamente un otro opinion di dje.

² Hesus tabata bistí ku un mantel púrpura manera e hendenan di kas real sa bisti, i un korona riba su kabes. Pero e mantel i korona tabata pa hasi bofon di su puesto di rei. E mantel a tapa su lomba ku tabata tur kòrtá i na sanger debí na e sota ku el a haña ku zuip, i e korona tabata di sumpiña i primí riba su kabes tur na sanger. E pueblo, instigá pa e saserdotenan prinsipal, a rechasá e hòmber pará nan dilanti. E saserdotenan a grita: “Klab’é na staka! Klab’é na staka!” Ku un kurason asesino, e pueblo a grita: “E mester muri.”—Juan 19:1-7, NW.

³ Ku dignidat i kurashi, Hesus a wanta e humiashon i a sufri sin keha.a E tabata plenamente prepará pa muri. Mas lat riba e dia di Pasku Hudiu ei, el a someté su mes boluntariamente na un morto doloroso riba un staka di tormento.—Juan 19:17, 18, 30.

⁴ E echo ku Hesus a entregá su bida a demostrá ku e tabata un berdadero amigu pa su siguidónan. El a yega di bisa: “Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:13) Esaki ta lanta algun pregunta importante. Tabata realmente nesesario pa Hesus pasa den tur e sufrimentu ei i despues muri? Dikon e tabata dispuesto pa hasi esei? Komo “su amigunan” i siguidónan, kon nos por imitá su ehèmpel?

 5. Kon bin Hesus tabata sa ki pruebanan spesífiko tabata sper’é?

⁵ Komo e Mesias primintí, Hesus tabata sa kiko pa spera. E tabata na haltura di e tantísimo profesianan den e Skritura Hebreo ku a predisí en detaye e sufrimentu i morto di e Mesias. (Isaias 53:3-7, 12; Daniel 9:26) Mas ku un biaha el a prepará su disipelnan pa e pruebanan ku tabata sper’é. (Marko 8:31; 9:31) Riba kaminda pa Yerusalèm pa selebrá su último Pasku Hudiu, el a bisa su apòstelnan spesífikamente: “E Yu di hende lo wòrdu entregá na e saserdotenan prinsipal i eskribanan; i nan lo konden’é na morto, i lo entreg’é na e paganonan. I nan lo hasi bofon di dje i skupi riba dje i sut’é i mat’é.” (Marko 10:33, 34) No tabata trata aki di palabranan bashí. Manera nos a mira, en bèrdat nan a hasi bofon di Hesus, skupié, sut’é i mat’é.

 6. Dikon Hesus mester a sufri i muri?

⁶ Pero pakiko Hesus mester a sufri i muri? Pa vários motibu masha importante. Di promé, dor di keda leal, Hesus lo a duna prueba di su integridat i sostené e soberania di Yehova. Kòrda ku Satanas a pretendé falsamente ku hende ta sirbi Dios solamente pa motibunan egoista. (Jòb 2:1-5) Kedando fiel “te na morto” riba un staka di tormenta, Hesus a duna e kontesta mas kompletu posibel riba Satanas su akusashon sin base. (Filipensenan 2:8; Proverbionan 27:11) Di dos, e sufrimentu i morto di e Mesias lo a kubri òf paga pa e pikánan di otro hende. (Isaias 53:5, 10; Daniel 9:24) Hesus a “duna su bida komo preis di reskate pa hopi,” i asina a habri kaminda pa nos por tin un relashon aprobá ku Dios. (Mateo 20:28) Di tres, dor di wanta tur tipo di difikultat i sufrimentu, Hesus “a ser probá den tur sentido meskos ku nos mes.” P’esei e ta un Sumo Saserdote miserikòrdioso, unu ku por “kompadesé di nos debilidatnan.”—Hebreonan 2:17, 18, NW; 4:15.

 7. Kuantu kos Hesus a sakrifiká ora el a bin na tera?

⁷ Pa bo por komprondé mihó kiko Hesus tabata dispuesto pa hasi, pensa riba esaki: Ta kua hòmber lo laga su famia i su kas atras i bai biba na un pais stranhero si e sa ku mayoria di habitante di e pais ei lo rechas’é, ku lo e ser someté na humiashon i sufrimentu i ku por último nan lo asesin’é? Pensa awor riba loke Hesus a hasi. Promé ku el a bin na tera, e tabatin un puesto privilegiá den shelu na lado di su Tata. Sin embargo, Hesus boluntariamente a bandoná su kas selestial i a bin na tera komo hende. El a hasi esei, sabiendo ku mayoria di hende lo a rechas’é i ku nan lo a somet’é na humiashon kruel, sufrimentu intenso i un morto doloroso. (Filipensenan 2:5-7) Kiko a motivá Hesus pa hasi e sakrifisio ei?

8, 9. Kiko a motivá Hesus pa entregá su bida?

⁸ Mas ku tur kos Hesus a ser motivá pa un amor profundo pa su Tata. Hesus su perseveransia tabata prueba di su amor pa Yehova. E amor ei a pone ku Hesus tabata preokupá pa e nòmber i reputashon di su Tata. (Mateo 6:9; Juan 17:1-6, 26) Riba tur kos, Hesus kier a mira e nòmber di su Tata ser hasí limpi di e reproche ku a ser montoná riba dje. Pues pa Hesus, tabata un gran onor i privilegio di por a sufri pa kousa di hustisia, pasobra e tabata sa ku su integridat lo a kontribuí na santifikashon di e nòmber bon i glorioso di su Tata.—1 Krónikanan 29:13.

⁹ Tabatin un motibu mas pakiko Hesus a entregá su bida: amor pa humanidat. E amor aki a originá for di prinsipio di historia humano. Hopi promé ku Hesus a bin na tera, Beibel ta revelá ki sintimentu e tabatin pa hende: “Mi delisia tabata den e yunan di hende.” (Proverbionan 8:30, 31) Su amor tabata masha bisto tempu e tabata riba tera. Manera nos a mira den e tres kapítulonan anterior di e buki aki, Hesus a demostrá su amor pa hende en general i pa su siguidónan en partikular den hopi manera. Pero dia 14 di nisan di aña 33, boluntariamente el a entregá su bida pa nos. (Juan 10:11) Di bèrdat no tabatin un manera mas grandi pa el a demostrá su amor pa nos. Akaso nos mester imit’é den esaki? Sí. De echo, nos a haña un mandamentu pa hasié.

10, 11. Kiko ta e mandamentu nobo ku Hesus a duna su siguidónan, kiko e ta enserá, i dikon ta importante pa nos obedes’é?

¹⁰ E anochi promé ku Hesus a muri, el a bisa su disipelnan di mas íntimo: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.” (Juan 13:34, 35) Dikon “stima otro” tabata “un mandamentu nobo”? E Lei di Moisés ya a yega di duna e mandamentu: “Stima bo próhimo manera bo mes.” (Levítiko 19:18) Pero e mandamentu nobo ta rekerí un amor mas grandi, un amor ku lo a motivá nos pa entregá nos bida na fabor di otro hende. Hesus mes a splika esaki ora el a bisa: “Esaki ta mi mandamentu, ku boso stima otro meskos ku ami a stima boso. Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:12, 13) Bon mirá, e mandamentu nobo ta bisa: “Stima otro hende, no meskos ku bo mes, sino mas ku bo mes.” E manera ku Hesus a biba i a muri tabata definitivamente un ehèmpel di tal amor.

¹¹ Dikon ta importante pa nos obedesé e mandamentu nobo? Kòrda ku Hesus a bisa: “Na esaki [e amor di sakrifisio propio] tur hende lo sa ku boso ta mi disipel.” Sí, amor di sakrifisio propio ta identifiká nos komo kristiannan berdadero. Nos lo por kompará e amor aki ku un badge. Delegadonan ku ta asistí na e kongresonan anual di Testigunan di Yehova ta bisti un badge. E karchi ta identifiká e persona, mustrando su nòmber i kongregashon. Amor di sakrifisio propio pa otro ta e “badge” ku ta identifiká kristiannan berdadero. Ku otro palabra, e amor ku nos ta mustra na otro mester ta asina riparabel ku e mester fungi komo un señal, òf badge, ku ta bisa opservadónan ku en bèrdat nos ta berdadero siguidó di Kristu. Kada un di nos ta hasi bon di puntra nos mes: ‘E “badge” di amor di sakrifisio propio ta bisto den mi bida?’

12, 13. (a) Te kon leu nos mester ta dispuesto pa hasi sakrifisio pa demostrá nos amor pa otro? (b) Kiko hasi sakrifisio propio ta nifiká?

¹² Komo siguidó di Hesus, nos tin ku stima otro manera é a stima nos. Esaki ta nifiká ku nos ta dispuesto pa hasi sakrifisio pa nos rumannan den fe. Te kon leu nos mester ta dispuesto pa hasi sakrifisio? Beibel ta bisa nos: “Na esaki nos konosé amor, ku el a entregá su bida pa nos; i nos mester entregá nos bida pa e rumannan.” (1 Juan 3:16) Meskos ku Hesus, nos mester ta dispuesto pa muri pa otro si ta nesesario. Den tempu di persekushon, nos lo preferá di sakrifiká nos propio bida ku traishoná nos rumannan spiritual i asina pone nan bida na peliger. Den paisnan dividí pa konflikto rasial òf étniko, nos lo riska nos propio bida pa protehá nos rumannan, sin importá ki antesedente rasial òf étniko nan tin. Ora nashonnan ta bai guera, nos ta preferá di bai será òf asta muri ku hisa arma kontra nos rumannan den fe òf kontra kualke otro hende.—Juan 17:14, 16; 1 Juan 3:10-12.

¹³ Ser dispuesto pa entregá nos bida pa nos rumannan no ta e úniko manera pa demostrá amor di sakrifisio propio. De echo, ta masha poko di nos hamas ta haña nos tin ku hasi un sakrifisio asina grandi. Sin embargo, si nos ta stima nos rumannan sufisiente pa muri pa nan, nos lo no mester ta dispuesto pa hasi sakrifisionan mas chikí, hasiendo tur loke nos por pa yuda nan awor? Hasi sakrifisio propio ta nifiká legumai nos propio bentaha òf komodidat p’e benefisio di otro hende. Nos ta pone nan nesesidat i bienestar promé ku di nos, asta ora esaki no ta kumbiní nos. (1 Korintionan 10:24) Den ki maneranan práktiko nos por demostrá amor di sakrifisio propio?

14. (a) Ki sakrifisio ansianonan mester hasi? (b) Kiko bo ta pensa di e ansianonan ku ta traha duru den bo kongregashon?

¹⁴ Ansianonan di kongregashon ta hasi hopi sakrifisio pa “pastoriá e tou.” (1 Pedro 5:2, 3) Fuera di perkurá pa nan mes famia, nan kisas tin ku tuma tempu anochi òf den wikènt pa atendé asuntunan di kongregashon. Esei ta inkluí prepará parti pa reunion, hasi bishita di pastoreo i atendé kasonan hudisial. Hopi ansiano ta hasi sakrifisionan adishonal, ya ku nan ta traha duru na asamblea i kongreso i ta sirbi komo miembro di Komité di Kontakto ku Hospital, Grupo di Bishitá Pashènt i Komité Regional di Konstrukshon. Ansianonan, no lubidá nunka ku ora boso ta sirbi ku un spiritu dispuesto—usando boso tempu, energia i rekursonan pa pastoriá e tou—boso ta demostrando amor di sakrifisio propio. (2 Korintionan 12:15) Tantu Yehova komo e kongregashon ku boso ta pastoriá ta apresiá boso esfuerso inegoista.—Filipensenan 2:29; Hebreonan 6:10.

15. (a) Menshoná algun sakrifisio ku kasánan di ansiano ta hasi. (b) Kiko bo ta pensa di e esposanan ku ta apoyá nan kasá i ta dispuesto pa kompartí nan kasá ku bo kongregashon?

¹⁵ Pero kiko di e kasánan di ansiano? Akaso e señoranan aki ku ta apoyá nan kasá no ta hasi sakrifisio di manera ku nan esposo por kuida e tou? Siguramente ta un sakrifisio pa un esposa ora ku su kasá tin ku dediká tempu na asuntunan di kongregashon; tempu ku di otro manera lo el a dediká na su famia. Pensa tambe riba e esposanan di superintendentenan di sirkuito i di distrito, i e sakrifisionan ku nan ta hasi pa kompañá nan kasá di kongregashon pa kongregashon i di sirkuito pa sirkuito. Nan ta renunsiá un kas di nan mes i kisas tin ku drumi tur siman den un otro kama. Esposanan ku di buena gana ta pone e interesnan di kongregashon promé ku di nan mes ta meresé elogio pa e manera generoso ku nan ta desplegá amor di sakrifisio propio.—Filipensenan 2:3, 4.

16. Mayornan kristian ta hasi ki sakrifisio pa nan yunan?

¹⁶ Kon nos por demostrá amor di sakrifisio propio den famia? Mayornan, boso ta hasi hopi sakrifisio pa kuida boso yunan i pa ‘lanta nan den e disiplina i instrukshon di Yehova.’ (Efesionan 6:4) Kisas boso tin ku traha hopi ora na un trabou agotador djis pa pone pan riba mesa i pa hasi sigur ku boso yunan tin paña adekuá pa bisti i un dak riba nan kabes. Boso ta preferá di hasi sakrifisio personal ku priva boso yunan di e nesesidatnan di bida. Boso ta hasi hopi esfuerso tambe pa studia ku boso yunan, hiba nan reunionnan kristian i traha huntu ku nan den sirbishi di vèlt. (Deuteronomio 6:6, 7) Boso amor di sakrifisio propio ta agradá Esun ku a originá bida di famia i lo por nifiká bida eterno pa boso yunan.—Proverbionan 22:6; Efesionan 3:14, 15.

17. Kon esposonan por imitá Hesus su amor di sakrifisio propio?

¹⁷ Esposonan, kon boso por imitá Hesus den mustra amor di sakrifisio propio? Beibel ta kontestá: “Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efesionan 5:25) Manera nos a mira, Hesus a stima su siguidónan asina tantu ku el a muri pa nan. Un esposo kristian ta imitá e aktitut di Hesus. Hesus no tabata egoista i e “no a agradá su mes.” (Romanonan 15:3) Un esposo asina ta pone di buena gana e nesesidatnan i interesnan di su kasá promé ku di dje. E no ta insistí pa tur kos bai manera e gusta, mas bien e ta demostrá ku e ta dispuesto pa bai na e manera ku su esposa ta preferá ora ku ningun prinsipio bíbliko ta ser violá. E esposo ku ta demostrá amor di sakrifisio propio ta gana Yehova su aprobashon i e amor i rèspèt di su kasá i yunan.

18. Kiko ta motivá nos pa sigui e mandamentu nobo pa stima otro?

¹⁸ No ta fásil pa obedesé e mandamentu nobo pa stima otro, pero nos tin un motivashon fuerte pa hasié. Pablo a skirbi: “E amor di Kristu ta obligá nos, yegando na e konklushon aki, ku ún a muri pa tur . . . i el a muri pa tur, pa esnan ku ta biba no biba mas pa nan mes, ma pa esun ku a muri i ku a resusitá pa nan motibu.” (2 Korintionan 5:14, 15) Siendo ku Hesus a muri pa nos, nos lo no mester sinti nos obligá di biba p’e? Nos por hasi esei dor di sigui su ehèmpel di amor di sakrifisio propio.

19, 20. Ki regalo presioso Yehova a duna nos, i kon nos por demostrá ku nos ta asept’é?

¹⁹ Hesus no a eksagerá ora el a bisa: “Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:13) E echo ku Hesus tabata dispuesto pa entregá su bida pa nos tabata e ekspreshon di mas grandi di su amor pa nos. Sin embargo, tin un otro persona ku a demostrá un amor asta mas grandi na nos. Hesus a splika: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Dios ta stima nos asina tantu ku el a duna su Yu komo un reskate, hasiendo posibel ku nos por ser librá for di piká i morto. (Efesionan 1:7) E reskate ta un regalo presioso for di Yehova, pero e no ta obligá nos pa asept’é.

²⁰ Ta keda na nos si nos ta aseptá e regalo di Yehova. Kon nos ta asept’é? Ora nos “kere” òf ehersé fe den su Yu. Sin embargo, fe no ta palabra so. Fe ta keda demostrá pa medio di akshon, na e manera ku nos ta biba. (Santiago 2:26) Nos ta duna prueba di nos fe den Hesukristu ora nos ta siguié dia tras dia. Esei lo trese bendishonnan riku awor i den futuro, manera e último kapítulo di e buki aki lo splika.