LÈS 17
Ki Klase di Persona Hesus Ta?
Ora nos lesa tokante e kosnan ku Hesus a hasi tempu e tabata aki riba tera, nos lo siña mas tokante su kualidatnan. Segun ku nos ta siña tokante e kualidatnan ei, nos lo haña mas gana di ta amigu di Hesus i di su Tata, Yehova. Laga nos wak algun di e bunita kualidatnan akí i kon nos por imitá Hesus den nos bida.
1. Den ki sentido Hesus ta manera su Tata?
Tempu Hesus tabata den shelu, el a pasa míles di miónes di aña ta opservá su Tata i siña for di dje. P’esei, e ta sinti, pensa i hasi meskos ku su Tata. (Lesa Huan 5:19.) De echo, Hesus ta imitá e kualidatnan di su Tata asina bon ku el a bisa: “Esun ku a mira mi, a mira e Tata tambe.” (Huan 14:9) Segun ku bo ta siña tokante e kualidatnan di Hesus, lo bo siña konosé Yehova mihó. Por ehèmpel, ora bo mira kon Hesus a mustra interes den otro hende, lo bo bin mira ku Yehova ta interesá den bo tambe.
2. Kon Hesus a mustra ku e ta stima Yehova?
Hesus a bisa: “Mi ta hasi presis manera e Tata a manda mi hasi, pa mundu por sa ku mi ta stima e Tata.” (Huan 14:31) Tempu Hesus tabata riba tera, asta ora tabata difísil p’e, el a obedesé su Tata i asina demostrá ku e tabata stim’é mashá. Ademas, komo ku Hesus ta stima su Tata, el a siña otro hende tokante su Tata i a yuda nan sera un amistat ku Dios.—Huan 14:23.
3. Kon Hesus a mustra ku e ta stima hende?
Beibel ta bisa ku Hesus “tabatin un kariño spesial pa hende.” (Proverbionan 8:31) Su amor pa hende a motiv’é pa duna di su tempu i energia pa yuda nan i animá nan. E milagernan ku Hesus a hasi no solamente a demostrá su poder sino tambe e kompashon ku e tabatin pa hende. (Marko 1:40-42) Hesus a trata hende ku bondat i no a hasi distinshon di persona. Su palabranan a duna konsuelo i speransa na tur hende di bon kurason ku tabata skuch’é. Komo ku Hesus tabata stima hende, e tabata dispuesto pa asta sufri i muri pa henter humanidat. Pero e ta stima spesialmente hende ku ta obedesé su siñansanan.—Lesa Huan 15:13, 14.
KIKO MAS NOS POR SIÑA?
Laga nos siña mas tokante e kualidatnan di Hesus i wak kon bo por mustra amor i generosidat meskos ku Hesus.
4. Hesus ta stima su Tata
E ehèmpel di Hesus ta siña nos kon nos mester stima Yehova. Lesa Lukas 6:12 i Huan 15:10; 17:26. Despues di lesa kada teksto, analisá e siguiente pregunta:
Kon nos por imitá Hesus i demostrá ku nos ta stima Yehova?
Hesus a stima su Tata selestial i a papia kuné regularmente den orashon
5. Hesus ta interesá den bienestar di otro hende
Hesus tabata mas interesá den otro hende su bienestar ku esun di dje mes. Asta ora Hesus tabata kansá, el a duna di su tempu i energia pa yuda otro hende. Lesa Marko 6:30-44. Despues, analisá e siguiente preguntanan:
Den e relato akí, kon ta algun manera ku Hesus a mustra interes den hende?—Wak versíkulo 31, 34, 41 i 42.
Kiko a motivá Hesus pa yuda otro hende?—Wak versíkulo 34.
Komo ku Hesus ta imitá Yehova su kualidatnan perfektamente, kiko esei ta siña nos tokante Yehova?
Kon bo por imitá e manera ku Hesus a mustra interes den otro hende?
6. Hesus ta generoso
Maske Hesus no tabatin hopi kos material, el a kompartí loke e tabatin ku otro hende. Hesus ta animá nos pa nos tambe ta generoso. Lesa Echonan 20:35. Despues, analisá e siguiente pregunta:
Segun Hesus, kiko nos mester hasi pa nos ta felis?
Pasa e VIDIO. Despues, analisá e siguiente pregunta:
Kon nos por ta generoso, asta si nos no tin hopi kos material?
Bo tabata sa?
Beibel ta siña ku nos tin ku hasi orashon na Yehova den nòmber di Hesus. (Lesa Huan 16:23, 24.) Hasiendo esei nos ta demostrá ku nos ta gradisidu na Hesus pa loke el a hasi pa nos por tin un amistat ku Yehova.
LOKE HENDE SA BISA: “Dios no tin kunes ku nos ta sufri.”
Kon loke Hesus a hasi tempu e tabata riba tera ta demostrá ku Yehova ta interesá den nos?
RESÚMEN
Hesus ta stima Yehova i e ta stima hende. Komo ku Hesus ta imitá su Tata perfektamente, mas bo siña konosé Hesus, mas lo bo siña konosé Yehova.
Repaso
Meskos ku Hesus, kon nos por demostrá ku nos ta stima Yehova?
Meskos ku Hesus, kon nos por demostrá ku nos ta stima otro hende?
Ki kualidat di Hesus bo ta gusta mas?
MAS INFORMASHON INTERESANTE
Wak algun kualidat di Hesus ku nos por imitá.
“Imitá Hesus: Sea un Persona . . .” (Hesus—E Kaminda, e Bèrdat i e Bida, página 317)
Wak dikon ta importante pa hasi orashon den nòmber di Hesus.
Beibel ta bisa algu tokante e aparensia di Hesus?
Kiko nos por siña for di e manera ku Hesus a trata hende muhé?
“Dios Ta Duna Hende Muhé Rèspèt i Dignidat” (E Toren di Vigilansia di 1 di òktober 2012)