“E Yu Ke Revelá e Tata”

“Ningun hende no sa ken e Tata ta, sino e Yu i esun na ken e Yu ke revelá e Tata.”​—LUK. 10:22.

1, 2. Ki pregunta ta difísil pa hopi hende, i dikon?

‘KEN Dios ta?’ Esaki ta un pregunta difísil pa hopi hende. Tuma por ehèmpel, hende ku ta yama nan mes kristian. Aunke mayoria di nan ta kere ku Dios ta parti di un Trinidat, hopi di nan ta atmití ku nan no ta komprondé e doktrina akí. Un eskritor religioso a skirbi ku “e doktrina akí ta algu ku hende su mente limitá no por kapta. E ta surpasá lógika òf komprondementu humano.” Di otro banda, mayoria di hende ku ta kere den e teoria di evolushon ta bisa ku Dios no ta eksistí. Segun nan, tur e kosnan maravioso ku nos ta mira a bini na eksistensia pa kasualidat. Pero Charles Darwin mes no a nenga ku Dios ta eksistí. El a deklará ku ta mihó nos bisa ku e tópiko Dios ta difísil pa hende komprondé.

² Sea kual sea loke hende ta kere, mayoria di nan tin pregunta tokante Dios su eksistensia. Pero komo ku nan no ta haña kontesta satisfaktorio, ku tempu, hopi di nan ta stòp di buska. I Beibel ta bisa ku Satanas ta “siega mente di esnan ku no ta kreyente.” (2 Kor. 4:⁠4) Pues, ta komprendibel ku mayoria di hende no sa e bèrdat tokante e Tata, e Kreador di universo!​—⁠Isa. 45:⁠18.

3. (a) Ken a revelá e Kreador na nos? (b) Ki preguntanan e artíkulo akí lo kontestá?

³ No opstante, ta masha importante pa hende haña sa e bèrdat tokante Dios. Dikon? Pasobra ta solamente esnan ku invoká “e nòmber di Yehova” lo ser salbá. (Rom. 10:⁠13) I pa invoká e nòmber di Dios, nos mester sa ken Dios ta i ki klase di Persona e ta. Anto Hesukristu a yuda su disipelnan konosé su Tata, revelando e Tata na nan. (Lesa Lukas 10:⁠22.) Dikon Hesus por a hasi esaki mihó ku kualke otro persona? Kon Hesus a revelá e Tata na su disipelnan? Kon nos tambe por revelá e Tata meskos ku Hesus a hasi? Laga nos kontestá e preguntanan akí.

HESUKRISTU​—⁠E ÚNIKO KUALIFIKÁ

4, 5. Dikon Hesus tabata e mihó persona pa revelá su Tata?

⁴ Hesus tabata e mihó persona pa revelá su Tata. Dikon? Pasobra promé ku Dios a krea tur otro forma di bida, el a krea Hesus komo un kriatura selestial. Sí, e ta “e Yu unigénito di Dios.” (Huan 1:⁠14; 3:⁠18) Ki un privilegio úniko! Tempu ku no tabatin ningun otro kriatura ainda, e Yu tabatin tur atenshon di su Tata i a siña konosé su Tata i Su kualidatnan. I segun ku nan tabata komuniká ku otro atraves di e míles di miónes di añanan ei, nan amor i kariño pa otro a bira mas profundo. (Huan 5:⁠20; 14:⁠31) No tin duda, Hesus a siña konosé su Tata mas mihó ku kualke otro persona!​—⁠Lesa Kolosensenan 1:​15-17.

⁵ Pues, no ta straño ku e Tata a nombra e Yu komo su bosero, esta, komo e “Palabra di Dios.” (Rev. 19:⁠13) Sí, Hesus tabata esun ku por a revelá e Tata na otro hende. Ku rason Huan, un eskritor di Evangelio, a bisa ku Hesus, “e Palabra,” ta “sintá banda di e Tata.” (Huan 1:​1, 18) Kisas Huan a usa e ekspreshon ei pa referí na un kustumber ku hende di su tempu tabatin ora di kome. E tempu ei, un invitado tabata haña un lugá di sinta pegá ku un otro invitado di manera ku nan por a kòmbersá fásilmente ku otro. Pues, komo ku e Skritura ta deskribí e Yu “sintá banda” di e Tata, e por tabatin kòmbersashonnan íntimo ku e Tata.

6, 7. Kon bini e relashon entre e Tata i e Yu a sigui bira mas fuerte?

⁶ Beibel ta bisa ku e Yu tabata “delisia” di su Tata, esta, ku e Tata tabatin kariño spesial pa e Yu. (Lesa Proverbionan 8:​22, 23, 30 i 31.) Anto segun ku nan tabata traha huntu, nan relashon a bira mas fuerte, i e Yu a siña imitá e kualidatnan di su Tata. I sin duda, e Yu a haña mas apresio pa su Tata segun ku e tabata opservá kon su Tata tabata trata ku e otro kriaturanan inteligente ku a ser kreá despues.

⁷ Asta ora Satanas a insinuá ku Yehova no tin derecho di goberná, e Yu por a opservá kon Yehova a demostrá amor, sabiduria, hustisia i poder den un situashon difísil. Esaki, na su turno, sin duda a siña e Yu kon pa trata ku situashonnan difísil ku e mes lo a konfrontá despues durante su sirbishi riba tera.​—⁠Huan 5:⁠19.

8. Kon e Evangelionan ta yuda nos siña hopi kos ­tokante e Tata su kualidatnan?

⁸ Debí ku e Yu tabatin un bon relashon ku su Tata, e por a duna detayenan di e Tata ku ningun otro persona no por a duna. P’esei, e mihó manera pa siña konosé e Tata ta di analisá e obranan di su Yu unigénito i loke el a siña hende. Pensa por ehèmpel riba e palabra “amor.” Awor, imaginá bo ku e úniko kos ku nos tabata sa di amor ta e definishon ku un dikshonario ta duna. Lo tabata masha difísil pa komprondé kompletamente kiko ta amor, no ta bèrdat? Pero awor, komo ku nos por reflekshoná riba e relatonan den e Evangelionan ku ta deskribí Hesus su sirbishi i mustra kon el a demostrá interes den hende, nos por komprondé kiko Beibel ke men ku e ekspreshon “Dios ta amor.” (1 Huan 4:​8, 16) Asina tambe nos por siña di e otro kualidatnan di Dios ku Hesus a revelá na su disipelnan tempu ku e tabata riba tera.

KON HESUS A REVELÁ SU TATA?

9. (a) Den kua dos manera Hesus a revelá su Tata na su disipelnan? (b) Ki ilustrashon Hesus a usa pa revelá su Tata?

⁹ Kon Hesus a revelá su Tata na su disipelnan i den un sentido na su futuro siguidónan? El a hasi esei den dos manera: pa medio di loke el a siña hende i su kondukta. Promé, laga nos analisá loke el a siña hende. Loke Hesus a siña su disipelnan ta mustra ku e tabata sa bon kon Yehova ta pensa, sinti i tambe kon ta Yehova su manera di hasi kosnan. Por ehèmpel, Hesus a kompará su Tata ku un hòmber ku ta stima su karnénan i ku ta bai buska su karné ku a dual. Anto Hesus a bisa ku ora e doño haña su karné pèrdí, “e ta alegrá mas pa motibu di esun ei ku pa motibu di e 99 karnénan ku no a dual.” Kiko Hesus kier a siña nos ku e ilustrashon akí? El a splika: “Asina tambe mi Tata ku ta den shelu no ta deseá pa ni ún di e chikitunan akí bai pèrdí.” (Mat. 18:​12-14) Anto kiko e ilustrashon akí ta siña bo tokante Yehova? Wèl, ku asta si bo ta sinti ku otronan ta neglishá bo i ku bo no ta bal nada, bo Tata selestial sí ta interesá den bo. Sí, den bista di Yehova, bo ta ún di “e chikitunan akí.”

10. Kon Hesus a revelá e Tata pa medio di su kondukta?

¹⁰ E di dos manera ku Hesus a revelá e Tata na su disipelnan tabata pa medio di su kondukta. P’esei, ora apòstel Felipe a bis’é pa “mustra [nan] e Tata,” Hesus por a respondé: “Esun ku a mira mi, a mira e Tata tambe.” (Huan 14:​8, 9) Awor, laga nos konsiderá algun okashon ku Hesus a reflehá e kualidatnan di su Tata. Ora un leproso a roga Hesus pa kur’é, Hesus a mishi ku e hòmber “tur na lepra” i a bis’é: “Mi ke. Sea kurá.” Sin duda, e leproso a komprondé ku ta Yehova a duna Hesus poder pa kur’é. (Luk. 5:​12, 13) At’akí un otro ehèmpel: Ora Lázaro a muri, Hesus “a suspirá profundamente i a keda masha konmoví” i ‘awa tabata basha for di su wowo.’ Esei sigur lo a yuda su disipelnan sinti e kompashon di e Tata. Maske Hesus tabata sa ku e ta bai resusitá Lázaro, el a sinti e doló ku e famia i amigunan di Lázaro tabata sinti. (Huan 11:​32-35, 40-43) Sin duda bo tambe tin bo relatonan bíbliko faborito tokante Hesus ku ta laga bo mira kon miserikòrdioso e Tata ta.

11. (a) Kiko Hesus a revelá tokante su Tata ora el a hasi e tèmpel limpi? (b) Dikon e relato akí ta duna nos konsuelo?

¹¹ Awor, kiko nos por siña for di e echo ku Hesus a hasi e tèmpel limpi? Visualisá e esena: Hesus ta traha un zuip di kabuya i ta kore ku e hendenan ku ta bende baka i karné den e tèmpel. Despues, e ta basha e monedanan di e kambiadónan di plaka abou i ta bòltu nan mesanan. (Huan 2:​13-17) E medida drástiko ku Hesus a tuma sigur a laga e disipelnan kòrda e profesia di Rei David, ku ta bisa: “Zelo pa bo kas a kaba ku mi.” (Sal. 69:⁠9) No tin duda, e echo ku Hesus a tuma akshon a demostrá ku e tabata zeloso pa defendé adorashon berdadero. Bo ta mira Yehova su personalidat den e manera ku Hesus a reakshoná? Sí, e relato akí ta laga nos kòrda ku Dios tin tur poder pa kaba ku maldat i ku e ta ansioso pa hasi esei. E manera ku Hesus a reakshoná ta revelá kon e Tata lo ta sinti ora e ta mira tur e kosnan malu ku ta sosodé riba tera awe. Esaki sigur ta un konsuelo pa nos ora nos ta eksperensiá inhustisia.

12, 13. Kiko bo por siña di Yehova for di e manera ku Hesus a trata su disipelnan?

¹² E manera ku Hesus a trata su disipelnan tambe a revelá diferente kualidat di su Tata. Konstantemente e disipelnan tabata diskutí tokante ken tabata esun di mas grandi. (Mar. 9:​33-35; 10:⁠43; Luk. 9:⁠46) Pero debí ku Hesus a pasa hopi tempu ku su Tata, e tabata sa kon E ta mira hende orguyoso. (2 Sam. 22:⁠28; Sal. 138:⁠6) Ademas, Hesus a mira tambe kon Satanas, un individuo egoista, a desplegá e mal karakterístika ei. Diabel tabata masha interesá den prominensia i posishon. Pues, Hesus lo mester a sintié tristu ora el a ripará ku su disipelnan, personanan ku el a siña, tabata sigui mustra ku nan ta ambisioso. Asta algun di esnan ku el a skohe komo apòstel tabatin e aktitut ei! Anto nan a keda ambisioso te na e último dia di Hesus su bida riba tera. (Luk. 22:​24-27) No opstante, Hesus a sigui korigí nan ku kariño; nunka el a pèrdè speransa ku un dia nan lo a kultivá e mesun aktitut humilde ku e tabatin.​—⁠Flp. 2:​5-8.

¹³ Bo a mira kon Hesus a imitá su Tata i ku pasenshi a korigí su disipelnan pa nan mal aktitut? Loke Hesus a hasi i bisa no ta siña bo ku Dios nunka lo bandoná su pueblo maske nan ta faya bes tras bes? E echo ku nos sa ki klase di Dios Yehova ta no mester motivá nos pa arepentí i pidi Dios pordon ora nos faya?

E YU TABATA KE REVELÁ SU TATA

14. Kon Hesus a demostrá ku e tabata ke revelá su Tata?

¹⁴ Hopi diktador gusta skonde informashon pa nan pueblo pa mantené nan bou di nan dominio i den ignoransia. Hesus sí no tabata asina. E tabata ke pa hende siña konosé su Tata bon; p’esei el a bisa nan tur loke nan mester a sa tokante su Tata. (Lesa Mateo 11:⁠27.) Ademas, el a duna su disipelnan ‘komprondementu penetrante pa nan por a siña konosé Yehova, e Dios berdadero.’ (1 Huan 5:⁠20) Kiko esei a enserá? Ku Hesus a habri mente di su siguidónan pa nan por a komprondé loke e tabata siña nan di e Tata. Pues, e no a skonde e identidat di su Tata den un siñansa inkomprendibel i kompliká, manera esun di Trinidat.

15. Dikon Hesus no a revelá tur loke e tabata sa ­tokante su Tata?

¹⁵ Awor, ta tur kos ku Hesus tabata sa tokante su Tata el a revelá? Nò! Tabatin kosnan ku el a keda sin bisa su disipelnan. (Lesa Huan 16:⁠12.) Dikon? Pasobra e tempu ei, nan lo ‘no por a komprondé’ tur e kosnan ei. Pero, manera Hesus mes a splika, hopi kos mas lo a ser revelá na nan despues ora nan haña “e ayudante,” esta spiritu santu. I spiritu santu lo a kapasitá nan pa “komprondé e bèrdat plenamente.” (Huan 16:​7, 13) Pues, meskos ku mayornan sabí ta warda te ora nan yunan bira sufisientemente grandi pa siña òf bisa nan sierto kosnan, Hesus a warda te ora su disipelnan tabata sufisientemente madurá i kapas pa komprondé sierto kosnan tokante e Tata. Hesus bondadosamente a tene kuenta ku nan limitashonnan.

IMITÁ HESUS I YUDA HENDE KONOSÉ YEHOVA

16, 17. Dikon abo tambe por revelá e Tata na otro hende?

¹⁶ Ora bo siña konosé un persona bon i ta ripará ku e ta un persona masha amoroso, bo no ta haña gana di konta otro hende di dje? Sí, esei ta presis loke Hesus a hasi ora e tabata riba tera; el a papia tokante su Tata. (Huan 17:​25, 26) Awor, kiko di nos? Nos tambe por revelá e Tata na otro hende manera Hesus a hasi?

¹⁷ Manera nos a mira kaba, Hesus tabata konosé su Tata mihó ku kualke otro persona. I e tabata ke pa otro hende tambe sa algun di e kosnan ku e tabata sa di su Tata. P’esei el a asta duna su siguidónan komprondementu penetrante pa nan por a kapta aspektonan profundo di Dios su personalidat. Ta ku Hesus su yudansa, nos a siña konosé nos Tata selestial den un manera ku mayoria di hende awe no konos’é. P’esei, nos ta masha kontentu ku Hesus tabata ke revelá su Tata na nos pa medio di su siñansa i kondukta. De echo, nos por asta broma ku nos konosé e Tata. (Yer. 9:⁠24; 1 Kor. 1:⁠31) Anto segun ku nos ta sigui traha duru pa nos tin un bon relashon ku Yehova, é, na su turno, tambe ta hala serka nos. (Sant. 4:⁠8) P’esei, awor nos tambe por kompartí nos konosementu ku otro hende. Pero kon nos por hasi esei?

18, 19. Den ki manera nos por revelá e Tata na otro hende? Splika.

¹⁸ Nos mester imitá Hesus i revelá e Tata ku echo i palabra. Pero tene kuenta sí ku hopi hende ku nos topa den sirbishi no sa ken Dios ta. Podisé nan tin un punto di bista trosí enkuanto Dios debí na siñansa falsu. Nos por siña nan loke Beibel ta bisa tokante e nòmber di Dios, su propósito pa humanidat i tokante su kualidatnan. Es mas, nos por kòmbersá ku nos rumannan den fe tokante algun relato bíbliko ku ta revelá algu di e personalidat di Dios ku nos no tabata sa di dje. Asina nan tambe por benefisiá.

¹⁹ Awor, dikon nos mester revelá e Tata pa medio di nos kondukta? Wèl, ora nos echonan ta reflehá e amor di Kristu, hende lo sinti nan motivá pa siña konosé tantu e Tata komo Hesus. (Efe. 5:​1, 2) Apòstel Pablo a animá nos pa ‘imit’é, meskos ku é a imitá Kristu.’ (1 Kor. 11:⁠1) Pues, nos tin e gran privilegio di por yuda hende konosé Yehova pa medio di nos kondukta. P’esei, laga nos sigui imitá Hesus i revelá e Tata na otro hende.