Gana Konosementu—Awor i pa Semper

E FÍSIKO aleman Ulrich Strunz a skirbi un seri di buki titulá Forever Young. Den nan el a trese padilanti ku ehersisio, nutrishon i un bida salú por promové mihó salú i posiblemente hiba na un bida mas largu. Pero e no ta primintí su lektornan ku dor di sigui su konseho nan lo por biba literalmente pa semper.

Sin embargo tin un klase di konosementu ku sí ta primintí bida eterno. Si bo biba pa semper, lo bo por sigui gana e konosementu útil ei pa semper. Hesus a bisa Dios den un orashon: “Esaki ta nifiká bida eterno, ku nan ta ganando konosementu di bo, e úniko Dios berdadero, i di esun ku bo a manda, Hesukristu.” (Juan 17:3, NW) Laga nos kuminsá na definí e ekspreshon “bida eterno” anto despues establesé kiko e konosementu ta enserá i kon bo por opten’é.

Segun Beibel, pronto e Kreadó lo transformá tera den un paradeis literal ku e kondishonnan ideal pa un bida largu. Pa e Paradeis ei bira realidat lo mester bini un akshon drástiko, meskos ku a tuma lugá den tempu di Noe ora Dios a manda un Diluvio. Mateo kapítulo 24, versíkulo 37 pa 39, ta mustra ku Hesus a kompará nos tempu ku “e dianan di Noe,” den kua e hendenan “no a komprondé” kon krítiko nan situashon tabata. Nan no a hasi kaso tampoko di e mensahe ku Noe a prediká. Anto a bini “e dia ku Noe a bai den e arka” i e Diluvio a destruí tur hende ku a rechasá e konosementu aki. Noe i e personanan ku tabata huntu kuné den e arka a salba.

Hesus a indiká ku un “dia” similar ta biniendo den nos tempu. Hende ku ta hasi kaso di e konosementu relashoná ku e suseso aki lo tin e speransa di no solamente sobrebibí, sino tambe di biba pa semper. Ademas, e mortonan ku ta den e memoria di Dios lo ser lantá na bida ku e speransa di no tin ku muri nunka mas. (Juan 5:28, 29) Ripará kon Hesus a ekspresá e dos pensamentunan aki. Ora el a papia ku Marta tokante e resurekshon di e mortonan, el a bisa: “Esun ku kere den mi lo biba, maske e muri, i tur esnan ku ta biba i ta kere den mi lo no muri nunka.” Tur kos ta mustra ku e “dia” aki ta masha serka, lokual ta nifiká ku probablemente “lo [bo] no muri nunka.”—Juan 11:25-27.

E ora ei Hesus a puntra Marta: “Bo ta kere esaki?” El a kontestá: “Sí, Señor.” Si Hesus hasi bo e mesun pregunta aki awe, kiko lo bo kontestá? Podisé bo ta haña ku ta difísil pa kere ku hende tin e posibilidat di no muri nunka. Pero asta si bo reakshoná asina, sin duda lo bo tin gana di por kere esei. Imaginá bo kuantu kos lo bo por siña si bo “no muri nunka”! Pensa kon lo bo disfrutá di tur e kosnan ku bo ta deseá di por siña i hasi awor pero ku nunka bo no tin tempu pa nan. I djis imaginá bo di por ta huntu atrobe ku bo sernan stimá ku a muri bai laga bo! Kiko ta e konosementu ku lo por hasi e kosnan ei posibel, i kon bo por hañ’é?

E Konosementu Ku Ta Duna Bida Ta na Nos Alkanse

E konosementu di Dios i di Kristu ta fuera di nos alkanse? Nò. Ta bèrdat ku hende no por kaba di siña for di tur loke e Kreadó a traha. Ma Hesus no tabata refiriendo na astronomia òf un otro ramo di siensia ora el a konektá “konosementu” ku “bida eterno.” Proverbionan kapítulo 2, versíkulo 1 i 5, ta indiká ku e “konosementu di Dios” ta konsistí di prinsipalmente e “palabranan” i “mandamentunan” ku nos por haña den Beibel. I pa loke ta Hesus, Juan 20:30 i 31 ta indiká ku e kosnan skirbí ta tur loke nos mester pa nos “por tin bida.”

Konsekuentemente, e konosementu di Yehova i Hesukristu manera Beibel ta trese esei dilanti ta sufisiente pa mustra bo kon pa haña bida eterno. Beibel ta un buki úniko. Den su bondat, e Kreadó a inspirá hende pa skirbié den un manera ku asta personanan ku no tin muchu skol i ku no a haña oportunidat pa studia por haña sufisiente konosementu pa gana bida eterno. Di otro banda, hende ku ta siña kosnan lihé i ku tin hopi tempu i rekurso na nan disposishon semper lo por siña algu nobo for di e Skritura inspirá. E echo ku bo por lesa e artíkulo aki ta un prueba ku bo tin e kapasidat pa siña. Pero kon bo mester usa e kapasidat ei?

Na tur parti di mundu, eksperensia a mustra ku e manera mas efikas pa haña e konosementu aki ta pa medio di un estudio personal di Beibel bou di guia di un hende ku ya a komprondé e informashon. Meskos ku Noe a hasi esfuerso pa kompartí konosementu ku e hendenan di su tempu, Testigunan di Yehova ta dispuesto pa bini bo kas i analisá Beibel huntu ku bo. Kisas nan ta usa e foyeto Kico Dios Ta Rekerí di Nos? òf e buki ku e título apropiá Conocimentu cu Ta Hiba na Bida Eterno.a Asta si bo tin problema ku e idea ku den e Paradeis riba tera hende fiel “lo no muri nunka,” bo por siña pone bo konfiansa den e promesa aki pa medio di e konsiderashonnan bíbliko ei. P’esei si bo ta deseá di biba pa semper òf bo ke djis wak si ta rasonabel pa kere ku bo por biba pa semper, kiko bo mester hasi? Aseptá e oportunidat aki pa studia Beibel.

Kuantu tempu un estudio asina ta tuma? E foyeto di 32 página ku nos a kaba di menshoná, disponibel den sentenáres di idioma, ta kontené apénas 16 lès kòrtiku. Òf si bo por saka mas o ménos un ora pa siman, lo bo tin mester di un par di luna so pa studia e temanan klave di Beibel, usando e buki Conocimentu cu Ta Hiba na Bida Eterno. E publikashonnan aki a yuda hopi hende haña bastante konosementu i desaroyá un amor profundo pa Dios. E Kreadó lo rekompensá esnan ku ègt ta stim’é i ta laga nan haña bida eterno.

En bèrdat e konosementu ku ta duna bida ta na nos alkanse, i e ta disponibel mesora. Bo por haña Beibel kompletu, òf por lo ménos parsialmente, den mas ku 2.000 idioma. Pa Testigunan di Yehova den 235 pais ta un plaser pa duna bo yudansa personal i tambe suministrá e publikashonnan basá riba Beibel pa bo por sigui haña mas konosementu.

Estudio Personal

Bo relashon ku Dios ta un asuntu personal entre abo ku e Kreadó. Ta abo so por manten’é i fortales’é, i ta E so por duna bo bida eterno. P’esei bo mester tin un estudio personal di su Palabra skirbí. Dor di laga un hende bini bo kas riba un base regular, lo bo ripará ku ta mas fásil pa saka tempu pa studia.

Siendo ku Beibel i e yudansanan pa studia Beibel ta kontené “e konosementu di Dios,” ta na su lugá pa bo kuida nan bon. (Proverbionan 2:5) Asina lo bo tin nan pa hopi aña. Si bo ta biba den un pais den desaroyo, kisas bo no a haña hopi buki na skol. Tal bes bo a siña prinsipalmente dor di skucha i opservá. Por ehèmpel na Benin, nan ta papia mas ku 50 idioma. P’esei, no ta nada straño pa bo topa hende ku ta dominá kuater òf sinku idioma, ounke nunka nan no a haña un buki den e idiomanan aki den nan man. Bo kapasidat pa siña dor di skucha, opservá i konsentrá ta un don. Ma lo bo ripará ku buki por ta un bon yudansa pa bo den bo estudio.

Asta si bo no tin hopi espasio na kas, purba haña un lugá apropiá pa warda bo Beibel i otro publikashonnan basá riba Beibel. Warda nan na un lugá kaminda bo por haña nan mesora i kaminda nan no ta daña.

Estudio di Famia

Si bo ta un mayor, bo mester ta interesá den yuda bo yunan gana e mesun konosementu ku abo ta hañando. Den paisnan den desaroyo, hopi bes mayornan tin kustumber di siña nan yunan vários di e kosnan ku nan mester por hasi den bida; por ehèmpel, kushiná, piki palu, saka awa, planta, piska i bende i kumpra riba merkado. Sin duda e edukashon ei por yuda nan haña nan propio sosten den bida. Sin embargo, e konosementu ku por hiba na bida eterno mes hopi mayor ta laga afó.

Sea kual sea bo situashon, probablemente bo ta ripará ku bo no tin hopi tempu. E Kreadó tambe ta konsiente di esaki. Pa loke ta e manera di siña yu Su kamindanan, tuma nota kiko el a bisa hopi tempu pasá: “Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deuteronomio 6:7) Ku e pensamentunan aki komo base, pakiko bo no ta purba desaroyá bo mes programa di siñansa, manera lo siguiente:

1. “Ora bo ta sinta den bo kas”: Hasi esfuerso pa studia Beibel regularmente ku bo yunan na kas, kisas un biaha pa siman, meskos ku un otro persona a studia ku bo. Testigunan di Yehova ta saka publikashonnan basá riba Beibel spesialmente pa eduká yu di tur edat.

2. “Ora bo ta kana riba kaminda”: Papia ku bo yunan informalmente tokante Yehova, meskos ku bo ta siña nan di e kosnan ku nan mester por hasi den bida òf duna nan guia den un manera informal.

3. “Ora bo ta bai drumi”: Hasi orashon ku bo yunan tur anochi.

4. “Ora bo ta lanta”: Hopi famia a haña resultadonan satisfaktorio for di nan konsiderashon di un teksto di Beibel tur mainta. Testigunan di Yehova ta usa e foyeto Eksaminando e Skritura Diariamenteb komo base pa esaki.

Den paisnan den desaroyo, hopi mayor ta hasi bastante esfuerso pa garantisá ku un di nan yunan ta haña un bon edukashon. Den e manera ei e yu lo por sòru pa su mayornan ora nan bira bieu. Sin embargo, si bo studia Beibel i yuda tur bo yunan hasi meskos, lo bo gana e konosementu ku lo permití tantu abo komo henter bo famia biba pa semper.

Lo yega e dia ku nos lo haña sa tur kos? Nò. Segun ku nos tera ta sigui su biahe atraves di e universo interminabel, nos lo sigui gana konosementu. Sí, Eklesiastés 3:11 ta bisa: “El [Dios] a traha tur kos apropiá na su tempu. Tambe el a pone eternidat den nan kurason, sin ku hende por haña sa e trabou ku Dios a hasi for di prinsipio te na fin.” Ganamentu di konosementu ta un plaser ku lo no kaba nunka.

[Nota]

[Komentario na página 5]

‘Esaki ta nifiká bida eterno, ku nan ta gana konosementu . . .’

[Plachinan na página 7]

Yuda bo famia gana konosementu awor i pa semper