Konsiderá Esun Ku A Perseverá

1-3. (a) Kon pisá Hesus su agonia tabata den e hòfi di Getsemané, i kiko tabata e kousa? (b) Kiko nos por bisa di Hesus su ehèmpel di perseveransia, i ki preguntanan ta surgi?

E PRESHON tabata hopi fuerte. Nunka promé Hesus a eksperensiá asina tantu angustia mental i emoshonal. E tabata den e último oranan di su bida riba tera. Huntu ku su apòstelnan el a yega na un lugá ku nan tabata konosé bon, e hòfi di Getsemané. El a reuní hopi biaha ku nan einan. Sin embargo, e anochi aki el a sinti e nesesidat di ta su so un ratu. El a laga su apòstelnan i a bai mas leu den e hòfi. Anto hinkando rudia el a kuminsá hasi orashon. Su orashon tabata asina intenso, i el a drenta asina un ansha ku su sodó a bira “manera gotanan di sanger ku tabata kai abou na suela.”—Lukas 22:39-44.

² Dikon Hesus tabata asina angustiá? Ta bèrdat ku e tabata sa ku denter di poko lo el a konfrontá sufrimentu físiko ekstremo, pero esei no tabata e motibu di su angustia. Su mente tabata riba asuntunan hopi mas importante. E tabata profundamente preokupá pa e santifikashon di e nòmber di su Tata i a rekonosé ku futuro di e famia humano a dependé di su fieldat. Hesus tabata sa kon importante tabata pa el a perseverá. Si el a frakasá, lo el a trese gran reproche riba e nòmber di Yehova. Pero Hesus no a frakasá. Mas despues riba e dia ei, e hòmber ku a yega di pone e mihó ehèmpel di perseveransia na mundu, djis promé ku el a hala su último rosea, a grita triunfantemente: “Ta kumplí!”—Juan 19:30.

³ Beibel ta urgi nos pa “konsiderá” Hesus su ehèmpel di perseveransia. (Hebreonan 12:1-3) P’esei tin algun pregunta importante ku ta surgi: Kua ta algun prueba ku Hesus a wanta ku perseveransia? Kiko a yud’é perseverá? Kon nos por sigui su ehèmpel? Pero promé ku nos kontestá e preguntanan aki, laga nos analisá kiko perseveransia ta enserá.

4, 5. (a) Kiko “perseveransia” ta nifiká? (b) Kon nos por ilustrá ku perseveransia ta enserá mas ku djis pasa den difikultatnan inevitabel?

⁴ De bes en kuando, nos tur ta “wòrdu afligí pa medio di vários prueba.” (1 Pedro 1:6) Pero e echo ku nos ta pasando den un prueba ta nifiká ku nos ta demostrando perseveransia? No nesesariamente. E sustantivo griego pa “perseveransia” ta nifiká “e kapasidat di soportá kosnan òf di no entregá apesar di difikultat.” Relashoná ku e tipo di perseveransia ku eskritornan bíbliko ta referí na dje, un komentarista bíbliko a splika: “Ta e spiritu ku por soportá kos, no simplemente ku resignashon, sino ku speransa ferviente . . . Ta e kualidat ku ta tene un hende riba pia ku kara pa bientu. Ta e birtut ku por transformá e prueba di mas difísil den gloria, pasobra mas ayá di e doló e ta mira e meta.”

⁵ Pues anto, perseveransia no ke men djis pasa den difikultatnan inevitabel. Den e sentido bíbliko, perseveransia ta enserá firmesa, kedando ku e aktitut mental korekto i ku un punto di bista yen di speransa apesar di prueba. Pensa riba e siguiente ilustrashon: Dos hòmber ta será den prizon den kondishonnan similar pero pa motibunan kompletamente distinto for di otro. Unu ta un kriminal komun i koriente, ku ta sinta su sentensia ku renkor, resignashon i kara tristu. E otro—un kristian berdadero enkarselá pa su fieldat—ta para firme i ta mantené un aktitut positivo pasobra e ta mira su situashon komo un oportunidat pa demostrá su fe. Siguramente nos no por konsiderá e kriminal komo un ehèmpel di perseveransia, miéntras ku e kristian fiel sí ta un ehèmpel di e kualidat ekselente aki.—Santiago 1:2-4.

 6. Kon nos ta kultivá perseveransia?

⁶ Perseveransia ta esensial si nos kier alkansá salbashon. (Mateo 24:13) Sin embargo, nos no ta nase ku e kualidat sumamente importante aki. Perseveransia ta algu ku nos mester kultivá. Kon? Romanonan 5:3 ta bisa: “Tribulashon ta produsí perseveransia.” Pues, si di bèrdat nos ke desaroyá perseveransia, nos no por kobardiá pa tur tèst òf prueba di fe. Mas bien, nos tin ku konfrontá nan. Nos ta kultivá perseveransia ora ku dia tras dia nos ta konfrontá i vense pruebanan grandi i chikí. Kada prueba ku nos superá ta fortalesé nos pa enfrentá e siguiente. Klaru ku nos no ta desaroyá perseveransia riba nos mes. Nos ta dependé di “e forsa ku Dios ta duna.” (1 Pedro 4:11) Pa yuda nos keda firme, Yehova a duna nos e mihó yudansa ku tin: e ehèmpel di su Yu. Laga nos analisá Hesus su registro perfekto di perseveransia.

7, 8. Kiko Hesus a wanta segun ku su bida terenal tabata yega su fin?

⁷ Segun ku Hesus tabata yega na fin di su bida riba tera, el a soportá tur tipo di krueldat. Fuera di e strès mental ekstremo ku el a pasa aden durante su último anochi, pensa tambe riba e desepshon ku lo e mester a sinti i e humiashon ku el a sufri. Un kompañero íntimo a traishon’é, su amigunan mas yegá a bandon’é, i el a keda sometí na un huisio ilegal durante kua miembronan di e korte religioso di mas haltu di e pais a hasi bofon di dje, skupié i dal e moketa. Sin embargo, el a wanta tur esaki ku dignidat, serenidat i fortalesa.—Mateo 26:46-49, 56, 59-68.

⁸ Hesus a wanta tambe bastante sufrimentu físiko durante su último oranan. Nan a sut’é, i segun ekspertonan esei tabata un hala di sota ku a kousa “strepinan di kòrtá profundo i bastante pèrdida di sanger.” Nan a klab’é na staka, un forma di ehekushon ku a kousa “un morto lento kompañá pa e máksimo doló i sufrimentu.” Pensa riba e agonia ku Hesus lo mester a eksperensiá ora ku nan a pasa klabunan grandi dor di su man i pia pa peg’é na e staka. (Juan 19:1, 16-18, NW) Imaginá bo e doló inmenso ku el a sinti ora ku nan a pone e staka para règt i e peso di su kurpa tabata kologá na e klabunan i su lomba tur habrí tabata feila kontra e staka. Anto el a wanta e sufrimentu físiko teribel aki miéntras ku e tabata karga e peso mental ku nos a deskribí na kuminsamentu di e kapítulo aki.

 9. Kiko hisa nos “staka di tormento” i sigui Hesus ta enserá?

⁹ Komo siguidó di Kristu, kiko nos kisas tin ku wanta? Hesus a bisa: “Si un hende kier bin mi tras, lag’é . . . tuma su staka di tormento i sigui mi kontinuamente.” (Mateo 16:24, NW) Aki Hesus a usa e ekspreshon “staka di tormento” den sentido figurativo pa representá sufrimentu, bèrgwensa òf asta morto. Sigui Kristu no ta un kaminda fásil. Nos normanan kristian ta hasi nos diferente. E mundu aki ta odia nos pasobra nos no ta parti di dje. (Juan 15:18-20; 1 Pedro 4:4) Sin embargo, nos ta dispuesto pa hisa nos staka di tormento. Sí, nos ta preferá di sufri, asta muri, ku stòp di sigui nos Gran Ehèmpel.—2 Timoteo 3:12.

10-12. (a) Dikon e imperfekshon di e personanan rònt di Hesus a pone su perseveransia na prueba? (b) Kua tabata algun di e situashonnan difísil ku Hesus a soportá?

¹⁰ Durante Hesus su ministerio el a konfrontá otro pruebanan kousá pa e imperfekshon di e hendenan rònt di dje. Kòrda ku e tabata e “trahadó eksperto” ku Yehova a usa pa krea e tera i tur bida ku tin riba dje. (Proverbionan 8:22-31) Pues, Hesus tabata sa kiko ta Yehova su propósito pa humanidat; hende lo mester a reflehá Yehova su kualidatnan i disfrutá di bida den salú perfekto. (Génesis 1:26-28) Pero ora Hesus tabata riba tera, el a mira e resultado trágiko di piká for di un otro perspektiva, esta, komo hende, ya ku e mes por a eksperensiá sintimentu i emoshon humano. Lo mester tabata hopi doloroso p’e pa mira personalmente kon leu hende a kai for di e perfekshon original ku Adam ku Eva tabatin! Pues Hesus a konfrontá un prueba di perseveransia. Akaso lo el a deskurashá i entregá, konsiderando hende pekaminoso komo un kaso pèrdí? Laga nos mira.

¹¹ E indiferensia di parti di e hudiunan a hasi Hesus asina tristu ku el a yora abiertamente. Pero el a laga nan aktitut indiferente fria su selo òf stòp e di prediká? Al kontrario, el a “siña hende tur dia den tèmpel.” (Lukas 19:41-44, 47) El a keda masha “tristu” ora el a mira kon duru kurason di e fariseonan tabata, ku a vigil’é pa mira si lo el a kura un sierto hòmber riba sabat. Akaso Hesus a laga e opositornan ei, ku tabata hustu den nan mes bista, intimid’é? Apsolutamente ku nò! El a para firme i a kura e hòmber, anto meimei di snoa!—Marko 3:1-5.

¹² Tabatin un kos mas ku lo mester tabata un prueba pa Hesus, esta, e debilidatnan di su disipelnan mas íntimo. Manera nos a siña den Kapítulo 3, nan a demostrá un deseo persistente pa prominensia. (Mateo 20:20-24; Lukas 9:46) Hesus a konsehá nan mas ku un biaha ku nan mester tabata humilde. (Mateo 18:1-6; 20:25-28) Sin embargo, nan a tarda pa apliká e konseho ei. Figurá bo, e último anochi ku e tabata ku nan, “a lanta un diskushon” entre nan tokante kua di nan tabata esun di mas grandi! (Lukas 22:24) Akaso Hesus a legumai nan, rasonando ku lo e no por a logra nada mas ku nan? Nò. Manera semper ku pasenshi, el a keda positivo i ku speransa, i a sigui mira e bon den nan. E tabata sa ku den nan kurason nan a stima Yehova i realmente kier a hasi Su boluntat.—Lukas 22:25-27.

13. Ki pruebanan similar na esnan ku Hesus a wanta nos lo por konfrontá?

¹³ Kisas nos ta konfrontá pruebanan similar na esnan ku Hesus a wanta. Por ehèmpel, podisé nos ta topa hende ku no ta interesá den e mensahe di Reino òf kisas ta bai asta kontra di dje. Nos lo laga e reakshonnan negativo ei deskurashá nos, òf nos lo sigui prediká ku selo? (Tito 2:14) Podisé e imperfekshonnan di nos rumannan kristian ta pone nos na prueba. Kisas un palabra papiá sin pensa òf un trato kon-ku-ta ta ofendé nos. (Proverbionan 12:18) Nos lo laga e imperfekshonnan di nos rumannan den fe pone nos bira lomba pa nan, òf nos lo sigui tolerá nan faltanan i buska e bon den nan?—Kolosensenan 3:13.

14. Kua ta e dos faktornan ku a yuda Hesus para firme?

¹⁴ Kiko a yuda Hesus para firme i mantené su integridat apesar di tur humiashon, desepshon i sufrimentu ku el a konfrontá? Tin dos faktor sobresaliente ku a sostené Hesus. Di promé, el a wak ariba i a apelá na “e Dios di perseveransia.” (Romanonan 15:5) Di dos, el a wak padilanti i a konsentrá riba loke su perseveransia lo a hiba na dje. Laga nos konsiderá e faktornan aki un pa un.

15, 16. (a) Kiko ta mustra ku Hesus no a stèns riba su propio forsa pa perseverá? (b) Ki konfiansa Hesus tabatin den su Tata, i dikon?

¹⁵ Ounke Hesus tabata e Yu perfekto di Dios, e no a stèns riba su propio forsa pa perseverá. Mas bien, el a akudí na su Tata selestial i a pidi su yudansa den orashon. Apòstel Pablo a skirbi: “[Kristu] tabata ofresé orashon i súplika ku gran sklamashon i lágrima na Esun ku ta kapas pa salb’é for di morto.” (Hebreonan 5:7) Tuma nota ku Hesus a “ofresé” no solamente orashon sino tambe súplika. E ekspreshon “súplika” ta referí na un petishon intenso i di kurason, sí, el a roga pa haña yudansa. Na e idioma griego original, “súplika” ta den un forma plural, lokual ta indiká ku Hesus a roga Yehova mas ku un biaha. De echo, den e hòfi di Getsemané, bes tras bes Hesus a hasi orashon fervientemente.—Mateo 26:36-44.

¹⁶ Hesus tabatin e pleno konfiansa ku Yehova lo a kontestá su súplikanan, pasobra e tabata sa ku su Tata ta Esun “ku ta skucha orashon.” (Salmo 65:2) Durante su eksistensia prehumano, e Yu primogénito a mira kon su Tata a reakshoná riba e orashonnan di su sirbidónan leal. Por ehèmpel, e Yu tabata testigu den shelu ora ku Yehova a manda un angel kontestá e orashon sinsero di profeta Daniel, asta promé ku Daniel a kaba di resa. (Daniel 9:20, 21) Pues anto, kon e Tata lo por a keda sin kontestá ora ku su Yu unigénito a drama su kurason “ku gran sklamashon i lágrima”? Yehova a kontestá e ruegonan di su Yu i a manda un angel fortales’é pa e por a perseverá bou di e prueba.—Lukas 22:43.

17. Pa nos perseverá, dikon nos mester akudí na shelu, i kon nos por hasi esei?

¹⁷ Pa por perseverá, nos tambe tin ku akudí na shelu, na e Dios ku ta “duna forsa.” (Isaias 40:29) Si e Yu perfekto di Dios a sinti e nesesidat di supliká Yehova pa yudansa, kuantu mas nos mester hasié! Meskos ku Hesus, nos kisas tin ku roga Yehova bes tras bes. (Mateo 7:7, NW) Ounke nos no ta spera bishita di un angel, di un kos sí nos por ta sigur: Nos Dios amoroso lo reakshoná riba e ruegonan di kristiannan leal ku “ta sigui den súplika i orashon di dia i anochi.” (1 Timoteo 5:5) Sin importá ki pruebanan nos por ta konfrontá—sea ta malesa, morto di un ser kerí òf persekushon serka opositor—Yehova lo kontestá nos orashonnan ferviente den kua nos ta pidi e sabiduria, kurashi i fortalesa pa perseverá.—2 Korintionan 4:7-11; Santiago 1:5.

18. Kon Hesus a wak mas ayá di su sufrimentu na loke tabatin su dilanti?

¹⁸ E di dos faktor ku a yuda Hesus perseverá ta ku el a wak padilanti, mas ayá di e sufrimentu na loke tabata sper’é. Beibel ta bisa di Hesus: “Pa motibu di e goso poní su dilanti, [el] a soportá e sufrimentu di [“un staka di tormento,” NW].” (Hebreonan 12:2) E ehèmpel di Hesus ta ilustrá kon speransa, goso i perseveransia ta traha huntu. Nos por resumié asin’aki: Speransa ta hiba na goso, i goso na perseveransia. (Romanonan 15:13; Kolosensenan 1:11) Hesus tabatin vários ekspektativa maravioso su dilanti. E tabata sa ku su fieldat lo a yuda vindiká e soberania di su Tata i habri kaminda pa e kumpra e famia humano bèk for di piká i morto. Ademas, Hesus tabatin e speransa di goberná komo Rei i sirbi komo Sumo Saserdote, i asina trese mas bendishon ainda pa hende obedesidu. (Mateo 20:28; Hebreonan 7:23-26) Hesus a haña un goso inmenso ora el a konsentrá riba e ekspektativanan i speransa ku tabatin su dilanti, i e goso ei en buèlta a yud’é perseverá.

19. Ora nos ta konfrontá pruebanan di nos fe, kon nos por laga speransa, goso i perseveransia traha huntu na nos fabor?

¹⁹ Meskos ku Hesus, nos tin ku laga speransa, goso i perseveransia traha huntu na nos fabor. Apòstel Pablo a bisa: ‘Regosihá den speransa.’ Anto el a agregá: ‘Perseverá den tribulashon.’ (Romanonan 12:12) Abo ta enfrentá un prueba pisá di bo fe na e momentonan aki? Hasi esfuerso pa wak padilanti. No pèrdè for di bista ku bo perseveransia lo trese alabansa pa e nòmber di Yehova. Mantené e presioso speransa di Reino bon kla den bo mente. Mira bo mes den Dios su binidero mundu nobo, i imaginá bo mes ta eksperensiá e bendishonnan di e Paradeis. Ora bo ta antisipá kumplimentu di e kosnan maravioso ku Yehova a primintí—inkluso e vindikashon di su soberania, eliminashon di maldat for di riba tera i fin di malesa i morto—esei lo yena bo kurason ku goso. Anto e goso ei lo por yuda bo perseverá apesar di kualke prueba ku bo por haña bo kuné. Kualke sufrimentu den e sistema di kosnan aki en bèrdat ta ‘leve i pa un momento so,’ si kompará nan ku e realisashon di e speransa di Reino.—2 Korintionan 4:17.

20, 21. Pa loke ta perseveransia, kiko Yehova ta spera di nos, i kiko mester ta nos determinashon?

²⁰ Hesus tabata sa ku ser su siguidó lo ta un reto, un bida ku lo a rekerí perseveransia. (Juan 15:20) E tabata prepará pa hiba delantera, sabiendo ku su ehèmpel lo a fortalesé otro hende. (Juan 16:33) Ta bèrdat ku Hesus a pone e ehèmpel perfekto di perseveransia, pero nos ta leu for di perfekshon. Kiko Yehova ta spera di nos? Pedro a splika: “Kristu a sufri pa boso, lagando un modelo pa boso sigui su pasonan ku sumo kuidou i atenshon.” (1 Pedro 2:21, NW) Den e manera ku Hesus a trata ku su pruebanan, el a laga “un modelo,” un ehèmpel pa nos imitá.a E registro di perseveransia ku el a traha por ser kompará ku “pasonan,” es desir, marka di pia. Nos no por sigui e pasonan ei perfektamente, pero sí nos por siguié ku “sumo kuidou i atenshon.”

²¹ Pues anto, laga nos ta determiná pa sigui e ehèmpel di Hesus lo mihó ku nos por. No lubidá nunka ku mas presis nos sigui den e pasonan di Hesus, mihó prepará nos lo ta pa perseverá “te na fin,” sea fin di e sistema di kosnan bieu aki òf fin di nos bida aktual. Nos no sa kua lo yega promé, pero un kos sí nos sa: Pa eternidat, Yehova lo rekompensá nos pa nos perseveransia.—Mateo 24:13.