“Mi Ta . . . Humilde di Kurason”

1-3. Den ki manera Hesus a hasi su entrada den Yerusalèm, i dikon algun hende den e multitut di mirónes lo a keda sorprendí?

YERUSALÈM tabata aribabou. Un gran hòmber tabata biniendo! Pafó di e stat, hendenan a bai para kant’i kaminda. Nan tabata ansioso pa yama e hòmber aki bonbiní, pasobra tabatin hende ta bisa ku e hòmber aki ta un heredero di Rei David i e Gobernante legítimo di Israel. Basta hende a bin ku rama di palma pa waya komo saludo, otronan a habri paña i rama di mata abou pa hasi e kaminda mas suave p’e. (Mateo 21:7, 8; Juan 12:12, 13) Hopi hende lo tabata puntra nan mes kon lo el a hasi su entrada den e stat.

² Tin hende kisas a spera un entrada masha luhoso i magnífiko. Kasi sigur nan tabata sa di hòmbernan importante ku a hasi un entrada mahestuoso. Por ehèmpel, David su yu hòmber Absalon a proklamá su mes komo rei i a laga 50 hòmber kore dilanti di su garoshi. (2 Samuel 15:1, 10) E gobernante romano Julio Cesar tabata ke mas fanfare ainda; un biaha el a enkabesá un proseshon triunfal te na e kapitolio romano, kompañá pa 40 olefante ku lampi kargá! Sin embargo, e hendenan di Yerusalèm tabata spera un hòmber hopi mas prominente. Sea ku e multitut di hende tabata plenamente konsiente di esei òf nò, esaki tabata e Mesias, e hòmber mas importante ku hamas a biba. Pero ora ku e futuro Rei aki a drenta e stat, algun hende lo a keda sorprendí.

³ Nan no a mira ningun garoshi di guera, ningun koredó, ningun kabai, i sigur ningun olefante. Nò, Hesus a bin riba un simpel bestia di karga, un buriku.a Ni é ni e bestia riba kua e tabata kore no tabata dòrná ku pañanan luhoso. En bes di un sia kostoso, tabatin algun paña ku e siguidónan íntimo di Hesus a pone riba lomba di e buriku. Dikon Hesus a skohe pa drenta Yerusalèm na un manera asina humilde, miéntras ku hòmbernan muchu ménos prominente a insistí pa hasi un entrada ku muchu mas splendor i seremonia?

 4. Kiko Beibel a profetisá tokante e manera ku e Rei Mesiániko lo a drenta Yerusalèm?

⁴ Hesus tabata kumpli ku un profesia: “Regosihá grandemente . . . Grita ku húbilo, o yu muhé di Yerusalèm! Ata bo rei ta bin serka bo; e ta hustu i ta trese salbashon, humilde i sintá riba un buriku.” (Zakarias 9:9) E profesia aki a mustra ku e Ungí di Dios, e Mesias, lo a revelá su mes un dia na e pueblo di Yerusalèm komo e Rei apuntá pa Dios. Ademas, e manera ku e lo a hasié—inkluso e bestia ku e lo a skohe pa kore ariba—lo a revelá un bunita kualidat di su kurason, esta, humildat.

 5. Kiko ta hasi e humildat di Hesus asina konmovedor, i dikon ta importante pa nos siña imitá Hesus den esaki?

⁵ Hesus su humildat ta un di su kualidatnan di mas atraktivo, unu ku ta konmové nos profundamente ora nos pensa riba dje. Manera nos a trata den e kapítulo anterior, ta Hesus so ta “e kaminda, i e bèrdat, i e bida.” (Juan 14:6) Ta bisto ku ningun di e míles di miónes di hendenan ku a yega di biba riba e mundu aki a yega di ta dje importante ei manera e Yu di Dios. Sin embargo, nos no ta haña den Hesus ni sikiera un rastro di e orguyo òf arogansia ku tin den masha hopi hende imperfekto. Pa nos por ta siguidó di Kristu, nos tin ku lucha kontra e tendensia di ta orguyoso. (Santiago 4:6) No lubidá ku Yehova ta odia arogansia. Pues anto, ta masha importante pa nos siña imitá Hesus su humildat.

 6. Kiko ta humildat, i kon Yehova por tabata sa ku e Mesias lo ta humilde?

⁶ Humildat ta un birtut ku ta nèt lo kontrario di orguyo òf arogansia. E ta un kualidat ku ta originá den un persona su kurason i ta ser manifestá na su manera di papia, di komportá su mes i di trata ku otro hende. Kon Yehova por tabata sa ku e Mesias lo ta humilde? E tabata sa ku su Yu a reflehá su propio ehèmpel perfekto di humildat. (Juan 10:15) Ademas, Yehova a mira e humildat di su Yu den akshon. Kon asina?

7-9. (a) Kon Miguel a demostrá humildat den su konfrontashon ku Satanas? (b) Kon kristiannan lo por imitá Miguel den mustra humildat?

⁷ E buki di Hudas ta revelá un ehèmpel fasinante: “E arkangel Miguel, ora ku e tabata pleita ku Diabel i tabata diskutí tokante di e kurpa di Moisés, no a tribi pronunsiá un huisio di maldishon kontra dje, ma a bisa: ‘SEÑOR reprendé bo.’” (Hudas 9) Miguel ta un nòmber ku ta ser apliká na Hesus—tantu promé komo despues di su bida riba tera—den su papel komo arkangel, òf hefe di Yehova su ehérsito selestial di angel.b (1 Tesalonisensenan 4:16) Pero tuma nota kon Miguel a atendé e konfrontashon aki ku Satanas.

⁸ E relato di Hudas no ta bisa nos kiko Satanas kier a hasi ku e kurpa di Moisés. Pero nos por tin sigur ku Diabel tabatin kualke propósito malisioso na mente. Podisé e kier a usa e restunan mortal di e hòmber fiel ei pa fomentá adorashon falsu. Ounke Miguel a resistí Satanas su plan malisioso, el a demostrá a la bes un dominio propio remarkabel. Satanas siguramente a meresé un reprendementu. Pero Miguel, kende na momento di e diskushon ku Satanas ainda no a risibí “tur huisio” òf outoridat pa husga, a sinti ku ta for di Yehova Dios so tal huisio lo mester a bin. (Juan 5:22) Komo arkangel, Miguel tabatin hopi outoridat. Pero tòg humildemente el a laga e asuntu den man di Yehova en bes di purba poderá di mas outoridat. Fuera di humildat, el a demostrá tambe di ta modesto, es desir, konsiente di su limitashonnan.

⁹ Hudas a ser inspirá pa skirbi tokante e insidente aki pa un motibu. Tabatin algun kristian den tempu di Hudas ku lamentablemente no tabata humilde. Ku arogansia nan tabata “papia malu di tur loke nan no [a] komprondé.” (Hudas 10) Komo hende imperfekto, ta masha fásil pa laga nos orguyo dominá nos! Kon nos ta reakshoná ora nos no ta komprondé algu ku ta ser hasí den e kongregashon kristian, kisas algu ku tin keber ku un desishon ku e kuerpo di ansiano a tuma? Si nos kuminsá papia kosnan negativo i krítiko, sin ku nos por ta na haltura di tur e faktornan tras di tal desishonnan, nos lo no ta demostrando un falta di humildat? Na lugá di hasi esei, laga nos imitá Miguel, esta Hesus, i apstené di husga asuntunan pa kua Dios no a duna nos e outoridat.

10, 11. (a) Kiko ta remarkabel di e echo ku Dios su Yu tabata dispuesto pa aseptá e asignashon pa bin na tera? (b) Kon nos por imitá Hesus su humildat?

¹⁰ Dios su Yu a demostrá humildat tambe dor di aseptá e asignashon pa bin na tera. Pensa riba loke e tabatin ku laga atras. E tabata e arkangel. E tabata tambe “e Palabra,” es desir, e Bosero di Yehova. (Juan 1:1-3) E tabata biba den shelu, den Yehova su “habitashon santu i glorioso.” (Isaias 63:15) Apesar di tur esei, e Yu “a bandoná su mes gloria, tumando forma di un sirbidó, siendo trahá den e semehansa di hende.” (Filipensenan 2:7) Anto pensa riba loke su asignashon riba tera a enserá! Su bida a ser transferí na e matris di un bírgen hudiu, kaminda el a desaroyá durante nuebe luna pa bira un beibi humano. El a nase komo un kriatura indefenso den kas di un karpinté pober. E mester a siña kana komo beibi i pokopoko krese bira un mucha chikí, despues un tiner. Ounke e mes tabata perfekto, durante henter su hubentut e mester a keda sumiso na mayornan humano imperfekto. (Lukas 2:40, 51, 52) Ki un humildat ekstraordinario!

¹¹ Nos por imitá Hesus su humildat i aseptá di buena gana asignashonnan di sirbishi ku tin biaha por parse inferior? Por ehèmpel, nos asignashon di prediká e bon nobo di e Reino di Dios por parse inferior ora ku hende ta reakshoná na un manera indiferente, ku bofon òf agresivo. (Mateo 28:19, 20) Pero si nos perseverá den e trabou aki, nos por yuda salba bida. Asta si no yega asina leu, nos lo siña manifestá mas humildat, i nos lo ta siguiendo e pasonan di nos Shon, Hesukristu.

12-14. (a) Kon Hesus a demostrá humildat ora ku hende a elogi’é? (b) Den ki maneranan Hesus a trata humildemente ku otro hende? (c) Kiko ta mustra ku Hesus su humildat no tabata djis un formalidat òf kortesia?

¹² Hesus su ministerio riba tera, for di kuminsamentu te final, tabata marká pa humildat. El a demostrá su humildat den e manera ku el a dirigí tur alabansa i gloria na su Tata. Tabatin biaha ku hende a elogiá Hesus pa e sabiduria di su palabranan, pa e poder di su milagernan, asta pa su karakter bondadoso. Pero bes tras bes, na lugá di aseptá e gloria ei, Hesus a dirigié na Yehova.—Marko 10:17, 18; Juan 7:15, 16.

¹³ Hesus a demostrá humildat den e manera ku el a trata hende. De echo, el a splika bon kla ku el a bin na tera, no pa wòrdu sirbí, ma pa sirbi otronan. (Mateo 20:28) El a mustra humildat den su manera suave i rasonabel di trata ku hende. Ora ku su siguidónan a desapunt’é, e no a zundra nan; el a sigui purba di yega na nan kurason. (Mateo 26:39-41) Ora ku e multitutnan a strob’é den su intento di buska un tiki trankilidat, sosiegu i privasidat, e no a manda nan bai; el a sigui duna di su mes, i a siña nan “hopi kos.” (Marko 6:30-34) Ora ku un señora no-israelita tabata blo rog’é pa kura su yu muhé, el a indiká na promé instante ku e no kier a hasi esei. Sin embargo, e no a nenga na un manera rabiá; al final el a hasié tòg en bista di e muhé su fe ekstraordinario, manera nos lo bai trata den Kapítulo 14.—Mateo 15:22-28.

¹⁴ Den masha hopi manera mes, Hesus a kumpli ku loke el a bisa tokante su mes: “Mi ta mansu i humilde di kurason.” (Mateo 11:29) Su humildat no tabata superfisial, un simpel formalidat òf kortesia. El a sali di fondo di su kurason. P’esei ta di komprondé ku Hesus a duna un prioridat haltu na siña su siguidónan pa nan ta humilde!

15, 16. Ki kontraste Hesus a menshoná entre e aktitut di gobernantenan di mundu i e aktitut ku su siguidónan mester kultivá?

¹⁵ Hesus su apòstelnan tabata slow den kultivá humildat. Hesus a hañ’é obligá ta purba bes tras bes pa siña nan humildat. Por ehèmpel, na un okashon Santiago ku Juan a laga nan mama pidi Hesus pa primintí ku lo e duna nan un puesto haltu den e Reino di Dios. Modestamente, Hesus a kontestá: “Pa sinta na mi man drechi i na mi man robes, esaki no ta keda na mi pa duna, ma ta pa esnan pa kendenan mi Tata a prepará esei.” E dies otro apòstelnan a tuma Santiago ku Juan “mashá na malu.” (Mateo 20:20-24) Kon Hesus a atendé e problema aki?

¹⁶ El a skual nan na un manera bondadoso, bisando: “Boso sa ku e gobernantenan di e paganonan tin dominio riba nan, i nan shon grandinan ta ehersé outoridat riba nan. Entre boso no t’asina, ma ken ku kier bira grandi entre boso lo ta boso sirbidó, i ken ku kier ta esun di promé entre boso lo ta boso esklabo.” (Mateo 20:25-27) E apòstelnan probablemente a yega di mira kon arogante, ambisioso i egoista “e gobernantenan di e paganonan” por ta. Hesus a mustra ku su siguidónan mester ta diferente for di e tiranonan hambrá pa poder ei. Nan mester tabata humilde. E apòstelnan a kapta e punto?

17-19. (a) Bispu di Hesus su morto, den ki manera memorabel el a siña su apòstelnan un lès tokante humildat? (b) Kua tabata e lès di mas impaktante di humildat ku Hesus a siña otronan tempu ku e tabata hende?

¹⁷ Esei no tabata fásil pa nan. No tabata ni promé ni último biaha ku Hesus a siña nan e lès ei. Mas promé, ora ku nan tabata diskutí tokante kua di nan ta mas grandi, el a pone un mucha meimei di nan i a bisa nan pa nan ta mas manera mucha, ya ku mucha por lo general no tin e orguyo, ambishon i interes pa haña puesto ku ta asina komun entre adultonan. (Mateo 18:1-4) Sin embargo, asta riba e anochi bispu di su morto el a mira ku su apòstelnan te ainda tabata lucha ku orguyo. E ora ei el a siña nan un lès masha memorabel. El a mara un sèrbètè na su sintura i a hasi e trabou di mas humilde, algu ku normalmente ta kriánan tabata hasi den e tempu ei pa bishitantenan di un kas. Hesus a laba pia di kada un di su apòstelnan, inkluso pia di Hudas, kende tabata a punto di traishon’é!—Juan 13:1-11.

¹⁸ Hesus a yuda nan komprondé e punto tokante humildat ora ku el a bisa nan: “Mi a duna boso un ehèmpel.” (Juan 13:15) E lès aki por fin a yega na nan kurason? Wèl, mas lat e anochi ei, nan a bolbe kuminsá diskutí tokante kua di nan tabata esun di mas grandi. (Lukas 22:24-27) Pero Hesus a sigui tene pasenshi ku nan i a siña nan humildemente. Despues el a duna nan e lès di mas impaktante: “El a humiá su mes dor di bira obedesidu te na morto, asta morto na un [staka].” (Filipensenan 2:8) Hesus boluntariamente a someté su mes na un morto humiante, kondená eróneamente komo un kriminal i un blasfemadó. Ku esei e Yu di Dios a demostrá ku e ta úniko, pasobra di tur e kriaturanan di Yehova, e ta esun ku a duna e ehèmpel sublime i perfekto di humildat.

¹⁹ Podisé ta esaki—e último lès di humildat ku Hesus a siña otronan tempu ku e tabata hende—a graba e kualidat di humildat permanentemente den kurason di su fiel apòstelnan. Beibel ta bisa nos ku e hòmbernan aki a sigui traha humildemente pa añanan, asta dékadanan, despues. Kiko di nos?

20. Kon nos por sa si nos ta humilde?

²⁰ Pablo a konsehá kada un di nos: “Laga tin den boso e aktitut aki ku tabatin tambe den Kristu Hesus.” (Filipensenan 2:5) Meskos ku Hesus, nos mester ta humilde. Kon nos por sa si nos tin un kurason humilde? Wèl, Pablo a rekordá nos ku nos no mester “hasi nada ku un aktitut di egoismo òf orguyo, ma ku humildat laga kada un di [nos] konsiderá e otro mas importante ku [nos] mes.” (Filipensenan 2:3) Pues e faktor klave ta kon nos ta mira otro hende na komparashon ku nos mes. Nos tin ku mira nan komo superior, komo mas importante ku nos. Abo lo apliká e konseho ei?

21, 22. (a) Dikon superintendentenan kristian mester ta humilde? (b) Kon nos por demostrá ku nos a bisti nos mes ku humildat?

²¹ Hopi aña despues di Hesus su morto, apòstel Pedro tabata pensa ainda riba e importansia di humildat. Pedro a siña superintendentenan kristian pa kumpli ku nan debernan humildemente, i nunka ehersé dominio riba e karnénan di Yehova. (1 Pedro 5:2, 3) Responsabilidat no ta hustifiká orguyo. Al kontrario, responsabilidat ta oumentá e nesesidat di berdadero humildat. (Lukas 12:48) Klaru ku e kualidat aki ta masha importante no solamente pa superintendentenan sino tambe pa tur kristian.

²² Un kos ta sigur, Pedro nunka mas a lubidá e anochi ei ku Hesus a laba su pia, apesar ku Pedro mes no tabata ke! (Juan 13:6-10) Pedro a skirbi na e kristiannan: “Boso tur, bisti boso mes ku humildat pa ku otro.” (1 Pedro 5:5) E ekspreshon “bisti boso mes” ta duna e idea di un kriá ku ta bisti un frèskòt pa kumpli ku trabou humilde. E frase aki probablemente ta rekordá nos di e okashon ku Hesus a mara un sèrbètè na su sintura promé ku el a hinka rudia pa hasi e tarea di laba pia di su apòstelnan. Si nos ta sigui Hesus, lo por tin kualke asignashon ku Dios ta duna nos ku nos lo konsiderá bou di nos nivel? E humildat di nos kurason lo mester ta bisto pa tur hende, komo si fuera nos tiné bistí.

23, 24. (a) Dikon nos mester resistí kualke inklinashon pa ta arogante? (b) Ki idea eróneo tokante humildat e siguiente kapítulo lo yuda korigí?

²³ Arogansia ta manera venenu. E efektonan por ta devastador. Arogansia ta un kualidat ku por pone e persona di mas talentoso bira inútil den bista di Dios. Di otro banda, humildat por hasi asta e persona di mas ménos bira masha útil pa Yehova. Kultivá e kualidat presioso aki diariamente dor di hasi esfuerso pa kana humildemente den e pasonan di Kristu. Ki maravioso lo ta pa meditá riba e bendishon ku esei lo trese kuné. Pedro a skirbi: “Humiá boso mes anto bou di e man poderoso di Dios, pa e por halsa boso na e tempu apropiá.” (1 Pedro 5:6) Yehova definitivamente a halsa Hesus p’e echo ku el a humiá su mes kompletamente. Nos Dios di igual manera lo tin deleite den rekompensá bo pa bo humildat.

²⁴ Lamentablemente, algun hende ta pensa ku humildat ta un señal di debilidat. Hesus su ehèmpel ta yuda nos mira ki robes e pensamentu ei ta, pasobra e hòmber di mas humilde tabata tambe esun ku mas kurashi. Esaki lo ta e tópiko di e siguiente kapítulo.