Kiko Dios A Hasi pa Bo?

Esei ta un di e tekstonan di Beibel mas konosí i mas usá. Nan ta bisa ku no tin ningun otro versíkulo den Beibel ku ta splika asina bon “e relashon entre Dios ku hende i e kaminda di salbashon.” Pa e motibu ei, na algun pais ta normal pa wak sea “Huan 3:16” òf e palabranan di e teksto ei riba entre otro muraya, bòrchi na eventonan públiko i steker pa bùmper di outo.

Muy probablemente, e hendenan ku ta gusta e teksto ei asina tantu ta konvensí ku nan lo haña salbashon eterno pasobra Dios ta stima nan. Kiko abo ta pensa? Kiko bo ta kere ku Dios a hasi pa mustra ku e ta stima bo?

Hopi hende ta rekonosé ku ta Dios a krea universo, naturalesa i humanidat. Komo ku tur loke ta bibu ta asina kompliká i bon hinká den otro, no tin duda ku mester tin un ser sumamente inteligente ku a krea tur e kosnan ei. Tur dia, un gran kantidat di hende ta yama Dios danki pa e echo ku el a duna nan bida. Ademas, nan ta rekonosé ku nan ta dependé kompletamente di Dios pa tur loke ta nesesario, manera aire, awa, kuminda i tur e siklonan di naturalesa, pa nan por sigui biba i disfrutá di loke nan ta hasi.

Komo ku Dios ta nos Kreador i Esun ku ta mantené nos na bida, ta na su lugá pa gradisié pa tur e kosnan ei. (Salmo 104:10-28; 145:15, 16; Echonan 4:24) Ora nos para pensa riba tur loke Dios ta hasi pa mantené nos na bida, nos ta mira kuantu e ta stima nos. Apòstel Pablo a deskribí e amor ku Dios tin pa nos na e siguiente manera: “[Dios] mes ta duna tur hende bida, rosea i tur kos. Pasobra ta pa medio di dje nos tin bida i ta move i ta eksistí.”—Echonan 17:25, 28.

Pero, tin mas manera ku Dios ta mustra nos su amor. El a duna nos, distinto for di bestia, un kapasidat spesial pa komprondé kosnan spiritual i ta yuda nos satisfasé e nesesidat akí tambe. (Mateo 5:3) Di e manera ei, hende obediente tin e speransa di bira parti di Dios su famia, esta, su “yunan.”—Romanonan 8:19-21.

Manera Huan 3:16 ta sigui bisa, Dios a mustra su amor na nos ora el a manda su Yu, Hesus, na mundu. El a bin siña nos tokante su Dios i Tata i pa muri pa nos. Pero, hopi hende ta atmití ku nan no ta komprondé dikon Hesus mester a muri i di ki manera su morto ta un muestra di Dios su amor pa nos. Laga nos wak kiko Beibel ta bisa tokante esaki.

Nos tur ta bira malu, bira bieu i muri. Pero esei no tabata e propósito di Yehova Dios. El a duna e promé pareha humano e speransa di biba pa semper den Paradeis riba tera. Pero, bou di un kondishon: Nan mester a obedes’é, sino nan lo a muri. (Génesis 2:17) E promé hòmber, Adam, a rebeldiá kontra Dios su outoridat. Komo konsekuensia, el a kumpra morto pa su mes i a pas’é pa su desendientenan. Apòstel Pablo a splika: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.”—Romanonan 5:12.

Sinembargo, Dios “ta stima hustisia.” (Salmo 37:28) P’esei, aunke e no por a pasa por haltu di e piká ku Adam deliberadamente a kometé, Dios no a kondená humanidat pa semper na sufrimentu i morto debí na e desobedensia di un hende. Al kontrario, komo ku Dios a apliká su prinsipio di “bida pa bida,” el a kumpli ku hustisia i a habri kaminda pa hende obediente por haña bida eterno. (Éksodo 21:23) Kon? Wèl, un hende mester a entregá òf sakrifiká su bida. Pero komo ku Adam tabata perfekto, e persona ku lo a sakrifiká su bida tambe mester tabata perfekto.

Ta klaru ku ningun desendiente di Adam no por a ofresé e sakrifisio ei, pero Hesus sí. (Salmo 49:6-9) Hesus a nase sin piká; e tabata perfekto meskos ku Adam tabata na prinsipio. Pues, ora Hesus a entregá su bida, el a libra humanidat for di sklabitut na piká. Di e manera ei, el a duna e desendientenan di e promé pareha humano e oportunidat pa disfrutá di e mesun bida perfekto ku Adam ku Eva tabatin na prinsipio. (Romanonan 3:23, 24; 6:23) Kiko presis nos mester hasi pa por benefisiá di e gran akto di amor ei?

Si nos bai bèk na Huan 3:16, nos ta mira ku e ta bisa “ken ku kere den [Hesus lo] no bai pèrdí, ma tin bida eterno.” Pues, esaki ta nifiká ku bida eterno ta mará na un kondishon: kere den Hesus i obedes’é.

Kisas bo ta puntra bo mes: ‘Kon asina obedesé? Hesus no a bisa ku “ken ku kere den dje” lo haña bida eterno?’ Sí, ta masha esensial pa nos kere, esta, pa nos tin fe. Pero, ta importante pa kòrda ku segun Beibel, fe ta nifiká mas ku djis kere so. Pa un hende por haña aprobashon di Dios, e mester hasi mas ku djis rekonosé ku Hesus ta e Salbador. E mester hasi esfuerso tambe pa apliká loke Hesus a siña hende. Si un hende ta bisa ku e tin fe, pero no ta hasi loke Hesus ta bisa, esei no ta bal nada. Beibel mes ta bisa: “Fe sin obra ta morto.” (Santiago 2:26) Ku otro palabra, loke un hende tin ku hasi ta pone fe den Hesus, es desir, e mester biba na armonia ku su fe.

Pablo a splik’é asin’akí: “Ta e amor di Kristu ta obligá nos pa hasi esaki, ya ku ta na e konklushon akí nos a yega: un hende [Hesus] a muri pa tur . . . , pa esnan ku ta biba no biba mas pa nan mes, ma pa esun ku a muri pa nan i a ser lantá for di morto.” (2 Korintionan 5:14, 15) Gratitut sinsero pa e sakrifisio di Hesus mester konmové nos pa hasi kambio den nos bida. Pues, en bes di biba pa nos mes, nos ta laga egoismo un banda, i nos ta biba pa Hesus, kende a muri pa nos. Ku otro palabra, nos tin ku pone loke Hesus a siña nos na práktika, i esei mester haña prioridat den nos bida. E kambionan ei lo tin un efekto riba nos norma- i balornan, riba nos desishonnan i riba tur loke nos ta hasi. Ki rekompensa lo tin pa esnan ku ta bisa ku nan ta kere, òf tin fe, den Hesus?

E último parti di Huan 3:16 ta menshoná e promesa ku Dios ta duna na tur hende ku ta pone fe den e sakrifisio di reskate i ku ta biba na armonia ku e normanan di Dios. Dios ke pa e hendenan fiel ei “no bai pèrdí, ma tin bida eterno.” Sinembargo, no ta tur hende ku Dios stima ta bai biba na e mesun kaminda.

Un grupo lo haña bida eterno den shelu. Hesus a bisa su fiel disipelnan bon kla ku e ta bai prepará un lugá pa nan den shelu pa nan por goberná kuné einan. (Huan 14:2, 3; Filipensenan 3:20, 21) Esnan ku haña resurekshon pa biba den shelu “lo ta saserdote di Dios i di Kristu, i nan lo reina komo rei huntu kuné pa e 1.000 añanan.”—Revelashon 20:6.

Solamente un kantidat limitá di Kristu su siguidónan lo haña e privilegio ei. Sí, Hesus a bisa: “No tene miedu, tou chikitu, pasobra boso Tata a haña ta bon pa duna boso e Reino.” (Lukas 12:32) Kuantu hende lo forma parti di e “tou chikitu” ei? Revelashon 14:1 i 4 ta bisa: “Mi a wak, i ata e Lamchi [Hesukristu resusitá] pará riba Seru di Sion [selestial], i huntu kuné 144.000 ku tabatin su nòmber i nòmber di su Tata skirbí riba nan frenta. Nan a ser kumprá for di entre humanidat komo e promé frutanan pa Dios i pa e Lamchi.” Kompará ku míles di miónes di hende ku a yega di biba, 144.000 persona en bèrdat ta un “tou chikitu.” Beibel ta bisa ku nan lo ta rei. Pues, ta riba ken nan lo goberná?

Hesus a papia di un otro grupo di hende fiel ku lo benefisiá di e Reino di Dios ku ta den shelu. Manera nos por mira na Huan 10:16, Hesus a bisa: “Mi tin otro karné ku no ta di e kurá akí; nan tambe mi tin ku trese, i nan lo skucha mi stèm, i nan tur lo bira ún tou bou di un wardadó.” E ‘karnénan’ ei tin speransa di biba pa semper riba tera, esta, e mesun speransa ku Adam ku Eva tabatin na prinsipio. Kon nos por sa ku e ‘karnénan’ ei lo bai biba riba tera?

Na hopi okashon Beibel ta bisa kon bida lo ta den Paradeis riba tera. Si bo ta deseá, bo por komprobá esei pa bo mes ora bo lesa e siguiente tekstonan den bo Beibel: Salmo 37:9-11; 46:8 i 9; 72:7, 8 i 16; Isaías 35:5 i 6; 65:21-23; Mateo 5:5; Huan 5:28 i 29 i Revelashon 21:4. E tekstonan ei ta profetisá ku Dios lo pone un fin na guera, hamber, malesa i morto. Ademas, nan ta papia di un tempu ku bon hende lo tin e goso di traha nan propio kas, planta den nan mes kunuku i kria nan yunan den un ambiente pasífiko.a Abo lo deseá di biba den un ambiente asina? Nos tin bon motibu pa kere ku pronto e promesanan ei lo bira realidat.

Si bo para pensa un ratu riba tur loke Dios a hasi pa bo i pa henter humanidat, bo ta mira klaramente ku el a hasi masha hopi kos kaba. Nos tin bida, inteligensia, un sierto grado di salú i tambe tur loke nos tin mester pa keda na bida. I mas importante ainda, manera Huan 3:16 ta siña nos, Dios a duna su Yu komo un sakrifisio di reskate pa nos por haña bendishonnan mas grandi ainda.

Sin duda, bida eterno den un ambiente agradabel di pas, den kua lo no tin malesa, guera, ni hamber, ni morto, lo habri kaminda pa hende disfrutá di felisidat i bendishonnan pa semper. Ta dependé kompletamente di kada un di nos si nos lo disfrutá di e bendishonnan ei den futuro. E pregunta ku ta lanta ta: Kiko abo ta hasiendo pa Dios?