Pregunta di Lector

Jesus a bisa: “Si boso pordoná e picánan di cualkier persona, nan ta keda pordoná; si boso retené esnan di cualkier persona, nan ta keda retené.” E palabranan aki ta nificá cu cristiannan por pordoná picánan?

No tin base bíblico pa concluí cu cristiannan en general, of asta ancianonan nombrá den e congregacionnan, tin autoridad divino pa pordoná picá. Sin embargo, loke Jesus a bisa su disipelnan na Juan 20:23, citá ariba, ta indicá cu Dios a otorgá n’e apostelnan podernan special en coneccion cu esaki. I e declaracion di Jesus ei por ta relacioná cu loke el a bisa na Mateo 18:18 tocante decisionnan celestial.

Cristiannan por pordoná cierto ofensanan, na armonia cu e conseho di apostel Pablo registrá na Efesionan 4:32: “Bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.” Aki Pablo tabata papiando tocante problemanan personal entre cristiannan, manera papiamentu cu falta di consideracion. Nan mester haci esfuerso pa resolvé e asuntunan aki, pordonando otro. Corda Jesus su palabranan: “P’esei, si bo ta treciendo bo ofrenda n’e altar i bo corda ei cu bo ruman tin algu contra bo, laga bo ofrenda ei dilanti dje altar, i bai; promé haci pas cu bo ruman, i despues, ora bo a bolbe bek, ofrecé bo ofrenda.”—Mateo 5:23, 24; 1 Pedro 4:8.

Sin embargo, e contexto di Juan 20:23 ta duna idea cu Jesus tabata refiriendo na picánan mas serio, manera ta ser indicá pa loke el a bisa mas aleu na su auditorio specífico. Laga nos mira pakico.

Riba e dia cu el a ser resucitá, Jesus a aparecé n’e disipelnan den un cuarto cerá na yabi den Jerusalem. E relato ta bisa: “P’esei Jesus a bisa nan atrobe: ‘Pas sea cu boso. Mescos cu e Tata a mandá mi, ami tambe ta manda boso.’ I despues di a bisa esaki el a supla riba nan i a bisa nan: ‘Ricibí spiritu santu. Si boso pordoná e picánan di cualkier persona, nan ta keda pordoná; si boso retené esnan di cualkier persona, nan ta keda retené.’”—Juan 20:21-23.

Probablemente, e disipelnan cu ta ser mencioná tabata principalmente e fiel apostelnan. (Compará cu versículo 24.) Suplando riba nan i bisando, “Ricibí spiritu santu,” Jesus a laga nan sa simbólicamente cu pronto spiritu santu lo ser dramá riba nan. Jesus a sigui bisando cu nan lo tin autoridad en coneccion cu pordon di picánan. Razonablemente, su dos declaracionnan ta relacioná cu otro, esun hibando n’e siguiente.

Cincuenta dia despues di su resureccion, riba e dia di Pentecoste, Jesus a drama spiritu santu. Kico esei a logra? Un cos cu el a logra ta cu esnan cu a ricibí e spiritu a nace di nobo como yunan spiritual di Dios cu e speransa di ser co-gobernante cu Cristo den shelu. (Juan 3:3-5; Romanonan 8:15-17; 2 Corintionan 1:22) Pero e dramamentu ei di spiritu a logra mas cosnan. Algun di esnan cu a ricibié a haña podernan milagroso. Pa medio di esei algun por a papia den idiomanan straño cu nan no tabata conocé. Otronan por a profetisá. Otronan por a sana esnan enfermo of lanta e mortonan na bida.—1 Corintionan 12:4-11.

Siendo cu Jesus su palabranan na Juan 20:22 a señalá n’e dramamentu di spiritu santu aki riba e disipelnan, su palabranan di coneccion tocante pordonamentu di picá ta parce di nificá cu e apostelnan a ricibí di un manera divino mediante un obramentu dje spiritu un autoridad único pa pordoná of keda sin pordoná picá.—Mira The Watchtower di 1 di mart, 1949, página 78.

Bijbel no ta duna nos un relato completo di tur e biahanan cu e apostelnan a usa tal autoridad, pero tampoco e no ta registrá tur caso caminda nan a usa un don milagroso pa papia den lenganan, pa profetisá of pa sana.—2 Corintionan 12:12; Galationan 3:5; Hebreonan 2:4.

Un caso cu a enbolbé autoridad apostólico pa pordoná of keda sin pordoná picánan a enbolbé Ananías i Safira, kendenan a engañá e spiritu. Pedro, kende a tende Jesus expresá loke nos ta lesa na Juan 20:22, 23, a desenmascará Ananías i Safira. Pedro a dirigí su mes promé na Ananías, kende a muri mesora. Ora Safira a yega mas despues i a sconde e engaño, Pedro a proclamá su huicio. Pedro no a pordoná su picá sino a bisa: “Mira! E pianan di esnan cu a dera bo esposo ta na porta, i nan lo cargá bo saca afó.” E tambe a muri mesora.—Echonan 5:1-11.

Den e caso aki apostel Pedro a usa autoridad special pa expresá un retencion specífico di picá, un conciencia milagroso cu Dios lo no a pordoná e picá di Ananías i Safira. Ta parce tambe cu e apostelnan tabatin perspicacia sobrehumano den casonan caminda nan tabata sigur cu picánan a ser pordoná riba e base dje sacrificio di Cristo. Dje manera ei e apostelnan ei dotá cu spiritu por a declará e pordon of retencion di picánan.a

Esaki no kier men cu tur anciano ungí cu spiritu e tempu ei tabatin un autoridad milagroso asina. Nos por mira esei for di loke apostel Pablo a bisa tocante e homber scomulgá for dje congregacion corinto. Pablo no a bisa, ‘Mi ta pordoná e homber ei su picánan’ ni tampoco, ‘Mi sa cu e homber ei a ser pordoná den shelu, p’esei acept’é bek.’ Mas bien, Pablo a insta henter e congregacion pa pordoná e cristian reestablecé aki i mustra amor na dje. Pablo a agregá: “Cualkier cos cu boso bondadosamente ta pordoná cualkier persona, ami tambe ta pordon’é.”—2 Corintionan 2:5-11.

Una bes cu e homber a ser restorá den e congregacion, tur e rumannan cristian por a pordoná den e sentido di no carga rencor contra dje pa loke el a haci. Pero, promé, lo e tabatin cu repentí i ser restorá. Con esei lo a sosodé?

Tin picánan serio cu e ancianonan di congregacion tin cu trata, manera hortamentu, gañamentu, of inmoralidad grosero. Nan ta purba corigí i reprendé malechornan asina, moviendo nan na repentimentu. Pero si un persona ta practicá picá grave sin repentí, e ancianonan aki ta aplicá e instruccion divino pa scomulgá e malechor. (1 Corintionan 5:1-5, 11-13) Loke Jesus a bisa na Juan 20:23 no ta aplicá den casonan asina. E ancianonan aki no tin donnan milagroso dje spiritu, manera e abilidad pa sana esnan físicamente enfermo of lanta e mortonan; e donnan ei a sirbi nan propósito den e promé siglo i despues a terminá. (1 Corintionan 13:8-10) Ademas, ancianonan awe no tin autoridad divino pa pordoná malecho serio den e sentido di declará un malechor serio limpi den bista di Jehova. E clase di pordon aki mester ta riba e base dje sacrificio di rescate, i solamente Jehova por pordoná riba e base ei.—Salmo 32:5; Mateo 6:9, 12; 1 Juan 1:9.

Mescos cu den e caso dje homber den Corinto di antigwedad, ora un persona cu a cometé un picá serio nenga di repentí, e mester ser scomulgá. Si despues e repentí i producí obra cu ta pas cu repentimentu, pordon divino ta posibel. (Echonan 26:20) Den un situacion asina, e Scritura ta duna e ancianonan motibu pa kere cu Jehova en berdad a pordoná e malechor. E ora ei, una bes e persona ser restorá, e ancianonan por yud’é spiritualmente pa bira firme den e fe. E otronan den e congregacion por pordoná den e mésun manera cu e cristiannan corintio a pordoná e homber scomulgá cu a ser restorá e tempu ei.

Atendiendo asuntunan den e manera aki, e ancianonan no ta traha nan mes normanan di huicio. Nan ta aplicá principionan di Bijbel i ta sigui estrechamente proceduranan bíblico cu Jehova a establecé. P’esei, cualkier acto di pordoná of keda sin pordoná di parti dje ancianonan lo ta den e sentido di Jesus su palabranan na Mateo 18:18: “Di berdad mi ta bisa boso, Cualkier cos cu boso mara riba tera lo ta cosnan mará den shelu, i cualkier cos cu boso los riba tera lo ta cosnan di los den shelu.” Nan accionnan simplemente lo reflehá Jehova su punto di bista di cosnan manera Bijbel ta presentá nan.

Consecuentemente, loke Jesus a bisa, manera tin registrá na Juan 20:23, no ta na conflicto cu e resto dje Scritura, sino e ta indicá cu e apostelnan tabatin un autorisacion special relacioná cu pordonamentu, na armonia cu nan papel special den e infancia dje congregacion cristian.

[Nota]