Lidia—Adorador Hospitalario di Dios

FOR di tempunan antiguo, sirbidornan dje Dios berdadero a distinguí nan mes pa nan hospitalidad. (Génesis 18:1-8; 19:1-3) Definí como “amor, cariño, of bondad pa hende straño,” e hospitalidad cu ta brota for di un curason sincero asta awe ta un señal di berdadero cristianismo. Realmente, e ta un rekisito pa tur cu kier adorá Dios aceptablemente.—Hebreonan 13:2; 1 Pedro 4:9.

Un persona cu a desplegá hospitalidad den un manera ehemplar tabata Lidia. E “simplemente a obligá” e misioneronan cristian cu tabata di bishita na Filípos keda den su cas. (Echonan 16:15) Aunke Lidia ta ser mencioná solamente brevemente den e Scritura, e poco cu ta ser bisá tocante dje por ta un animacion pa nos. Den ki manera? Ken Lidia tabata? Kico nos sa tocante dje?

“Bendedor di Púrpura”

Lidia tabata biba na Filípos, e stad principal di Macedonia. Sin embargo, e tabata di Tiatira, un stad dje region di Lidia, den parti west di Asia Menor. P’e motibu aki algun hende ta indicá cu posiblemente “Lidia” tabata un nomber di cariño cu el a ricibí na Filípos. Cu otro palabra, e tabata “e lidiano,” mescos cu e muher na ken Jesucristo a duna testimonio por a ser yamá “e muher samaritano.” (Juan 4:9) Lidia tabata bende “púrpura” of artículonan pintá cu e tiña aki. (Echonan 16:12, 14) Inscripcionnan cu arkeólogonan a descubrí ta duna prueba cu a existí trahadornan di tiña tantu na Tiatira como na Filípos. Ta posibel cu Lidia a muda pa motibu di su trabou, sea pa cuminsá su mes negoshi of como representante di un compania di tiñadornan di Tiatira.

Tiña di color púrpura por ser derivá for di vários fuente. Esun di mas caru a ser sacá for di cierto tipo di cocolishi di laman. Segun e poëta romano di promé siglo, Martial, un mantel dje mihó púrpura di Tiro (un otro centro unda e substancia aki a ser producí) por a costa te cu 10.000 sestercio [moneda romano], of 2.500 denario, e ekivalente di pago di un trahador pa 2.500 dia. Claramente, pañanan asina tabata artículonan di luho cu solamente un par di hende por a cumpra. Pues, Lidia por tabata económicamente bon pará. Sea cual sea e caso, e tabata den e posicion pa ofrecé hospitalidad na apostel Pablo i su compañeronan—Lucas, Sílas, Timoteo i tal bes otronan.

Pablo Su Predicacion na Filípos

Rond di aña 50 E.C., Pablo a pone pia pa promé biaha na Europa i a cuminsá predicá na Filípos.a Ora el a yega den un stad nobo, Pablo tabatin e custumber di bishitá e snoa pa predicá promé n’e hudiunan i prosélitonan cu tabata reuní ei. (Compará cu Echonan 13:4, 5, 13, 14; 14:1.) Sin embargo, segun algun fuente di informacion, ley romano a prohibí e hudiunan di practicá nan religion den e “límitenan sagrado” di Filípos. P’esei, despues di a pasa “algun dia” ei, riba e dia di sabat e misioneronan a haña un lugá cantu di un riu pafó dje stad unda ‘nan a pensa cu tabatin un lugá di oracion.’ (Echonan 16:12, 13) Esaki aparentemente tabata Riu Gangites. Ei e misioneronan a haña solamente hende muher, di cua un di nan tabata Lidia.

“Un Adorador di Dios”

Lidia tabata “un adorador di Dios,” pero probablemente e tabata un persona cu a combertí na hudaismo en busca di e berdad religioso. Aunke e tabatin un bon trabou, Lidia no tabata materialista. Mas bien, el a reservá tempu pa cosnan spiritual. “Jehova a habri su curason ampliamente p’e presta atencion n’e cosnan cu Pablo tabata papia,” i Lidia a aceptá e berdad. Realmente, “e i su famia a bautisá.”—Echonan 16:14, 15.

Bijbel no ta specificá ken e otro miembronan dje cas di Lidia tabata. Siendo cu no tin mencion di un esposo, kisas e tabata soltera of biuda. Tal bes “su famia” tabata consistí di parientenan, pero e término por a implicá tambe esclabonan of criánan. Sea cual sea e caso, Lidia a compartí celosamente e cosnan cu el a siña cu esnan cu tabata biba cuné. I ki un goso e mester a haña ora nan a kere i a aceptá e fe berdadero!

“E Simplemente A Obligá Nos di Aceptá”

Promé cu nan a topa Lidia, tal bes e misioneronan tabatin cu contentá nan cu posadanan obtené riba nan propio gastu. Pero Lidia tabata contentu cu e por a ofrecé acomodacion alternativo. Sin embargo, e echo cu e tabatin cu insistí ta indicá cu Pablo i su compañeronan a ofrecé cierto resistencia. Pakico? Pablo tabata kier a ‘percurá e bon nobo sin costo, afin di no abusá di su autoridad’ i no bira un carga pa ningun hende. (1 Corintionan 9:18; 2 Corintionan 12:14) Pero Lucas ta agregá: “Awor ora e i su famia a bautisá, el a bisa cu súplica: ‘Si boso a husga cu mi ta fiel na Jehova, drenta den mi cas i keda.’ I e simplemente a obligá nos di aceptá.” (Echonan 16:15) Lidia tabata masha preocupá tocante ser fiel na Jehova, i ofrecé hospitalidad aparentemente tabata un evidencia di su fe. (Compará cu 1 Pedro 4:9.) Ki un ehempel excelente! Nos tambe ta usa nos posesionnan pa promové interesnan dje bon nobo?

E Rumannan na Filípos

Ora Pablo i Sílas a ser librá for di prizon despues dje episodio cu a enbolbé e criá poseí pa demoño, nan a regresá n’e cas di Lidia, unda nan a haña algun ruman. (Echonan 16:40) Creyentenan den e congregacion filipense recien formá tal bes a usa Lidia su cas como un lugá di reunion regular. Ta lógico pa pensa cu su cas a sigui ser un centro di actividad teocrático den e stad.

E hospitalidad caluroso cu Lidia a demostrá na principio a resultá di ta un característica di henter e congregacion. Apesar di nan pobresa, na vários ocasion e filipensenan a manda pa Pablo e cosnan cu e tabatin mester, i e apostel tabata gradicidu.—2 Corintionan 8:1, 2; 11:9; Filipensenan 4:10, 15, 16.

Lidia no ta ser mencioná den e carta cu Pablo a manda n’e filipensenan rond di 60-61 E.C. E Scritura no ta revelá kico a sosodé cuné despues dje sucesonan relatá na Echonan capítulo 16. No obstante, e mencion breve dje muher dinámico aki ta haci nos deseá di “sigui e curso di hospitalidad.” (Romanonan 12:13) Ki gradicidu nos ta di tin cristiannan manera Lidia meimei di nos! Nan spiritu ta contribuí hopi pa haci congregacionnan caluroso i amigabel, p’e gloria di Jehova Dios.

[Nota]

[Kuadro na página 28]

Bida dje Hudiunan na Filípos

Bida na Filípos siguramente no tabata fácil pa hudiunan i esnan cu a combertí na hudaismo. Kisas tabatin cierto sintimentunan anti-hudiu, pasobra djis promé cu Pablo su bishita, Emperador Claudio a saca e hudiunan for di Roma.—Compará cu Echonan 18:2.

Ta significativo cu Pablo i Sílas a ser hibá lastrá dilanti e magistradonan despues cu nan a cura e criá cu tabatin un spiritu di adivinacion. Su doñonan, awor privá di un fuente lucrativo di ganashi, a probechá dje prehuicionan di nan conciudadanonan dor di declará: “E hombernan aki ta causando hopi desordu den nos stad, nan siendo hudiunan, i nan ta publicando custumbernan cu no ta legal pa nos aceptá ni practicá, ya cu nos ta romano.” Como resultado, Pablo i Sílas a ser sutá cu bara i tirá den prizon. (Echonan 16:16-24) Den un ambiente asina, curashi tabata necesario pa adorá Jehova abiertamente, e Dios dje hudiunan. Pero evidentemente Lidia no a preocupá cu ser diferente.

[Plachi na página 27]

Ruinanan na Filípos