Kon Pa Bira Felis

NOS tur ke ta felis. Òf nò?— Pero mayoria hende no ta felis di bèrdat. Bo sa dikon?— Dor ku nan no a siña kiko ta e sekreto di felisidat. Nan ta kere ku pa bo bira felis bo mester haña yen di kos. Pero ora nan haña e kosnan ei, nan felisidat no ta dura largu.

Awor, tende un sekreto importante aki. E Gran Maestro a bisa ku tin mas felisidat den duna ku den risibí. (Echonan 20:35) Kiko anto nos por hasi pa nos bira felis?— Sí, nos por duna hende kos i hasi kos pa nan. Bo tabata sa esei?—

Laga nos pensa un tiki mas riba e asuntu aki. Kiko Hesus a bisa? E tabata kier men ku un hende no ta bira felis ora e haña un regalo?— Nò, no ta esei el a bisa. Bo gusta haña regalo, no ta asina?— Sí, tur hende gusta. Nos ta keda kontentu ora nos haña kos bunita.

Pero Hesus a bisa ku nos por bira asta mas kontentu ora nos duna. Awor, ta ken bo ta kere a duna hende mas tantu kos?— Sí, Yehova Dios.

Beibel ta bisa ku Dios “ta duna tur hende bida i rosea i tur kos.” E ta duna nos áwaseru for di shelu i lus di solo tambe, pa mata krese i pa nos tin kuminda pa kome. (Echonan 14:17; 17:25) No ta nada straño ku Beibel ta bisa ku Yehova ta “e Dios bendishoná,” esta, e Dios felis! (1 Timoteo 1:11) Un di e kosnan ku ta hasi Dios felis ta ku e ta duna. Nos tambe por bira felis dor di duna.

Awor, kiko nos por duna hende? Kiko abo ta kere?— Tin bes regalo ta kosta plaka. Si ta na un tienda bo ta kumpra e regalo, bo tin ku paga p’e. P’esei, si bo ke duna hende un regalo asina, kisas lo bo tin ku spar te ora bo tin plaka pa kumpra e regalo.

Pero no ta tur ora ta kumpra nos mester kumpra regalo. Por ehèmpel, ora ta hasi kalor un glas di awa friu ta baha hopi bon. P’esei, si bo duna un hende un glas di awa friu ora e tin set, bo por sinti e felisidat di duna.

Kisas un dia abo ku bo mama por traha kuki huntu. Lo bo gusta esei, no? Pero kiko bo por hasi ku un par di bo kukinan pa bo bira asta mas felis ku si bo kome nan bo so?— Sí, bo por duna un di bo amigunan un par di nan. Bo no tin gana di hasi e kos ei un dia?—

E Gran Maestro i su apòstelnan tur a haña felisidat dor di duna. Bo sa ta kiko nan a duna hende?— E mihó kos na mundu! Nan tabata sa e bèrdat tokante Dios, i nan a keda kontentu pa kompartí e bon notisia aki ku otro hende. Anto nan tabata hasié sin laga niun hende paga nan.

Un dia apòstel Pablo ku su bon amigu, disipel Lukas, a topa un señora ku tambe tabata ke duna p’e haña felisidat. Nan a top’é kantu di un riu. Pablo ku Lukas a bai n’e lugá ei dor ku nan a tende ku hende tabata bai aya pa hasi orashon. I, bèrdat, ora nan a yega nan a topa algun señora ta hasi orashon.

Pablo a kuminsá konta e señoranan aki e bon notisia tokante Yehova Dios i su Reino. Un di nan tabata yama Lidia, i el a skucha ku hopi atenshon. Ora a kaba, Lidia kier a hasi algu pa mustra kuantu el a gusta e bon notisia ku el a tende. P’esei el a pidi Pablo ku Lukas mashá: “Si boso a husga ku mi ta fiel na Señor, bin mi kas i keda serka mi.” I el a pone ku nan mester a bai kas kuné.—Echonan 16:13-15.

Lidia a keda kontentu di por tin e sirbidónan di Dios ei den su kas. El a stima nan, pasobra nan a yud’é siña tokante Yehova Dios i Hesus, i tokante kiko hende mester hasi pa nan biba pa semper. El a keda kontentu di por a duna Pablo ku Lukas kuminda i un lugá pa sosegá, pasobra e mes tabatin hopi gana di duna. I esei ta un kos ku nos mester keda kòrda. Si un hende bisa nos ku nos tin ku duna un regalo, pero nos mes no ke hasié, e ora ei nos lo no bira felis dor di duna e regalo.

Por ehèmpel, imaginá bo ku bo tin un par di mangel, anto bo mes ke kome nan. Si mi bisa bo ku bo tin ku duna un otro mucha un par di nan, lo bo keda kontentu di dun’é nan?— Pero awor, imaginá bo ku bo tin un par di mangel, anto bo ta topa un bon amigu. Si bo mes haña gana di parti bo mangelnan ku bo amigu, lo bo no keda kontentu di hasié?—

Tin bes nos ta stima un hende asina tantu ku nos ke dun’é tur kos, sin keda ku nada pa nos mes. Segun ku nos amor pa Dios ta krese, mas i mas nos mester sinti asina p’e tambe.

E Gran Maestro tabata sa di un señora pober ku tabata sinti asina. Hesus a mir’é den tèmpel na Yerusalèm. E tabatin dos moneda chikitu so; nada mas. Pero el a tira tur dos den kaha komo kontribushon, esta, komo un regalo pa e tèmpel. Niun hende no a oblig’é. Mayoria dje hendenan ku tabat’ei no a haña sa mes kiko el a hasi. El a hasié pasobra e mes tabata ke, i pasobra el a stima Yehova masha hopi mes. El a keda kontentu ku e por a duna algu.—Lukas 21:1-4.

Tin hopi manera ku nos por duna. Bo por bisa mi un par di nan?— Si nos duna pasobra nos mes ke, nos lo ta felis. Esei ta loke e Gran Maestro ta bisa nos pa hasi: “Duna.” (Lukas 6:38) Si nos duna, nos ta hasi hende felis. Anto nos mes lo bira asta mas felis ainda!