Ken Lo “Ser Salbá”?

“Tur cu inbocá e nomber di Jehova lo ser salbá.”—ECHONAN 2:21.

 1. Pakico Pentecoste 33 E.C. tabata un dia crucial den historia di mundu?

PENTECOSTE 33 E.C. tabata un dia crucial den historia di mundu. Pakico? Pasobra riba e dia ei un nacion nobo a nace. Na cuminsamentu, e no tabata un nacion masha grandi—solamente un cantidad di 120 disipel di Jesus cu tabata reuní den un cuarto ariba den Jerusalem. Pero awe, miéntras cu mayoria nacion cu a existí n’e tempu aya a ser lubidá, e nacion cu a nace den e cuarto ariba ei ainda ta cu nos. E echo aki ta di sumo importancia pa nos tur, ya cu esaki ta e nacion cu Dios a nombra pa ta su testigo dilanti humanidad.

 2. Ki sucesonan milagroso a marca e nacementu di un nacion nobo?

² Ora e nacion nobo ei a cuminsá existí, sucesonan importante cu a cumpli cu Joël su palabranan profético a tuma lugá. Nos ta lesa di e sucesonan aki na Echonan 2:2-4: “Di ripiente tabatin for di shelu un zonido mescos cu suplamentu di un bientu fuerte, i el a yena henter e cas den cua nan tabata sintá. I lenganan manera di candela a bira visibel pa nan i a ser distribuí tur rond, i un a sinta riba cada un di nan, i nan tur a yena cu spiritu santu i a cuminsá papia den diferente lenga, manera e spiritu a concedé na nan pa expresá nan mes.” Den e manera aki e 120 homber i muhernan fiel ei a bira un nacion spiritual, e promé miembronan di loke apostel Pablo despues a yama “e Israel di Dios.”—Galationan 6:16.

 3. Ki profecia di Joël a cumpli na Pentecoste 33 E.C.?

³ Multitudnan a core bin pa investigá kico e ‘suplamentu di bientu fuerte’ tabata, i apostel Pedro a splica nan cu un dje profecianan di Joël tabata ser cumplí. Cua profecia? Wel, scucha loke el a bisa: “‘Den e último dianan,’ Dios ta bisa, ‘lo mi drama algu di mi spiritu riba tur sorto di carni, i boso yu hombernan i boso yu muhernan lo profetisá i boso hóbennan lo mira visionnan i boso hombernan bieu lo soña soñonan; i asta riba mi esclabonan i riba mi esclabanan lo mi drama algu di mi spiritu den e dianan ei, i nan lo profetisá. I lo mi duna indicacionnan profético den shelu ariba i señalnan riba tera abou, sanger i candela i neblina di huma; solo lo ser combertí den scuridad i luna den sanger promé cu Jehova su dia grandi i ilustre yega. I tur cu inbocá e nomber di Jehova lo ser salbá.’” (Echonan 2:17-21) Por haña e palabranan cu Pedro a cita na Joël 2:28-32, i nan cumplimentu a nificá cu tempu tabata cabando p’e nacion hudiu. “Jehova su dia grandi i ilustre,” un tempu di regla cuenta pa Israel infiel, tabata cerca. Pero ken lo ser salbá, of scapa? I kico esaki a prefigurá?

Dos Cumplimentu di Profecia

 4, 5. En bista di sucesonan binidero, ki conseho Pedro a duna, i pakico e conseho ei no tabata aplicabel den su dia so?

⁴ Den e añanan despues di 33 E.C., e Israel spiritual di Dios a florecé, pero e nacion carnal di Israel no. Na 66 E.C., Israel carnal tabata den guera cu Roma. Na 70 E.C., casi Israel a stop di existí i Jerusalem cu su tempel a ser kimá te na suela. Na Pentecoste 33 E.C., Pedro a duna excelente conseho en bista dje tragedia na caminda. Citando Joël atrobe, el a bisa: “Tur cu inbocá e nomber di Jehova lo ser salbá.” Cada hudiu individual tabatin cu tuma un decision personal pa inbocá e nomber di Jehova. Esaki a encerá, entre otro, obedecé e instruccionnan cu Pedro ta duna siguientemente: “Repentí, i laga cada un di boso ser bautisá den e nomber di Jesucristo pa pordon di boso picánan.” (Echonan 2:38) Pedro su oyentenan tabatin cu aceptá Jesus como e Mesías, cu Israel como nacion a rechasá.

⁵ E palabranan profético ei di Joël tabatin un impacto grandi riba esnan mansu den e promé siglo. Sin embargo, nan tin un impacto asta mas grandi awe pasobra, manera sucesonan den siglo 20 ta mustra, tabatin un di dos cumplimentu dje profecia di Joël. Laga nos mira con.

 6. Con e identidad dje Israel di Dios a cuminsá bira cla segun cu 1914 tabata acercá?

⁶ Despues cu e apostelnan a muri, e mal yerba di cristianismo falsu a tapa e Israel di Dios. Pero durante e tempu di fin, cu a cuminsá na 1914, e identidad dje nacion spiritual aki a bira cla un biaha mas. Tur esaki tabata na cumplimentu di Jesus su comparacion dje trigu i mal yerba. (Mateo 13:24-30, 36-43) Segun cu 1914 tabata acercando, cristiannan ungí a cuminsá separá nan mes for di cristiandad infiel, rechasando cu curashi su doctrinanan falsu i predicando e binidero fin di “e tempu señalá dje nacionnan.” (Lucas 21:24) Pero e promé guera mundial, cu a estayá na 1914, a lanta cuestionnan pa cua nan no tabata prepará. Bou di presion intenso hopi a mengua nan actividad, i algun a comprometé nan principionan. Pa 1918 nan actividad di predicá a prácticamente stop.

 7. (a) Ki suceso similar na Pentecoste 33 E.C. a tuma lugá na 1919? (b) Cuminsando na 1919, ki efecto e dramamentu dje spiritu di Dios tabatin riba sirbidónan di Jehova?

⁷ Sin embargo, esei no a dura largu. Cuminsando na 1919, Jehova a cuminsá drama su spiritu riba su pueblo den un manera cu a pone nan corda Pentecoste 33 E.C. Claro, na 1919 no tabatin papiamentu den lenga ni suplamentu di un bientu fuerte. For dje palabranan di Pablo na 1 Corintionan 13:8 nos ta comprendé cu e tempu pa milager a pasa masha tempu caba. Pero Dios su spiritu tabata claramente evidente na 1919 ora cu, na un congreso na Cedar Point, Ohio, Merca, cristiannan fiel a yena di nobo cu vigor i a bolbe cuminsá cu e trabou di predicá e bon nobo dje Reino. Na 1922 nan a regresá Cedar Point i a ser stimulá mashá dor dje apelacion “Anunciá, anunciá, anunciá e Rey i su reino.” Manera a sosodé den promé siglo, mundu a ser obligá pa tuma nota dje efectonan dje dramamentu di Dios su spiritu. Tur cristian dedicá—homber i muher, bieu i hóben—a cuminsá “profetisá,” esta, declará “e cosnan magnífico di Dios.” (Echonan 2:11) Mescos cu Pedro, nan a exhortá esnan mansu: “Salba boso for dje generacion perverso aki.” (Echonan 2:40) Con esnan cu a reaccioná faborablemente lo por a haci esei? Dor di obedecé e palabranan di Joël hañá na Joël 2:32: “Tur cu inbocá e nomber di Jehova lo ser salbá.”

 8. Con cosnan a bai cu e Israel di Dios desde 1919?

⁸ Desde e promé añanan ei, e asuntunan dje Israel di Dios a bai dilanti. Ta parce cu e seyamentu dje ungínan ta basta avansá, i desde añanan ’30 un multitud grandi di esnan mansu cu un speransa terenal a aparecé riba esena. (Revelacion 7:3, 9) Nan tur tin un sentido di urgencia, pasobra e di dos cumplimentu di Joël 2:28, 29 ta mustra cu nos ta cerca di un dia di Jehova inspirador di temor asta mas grandi, ora cu un sistema di cosnan mundial religioso, político i comercial lo ser destruí. Nos tin tur motibu pa “inbocá e nomber di Jehova” den pleno fe cu lo e libra nos!

Con Nos Ta Inbocá e Nomber di Jehova?

 9. Kico ta algun dje cosnan enbolbí den inbocá e nomber di Jehova?

⁹ Kico ta enbolbí den inbocá Jehova su nomber? E contexto di Joël 2:28, 29 ta yuda nos contestá e pregunta ei. Por ehempel, Jehova no ta scucha tur hende cu inbok’é. Atrabes di un otro profeta, Isaías, Jehova a bisa Israel: “Ora boso habri boso palma di man, mi ta sconde mi wowonan for di boso. Maske boso ta haci hopi oracion, mi no ta scucha.” Pakico Jehova a nenga di scucha su propio nacion? E mes ta splica: “Cu dramamentu di sanger boso mannan mes a yena.” (Isaías 1:15) Jehova lo no scucha ningun hende cu ta culpabel di sanger of cu ta practicá picá. Den e contexto di Joël 2:28, 29, nos ta haña cu Joël tambe ta enfatisá repentimentu. Por ehempel, na Joël 2:12, 13, nos ta lesa: “‘I awor tambe,’ e expresion di Jehova ta, ‘bolbe na mi cu tur boso curason, i cu yunamentu i cu yoramentu i cu gritunan di yoramentu. I sker boso curason, i no boso paña; i bolbe na Jehova boso Dios, pasobra e ta yen di gracia i misericordioso, e ta tarda pa rabia i ta abundante den bondad amoroso.’” Cuminsando na 1919, cristiannan ungí a actua na armonia cu e palabranan aki. Nan a repentí di nan fayonan i a dicidí pa nunca mas comprometé nan principionan of mengua nan actividad. Esaki a habri caminda pa Dios drama su spiritu. Tur persona cu kier inbocá Jehova su nomber i pa Dios tend’é mester sigui e mésun curso.

10. (a) Kico ta berdadero repentimentu? (b) Con Jehova ta respondé na berdadero repentimentu?

¹⁰ Corda, berdadero repentimentu ta mas cu djis bisa: “Despensa.” Israelitanan tabatin e custumber di sker nan paña exterior pa mustra e intensidad di nan sintimentunan. Pero Jehova ta bisa: “Sker boso curason, i no boso paña.” Berdadero repentimentu ta bini di curason, for dje profundidad di nos ser. Esei ta encerá renunciá malecho, net manera nos ta lesa na Isaías 55:7: “Laga e malbado bandoná su caminda, i e hende perhudicial su pensamentunan; i lagu’e bolbe na Jehova.” Esei ta enbolbé odia picá, manera Jesus a haci. (Hebreonan 1:9) Anto, nos ta confia cu Jehova ta pordoná nos riba base dje sacrificio di rescate pasobra Jehova ta “yen di gracia i misericordioso, e ta tarda pa rabia i ta abundante den bondad amoroso.” Lo e aceptá nos adoracion, nos ofrenda di grano i di bebida spiritual. Lo e scucha ora nos inbocá su nomber.—Joël 2:14.

11. Ki lugá adoracion berdadero mester tin den nos bida?

¹¹ Den e Sermon Riba Ceru, Jesus a duna nos algu mas pa tene na mente ora el a bisa: “Sigui busca, anto, promé e reino i Su husticia.” (Mateo 6:33) Nos no mester mira nos adoracion como algu casual, algu cu nos ta haci superficialmente pa calma nos concenshi. Sirbishi na Dios ta merecé e promé lugá den nos bida. Pues, atrabes di Joël, Jehova ta pasa na bisa: “Supla un cachu den Síon . . . Reuní e pueblo. Santificá un congregacion. Trece e hombernan bieu huntu. Reuní e muchanan i esnan cu ta na pechu. Laga e bruidegom sali for di su kamber interior, i e bruid for di su cuarto nupcial.” (Joël 2:15, 16) Ta natural cu hende recien casá ta distraí, teniendo bista solamente un pa otro. Pero asta pa nan, sirbishi na Jehova tin cu bini na promé lugá. Nada ta mas importante cu ser reuní den adoracion berdadero na nos Dios, inbocando su nomber.

12. Ki potencial pa crecementu nos ta mira den e informe di Memorial di aña pasá?

¹² Cu esaki na mente, laga nos considerá un estadística cu e Raport di Aña di Sirbishi 1997 di Testigonan di Jehova ta revelá. Aña pasá nos tabatin un máximo di 5.599.931 publicadó di Reino—berdaderamente un multitud grandi di alabadónan! Asistencia na Memorial tabata 14.322.226—rond di ocho miyon i mei mas tantu hende cu e cantidad di publicadó. E cifra ei ta mustra un potencial maraviyoso pa crecementu. Hopi di e ocho miyon i mei hendenan ei ya caba ta studiando Bijbel cu Testigonan di Jehova como personanan interesá of yunan di mayornan bautisá. Un cantidad grandi a asistí pa promé biaha na un reunion. E echo cu nan tabata presente a duna Testigonan di Jehova un bon oportunidad pa cera conocí cu nan i ofrecé pa yuda nan haci mas progreso. Anto, tabatin esnan cu ta bin Memorial tur aña i kisas ta asistí na un par di otro reunion, pero nan no ta haci mas progreso. Naturalmente, personanan asina ta masha bon biní pa asistí na reunion. Pero nos ta insta nan pa meditá bon riba e palabranan profético di Joël i considerá ki pasonan mas nan mester dal pa ta sigur cu Jehova lo tende ora nan inbocá su nomber.

13. Si nos ta inbocando e nomber di Jehova caba, ki responsabilidad nos tin pa cu otro hende?

¹³ Apostel Pablo a enfatisá un otro aspecto di inbocá e nomber di Dios. Den su carta n’e romanonan, el a cita Joël su palabranan profético: “Tur cu inbocá e nomber di Jehova lo ser salbá.” Anto el a razoná: “Con nan lo inbocá esun den ken nan no a pone fe? Con, na nan turno, nan lo pone fe den esun di ken nan no a tende? Con, na nan turno, nan lo tende sin un hende pa predicá?” (Romanonan 10:13, 14) Sí, hopi otro hende cu no conocé Jehova ainda tin cu inbocá su nomber. Esnan cu conocé Jehova caba tin e responsabilidad, no pa predicá so, sino tambe pa haci esfuerso i duna nan e yudansa ei.

Un Paradijs Spiritual

14, 15. Ki bendicionnan paradísico Jehova su pueblo ta disfrutá di dje debí cu nan ta inbocá su nomber den un manera cu ta agrad’é?

¹⁴ Esei ta e manera cu tantu e ungínan como e otro carnénan ta mira e asuntu, i como resultado, Jehova ta bendicioná nan. “Jehova lo ta celoso pa su tera i lo mustra compasion na su pueblo.” (Joël 2:18) Na 1919, Jehova a mustra celo i compasion pa su pueblo ora el a restorá nan i a trece nan den su region di actividad spiritual. Esaki ta berdaderamente un paradijs spiritual, bon describí pa Joël den e palabranan aki: “No tene miedu, O suela. Gosa i alegrá; pasobra realmente Jehova lo haci un cos grandi den loke E ta haci. No tene miedu, boso, bestianan dje campo habrí, pasobra e sabananan dje desierto lo bira berde sigur. Pasobra e palu realmente lo duna su fruta. E palu di figu i e mata di wijndruif tin cu duna nan energia vital. I, boso, yunan di Síon, gosa i alegrá den Jehova boso Dios; pasobra sigur lo e duna boso e awaceru di otoño na un midí corecto, i lo e basha riba boso un palu di awa, awaceru di otoño i awaceru di primavera, manera na principio. I e flurnan di bienta tin cu ta yen di grano limpiá, i e bakinan di pers tin cu basha over cu biña nobo i zeta.”—Joël 2:21-24.

¹⁵ Ki un cuadro agradabel! Tres alimento básico den Israel—grano, zeta di olijfi i biña—lo ser percurá na abundancia huntu cu hopi tou di bestia. Den nos dia e palabranan profético ei en berdad ta cumpli den un manera spiritual. Jehova ta duna nos tur e alimento spiritual cu nos tin mester. Nos no ta encantá cu tal abundancia cu Dios ta duna? Berdaderamente, manera Malakías a profetisá, nos Dios a ‘habri e portanan di shelu i a basha riba nos un bendicion te ora cu no tin mas necesidad.’—Malakías 3:10.

Fin di un Sistema di Cosnan

16. (a) Kico e dramamentu di Jehova su spiritu ta nificá pa nos tempu? (b) Kico e futuro ta encerá?

¹⁶ Ta despues di predicí e condicion paradísico dje pueblo di Dios cu Joël ta profetisá tocante e dramamentu di Jehova su spiritu. Ora Pedro a cita e profecia aki na Pentecoste, el a bisa cu el a cumpli “den e último dianan.” (Echonan 2:17) E dramamentu di Dios su spiritu n’e tempu aya a nificá cu e último dianan a cuminsá pa e sistema di cosnan hudiu. E dramamentu di Dios su spiritu riba e Israel di Dios den siglo 20 ta nificá cu nos ta bibando den e último dianan dje sistema di cosnan mundial. En bista di esaki, kico e futuro ta encerá? Joël su profecia ta pasa na bisa nos: “Lo mi duna indicacionnan profético den shelu i riba tera, sanger i candela i pilarnan di huma. Solo mes lo cambia den scuridad, i luna den sanger, promé cu e binimentu dje dia di Jehova, grandi i inspirador di temor.”—Joël 2:30, 31.

17, 18. (a) Cua tabata e dia inspirador di temor di Jehova cu a bini riba Jerusalem? (b) E echo cu Jehova su dia inspirador di temor ta bini sigur den futuro ta impulsá nos pa haci kico?

¹⁷ Na 66 E.C., e palabranan profético aki a cuminsá cumpli den Hudea segun cu sucesonan a avansá, sin cu ningun hende por a stop nan, den direccion dje culminacion dje dia di Jehova, inspirador di temor na 70 E.C. Ki spantoso tabata e tempu ei pa ta entre esnan cu no tabata halsa e nomber di Jehova! Awe, tin sucesonan mésun spantoso nos dilanti, ora cu Jehova destruí henter e sistema di cosnan mundial aki. Sin embargo, ta posibel pa scapa. E profecia ta pasa na bisa: “Tin cu sosodé cu tur cu inbocá e nomber di Jehova lo ser salbá; pasobra den Ceru di Síon i den Jerusalem lo resultá di ta esnan cu a scapa, manera Jehova a bisa, i entre e sobrebibientenan, cu Jehova ta yama.” (Joël 2:32) Testigonan di Jehova ta berdaderamente gradicidu cu nan a conocé Jehova su nomber, i nan tin confiansa absoluto cu lo e salba nan ora nan inbok’é.

¹⁸ Sin embargo, kico lo sosodé ora Jehova su dia grandi i ilustre dal e mundu aki cu tur su furia? Esei lo ser considerá den e último artículo di studio.

Bo Ta Corda?

◻ Na ki tempu Jehova a drama pa promé bes su spiritu riba su pueblo?

◻ Kico ta algun dje cosnan enbolbí den inbocá e nomber di Jehova?

◻ Na ki tempu Jehova su dia grandi i ilustre a bini riba Israel carnal?

◻ Con Jehova ta bendicioná esnan cu ta inbocá su nomber awe?

[Plachi na página 15]

Un nacion nobo a nace na Pentecoste 33 E.C.

[Plachi na página 16, 17]

Mas trempan den e siglo aki, Jehova a drama su spiritu atrobe riba su pueblo na cumplimentu di Joël 2:28, 29

[Plachi na página 18]

Mester yuda hende inbocá e nomber di Jehova