Capítulo Ocho

Jehova Dios Ta den Su Tempel Santu

Isaías 6:1-13

 1, 2. (a) Na ki tempu profeta Isaías ta ricibí su vision dje tempel? (b) Pakico rey Uzías a perde aprobacion di Jehova?

“DEN e aña cu rey Uzías a muri, ami sin embargo, a mira Jehova, sintá riba un trono haltu i elevá, i e plooinan di su bistí tabata yena e tempel.” (Isaías 6:1) Cu e palabranan aki dje profeta, e di seis capítulo di Isaías ta cuminsá. Ta aña 778 P.E.C.

² Uzías su reinado di 52 aña como rey di Huda tabata pa gran parti un éxito rotundo. Dor cu el a haci loke “tabata recto den bista di Jehova,” el a conta cu e respaldo di Dios den su hazañanan militar, di construccion i di agricultura. Pero e mésun éxito aki a nificá su caida. Cu tempu, su curason a bira orguyoso, “di manera cu el a actua infiel contra Jehova su Dios i a drenta e tempel di Jehova pa kima censia.” Pa motibu dje accion arogante aki i su furia contra e sacerdotenan cu a reprend’é, Uzías a muri como leproso. (2 Crónicanan 26:3-22) Tabata rond dje tempu aki cu Isaías a cuminsá su asignacion como profeta.

 3. (a) Ta Jehova mes Isaías ta mira? Splica. (b) Ki esena Isaías ta contemplá, i pa ki motibu?

³ Bijbel no ta bisa nos unda Isaías ta ora e mira e vision. Pero ta claro cu loke e ta mira cu wowo literal ta un vision i no un bista real dje Todopoderoso, ya cu “ningun hende no a mira Dios nunca.” (Juan 1:18; Éxodo 33:20) No obstante, mira e Creador Jehova asta den vision ta un bista impresionante. E Gobernante Universal i Fuente di tur gobernacion legítimo ta sintá riba un trono elevá, i esei ta simbolisá su papel como Rey i Hues eterno! E plooinan dje bistí largu ta yena e tempel. Jehova ta yama Isaías pa un servicio profético cu lo engrandecé Su poder i husticia soberano. Como preparacion, lo e haña un vision dje santidad di Dios.

 4. (a) Pakico e descripcionnan di Jehova mirá den vision i skirbí den Bijbel, mester ta simbólico? (b) Kico e vision di Isaías ta siña nos en cuanto Jehova?

⁴ Distinto dje visionnan cu Ezekiel, Daniel i Juan a conta, Isaías no ta duna ningun descripcion dje aparencia di Jehova den e vision. Ademas, tur e relatonan ei ta varia pa loke nan ta mira den shelu. (Ezekiel 1:26-28; Daniel 7:9, 10; Revelacion 4:2, 3) Sin embargo, ta bon pa tene e caracter i propósito dje visionnan aki na mente. Nan no ta descripcionnan literal dje presencia di Jehova. Wowo literal no por mira loke ta spiritual, i mente humano cu su limitacionnan tampoco por comprendé e region spiritual. P’esei, e visionnan ta presentá den términonan humano e informacion cu mester ser transmití. (Compará cu Revelacion 1:1.) Den e vision di Isaías, un descripcion dje aparencia di Dios no ta necesario. E vision ta informá Isaías cu Jehova ta den su tempel santu i cu e ta santu i cu su huicionan ta puru.

E Serafinnan

 5. (a) Ken e serafinnan ta, i kico e expresion aki ta nificá? (b) Pakico e serafinnan ta sconde nan cara i pia?

⁵ Scucha! Isaías ta continuá: “Tabatin serafin pará riba dje. Cada un tabatin seis ala. Cu dos e tabata tapa su cara, i cu dos e tabata tapa su pia i cu dos e tabata bula rond.” (Isaías 6:2) Isaías capítulo 6 ta e único lugá den Bijbel cu ta haci mencion di serafin. Tur cos ta mustra cu esakinan ta criaturanan angelical den sirbishi di Jehova cu tin un rango masha haltu pa loke ta privilegio i onor, ya cu nan ta posicioná rond dje trono celestial di Jehova. Distinto dje rey orguyoso Uzías, nan ta ocupá nan puesto cu tur humildad i modestia. Dor cu nan ta den presencia dje Soberano celestial, nan ta tapa nan cara cu un par di ala; i cu respet profundo p’e lugá santu, nan ta tapa nan pia cu un otro par. Como cu e serafinnan ta hopi cerca dje Soberano Universal, nan ta tene nan mes den fondo pa no kita atencion for dje gloria personal di Dios. E expresion “serafin,” cu ta nificá “esnan ardiente” of “esnan kimando,” ta indicá cu nan ta briya, pero nan ta sconde nan cara for dje gloria i resplandor mas intenso di Jehova.

 6. Kico ta e posicion dje serafinnan en relacion cu Jehova?

⁶ E serafinnan ta usa nan di tres par di ala pa bula rond i, sin duda, pa zweef of ‘para,’ den nan lugá. (Compará cu Deuteronomio 31:15.) En cuanto nan posicion, profesor Franz Delitzsch ta comentá: “En realidad e serafinnan no ta pará mas haltu cu e cabes di Esun cu ta sintá riba e trono, sino cu nan a zweef mas haltu cu Su paña largu cu ta yena e sala.” (Commentary on the Old Testament) Esaki ta parce razonabel. E echo cu nan ta “pará riba dje” no ta nificá cu nan ta superior na Jehova, sino cu nan ta warda riba dje, cla pa obedec’é i sirbié.

 7. (a) Kico ta e asignacion dje serafinnan? (b) Pakico e serafinnan ta proclamá e santidad di Dios tres bes?

⁷ Scucha e serafinnan privilegiá ei awor! “Esun aki a grita esun aya i bisa: ‘Santu, santu, santu ta Jehova di ehércitonan. E plenitud di henter e tera ta su gloria.’” (Isaías 6:3) Nan asignacion ta pa soru p’e santidad di Jehova ser declará i pa su gloria ser reconocé rond universo, di cua tera ta forma parti. Por mira su gloria den tur loke el a crea i pronto tur habitante di tera lo ripará esei. (Númeronan 14:21; Salmo 19:1-3; Habacuc 2:14) E declaracion tripel, “santu, santu, santu,” no ta evidencia di un Trinidad. E ta mas bien un tripel énfasis dje santidad di Dios. (Compará cu Revelacion 4:8.) Jehova ta santu den e grado mas haltu.

 8. Ki efecto e declaracionnan dje serafinnan ta producí?

⁸ Aunke Isaías no ta mencioná e cantidad di serafin, kisas tin grupo-grupo di serafin posicioná banda dje trono. Den un cantica melodioso nan ta ripití un tras di otro e declaracion dje santidad i gloria di Dios. Ki efecto e declaracionnan ei ta producí? Scucha atrobe segun cu Isaías ta continuá: “I bos di esun cu tabata yama a pone e skarnirnan dje drempelnan cuminsá tembla, i e cas mes gradualmente a yena cu huma.” (Isaías 6:4) Hopi bes den Bijbel, huma of nubia ta un señal visibel dje presencia di Dios. (Éxodo 19:18; 40:34, 35; 1 Reynan 8:10, 11; Revelacion 15:5-8) E ta denotá un gloria cu nos como ser humano no por acercá.

Indigno, Pero Tog Hací Limpi

 9. (a) Ki efecto e vision tin riba Isaías? (b) Ki contraste evidente tin entre Isaías i rey Uzías?

⁹ E vision dje trono di Jehova tin un efecto profundo riba Isaías. E ta skirbi: “Mi a bisa: ‘Ai di mi! Pasobra mi a keda casi silenciá, pasobra un homber di lip impuru mi ta, i meimei di un pueblo di lip impuru mi ta biba; pasobra mi wowonan a mira e Rey, Jehova di ehércitonan mes!’” (Isaías 6:5) Ki un contraste skerpi entre Isaías i rey Uzías! Uzías a usurpá e funcion dje sacerdotenan ungí i a cometé e sacrilegio di invadí e compartimentu Santu dje tempel. Aunke Uzías a mira e candelarnan di oro, e altar di oro pa kima censia i e mesanan dje “pan di Presencia,” e no a mira Jehova su cara di aprobacion ni ricibí ningun comision special for di dje. (1 Reynan 7:48-50; nota na pia di página) En cambio, profeta Isaías sí no ta menospreciá e sacerdocio ni drenta e tempel sin autorisacion. Tog, e sí ta haña un vision di Jehova den su tempel santu i e onor pa cumpli cu un comision di parti di Dios. Miéntras cu e serafinnan no ta tribi mira e Señor di tempel riba su trono, Isaías sí ta ser permití pa contemplá “e Rey, Jehova di ehércitonan mes” den un vision!

10. Pakico Isaías ta sinti hopi miedu ora e mira e vision?

¹⁰ E contraste cu Isaías ta mira entre e santidad di Dios i su propio estado pecaminoso ta pon’é sinti su mes totalmente impuru. Miedu ta poderá di dje i e ta pensa cu e ta bai muri. (Éxodo 33:20) E ta tende e serafinnan alabá Dios cu lip limpi, miéntras cu su lipnan mes ta impuru. Ademas, nan ta manchá cu e impuresa dje lipnan dje pueblo den cua e ta biba i cu e ta tende papia. Jehova ta santu, i su sirbidónan tin cu reflehá e cualidad ei. (1 Pedro 1:15, 16) Aunke ya Dios a scoge Isaías como su bocero, esaki di ripiente ta realisá den ki condicion pecaminoso e ta i cu e falta e lipnan limpi cu ta corespondé cu un bocero dje Rey glorioso i santu. Ki contesta lo e ricibí for di shelu?

11. (a) Kico un dje serafinnan ta haci, i kico e accion aki ta simbolisá? (b) Si nos meditá riba loke e serafin ta bisa Isaías, con esei por yuda nos ora nos ta sinti nos indigno como sirbidó di Dios?

¹¹ En bes di core cu Isaías for di dilanti e presencia di Jehova debí na su puesto inferior, e serafinnan ta sali na su yudansa. E registro ta bisa: “Riba esei, un dje serafinnan a bula bini cerca mi, i den su man tabatin un carbon cayente cu el a coge cu tang for dje altar. Anto el a mishi cu mi boca i bisa: ‘Mira! Esaki a mishi cu bo lipnan, i bo eror a bai for di bo i bo picá mes a keda expiá.’” (Isaías 6:6, 7) Den sentido simbólico, candela tin un efecto purificador. Ora e serafin ta laga e carbon cayente dje candela santu di riba e altar mishi cu e lipnan di Isaías, e ta sigurá Isaías cu su picánan a ser expiá te n’e grado necesario pa permitié ricibí Dios su aprobacion i un comision. Esta trankilisante e pasashi aki ta pa nos! Ya cu nos tambe ta pecadó i indigno pa acercá Dios. Pero e mérito di Jesus su sacrificio di rescate a libra nos i awor nos por ricibí e aprobacion di Dios i acerk’é den oracion.—2 Corintionan 5:18, 21; 1 Juan 4:10.

12. Ki altar Isaías ta mira, i ki efecto e candela tin?

¹² E mencion dje “altar” ta bolbe corda nos cu esaki ta un vision. (Compará cu Revelacion 8:3; 9:13.) Tabatin dos altar den e tempel di Jerusalem. E altar chikitu di censia tabata net dilanti e cortina dje Santísimo, i e altar grandi di sacrificio riba cua e candela tabata constantemente cendé, tabata dilanti dje entrada dje santuario. (Levítico 6:12, 13; 16:12, 13) Pero e altarnan terenal aki tabata simbolisá algu, nan a representá realidadnan mayor. (Hebreonan 8:5; 9:23; 10:5-10) Tempu cu rey Sálomon a inaugurá e tempel, ta candela cu a baha for di shelu a consumí e ofrenda kimá riba e altar. (2 Crónicanan 7:1-3) I awor, ta candela for dje berdadero altar, esun celestial, ta kita e impuresa for di Isaías su lipnan.

13. Ki pregunta Jehova ta plantia, i ken e ta incluí ora e bisa “nos”?

¹³ Laga nos scucha huntu cu Isaías. “Mi a cuminsá tende e bos di Jehova ta bisa: ‘Ken lo mi manda, i ken lo bai pa nos?’ Anto mi a bisa: ‘At’ami akí! Manda mi.’” (Isaías 6:8) Siendo cu no tin niun otro profeta humano den e vision, ta claro cu e pregunta cu Jehova ta plantia ta pa haña un contesta di Isaías. Ta trata aki sin duda di un invitacion pa Isaías ta e mensahero di Jehova. Pero pakico Jehova ta puntra: “Ken lo bai pa nos?” Dor di usa awor e pronomber personal “nos” na lugá di “ami,” Jehova ta incluí por lo ménos un otro persona huntu cu su mes. Ken? No ta su Yu unigénito, kende despues a bira e homber Jesucristo? Tabata en berdad e mésun Yu aki na ken Dios a bisa: “Laga nos traha hende den nos imágen.” (Génesis 1:26; Proverbionan 8:30, 31) Sí, banda di Jehova den su corte celestial tin su Yu unigénito.—Juan 1:14.

14. Con Isaías ta respondé n’e invitacion di Jehova, i ki ehempel e ta pone pa nos?

¹⁴ Isaías no ta vacilá pa respondé! Sin importá kico e mensahe por ta, e ta contestá mesora: “At’ami akí! Manda mi.” E no ta ni puntra kico e ta gana cu aceptá e asignacion. Su spiritu dispuesto ta un ehempel excelente pa tur sirbidó di Dios djawe cu tin e comision di predicá e ‘bon nobo dje reino den tur e tera habitá.’ (Mateo 24:14) Mescos cu Isaías, nan ta pega fielmente na nan asignacion i ta hiba e “testimonio pa tur nacion” apesar dje indiferencia cu ta reina tur caminda. I nan ta sigui padilanti cu e mésun confiansa cu Isaías tabatin pasobra nan sa cu nan comision tin e respaldo dje autoridad supremo.

E Comision di Isaías

15, 16. (a) Kico Isaías tin di bisa “e pueblo aki,” i con nan lo reaccioná? (b) Ta Isaías su falta cu e pueblo ta reaccioná asina? Splica.

¹⁵ Awor Jehova ta splica kico Isaías tin cu bisa i con e reaccion lo ta: “Bai, i bo tin cu bisa e pueblo aki: ‘Tende bes tras bes, pero no comprendé; i mira bes tras bes, pero no haña ningun conocimentu.’ Haci e curason dje pueblo aki indispuesto pa aceptá, i haci asta nan oreanan indispuesto pa respondé, i plak asta nan wowonan cera, pa nan no mira cu nan wowonan i pa nan no tende cu nan oreanan, i pa nan mes curason no comprendé i pa nan realmente no bolbe bek i haña curacion pa nan mes.” (Isaías 6:9, 10) Esaki ta nificá cu Isaías mester ta brutu i sin tacto i pone e hudiunan haña asco pa nan sigui bai contra Jehova? Di ningun manera! Ta Isaías su mes hendenan i e ta sinti cu e tin cierto laso cu nan. Sin embargo, e palabranan di Jehova ta indicá con e pueblo lo reaccioná riba su mensahe sin importá con fiel Isaías ta cumpli cu su tarea.

¹⁶ E culpa ta dje pueblo. Isaías lo papia cu nan “bes tras bes,” pero nan lo no aceptá e mensahe ni comprend’é. E mayoria lo ta terco i indiferente, como si fuera completamente ciegu i surdu. Dor di bai cerca nan cu frecuencia, Isaías lo laga “e pueblo aki” demostrá cu nan no kier comprendé, i cu nan ta cera nan mente i curason p’e mensahe di Isaías—e mensahe di Dios—pa nan. E situacion djawe ta masha parecido! Hopi hende ta nenga di scucha Testigonan di Jehova segun cu nan ta predicá e bon nobo dje binidero Reino di Dios.

17. Na kico Isaías ta referí ora e puntra, “pa cuantu tempu”?

¹⁷ Isaías ta preocupá: “Riba esaki mi a bisa: ‘Pa cuantu tempu, o Jehova?’ E ora ei el a bisa: ‘Te ora cu e stadnan realmente basha abou den ruina, pa nan keda sin habitante, i e casnan keda sin hende terenal, i e suela mes keda ruiná te bira un lugá desolá; i Jehova realmente alehá hende terenal leu, i e condicion bandoná bira hopi extenso meimei dje tera.’” (Isaías 6:11, 12) Ora Isaías puntra “pa cuantu tempu,” e no ta puntrando pa cuantu tempu lo e tin cu sigui predicá na un pueblo indiferente. E ta mas bien preocupá cu e pueblo i ta puntra con largu nan condicion spiritual deplorabel lo dura i pa cuantu tempu Jehova su nomber lo ser desonrá riba tera. (Mira Salmo 74:9-11.) Pues anto, pa cuantu tempu e situacion sin sentido aki lo sigui?

18. Te na ki tempu e condicion spiritual deplorabel dje pueblo lo sigui, i Isaías lo biba pa mira e cumplimentu completo dje profecia?

¹⁸ Lamentablemente, e contesta di Jehova ta indicá cu e condicion spiritual deplorabel dje pueblo lo sigui te ora nan sufri tur e consecuencianan di desobedencia na Dios, manera su pacto ta stipulá. (Levítico 26:21-33; Deuteronomio 28:49-68) E nacion lo caba na ruina, e pueblo lo ser deportá i e tera lo keda desolá. Aunke Isaías lo profetisá pa mas cu 40 aña, siguiendo te den e reinado di rey Uzías su bisanietu Ezekías, lo e no biba pa mira e destruccion di Jerusalem i su tempel na man dje ehército di Babilonia na aña 607 P.E.C. Apesar di esei, Isaías lo cumpli fielmente cu su comision te na su morto, mas cu 100 aña promé cu e desaster nacional tuma lugá.

19. Aunke lo kap e nacion mescos cu un palu, ki garantia Dios ta duna Isaías?

¹⁹ E destruccion cu lo laga Huda “ruiná te bira un lugá desolá” lo bini sigur. Pero e situacion no ta sin speransa. (2 Reynan 25:1-26) Jehova ta sigurá Isaías: “Ainda lo tin un diesmo den dje, i atrobe e tin cu bira algu pa kima, manera un palu grandi i manera un palu masivo den cua, ora cu kap nan, tin un troncon; un simia santu lo ta su troncon.” (Isaías 6:13) Sí, “un diesmo . . . un simia santu,” lo keda, mescos cu e troncon di un palu masivo cu ta ser di kap. Sin duda, e garantia aki ta consolá Isaías: lo tin un resto santu den su pueblo. Aunke e nacion lo bolbe kima, mescos cu un palu grandi cu nan ta kap usa pa carbon, lo keda un troncon vital dje palu simbólico di Israel. Esei lo ta un simia, of desendiente, cu ta santu pa Jehova. Cu tempu lo e spruit atrobe, i e palu lo bolbe crece.—Compará cu Job 14:7-9; Daniel 4:26.

20. Con e último parti dje profecia di Isaías a cumpli inicialmente?

²⁰ E palabranan dje profecia a cumpli? Sí. Setenta aña despues cu e tera di Huda a keda desolá, un resto di personanan temeroso di Dios a bolbe for di exilio den Babilonia. Nan a reconstruí e tempel i e stad, i nan a reestablecé adoracion berdadero den e pais. E regreso dje hudiunan na nan tera natal cu nan a haña di Dios, a permití un di dos cumplimentu dje profecia aki cu Jehova a duna Isaías. Ki cumplimentu?—Ésdras 1:1-4.

Otro Cumplimentunan

21-23. (a) Riba ken e profecia di Isaías a cumpli den promé siglo, i di ki manera? (b) Ken a forma e “simia santu” den promé siglo, i con el a ser conserbá?

²¹ E trabou profético di Isaías a prefigurá e obra cu e Mesías, Jesucristo, lo a haci un 800 aña despues. (Isaías 8:18; 61:1, 2; Lucas 4:16-21; Hebreonan 2:13, 14) Aunke Jesus tabata mas grandi cu Isaías, e tabata mes dispuesto pa laga su Tata celestial mand’é, pasobra el a bisa: “Mira! Mi a bini pa haci bo boluntad.”—Hebreonan 10:5-9; Salmo 40:6-8.

²² Mescos cu Isaías, Jesus a cumpli fielmente cu e trabou asigná na dje i el a topa cu e mésun reaccion. E hudiunan di Jesus su tempu no tabata mas dispuesto pa aceptá e mensahe cu esnan na ken profeta Isaías a predicá. (Isaías 1:4) Uso di ilustracion tabata un rasgo den Jesus su ministerio. Esaki a impulsá su disipelnan pa puntra: “Pakico bo ta usa ilustracion ora bo ta papia cu nan?” Jesus a contestá nan: “Ta duná na boso pa comprendé e secretonan sagrado dje reino di shelu, pero no ta duná na e hendenan ei. Esaki ta e motibu pakico mi ta usa ilustracion ora mi ta papia cu nan, pasobra mirando, nan ta mira en bano, i tendiendo, nan ta tende en bano, ni no ta capta e sentido di dje; i ta riba nan e profecia di Isaías ta cumpli, cu ta bisa: ‘Tendiendo, boso lo tende pero di ningun manera lo capta e sentido di dje; i, mirando, boso lo mira pero di ningun manera wak. Pasobra e curason dje pueblo aki a bira indispuesto pa ricibí, i cu nan orea nan a tende sin respondé, i nan a cera nan wowo; pa nan nunca mira cu nan wowo i tende cu nan orea i capta e sentido di dje cu nan curason i bolbe, i ami cura nan.’”—Mateo 13:10, 11, 13-15; Marco 4:10-12; Lucas 8:9, 10.

²³ Ora Jesus a cita for di Isaías, el a mustra cu e profecia tabatin un cumplimentu den su tempu. Por lo general e pueblo a demostrá e mésun actitud di curason cu hudiu di tempu di Isaías. Nan a haci nan mes ciegu i surdu pa su mensahe i, di igual manera, a topa cu nan destruccion. (Mateo 23:35-38; 24:1, 2) Esaki a sosodé ora e forsanan romano bou di mando di general Tito a bini contra Jerusalem na aña 70 E.C. i a bari e stad i su tempel. No obstante, algun a scucha Jesus i a bira su disipel. Jesus a yama esakinan “felis.” (Mateo 13:16-23, 51) El a informá nan cu ora nan a mira “Jerusalem rondoná pa ehércitonan den campamentu,” nan mester a “cuminsá hui p’e cerunan.” (Lucas 21:20-22) Di manera cu e “simia santu” cu a ehercé fe i cu a ser formá den un nacion spiritual, “e Israel di Dios,” a ser salbá.a—Galationan 6:16.

24. Con Pablo a aplicá e profecia di Isaías, i kico esaki ta indicá?

²⁴ Rond di aña 60 E.C., apostel Pablo a haña su mes bou di aresto di cas na Roma. El a convocá “e hombernan principal dje hudiunan” i tambe otro personanan i a duna nan un “testimonio cabal tocante e reino di Dios.” Ora hopi di esnan presente no kier a aceptá su mensahe, Pablo a splica cu esei tabata un cumplimentu dje profecia di Isaías. (Echonan 28:17-27; Isaías 6:9, 10) Asina Jesus su disipelnan a cumpli cu un comision comparabel cu esun di Isaías.

25. Kico Dios su Testigonan dje tempu actual a dicerní, i con nan ta reaccioná?

²⁵ Mescos awe tambe, Testigonan di Jehova ta dicerní cu Jehova Dios ta den su tempel santu. (Malakías 3:1) Mescos cu Isaías, nan ta bisa: “At’ami akí! Manda mi.” Nan ta proclamá celosamente e mensahe di spiertamentu tocante e binidero fin dje mal sistema di cosnan aki. Pero, manera Jesus a indicá, relativamente poco hende ta habri nan wowo i orea pa mira i tende i ser salbá. (Mateo 7:13, 14) Berdad, felis ta esnan cu sí ta incliná nan curason pa scucha i “haña curacion pa nan mes”!—Isaías 6:8, 10.

[Nota]

[Plachi na página 94]

“At’ami akí! Manda mi.”

[Plachi na página 97]

‘Te ora cu e stadnan basha abou den ruina, pa keda sin habitante’