Nan A Haci e Boluntad di Jehova
Pedro Ta Predicá na Pentecoste
TABATA un mainta di primavera cu un clima suave na aña 33 E.C. E atmósfera tabata cargá cu excitacion! Un multitud agitá di hudiu i prosélito a yena e cayanan di Jerusalem. Nan a bini for di lugánan manera Elam, Mesopotamia, Capadocia, Egipto i Roma. Tabata ki fasinante pa mira nan bistí den nan trahe local i pa tende nan diferente idiomanan! Algun a biaha casi dos mil kilometer pa ta presente p’e ocasion special aki. Kico esei tabata? Pentecoste—un festival hudiu gososo cu a marca e fin dje cosecha di cebada.—Levítico 23:15-21.
Huma tabata bai haltu for dje ofrendanan riba e altar dje tempel, i e levitanan a canta e Halel (Salmo 113 te 118). Djis promé cu 9:00 a.m., algu asombroso a sosodé. For di shelu, hende a tende “un zonido mescos cu suplamentu di un bientu fuerte.” El a yena henter e cas den cua rond di 120 disipel di Jesucristo tabata reuní. E relato bíblico ta bisa: “Lenganan manera di candela a bira visibel pa nan i a ser distribuí tur rond, i un a sinta riba cada un di nan, i nan tur a yena cu spiritu santu i a cuminsá papia den diferente lenga, net manera e spiritu a concedé na nan pa expresá nan mes.”—Echonan 2:1-4.
Cada Hende Ta Tende Su Propio Idioma
Pronto, hopi disipel tabata saliendo na cantidad for dje cas. Asombrosamente, nan por a papia den e vários idiomanan dje multitud! Imaginá ki un sorpresa tabata pa un bishitante for di Persia i un nativo di Egipto tende nan propio idiomanan ser papiá dor di galileonan. Ta di comprendé cu e multitud a keda pasmá. “Kico esaki lo kier men?” nan a puntra. Algun a cuminsá haci mofa dje disipelnan, bisando: “Nan ta yen di biña dushi.”—Echonan 2:12, 13.
Siguientemente apostel Pedro a lanta para i a dirigí su mes n’e multitud. El a splica cu e don milagroso aki di lenganan tabata un cumplimentu dje promesa cu Dios a haci mediante profeta Joël: “Lo mi drama algu di mi spiritu riba tur sorto di carni.” (Echonan 2:14-21; Joël 2:28-32) Sí, Dios a caba di drama su spiritu santu riba e disipelnan di Jesus. Esaki tabata evidencia claro cu Jesus a ser lantá for di morto i awor tabata den shelu n’e man drechi di Dios. “P’esei,” Pedro a bisa, “laga henter e cas di Israel sa cu tur siguridad cu Dios a hacié tantu Señor como Cristo, e Jesus aki kende boso a claba na staca.”—Echonan 2:22-36.
Con e oyentenan a reaccioná? “Nan a sinti nan heridá di curason,” e relato ta bisa, “i nan a bisa Pedro i e sobrá apostelnan: ‘Hombernan, rumannan, kico nos lo haci?’ ” Pedro a contestá: “Repentí, i laga cada un di boso ser bautisá.” Rond di 3.000 a haci exactamente esei! Despues di esei, “nan a sigui dedicá nan mes n’e siñansa dje apostelnan.”—Echonan 2:37-42.
Hibando delantera n’e ocasion monumental aki, Pedro a usa e promé di “e yabinan dje reino di shelu” cu a Jesus a primintí di dun’é. (Mateo 16:19) E yabinan aki a habri caminda pa privilegionan special na diferente grupo di hende. E promé yabi aki a haci posibel pa hudiunan bira cristian ungí cu spiritu. Despues, e segundo i e tercer yabi a haci e mésun oportunidad aki disponibel pa samaritanonan i pa gentilnan respectivamente.—Echonan 8:14-17; 10:44-48.
Lesnan pa Nos
Aunke e multitud di hudiu i prosélito aki a carga e responsabilidad di comunidad p’e morto dje Yu di Dios, Pedro a dirigí su mes na nan cu respet, yamando nan “rumannan.” (Echonan 2:29) Su meta tabata pa conmové nan na repentimentu, no pa condená nan. P’esei, su actitud pa cu nan tabata positivo. El a presentá e echonan i a apoyá su puntonan cu citanan for dje Scritura.
Esnan cu ta predicá e bon nobo awe ta haci bon di sigui e ehempel di Pedro. Nan mester trata na establecé un tereno comun cu nan oyentenan, anto cu tacto razoná cu nan for dje Scritura. Ora e berdad di Bijbel ta ser presentá den un manera positivo, esnan di curason hustu lo respondé.—Echonan 13:48.
Pedro su celo i curashi riba e dia di Pentecoste ta resaltá na contraste skerpi cu su nengamentu di Jesus rond di shete siman promé. N’e ocasion ei Pedro a ser paralisá dor di temor di hende. (Mateo 26:69-75) Pero Jesus a haci súplica na fabor di Pedro. (Lucas 22:31, 32) Sin duda, e aparicion di Jesus despues di su resureccion na Pedro a fortalecé e apostel. (1 Corintionan 15:5) Como resultado, Pedro su fe no a caba na nada. Den un corto tempu, e tabata predicando cu curashi. Pues, anto, el a predicá no solamente na Pentecoste sino p’e resto di su bida.
Kico si nos a peca den un manera of otro, mescos cu Pedro? Laga nos manifestá repentimentu, pidi pordon den oracion, i dal paso pa haña yudansa spiritual. (Santiago 5:14-16) E ora ei nos por sigui padilanti cu confiansa cu nos sirbishi sagrado ta aceptabel pa nos misericordioso Tata celestial, Jehova.—Exodo 34:6.