Tur Mester Rindi Cuenta na Dios
“Cada un di nos lo rindi cuenta pa su mes na Dios.”—ROMANONAN 14:12.
1. Ki límitenan a ser poné riba e libertad di Adam i Eva?
JEHOVA DIOS a crea nos promé mayornan, Adam i Eva, como personanan cu un boluntad liber. Aunke nan tabata inferior cu e angelnan, nan tabata criaturanan inteligente capas pa tuma decisionnan sabí. (Salmo 8:4, 5) Sin embargo, e libertad ei duná dor di Dios no a duna hende permit pa determiná personalmente loke tabata bon i malu. Adam i Eva mester a duna cuenta na nan Creador, i e dunamentu di cuenta aki a extendé na tur nan desendientenan.
2. Ki reglamentu di cuenta Jehova lo haci pronto, i pakico?
2 Awor cu nos ta acercando e culminacion dje mal sistema di cosnan aki, Jehova lo haci un ahuste di cuenta riba tera. (Compará cu Romanonan 9:28.) Pronto, hende malbado lo tin cu rindi cuenta na Jehova Dios pa e sakeo dje recursonan dje tera, e destruccion di bida humano i specialmente e persecucion di su sirbidornan.—Revelacion 6:10; 11:18.
3. Ki preguntanan nos lo considerá?
3 Enfrentá cu e perspectiva aki cu ta pone nos pensa, ta probechoso pa nos meditá riba Jehova su tratonan hustu cu su criaturanan den pasado. Con e Scritura por yuda nos, personalmente, pa rindi un cuenta aceptabel na nos Creador? Ki ehempelnan por yuda nos, i cua ta esnan cu nos tin cu evitá di imitá?
Angelnan Tin cu Rindi Cuenta
4. Con nos sa cu Dios ta exigí cuenta dje angelnan pa nan accionnan?
4 Jehova su criaturanan angelical den shelu tambe tin cu rindi cuenta na dje mescos cu nos. Promé cu e Diluvio di tempu di Noe, algun angel desobedientemente a materialisá afin di tene relacion sexual cu hende muher. Como personanan cu un boluntad liber, e criaturanan spiritual aki por a tuma e decision aki, pero Dios a exigí cuenta di nan. Ora e angelnan desobediente a regresá n’e region spiritual, Jehova no a permití nan recobrá nan posicion original. Disipel Hudas ta bisa nos cu nan a ser “reservá cu cadena eterno bou di scuridad denso p’e huicio dje gran dia.”—Hudas 6.
5. Ki caida Satanas i su demoñonan a experenciá, i con e cuenta di nan rebelion lo ser reglá?
5 E angelnan desobediente aki, of demoñonan, tin Satanas e Diabel como nan gobernante. (Mateo 12:24-26) E angel malbado aki a rebelá contra su Creador i a desafiá e legitimidad di Jehova su soberania. Satanas a conducí nos promé mayornan den picá, i esaki a resultá den nan morto final. (Génesis 3:1-7, 17-19) Aunke Jehova a permití Satanas haña acceso n’e region celestial pa un periodo despues di esei, e buki bíblico di Revelacion a predicí cu n’e debido tempu di Dios, e malbado aki lo a ser tirá abou den becindario dje tera. Evidencia ta indicá cu esaki a tuma lugá djis despues cu Jesucristo a ricibí poder di Reino na 1914. Cu tempu, e Diabel i su demoñonan lo bai den destruccion eterno. Ora e cuestion di soberania ser resolvé finalmente, e cuenta pa rebelion lo a ser reglá den un manera hustu.—Job 1:6-12; 2:1-7; Revelacion 12:7-9; 20:10.
E Yu di Dios Tin cu Rindi Cuenta
6. Con Jesus ta mira su propio deber di rindi cuenta na su Tata?
6 Ki un ehempel excelente e Yu di Dios, Jesucristo, a pone! Como un homber perfecto igual cu Adam, Jesus tabatin deleite den haci e boluntad divino. Tambe e tabata contentu di mester a rindi cuenta pa anda di acuerdo cu Jehova su ley. E salmista a profetisá apropiadamente tocante Jesus: “Pa haci bo boluntad, O mi Dios, mi tin deleite, i bo ley ta den mi partinan paden.”—Salmo 40:8; Hebreonan 10:6-9.
7. Ora Jesus tabata haci oracion riba e último anochi promé cu su morto, pakico e por a bisa e palabranan registrá na Juan 17:4, 5?
7 Apesar dje oposicion yen di odio cu Jesus a experenciá, el a haci e boluntad di Dios i a mantené integridad te na morto riba un staca di tormento. Dje manera ei el a paga e prijs di rescate pa libra humanidad for dje consecuencianan mortífero dje picá di Adam. (Mateo 20:28) P’esei, riba e último anochi promé cu su morto, cu confiansa Jesus por a bisa den oracion: “Mi a glorificá bo riba tera, terminando e trabou cu bo a duná mi pa haci. Pues, awor, Tata, glorificá mi banda di bo mes cu e gloria cu mi tabatin banda di bo promé cu e mundu a existí.” (Juan 17:4, 5) Jesus por a bisa e palabranan ei na su Tata celestial pa motibu cu e tabata pasando exitosamente e prueba di mester a rindi cuenta i a haña e aprobacion di Dios.
8. (a) Con Pablo a mustra cu nos mester rindi cuenta di nos mes na Jehova Dios? (b) Kico lo yuda nos haña aprobacion cerca Dios?
8 Distinto dje homber perfecto Jesucristo, nos ta imperfecto. Tog, nos tin cu rindi cuenta na Dios. Apostel Pablo a bisa: “Pakico bo ta husga bo ruman? Of pakico abo tambe ta menospreciá bo ruman? Pasobra nos tur lo para dilanti e tribunal di Dios; pasobra ta pará skirbí: ‘“Mes sigur cu mi ta biba,” Jehova ta bisa, “na mi tur rudia lo dobla, i tur lenga lo haci reconocimentu abierto na Dios.”’ Pues anto, cada un di nos lo rindi cuenta pa su mes na Dios.” (Romanonan 14:10-12) Pa nos por haci esei i haña e aprobacion di Jehova, amorosamente el a duna nos tantu un concenshi como su Palabra inspirá, e Bijbel, pa guia nos den loke nos ta bisa i haci. (Romanonan 2:14, 15; 2 Timoteo 3:16, 17) Sacando pleno probecho di Jehova su percuracionnan spiritual i siguiendo nos concenshi bíblicamente entrená lo yuda nos haña e aprobacion di Dios. (Mateo 24:45-47) Jehova su spiritu santu, of forsa activo, ta un fuente adicional di fortalesa i guia. Si nos actua na armonia cu e guia di su spiritu i di nos concenshi bíblicamente entrená, nos ta mustra cu nos no ta keda sin ‘haci caso di Dios,’ na ken nos tin cu rindi cuenta pa tur nos accionnan.—1 Tesalonicensenan 4:3-8; 1 Pedro 3:16, 21.
Nacionnan Tin cu Rindi Cuenta
9. Ken e edomitanan tabata, i kico a sosodé cu nan pa e manera cu nan a trata cu Israel?
9 Nacionnan tin cu rindi cuenta na Jehova. (Jeremías 25:12-14; Sofonías 3:6, 7) Considerá e reino antiguo di Edom, situá sur di Laman Morto i nort dje Golfo di Aqaba. E edomitanan tabata un pueblo semita, estrechamente ligá cu e israelitanan. Aunke e antepasado dje edomitanan tabata e nietu di Abraham, Esau, nan a nenga di permití e israelitanan crusa dor di Edom riba “e caminda dje rey” ora esakinan tabata rumbo p’e Tera Primintí. (Númeronan 20:14-21) Den transcurso dje siglonan e hostilidad dje edomitanan a desaroyá bira un odio implacabel contra Israel. Finalmente, e edomitanan tabatin cu rindi cuenta pa motibu cu nan a urgi e babilonionan pa destruí Jerusalem na 607 P.E.C. (Salmo 137:7) Den siglo seis P.E.C., trupanan babilónico bou di Rey Nabonido a conkistá Edom, i el a bira desolá, manera Jehova a decretá.—Jeremías 49:20; Abdías 9-11.
10. Con e moabitanan a actua pa cu e israelitanan, i con Dios a exigí cuenta di Moab?
10 Cosnan no a bai mihó cu Moab. E reino moabita tabata situá nort di Edom i oost di Laman Morto. Promé cu e israelitanan a drenta e Tera Primintí, e moabitanan no a actua hospitalariamente pa cu nan, evidentemente suministrando nan cu pan i awa solamente pa ganashi financiero. (Deuteronomio 23:3, 4) E Rey di Moab, Balac, a contratá e profeta Balam pa maldicioná Israel, i a usa muhernan moabita pa seducí hombernan israelita pa cometé inmoralidad i idolatria. (Númeronan 22:2-8; 25:1-9) Sin embargo, Jehova no a pasa por haltu dje odio di Moab contra Israel. Manera a ser profetisá, Moab a sufri di desolacion na man dje babilonionan. (Jeremías 9:25, 26; Sofonías 2:8-11) Sí, Dios a exigí cuenta di Moab.
11. Moab i Amon a bira manera cua stadnan, i kico profecianan bíblico ta indicá relacioná cu e mal sistema di cosnan actual?
11 No solamente Moab sino tambe Amon tabatin cu rindi cuenta na Dios. Jehova a profetisá: “Moab mes lo bira mescos cu Sódoma, i e yunan di Amon mescos cu Gomora, un lugá yen di sumpiña, i un pos di salu, i un desierto desolá, asta pa tempu indefiní.” (Sofonías 2:9) E teranan di Moab i di Amon a ser desolá, mescos cu Dios a destruí e stadnan di Sódoma i Gomora. Segun e Sociedad Geológico di Londen, investigadornan ta afirmá cu nan a localisá e ruinanan di Sódoma i Gomora n’e costa oost di Laman Morto. Cualkier evidencia confiabel cu ainda por bini na claridad relacioná cu esaki por solamente apoyá profecianan di Bijbel cu ta indicá cu Jehova Dios lo exigí cuenta dje mal sistema di cosnan actual tambe.—2 Pedro 3:6-12.
12. Aunke Israel tabatin cu rindi cuenta na Dios pa su picánan, kico a ser profetisá relacioná cu un resto hudiu?
12 Aunke Jehova a faborecé Israel altamente, e tabatin cu rindi cuenta na Dios pa su picánan. Ora Jesucristo a bini n’e nacion di Israel, e mayoria a rechas’é. Solamente un resto a ehercé fe i a bira su siguidornan. Pablo a aplicá cierto profecianan n’e resto hudiu aki ora el a skirbi: “Isaías ta sclama relacioná cu Israel: ‘Aunke e cantidad dje yunan di Israel por ta manera santu di laman, e resto ta loke lo ser salbá. Pasobra Jehova lo regla cuenta riba tera, concluyend’e i cortand’e.’ Tambe, net manera Isaías a bisa di antemano: ‘Aménos cu Jehova di ehércitonan a laga un simia pa nos, nos lo a bira mescos cu Sódoma, i nos lo a keda mescos cu Gomora.’” (Romanonan 9:27-29; Isaías 1:9; 10:22, 23) E apostel a cita e ehempel dje 7.000 personanan den tempu di Elías cu no a buig pa Baal, i el a bisa e ora ei: “P’esei, dje manera aki, n’e tempu actual tambe un resto a presentá segun un scogementu debí na bondad inmerecí.” (Romanonan 11:5) E resto ei tabata consistí di individuonan cu personalmente tabatin cu rindi cuenta na Dios.
Ehempelnan di Rindi Cuenta Personalmente
13. Kico a sosodé cu Cain ora Dios a exigí cuenta di dje pa asesinato di su ruman Abel?
13 Bijbel ta relatá hopi caso di e deber di hende pa rindi cuenta personalmente na Jehova Dios. Tuma por ehempel Cain, e yu primogénito di Adam. Tantu e como su ruman Abel a ofrecé sacrificio na Jehova. Dios a aprobá e sacrificio di Abel, pero no esun di Cain. Ora Dios a exigí cuenta di Cain pa motibu cu el a asesiná su ruman brutalmente, na un moda sin heful el a bisa Dios: “Ami ta e guardian di mi ruman?” Pa su picá, Cain a ser deportá pa “e tera di Condicion di Fugitivo n’e parti oost di Eden.” E no a mustra repentimentu sincero pa su crímen, i a solamente lamentá su castigu merecí.—Génesis 4:3-16.
14. Con e deber di rindi cuenta personalmente na Dios a ser ilustrá den e caso dje sumo sacerdote Eli i su yunan?
14 E caso di Eli, sumo sacerdote di Israel, tambe ta ilustrá cu hende tin cu rindi cuenta personalmente na Dios. Su yunan, Hofni i Finehas, tabata sirbi den e funcion di sacerdote pero nan “tabata culpabel di inhusticia pa cu hende, i di falta di reverencia pa cu Dios, i no a abstené nan mes di ningun clase di maldad,” segun historiador Josefo. E ‘hombernan aki cu no tabata sirbi pa nada’ no a reconocé Jehova, a cometé sacrilegio, i tabata culpabel di inmoralidad grosero. (1 Samuel 1:3; 2:12-17, 22-25) Como nan tata i sumo sacerdote di Israel, Eli tabatin e deber di disipliná nan, pero el a meramente reprendé nan suavemente. Eli a ‘sigui onra su yunan mas cu Jehova.’ (1 Samuel 2:29) Castigu merecí a bini riba e cas di Eli. Tur dos yu a muri e mésun dia cu nan tata, i nan liña sacerdotal cu tempu a ser cortá completamente. Asina e cuenta a ser reglá.—1 Samuel 3:13, 14; 4:11, 17, 18.
15. Pakico Jonatan, yu di Rey Saul, a ser recompensá?
15 Jonatan, yu di Rey Saul, a pone un ehempel completamente diferente. Pronto despues cu David a mata Goliat, “e alma mes di Jonatan a bira ligá cu e alma di David,” i nan a cera un pacto di amistad. (1 Samuel 18:1, 3) Probablemente, Jonatan a dicerní cu e spiritu di Dios a bandoná Saul, pero su propio celo pa adoracion berdadero no a mengua. (1 Samuel 16:14) Jonatan su aprecio p’e autoridad di David cu Dios a dun’é nunca no a tambaleá. Jonatan a realisá cu e tabatin cu rindi cuenta na Dios, i Jehova a recompens’é pa su curso onorabel dor di garantisá cu su liña di desendencia a sigui pa generacionnan.—1 Crónicanan 8:33-40.
Deber di Rindi Cuenta den e Congregacion Cristian
16. Ken Tito tabata, i pakico nos por bisa cu el a traha un bon informe pa su mes cerca Dios?
16 E Scritura Griego Cristian ta papia bon di hopi homber i muher cu a traha un informe excelente pa nan mes. Por ehempel, tabatin e cristian griego yamá Tito. Segun indicacion el a bira un cristian durante Pablo su promé biahe di misionero pa Chipre. Siendo cu hudiunan i prosélitonan for di Chipre por tabata na Jerusalem durante Pentecoste di 33 E.C., kisas cristianismo a alcansá e isla djis despues di esei. (Echonan 11:19) No obstante, Tito a resultá di ta un di Pablo su fiel colaboradornan. El a compañá Pablo i Barnabas riba e biahe pa Jerusalem rond di 49 E.C., ora e cuestion vital di circuncision a ser resolvé. E echo cu Tito no tabata circuncidá a duna peso n’e argumento di Pablo cu gentilnan combertí na cristianismo no mester tabata bou dje Ley di Moises. (Galationan 2:1-3) E Scritura ta duna testimonio dje excelente ministerio di Tito, i Pablo asta a dirigí un carta inspirá pa Dios na dje. (2 Corintionan 7:6; Tito 1:1-4) Evidentemente, yegando te na fin mes di su curso terenal, Tito a sigui traha un informe excelente pa su mes cerca Dios.
17. Ki informe Timoteo a traha pa su mes, i con e ehempel aki por afectá nos?
17 Timoteo tabata un otro individuo celoso cu a traha un informe aceptabel pa su mes cerca Jehova Dios. Aunke Timoteo tabatin algun problema cu salú, el a desplegá ‘fe sin ningun hipocresia’ i ‘a sirbi como esclabo cu Pablo p’e adelanto dje bon nobo.’ P’esei e apostel por a bisa compañeronan cristian na Filípos: “Mi no tin ningun otro cu un disposicion manera esun di [Timoteo] kende berdaderamente lo percurá p’e cosnan cu tin di haber cu boso.” (2 Timoteo 1:5; Filipensenan 2:20, 22; 1 Timoteo 5:23) Enfrentá cu debilidad humano i otro pruebanan, nos tambe por tin fe sin hipocresia i por traha un informe aceptabel pa nos mes cerca Dios.
18. Ken Lidia tabata, i ki spiritu el a desplegá?
18 Lidia tabata un muher deboto cu evidentemente a traha un informe excelente pa su mes cerca Dios. E i su famia tabata entre e promé individuonan na Europa cu a aceptá cristianismo debí n’e actividad di Pablo na Filípos rond di 50 E.C. Como un nativo di Tiatira, Lidia probablemente tabata un prosélito hudiu, pero kisas tabatin poco hudiu i no tabatin snoa na Filípos. E huntu cu otro muhernan deboto tabata reuní cantu di un riu ora Pablo a papia cu nan. Como resultado, Lidia a bira un cristian i a convencé Pablo i su socionan pa keda na su cas. (Echonan 16:12-15) E hospitalidad cu Lidia a demostrá ta para como un rasgo distintivo di cristiannan berdadero.
19. Mediante ki bon obranan Dórcas a traha un informe excelente pa su mes cerca Dios?
19 Dórcas tabata un otro muher cu a traha un informe excelente pa su mes cerca Jehova Dios. Ora el a muri, Pedro a bai Jope como reaccion riba un peticion dje disipelnan cu tabata biba ei. E dos hombernan cu a topa Pedro “a hib’é na e kamber djariba; i tur e biudanan a presentá nan mes na dje yorando i mustrando hopi bistí interior i bistí exterior cu Dórcas tabata traha ora e tabata cerca nan.” Dórcas a ser restorá bek na bida. Pero e mester ser recordá solamente pa su generosidad amoroso? No. E tabata un “disipel” i siguramente a participá den e trabou di haci disipel e mes. Muhernan cristian awe di igual manera ‘ta abundá den bon obranan i donnan di misericordia.’ Tambe nan tin deleite pa tene un parti activo den proclamá e bon nobo dje Reino i haci disipel.—Echonan 9:36-42; Mateo 24:14; 28:19, 20.
20. Ki preguntanan nos por haci nos mes?
20 Bijbel ta mustra claramente cu nacionnan i individuonan mester rindi cuenta n’e Señor Soberano Jehova. (Sofonías 1:7) Si nos ta dedicá na Dios, laga nos puntra nos mes por lo tantu, ‘Con mi ta mira mi privilegionan i responsabilidadnan cu Dios a duná mi? Ki clase di informe mi ta trahando pa mi mes cerca Jehova Dios i Jesucristo?’
Con Bo Ta Contestá?
◻ Con lo bo proba cu angelnan i e Yu di Dios tin cu rindi cuenta na Jehova?
◻ Ki ehempelnan bíblico tin pa mustra cu Dios ta exigí cuenta di nacionnan?
◻ Kico Bijbel ta bisa tocante nos deber pa rindi cuenta personalmente na Dios?
◻ Ken tabata algun individuo di registro bíblico cu a traha un informe excelente cerca Jehova Dios?
[Plachi na página 10]
Jesucristo a traha un informe excelente pa su mes cerca su Tata celestial
[Plachi na página 15]
Mescos cu Dórcas, muhernan cristian awe ta traha un bon informe pa nan mes cerca Jehova Dios
[Rekonosementu pa Potrèt na página 13]
The Death of Abel/The Doré Bible Illustrations/Dover Publications, Inc.