“Mi Tin e Speransa Akí den Dios”

1-3. (a) Kiko ta un di nos siñansanan prinsipal? (b) Dikon e resurekshon ta asina importante? (Wak e promé plachi.)

KIKO lo bo kontestá si un hende puntra bo: ‘Kiko ta bo kreensianan prinsipal?’ Siguramente lo bo bisa ku bo ta kere ku Yehova ta e Kreador i Dunador di Bida. Tambe lo bo bisa ku bo ta kere den Hesukristu, kende a duna su bida komo reskate. I gustosamente lo bo bisa tambe ku pronto lo tin un paradeis riba tera, kaminda e pueblo di Dios lo biba pa semper. Pero lo bo menshoná e resurekshon komo un di e kreensianan ku mas bo ta balorá?

² Nos tin bon motibu pa bisa ku resurekshon tambe ta un siñansa importante, asta si nos ta spera ku nos lo sobrebibí e tribulashon grandi i biba riba tera pa semper. Apòstel Pablo a mustra dikon e kreensia akí ta asina importante ora el a bisa: “Si en bèrdat e mortonan no ta resusitá, e ora ei ni Kristu no a lanta for di morto.” Si Kristu no a ser resusitá, lo e no ta reinando aworakí, i loke nos ta prediká tokante Kristu su gobernashon lo no tin sentido. (Lesa 1 Korintionan 15:12-19.) Sinembargo, nos sa ku Hesus a ser resusitá. Komo ku nos ta kere esei, nos no ta manera e saduseonan hudiu, kendenan tabata nenga redondamente ku e mortonan por bolbe biba. Asta ora otro hende ta hasi bofon di nos, nos ta sigui kere ku Dios por lanta hende for di morto.—Mar. 12:18; Echo. 4:2, 3; 17:32; 23:6-8.

³ Pablo a bisa ku e siñansa di “resurekshon di e mortonan” ta parti di “e kosnan fundamental tokante Kristu.” (Heb. 6:1, 2) Anto Pablo a mustra bon kla ku e tabatin fe den e resurekshon. (Echo. 24:10, 15, 24, 25) Pero e echo ku e siñansa di resurekshon ta un siñansa prinsipal, esta, un di “e kosnan básiko di e deklarashonnan sagrado di Dios,” no ta nifiká ku e ta un siñansa simpel. (Heb. 5:12) Dikon nò?

 4. Ki pregunta tokante resurekshon nos por hasi nos mes?

⁴ Ora hende kuminsá studia Beibel, mayoria di nan ta lesa relatonan di resurekshon ku a tuma lugá den pasado, manera esun di Lázaro. Anto nan ta siña ku Abraham, Yòb i Daniel tabatin sigur ku den futuro e mortonan lo bolbe biba. Pero kiko lo bo kontestá si un hende pidi bo mustr’é den Beibel ku e promesa di resurekshon ta sigui konta asta hopi aña òf siglonan despues ku Dios a primintí esei? Beibel di bèrdat ta indiká na ki tempu e resurekshon lo tuma lugá? E kontesta pa e preguntanan akí lo fortalesé nos fe. Pues ban wak kon e Skritura ta kontestá nan.

 5. Ki preguntanan tokante resurekshon nos lo kontestá?

⁵ Ta fásil pa nos imaginá ku un hende ku a kaba di fayesé por ser resusitá. (Huan 11:11; Echo. 20:9, 10) Pero kiko di e promesa ku un hende lo ser resusitá añanan, òf asta siglonan, despues? Nos por kere den e promesa ei sin importá si e persona a kaba di fayesé òf si el a fayesé hopi tempu pasá? Eigenlijk bo a pone fe kaba den un resurekshon ku a tuma lugá hopi tempu despues ku Dios a profetisá tokante dje. Kon asina? Kiko e tin di haber ku nos speransa di un resurekshon den futuro?

 6. Kon e profesia na Salmo 118 a kumpli den Hesus?

⁶ Algun hende ta pensa ku ta David a komponé Salmo 118. E salmo akí ta kontené un profesia tokante un resurekshon ku lo a tuma lugá hopi tempu despues ku el a ser skirbí. E ta bisa: “O SEÑOR, salba awor, nos ta roga bo; . . . Bendishoná ta esun ku ta bini den e nòmber di SEÑOR.” Kisas bo ta kòrda ku miéntras Hesus tabata drenta Herúsalèm riba 9 di nisan, esta, poko promé ku su morto, algun hende a sita e profesia ei tokante e Mesías. (Sal. 118:25, 26; Mat. 21:7-9) Pero dikon nos ta bisa ku Salmo 118 a referí na un resurekshon ku lo a tuma lugá hopi aña despues? Ripará kiko mas e salmo ei ta bisa: “E piedra ku e trahadónan a rechasá a bira e piedra-di-skina prinsipal.”—Sal. 118:22.

 7. Te na ki grado e hudiunan a rechasá Hesus?

⁷ “E trahadónan,” esta, e lidernan religioso hudiu, a rechasá e Mesías. Nan a hasi mas ku djis bira lomba p’e òf keda sin asept’é komo e Kristu. Mayoria di hudiu a yega asina leu di pidi Pilato pa laga mat’é. (Luk. 23:18-23) Sí, nan tabata responsabel pa e morto di Hesus.

 8. Kon Hesus por a bira “e piedra-di-skina prinsipal”?

⁸ Si nan a rechasá Hesus i a laga mat’é, ta kon e por a bira “e piedra-di-skina prinsipal”? Esei por a sosodé solamente si el a ser resusitá. Hesus mes a indiká esei ora el a konta un ilustrashon tokante algun kunukero ku a maltratá e esklabonan ku e doño tabata manda na e kunuku. Asina tambe e israelitanan a maltratá e profetanan ku Dios a manda serka nan. Finalmente, e doño a manda su yu stimá i heredero serka e kunukeronan. Nan a aseptá e yu? Niun ora so! E kunukeronan a bai asina leu di mata e yu. Despues ku Hesus a konta e ilustrashon ei, el a sita e palabranan profétiko di Salmo 118:22. (Luk. 20:9-17) Apòstel Pedro a hasi un konekshon similar ora el a usa e mesun versíkulo ei miéntras e tabata papia ku “e lidernan, ansianonan i eskribanan di e hudiunan [ku] a reuní na Herúsalèm.” El a papia tokante “Hesukristu, e nazareno, esun ku boso a klaba na staka, ma ku Dios a lanta for di morto.” Despues Pedro a bisa bon kla: “E Hesus akí ta ‘e piedra ku boso, komo trahadó, a menospresiá, i ku a bira e kabes di skina.’”—Echo. 3:15; 4:5-11; 1 Ped. 2:5-7.

 9. Salmo 118:22 a profetisá tokante ki suseso remarkabel?

⁹ Sí, Salmo 118:22 a profetisá tokante un resurekshon ku lo a tuma lugá sientos di aña despues. Hende lo a rechasá e Mesías i e mester a muri, pero Dios lo a resusit’é i lo el a bira e piedra-di-skina prinsipal. Despues di Hesus su resurekshon, su nòmber lo ta e úniko “nòmber bou di shelu ku Dios a duna hende pa medio di kua nos por ser salbá.”—Echo. 4:12; Efe. 1:20.

10. (a) Ki profesia nos ta haña na Salmo 16:10? (b) Kon nos por tin sigur ku e profesia na Salmo 16:10 no a kumpli den David?

¹⁰ Ban wak un otro teksto ku a papia tokante un resurekshon. Esaki a ser skirbí míles di aña promé ku el a tuma lugá. E echo ku por tin un resurekshon hopi tempu despues ku Dios a profetisá tokante dje òf primintí esei ta fortalesé nos fe. Na Salmo 16:10, David a skirbi: “Lo bo no entregá mi alma na Sheol [òf, “Graf,” NW], tampoko lo bo no permití bo santu mira korupshon.” David no tabata bisa ku e lo no muri nunka òf ku lo e no ta den graf. E Palabra di Dios ta bisa bon kla ku David a bira bieu. Despues di su morto, el “a bai sosegá serka su tatanan i a wòrdu derá den e stat di David.” (1 Rei. 2:1, 10) Pues, kiko Salmo 16:10 ke bisa anto?

11. Despues di kuantu tempu Pedro a papia tokante Salmo 16:10?

¹¹ Nos no ta keda sin un kontesta. Mas ku mil aña despues ku David a skirbi e salmo ei i algun siman despues ku Hesus a muri i a ser resusitá, Pedro a papia tokante Salmo 16:10 ku míles di hudiu i hende ku a kombertí na hudaismo. (Lesa Echonan 2:29-32.) El a bisa ku en bèrdat David a muri i a ser derá. Pedro su oyentenan tabata sa esei. Pedro a bisa ku David “a mira e resurekshon di Kristu di antemano i a papia tokante esei.” Beibel no ta bisa ku Pedro su oyentenan no tabata di akuerdo ku loke el a bisa.

12. Den ki manera Salmo 16:10 a kumpli, i kiko esei ta konfirmá tokante e promesa di un resurekshon?

¹² Pa Pedro enfatisá loke el a bisa, el a sita e palabranan di David na Salmo 110:1. (Lesa Echonan 2:33-36.) E rasonamentu basá riba e Skritura ku Pedro a usa a konvensé un multitut grandi ku Hesus tabata “tantu Señor komo Kristu.” E hendenan a rekonosé ku Salmo 16:10 a kumpli ora Dios a resusitá Hesus. Mas despues, apòstel Pablo a usa e mesun rasonamentu konvinsente ei ora e tabata papia ku e hudiunan na e stat di Antiokia, Pisidia. Su argumento a impreshoná nan asina tantu ku nan kier a skucha mas. (Lesa Echonan 13:32-37, 42.) E argumentonan akí mester konvensé nos tambe ku e profesianan bíbliko ei tokante un resurekshon tabata konfiabel, aunke siglonan a pasa promé ku nan a kumpli.

13. Ki pregunta tokante resurekshon por lanta?

¹³ Ta un animashon pa sa ku un resurekshon por tuma lugá sientos di aña despues ku Dios a profetisá di dje. Pero un hende por puntra su mes: ‘Esei ke men ku mi mester warda hopi tempu pa mi por mira mi sernan kerí? Na ki tempu e resurekshon ku mi ta spera ariba lo sosodé?’ Wèl, Hesus a bisa su apòstelnan ku tabatin kos ku nan no tabata sa ni no tabatin nodi di sa. Tin detayenan tokante “e tempu- òf dianan stipulá ku e Tata so tin outoridat pa determiná.” (Echo. 1:6, 7; Huan 16:12) Sinembargo, esei no ta nifiká ku nos no tin niun detaye tokante ki tempu e resurekshon lo tuma lugá.

14. Kon e resurekshon di Hesus ta diferente for di esnan promé kuné?

¹⁴ Pa nos por komprondé esei, nos mester pensa un ratu riba e resurekshonnan ku Beibel a profetisá di dje. Esun di mas importante, ta esun di Hesus. Si Dios no a resusit’é, nos lo no tabatin e speransa pa bolbe mira nos sernan kerí ku a fayesé. Hende ku a resusitá promé ku Hesus, por ehèmpel, esnan ku Elías i Eliseo a resusitá, no a biba pa semper. Nan a muri atrobe i a bira stòf den graf. Na kontraste, “Dios a lanta Kristu for di morto, [i] e no ta muri mas; morto no tin dominio riba dje mas.” Den shelu, e “ta biba pa tur eternidat.”—Rom. 6:9; Rev. 1:5, 18; Kol. 1:18; 1 Ped. 3:18.

15. Dikon a yama Hesus “e promé fruta”?

¹⁵ Hesus tabata e promé persona ku a resusitá pa biba den shelu komo un kriatura spiritual, i sin duda su resurekshon tabata esun di mas importante. (Echo. 26:23) Pero e no ta e úniko persona ku a haña e promesa pa un resurekshon den shelu komo un kriatura spiritual. Hesus a sigurá su fiel apòstelnan ku nan lo goberná huntu kuné den shelu. (Luk. 22:28-30) Pa nan por haña e rekompensa akí, nan mester muri promé. Despues, meskos ku Kristu, Dios lo resusitá nan komo kriatura spiritual. Pablo a skirbi ku “Kristu a ser lantá for di morto, e promé fruta di esnan ku a bai sosegá.” Pablo a sigui bisa ku lo tin otro hende ku Dios lo resusitá pa biba den shelu, bisando: “Kada un den su debido órden: Kristu, e promé fruta, despues esnan ku ta pertenesé na Kristu, durante su presensia.”—1 Kor. 15:20, 23.

16. Ki indikashon nos ta haña den Beibel tokante e tempu ku e resurekshon pa bida den shelu lo tuma lugá?

¹⁶ E palabranan ei ta duna nos un indikashon na ki tempu e resurekshon pa bida den shelu lo tuma lugá. Lo e tuma lugá “durante [Kristu] su presensia.” Pa hopi tempu kaba, Testigunan di Yehova ta usa Beibel pa mustra ku desde 1914 nos ta bibando durante e presensia di Hesus. Ainda nos ta bibando durante e tempu ei, i e sistema malbado akí pronto lo yega na su fin.

17, 18. Kiko lo sosodé ku algun ruman ungí durante e presensia di Kristu?

¹⁷ Beibel ta agregá mas detaye tokante e resurekshon pa bida den shelu, bisando: “Nos no ke pa boso ta den ignoransia pa loke ta esnan ku a bai sosegá, . . . Si nos tin fe ku Hesus a muri i lanta for di morto, nos tin fe tambe ku Dios lo lanta esnan ku a bai sosegá den union ku Hesus i trese nan huntu kuné. . . . Nos ku lo ta na bida durante e presensia di Señor sigur lo no lanta promé ku esnan ku a bai sosegá; pasobra Señor mes lo baha for di shelu ku un yamada di outoridat, . . . i esnan ku ta morto den union ku Kristu lo lanta promé. Despues, nos ku lo ta na bida lo ser hibá huntu ku nan den nubia pa kontra ku Señor den laira; i asina nos lo ta semper huntu ku Señor.”—1 Tes. 4:13-17.

¹⁸ E promé resurekshon, esta, e resurekshon pa bida den shelu, ta tuma lugá durante “e presensia” di Kristu. E rumannan ungí ku lo ta na bida durante e tribulashon grandi ‘lo ser hibá huntu den nubia.’ Esnan ku ‘lo ser hibá huntu den nubia’ lo no “bai drumi den morto” den e sentido ku nan lo no drumi den morto pa hopi tempu. Nan “tur lo ser kambiá, den un momento, den un fregá di wowo, durante e último tròmpèt.”—1 Kor. 15:51, 52; Mat. 24:31.

19. Ki “mihó resurekshon” lo tin den futuro?

¹⁹ Awe, mayoria di kristian fiel no ta ungí i no a haña e yamada pa bai goberná ku Kristu den shelu. Mas bien, nan ta warda riba “e dia di Yehova,” ora e pone un fin na e sistema malbado akí. Niun hende no sa e tempu eksakto ku e fin lo yega, ma tin prueba ku ta mustra ku e dia ta serka. (1 Tes. 5:1-3) Despues di esei, un otro resurekshon lo tuma lugá: un resurekshon pa bida den paradeis riba tera. E hendenan ku lo ser resusitá lo tin e speransa pa bira perfekto i pa biba pa semper sin muri nunka. Siguramente esei lo ta “un mihó resurekshon” ku e resurekshonnan di pasado kaminda esnan ku a ser resusitá a bolbe muri despues di tempu.—Heb. 11:35.

20. Dikon nos por tin sigur ku e binidero resurekshon lo tuma lugá na un manera ordená?

²⁰ Beibel ta bisa ku esnan ku lo lanta pa bida den shelu lo resusitá “kada un den su debido órden.” (1 Kor. 15:23) Nos por tin sigur ku e resurekshon riba tera tambe lo tuma lugá na un manera ordená, òf organisá. Esei sigur ta algu masha interesante! Kisas nos ta puntra nos mes: ‘Hende ku a muri resientemente lo resusitá na komienso di e Reinado di Mil Aña di Kristu i topa nan sernan kerí ku konosé nan? Hòmbernan fiel di pasado ku tabata bon lider lo resusitá mas promé pa yuda organisá e pueblo di Dios den e mundu nobo? Anto kiko di hende ku nunka no a sirbi Yehova? Na ki tempu i na unda nan lo ser resusitá?’ Tin hopi pregunta ku nos por hasi nos mes. Pero pa ta franko, aworakí ta ora pa preokupá nos mes ku e asuntunan ei? No ta muchu mas mihó pa nos warda i wak kiko lo sosodé? Lo ta masha emoshonante pa wak kon Yehova lo trata ku e asuntunan ei.

21. Kiko ta bo speransa relashoná ku e resurekshon?

²¹ Mientrastantu, nos mester fortalesé nos fe den Yehova, kende mediante Hesus ta sigurá nos ku e mortonan den e memoria di Dios lo lanta. (Huan 5:28, 29; 11:23) Komo un prueba mas ku Yehova por resusitá e mortonan, Hesus a yega di bisa ku Abraham, Isak i Yakòb “tur ta bibu” pa Yehova. (Luk. 20:37, 38) Turesten, nos tin sufisiente motibu pa bisa meskos ku Pablo: “Mi tin e speransa akí den Dios, . . . ku lo bai tin un resurekshon di tantu hende hustu komo inhustu.”—Echo. 24:15.