Poder pa Resistí Tentashon i Vense Desanimashon

“Boso lo risibí poder ora spiritu santu bin riba boso.”​—ECHO. 1:8.

1, 2. Kiko Hesus a garantisá su disipelnan, i dikon nan tabatin mester di e yudansa ei?

HESUS tabata sa ku su disipelnan, riba nan mes forsa, lo no por a kumpli ku tur loke el a ordená nan. En bista di e magnitut di nan trabou di prediká, e oposishon fuerte ku nan lo mester a enfrentá i nan limitashonnan komo hende imperfekto, ta opvio ku nan tabatin mester di yudansa sobrehumano. P’esei, djis promé ku Hesus a subi na shelu, el a garantisá su disipelnan: “Boso lo risibí poder ora spiritu santu bin riba boso, i boso lo ta mi testigunan na Yerusalèm i na henter Hudea i Samaria, i te na e parti mas alehá di mundu.”​—Echo. 1:8.

² E promesa ei a kuminsá kumpli na Pentekòste di aña 33 di nos era ora ku Kristu su siguidónan a risibí poder pa medio di spiritu santu pa prediká den henter Yerusalèm. Oponentenan no por a stòp nan. (Echo. 4:20) Meskos ku e fiel disipelnan ei, nos tambe, awe mas ku nunka, tin mester di Dios su forsa durante e último dianan akí, “te na fin di mundu.”​—Mat. 28:20.

 3. (a) Kiko ta e diferensia entre spiritu santu i poder? (b) Kiko e poder ku Yehova ta duna nos por yuda nos hasi?

³ Hesus a primintí su disipelnan ku nan ‘lo risibí poder ora spiritu santu bin riba nan.’ E palabranan “poder” i “spiritu” no tin e mesun nifikashon. Dios su spiritu santu, esta, su forsa aktivo, ta e energia ku e ta usa pa kumpli ku Su boluntat. Por ehèmpel, e por duna hende e energia ei òf us’é den otro manera pa kumpli ku su propósito. En kambio, poder ta e kapasidat di aktua, obra òf produsí un sierto efekto. I poder por ta pasivo den e sentido ku e ta keda inaktivo den un hende òf un opheto te ora mester di dje pa produsí un sierto efekto. Pues, nos por kompará spiritu santu ku e energia òf koriente ku tin mester pa karga un bateria, miéntras ku poder ta e energia ku e bateria ta retené te ora e haña uso. Di mes manera, e poder, òf forsa, ku Yehova ta duna nos pa medio di su spiritu santu ta yuda kada un di nos ku ta su sirbidónan kumpli ku nos dedikashon na dje i pa, ora ta nesesario, resistí forsanan malbado.​—Lesa Mikeas 3:8; Kolosensenan 1:29.

 4. Kiko nos lo konsiderá den e artíkulo akí, i dikon?

⁴ Kon nos ta manifestá e poder ku nos ta risibí pa medio di spiritu santu? Kon spiritu santu ta impulsá nos pa aktua òf reakshoná den situashonnan ku nos por haña nos aden? Awor bon, ora nos ta hasi esfuerso pa sirbi Dios fielmente, nos ta haña nos ku hopi opstákulo ku sea Satanas, su mundu malbado òf nos mes ta pone den nos kaminda debí na nos imperfekshon. Ta importante pa nos komo kristian vense e opstákulonan ei pa nos por perseverá, partisipá regularmente den e ministerio i keda ku un bon relashon ku Yehova. P’esei, laga nos konsiderá kon spiritu santu ta yuda nos resistí tentashon i tambe trata ku kansansio i desanimashon.

Forsa pa Resistí Tentashon

 5. Kon orashon por fortalesé nos?

⁵ Hesus a siña su siguidónan pa resa pidi Dios: “No laga nos kai den tentashon, ma libra nos di e malbado.” (Mat. 6:13, BPK) Yehova siguramente lo no keda sin yuda su fiel sirbidónan ku ta hasi e tipo di petishonnan akí. Na un otro okashon, Hesus a bisa: ‘Boso Tata selestial lo duna spiritu santu na esnan ku pidié.’ (Luk. 11:13) Ta un alivio pa sa ku Yehova ta duna nos su spiritu santu pa yuda nos hasi loke ta korekto! Klaru ku esaki no ta nifiká ku Yehova lo no permití pa nos haña nos ku tentashon. (1 Kor. 10:13) Ma ora nos haña nos ku tentashon, ta nèt na e momentonan ei nos tin ku hasi orashon asta mas intenso.​—Mat. 26:42.

 6. Kiko Hesus a usa komo base pa refutá Satanas su insinuashonnan?

⁶ Hesus a sita tekstonan di Beibel pa refutá Diabel su insinuashonnan. E tabata konosé e Palabra di Dios for di kabes, pasobra el a kontestá Satanas: “Ta pará skirbí . . . Tambe ta pará skirbí . . . Bai for di akinan, Satanas! Pasobra ta pará skirbí: ‘Adorá SEÑOR bo Dios, i sirbi e so.’” Amor pa Yehova i pa su Palabra a motivá Hesus pa rechasá tur e tentashonnan ku Satanas a pone su dilanti. (Mat. 4:​1-10) I debí ku Hesus a resistí esakinan bes tras bes, Satanas a bai lag’é.

 7. Kon Beibel ta yuda nos resistí tentashon?

⁷ Si Hesus mes a dependé riba e Skritura pa resistí e tentashonnan di Diabel, kuantu mas nos tin ku hasi esei! Pa nos por resistí Diabel i su demoñonan, nos mester kuminsá na konosé Dios su prinsipionan i pega na nan fielmente. Hopi hende ku ta studia Beibel ta sinti nan konmoví pa biba di akuerdo ku su prinsipionan ora nan mira e balor di e sabiduria i hustisia di Dios. No tin duda: “E palabra di Dios” tin poder pa diserní “e pensamentunan i intenshonnan di kurason.” (Heb. 4:12) Mas un hende lesa Beibel i meditá riba loke el a lesa, mas e ta komprondé e “bèrdat” di Yehova su Palabra. (Dan. 9:13) P’esei ta bon pa nos meditá riba tekstonan ku tin di aber ku nos debilidatnan.

 8. Kiko nos tin ku hasi pa haña spiritu santu?

⁸ Hesus por a resistí tentashon no solamente pasobra e tabata konosé e Skritura bon sino tambe pasobra e tabata “yen di spiritu santu.” (Luk. 4:1) Pa nos por tin e mesun forsa i kapasidat pa resistí tentashon, nos mester hala serka Yehova, hasiendo bon uso di tur loke e ta proveé pa nos por haña su spiritu santu. (Sant. 4:​7, 8) Kon nos por hasi esei? Entre otro, nos mester studia Beibel, hasi orashon i asosiá ku nos rumannan. Hopi ruman a mira e balor di pega na un programa yená ku aktividatnan kristian, lokual ta yuda nan keda enfoká riba kosnan spiritual i edifikante.

9, 10. (a) Kiko ta e tentashonnan mas komun den bo área? (b) Kon meditashon i orashon por duna bo forsa pa resistí tentashon asta ora bo ta kansá?

⁹ Ki tipo di tentashon abo mester a resistí? Bo a yega di haña bo ku e tentashon pa flirt ku un persona ku no ta bo kasá? Si bo ta soltero, bo a yega di haña bo ku e tentashon pa sali ku un persona di e sekso opuesto ku no ta un ruman den fe? Bo a yega di haña bo diripiente ku un esena inmoral miéntras bo tabata wak televishon òf sùrf riba Internet? Kon bo a reakshoná? Wèl, lo ta sabí pa para ketu un ratu i pensa kon ún fayo por hiba na un otro i despues na piká serio. (Sant. 1:​14, 15) Pensa riba kuantu doló un solo akto di infieldat por kousa Yehova, e kongregashon i bo famia. Di otro banda, ora nos ta pega fielmente na prinsipionan divino, nos lo disfrutá di un konsenshi limpi. (Lesa Salmo 119:37; Proverbionan 22:3.) Pues, ki ora ku bo haña bo ku pruebanan asina, hasi orashon i pidi Yehova forsa pa resistí.

¹⁰ Tin algu mas ku nos mester tene na mente relashoná ku e strategianan di Satanas. El a aserká Hesus despues ku Hesus a yuna 40 dia den desierto. Sin duda, Diabel a pensa ku esei tabata un bon “tempu” pa pone Hesus su integridat na prueba. (Luk. 4:13) Awe ta meskos; Satanas ta buska e momento oportuno pa pone nos integridat na prueba. P’esei mes ta masha importante pa nos keda spiritualmente fuerte. Hopi biaha, Satanas ta ataká ora ku e sa ku su víktima ta den su momentonan di mas débil. P’esei, ora nos ta sinti nos kansá òf desanimá, nos mester ta mas determiná ku nunka pa pidi Yehova pa su protekshon i spiritu santu.​—2 Kor. 12:​8-10.

Poder pa Trata ku Kansansio i Desanimashon

11, 12. (a) Dikon hopi hende awe ta sinti nan desanimá? (b) Kiko por duna nos e forsa pa vense desanimashon?

¹¹ Komo hende imperfekto, de bes en kuando nos sa sinti nos desanimá, spesialmente den e tempu trabahoso akí. Probablemente, esaki ta e tempu di mas difísil ku humanidat a yega di pasa aden. (2 Tim. 3:​1-5) I segun ku Armagedón ta aserká, problemanan ekonómiko, emoshonal i di otro índole ta sigui oumentá. No ta nada straño anto ku algun hende ta haña ku dia pa dia ta bira mas difísil pa nan kumpli ku nan responsabilidat di kuida nan famia i perkurá materialmente pa nan. Debí na nan situashon, nan ta sinti nan kansá, abatí i sin niun tiki energia. Si abo ta sinti bo asina, kon lo bo por trata ku e situashon?

¹² No lubidá ku Hesus a garantisá su disipelnan ku lo e manda un ayudante pa nan—e spiritu santu di Dios. (Lesa Juan 14:​16 i 17.) Esaki ta e forsa di mas poderoso den universo. Pa medio di dje, Yehova por duna nos fortalesa ku ta ‘muchu mas abundante’ di loke nos tin mester pa soportá kualke prueba. (Efe. 3:20) Ora nos ta dependé di e forsa ei, segun apòstel Pablo, nos ta haña “poder mas ayá di loke ta normal” aunke “nos ta ser oprimí den tur manera.” (2 Kor. 4:​7, 8, NW) Pero Yehova no a primintí di kita nos problemanan, ma el a garantisá nos ku, pa medio di su spiritu santu, lo e duna nos e forsa ku nos tin mester pa trata ku esakinan.​—Fil. 4:13, NW.

13. (a) Relatá kon un hóben a risibí fortalesa pa trata ku un situashon difísil. (b) Bo por konta un eksperensia paresido?

¹³ Konsiderá e ehèmpel di Stephanie, un pionero regular di 19 aña di edat. Tempu ku e tabatin 12 aña, el a haña un atake selebral i nan a konstatá ku e tabatin un tumor na selebro. E mester a hasi dos operashon i haña bestraling. Pero lamentablemente, el a haña dos atake selebral mas ku a afektá su bista i pone ku kasi e no por a move e banda robes di su kurpa mas. Stephanie tin ku spar su energia pa e por hasi e kosnan ku e ta haña ta mas importante, manera asistí na reunion di kongregashon i partisipá den sirbishi di vèlt. Sinembargo, e ta sinti kon Yehova su spiritu santu ta yud’é perseverá. Awor kiko a yuda Stephanie vense desanimashon? Esei ta entre otro publikashonnan basá riba Beibel i e eksperensianan ku esakinan ta kontené, kartanan di animashon ku rumannan a manda p’e i tambe e palabranan di estímulo ku nan tabata ekspresá na dje promé i despues di reunion. Algun persona interesá den e bèrdat tambe a anim’é mashá; komo muestra di nan gratitut pa loke el a siña nan, nan tabata bini serka dje na kas pa risibí estudio di Beibel. Stephanie ta masha gradisidu na Yehova pa tur esaki. Su teksto preferí ta Salmo 41:3, ku e ta sinti a kumpli den su kaso.

14. Kiko nos mester evitá ora nos ta sinti nos desanimá, i dikon?

¹⁴ Ora nos ta kansá òf bou di hopi tenshon, kisas nos tin e tendensia di baha man na nos aktividatnan spiritual, pensando ku esei ta e manera pa trata ku e situashon. Esei ta e pió kos ku nos por hasi. Dikon? Pasobra ta nèt pa medio di e aktividatnan ei—manera, estudio personal, Adorashon Komo Famia, sirbishi di vèlt i reunion kristian—nos ta haña spiritu santu ku ta fortalesé nos. Aktividatnan kristian semper ta refreskante. (Lesa Mateo 11:​28 i 29.) Kuantu biaha rumannan ta bini reunion kansá, pero ora di bai kas, nan ta sinti nan bon i yen di energia, komo si fuera nan bateria spiritual ta kargá atrobe!

15. (a) Yehova a primintí kristiannan un bida fásil? Usa teksto di Beibel pa splika. (b) Kiko Dios a primintí nos, i kiko nos mester puntra nos mes?

¹⁵ Klaru ku esaki no ta nifiká ku disipelnan di Kristu no ta haña nan ku preshon. Nan tin ku hasi hopi esfuerso pa keda fiel. (Mat. 16:​24-26; Luk. 13:24) Sinembargo, Yehova ta duna esun kansá forsa pa medio di su spiritu santu. Profeta Isaias a bisa: “Esnan ku spera riba SEÑOR lo haña forsa renobá; nan lo bula bai ariba ku hala manera águila, nan lo kore sin bira fatigá, nan lo kana sin kansa.” (Isa. 40:​29-31) En bista di esei, ta bon pa nos puntra nos mes: ‘Kiko ta pone nos sinti anto ku ta nos aktividatnan kristian ta kansa nos?’

16. Kiko nos por hasi pa eliminá e posibel kousa di kansansio òf desanimashon?

¹⁶ Yehova su Palabra ta animá nos pa “hasi sigur di e kosnan mas importante.” (Fil. 1:10, NW) Komparando bida kristian ku un kareda largu, apòstel Pablo, bou di inspirashon, a konsehá: “Laga nos tambe pone un banda tur strobashon, . . . i ku perseveransia laga nos kore e kareda ku ta poní nos dilanti.” (Heb. 12:1) Loke Pablo tabata ke men ta ku nos no mester kore tras di kosnan ku no ta bale la pena, esta, kosnan ku ta kansa nos. Kisas algun di nos ta buska mas kos pa hasi apesar ku nos tin un bida drùk kaba. P’esei, si tur ora bai bo ta kansá i tin strès, kisas ta bon pa bo analisá bo situashon i wak kuantu tempu bo ta dediká na kumpli ku e eksigensianan di bo trabou seglar, kuantu bes bo ta biaha pa plaser i tambe kuantu tempu bo ta dediká na deporte òf otro rekreo. Si nos ta rasonabel i modesto, nos lo rekonosé nos limitashonnan i evitá aktividatnan innesesario.

17. Dikon algun di nos ta sinti nos desanimá, pero ki garantia Yehova a duna nos?

¹⁷ Kisas algun di nos ta sinti nos un poko desanimá pa motibu ku e fin di e sistema di kos akí no a bini ainda manera nos a ferwagt. (Pro. 13:12) Pero si nos ta sinti asina, nos por haña animashon for di e palabranan di Habakuk 2:3: “E vishon lo ta pa e tempu stipulá; e ta pura yega na e fin, i e lo no faya. Maske e ta tarda, sper’é; pasobra e lo bin sigur, e lo no tarda.” Sí, Yehova a garantisá nos ku e fin lo bini na e tempu ku el a stipulá!

18. (a) Ki promesa di Yehova ta fortalesé bo? (b) Kon e siguiente artíkulo lo benefisiá nos?

¹⁸ Sin duda, nos tur komo Yehova su sirbidónan fiel ta anhelá e dia ku nos lo no sinti nos kansá ni desanimá mas, ya ku lo yega e dia ku tur hende lo bolbe haña ‘nan vigor di hubentut.’ (Jòb 33:25) Pero for di awor nos por haña fortalesa pa medio di spiritu santu segun ku nos ta partisipá den aktividatnan spiritual refreskante. (2 Kor. 4:16; Efe. 3:16) No laga kansansio pone bo pèrdè e oportunidat di risibí bindishonnan eterno. Kualke difikultat ku sea tentashon, kansansio òf desanimashon por trese kuné lo pasa pa olvido, si no ta aworakí, ta den Dios su mundu nobo. Den e siguiente artíkulo, nos lo konsiderá kon spiritu santu ta duna kristiannan poder pa soportá persekushon, resistí preshon dañino di nan pareunan i wanta vários otro difikultat.

Kon Lo Bo Kontestá?

• Kon lesamentu di Beibel ta fortalesé nos?

• Kon orashon i meditashon ta fortalesé nos?

• Kon bo por evitá kosnan ku por kousa desanimashon?

[Plachi na página 26]

Reunion kristian ta fortalesé nos spiritualmente