Permanece den E “Stad Di Refugio” i Biba!

“E tin cu biba den su stad di refugio te na morto dje sumo sacerdote.”—NUMERONAN 35:28.

 1. Ken ta e Vengador di sanger, i ki accion lo e tuma pronto?

JEHOVA su Vengador di sanger, Jesucristo, ta cla pa atacá. Cu su forsanan angelical, e Vengador aki pronto lo tuma accion contra tur persona no-repentí cu ta culpabel di sanger. Sí, Jesus lo sirbi como Dios su Ehecutor durante e “tribulacion grandi” cu ta acercando rápidamente. (Mateo 24:21, 22; Isaías 26:21) E ora ei humanidad lo no scapa dje consecuencianan di nan culpa di sanger.

 2. Kico ta e único berdadero lugá di refugio, i ki preguntanan ta rekerí contesta?

² E caminda pa siguridad ta di subi e caretera cu ta bai n’e stad di refugio antitípico i core pa bo bida! Si un refugiado ser admití den e stad, lo e mester permanecé ei, pasobra esei ta e único berdadero lugá di refugio. Pero kisas bo por puntra, ‘Ya cu mayoria di nos nunca a mata ningun hende, nos ta realmente culpabel di sanger? Pakico Jesus ta e Vengador di sanger? Kico ta e stad di refugio di tempu moderno? Cualkier hende hamas por bandon’é sano i salbo?’

Nos Ta Realmente Culpabel di Sanger?

 3. Ki rasgo dje Ley di Moises lo yuda nos mira cu miles di miyones di hende riba tera ta carga culpa di sanger?

³ Un rasgo dje Ley di Moises lo yuda nos mira cu miles di miyones di hende riba tera ta carga culpa di sanger. Dios a pone riba e israelitanan un responsabilidad colectivo pa dramamentu di sanger. Si un hende a ser hañá matá i su asesino tabata desconocí, e huesnan tabatin cu midi e distancia te n’e stadnan den cercania pa determiná e stad di mas cercano. Pa eliminá culpa, e ancianonan dje stad aparentemente culpabel di sanger ei tabatin cu kibra e nek di un baca yong cu no a ser poné na trabou ainda den un vaye di coriente di awa no-cultivá. Esaki a ser hací dilanti sacerdotenan levita ‘pasobra Jehova a scoge nan pa resolvé pleitunan tocante actonan violento.’ E ancianonan dje stad a laba nan man riba e baca i a bisa: “Nos mannan no a drama e sanger aki, ni nos wowonan no a mir’e ser dramá. No pon’é riba cuenta di bo pueblo Israel kende bo a redimí, O Jehova, i no pone e culpa di sanger inocente meimei di bo pueblo Israel.” (Deuteronomio 21:1-9) Jehova Dios no tabata kier p’e tera di Israel ser contaminá cu sanger di su pueblo pa carga culpa di sanger colectivo.

 4. Babilonia e Grandi tin ki registro di culpabilidad di sanger?

⁴ Sí, ta existí culpa di sanger colectivo of di comunidad. Considerá e inmenso culpa di sanger cu ta poné riba Babilonia e Grandi, e imperio mundial di religion falsu. Wel, e ta burachi cu e sanger di Jehova su sirbidornan! (Revelacion 17:5, 6; 18:24) Cristiandad su religionnan ta pretendé di sigui e Prins di Pas, pero guera, inkisicion religioso i crusadanan mortífero a hacié culpabel di sanger dilanti Dios. (Isaías 9:6; Jeremías 2:34) En realidad, e mester carga e culpa principal p’e mortonan di miyones di hende den e dos gueranan mundial dje siglo aki. P’esei, esnan cu ta pega na religion falsu i tambe e apoyadornan i participantenan den guera humano ta culpabel di sanger dilanti Dios.

 5. Con algun hende tabata manera e matador inintencional den Israel?

⁵ Algun hende a causa morto humano boluntariamente of dor di descuido. Otronan a tuma parti den matamentu colectivo, tal bes persuadí dor di lidernan religioso cu esaki tabata e boluntad di Dios. Otronan a persiguí i a mata sirbidornan di Dios. Asta si nos no a haci tal cosnan, tog nos ta compartí responsabilidad di comunidad p’e pérdida di bida humano pasobra nos no tabata conocé e ley i boluntad di Dios. Nos ta manera e matador inintencional ‘kende a mata su próhimo sin tabata sa esei i kende no a odi’é anteriormente.’ (Deuteronomio 19:4) Individuonan asina mester roga Dios pa misericordia i mester core drenta e stad di refugio antitípico. Sino nan lo tin un encuentro fatal cu e Vengador di sanger.

Jesus Su Papelnan Vital

 6. Pakico nos por bisa cu Jesus ta e pariente mas yegá di humanidad?

⁶ Den Israel e vengador di sanger tabata e víctima su pariente mas yegá. Pa venga tur esnan matá riba tera i specialmente e sirbidornan di Jehova cu a ser matá, e Vengador moderno di sanger lo mester ta un pariente di henter humanidad. Jesucristo a cumpli cu e papel ei. El a nace como un homber perfecto. Jesus a entregá su bida sin picá den morto como un sacrificio di rescate, i despues di su resureccion pa cielu, el a presentá su balor na Dios na fabor di Adam su desendientenan pecaminoso i muribundo. Asina Cristo a bira Redentor di humanidad, nos pariente mas yegá—e Vengador legítimo di sanger. (Romanonan 5:12; 6:23; Hebreonan 10:12) Jesus ta ser identificá como un ruman pa e siguidornan ungí di su pasonan. (Mateo 25:40, 45; Hebreonan 2:11-17) Como Rey celestial e ta bira e “Tata Eterno” di esnan cu lo beneficiá for di su sacrificio como su súbditonan terenal. Esakinan lo biba pa semper. (Isaías 9:6, 7) Pues Jehova apropiadamente a nombra e Pariente aki di humanidad como e Vengador di sanger.

 7. Como e gran Sumo Sacerdote, kico Jesus ta haci pa hende?

⁷ Tambe Jesus ta un Sumo Sacerdote sin picá, probá i compasivo. (Hebreonan 4:15) Den e capacidad ei e ta aplicá e mérito di su sacrificio di expiacion [kitamentu di culpabilidad mediante compensacion] di picá na humanidad. E stadnan di refugio a ser establecí “pa e yunan di Israel i pa e residente stranhero i pa e poblador meimei di nan.” (Númeronan 35:15) Pues e Sumo Sacerdote a aplicá promé e mérito di su sacrificio na su siguidornan ungí, “e yunan di Israel.” Awor e ta ser aplicá n’e ‘residentenan stranhero’ i n’e ‘pobladornan’ den e stad di refugio antitípico. E “otro carnénan” aki di Señor Jesucristo ta spera di biba pa semper riba tera.—Juan 10:16; Salmo 37:29, 34.

E Stad di Refugio Djawe

 8. Kico ta e stad di refugio antitípico?

⁸ Kico ta e stad di refugio antitípico? Esei no ta un of otro sitio geográfico manera Hébron, un dje seis stadnan levita di refugio i residencia dje sumo sacerdote di Israel. E stad di refugio djawe ta e percuracion di Dios pa protehá nos for di morto como consecuencia di violacion di su mandamentu tocante e santidad di sanger. (Génesis 9:6) Sea deliberadamente of inintencionalmente, tur violador dje mandamentu ei mester busca Dios su pordon i e cancelacion di su picá mediante fe den e sanger dje Sumo Sacerdote, Jesucristo. Cristiannan ungí cu speransa celestial i e “multitud grandi” cu prospectonan terenal a saca probecho dje beneficionan di Jesus su sacrificio di expiacion di picá i ta den e stad di refugio antitípico.—Revelacion 7:9, 14; 1 Juan 1:7; 2:1, 2.

 9. Con Saulo di Tarso a violá e mandamentu di Dios tocante sanger, pero con el a manifestá un cambio di actitud?

⁹ Promé cu apostel Pablo a bira un cristian, el a violá e mandamentu tocante sanger. Como Saulo di Tarso, el a persiguí Jesus su siguidornan i asta a aprobá cu nan a ser asesiná. “No obstante,” Pablo a bisa, “mi a ser mustrá misericordia, pasobra mi tabata ignorante i a actua cu falta di fe.” (1 Timoteo 1:13; Echonan 9:1-19) Saulo tabatin un actitud di repentimentu cu mas despues a ser probá dor di hopi obra di fe. Pero mas cu fe den e rescate ta necesario pa por drenta e stad di refugio antitípico.

10. Con ta posibel pa obtené un bon concenshi, i kico mester haci pa mantené esaki?

¹⁰ Un matador inintencional por a permanecé den un di Israel su stadnan di refugio solamente si e por a proba cu e tabatin un bon concenshi pa cu Dios relacioná cu dramamentu di sanger. Pa obtené un bon concenshi, nos mester ehercé fe den Jesus su sacrificio, repentí di nos picánan, i cambia nos curso. Nos tin cu haci peticion pa un bon concenshi den un dedicacion huntu cu oracion na Dios mediante Cristo, simbolisando esaki cu bautismo bou di awa. (1 Pedro 3:20, 21) E bon concenshi aki ta permití nos alcansá un relacion limpi cu Jehova. E único manera pa mantené un bon concenshi ta di cumpli cu Dios su rekisitonan i efectuá e trabou asigná na nos den e stad di refugio antitípico, net manera refugiadonan den e antiguo stadnan di refugio tabatin cu obedecé e Ley i cumpli cu nan asignacionnan di trabou. E trabou principal pa Jehova su pueblo awe ta esun di declará e mensahe di Reino. (Mateo 24:14; 28:19, 20) Haciendo e trabou ei lo yuda nos ser residentenan útil dje stad di refugio di tempu moderno.

11. Kico nos mester evitá si nos kier permanecé sano i salbo den e stad di refugio djawe?

¹¹ Bandonando e stad di refugio djawe ta nificá exponé nos mes na destruccion, pasobra e Vengador di sanger pronto lo drenta den accion contra tur esnan cu ta culpabel di sanger. Esaki no ta tempu pa ser gará pafó dje stad protectivo aki of den un área peligroso cerca dje rand di su sabananan. Nos lo terminá pafó dje stad di refugio antitípico si nos perde fe den e sacrificio di expiacion di picá dje Sumo Sacerdote. (Hebreonan 2:1; 6:4-6) Tampoco nos lo ta sano i salbo si nos adoptá e camindanan mundano, si nos ta para na rand di Jehova su organisacion of si nos desviá for di nos Tata celestial su normanan hustu.—1 Corintionan 4:4.

Librá for dje Stad di Refugio

12. Pa cuantu tempu esnan cu anteriormente tabata culpabel di sanger mester permanecé den e stad di refugio antitípico?

¹² Un matador inintencional den Israel tabatin cu permanecé den un stad di refugio “te na morto dje sumo sacerdote.” (Númeronan 35:28) Pues, pa cuantu tempu esnan cu anteriormente tabata culpabel di sanger mester keda den e stad di refugio antitípico? Te ora nan no mester dje servicionan mas dje Sumo Sacerdote, Jesucristo. “Tambe e por salba completamente esnan cu ta acudí na Dios mediante dje,” Pablo a bisa. (Hebreonan 7:25) Tanten cu ta sigui existí cualkier culpa di sanger, e servicionan dje Sumo Sacerdote ta necesario pa asina hende imperfecto por tin un posicion hustu dilanti Dios.

13. Ken ta e “yunan di Israel” di tempu moderno, i pa cuantu tempu nan mester keda den e “stad di refugio”?

¹³ Corda cu e antiguo stadnan di refugio a ser establecí pa “e yunan di Israel,” e residentenan stranhero i e pobladornan. “E yunan di Israel” ta israelitanan spiritual. (Galationan 6:16) Nan mester permanecé den e stad di refugio antitípico tanten cu nan ta biba riba tera. Pakico? Pasobra ainda nan ta den carni imperfecto i p’esei tin mester dje mérito di expiacion di nan Sumo Sacerdote celestial. Pero ora e cristiannan ungí aki ta muri i ta ser resucitá pa bida spiritual den cielu, nan no tin mester dje servicionan di expiacion mas dje Sumo Sacerdote; nan lo a bandoná pa semper e carni cu su culpa di sanger inherente. Respecto e ungínan resucitá ei, e Sumo Sacerdote lo a muri den un capacidad expiador i protectivo.

14. Pakico esnan cu prospectonan celestial mester keda awor den e stad di refugio djawe?

¹⁴ Tin un otro motibu bíblico mas pakico esnan cu lo ta ‘co-herederonan celestial cu Cristo’ mester permanecé den e stad di refugio antitípico te ora nan terminá fielmente nan curso terenal den morto. Ora nan muri, nan lo sacrificá e naturalesa humano pa semper. (Romanonan 8:17; Revelacion 2:10) Jesus su sacrificio ta aplicá solamente na esnan cu tin naturalesa humano. P’esei, e Sumo Sacerdote ta muri pa cu esnan di Israel spiritual ora nan ser resucitá como criatura spiritual cu lo biba eternamente den cielu como “participantenan den naturalesa divino.”—2 Pedro 1:4.

15. Ken ta e actual ‘residentenan stranhero’ i ‘pobladornan,’ i kico e gran Sumo Sacerdote lo haci pa nan?

¹⁵ Na ki tempu e Sumo Sacerdote lo “muri” relacioná cu e ‘residentenan stranhero’ i ‘pobladornan’ di tempu moderno, permitiendo nan pa bandoná e stad di refugio antitípico? E miembronan aki dje multitud grandi no por sali for dje stad di refugio aki inmediatamente despues dje tribulacion grandi. Pakico no? Pasobra ainda nan lo ta den nan carni pecaminoso i imperfecto i lo tin cu permanecé bou dje proteccion dje Sumo Sacerdote. Dor di probechá di su servicionan di expiacion durante su gobernacion i sacerdocio di mil aña, nan lo alcansá perfeccion humano. E ora ei Jesus lo presentá nan na Dios pa un prueba final i eternamente decisivo di nan integridad dor di laga Satanas i su demoñonan los pa un tempu corticu. Debí cu nan ta pasa e prueba aki cu aprobacion divino, Jehova lo declará nan hustu. Asina nan lo alcansá e plenitud mes di perfeccion humano.—1 Corintionan 15:28; Revelacion 20:7-10.a

16. Na ki tempu sobrebibientenan dje tribulacion grandi lo no tin mester dje servicionan di expiacion mas dje Sumo Sacerdote?

¹⁶ Pues, anto, sobrebibientenan dje tribulacion grandi lo tin cu mantené un bon concenshi dor di permanecé den e stad di refugio antitípico te na fin dje Reinado di Mil Aña di Cristo. Como hende hací perfecto, nan lo no tin mester dje servicionan di expiacion mas dje Sumo Sacerdote i lo sali for di bou di su proteccion. E ora ei Jesus lo muri pa cu nan como Sumo Sacerdote, pasobra lo e no tin nodi actua mas na nan fabor cu e sanger purificador di su sacrificio. N’e tempu ei nan lo bandoná e stad di refugio antitípico.

17. Pakico lo no ta necesario pa esnan cu ta resucitá durante e Reinado di Mil Aña di Cristo drenta e stad di refugio antitípico i permanecé ei?

¹⁷ Esnan cu ta ser resucitá durante Jesus su Reinado di Mil Aña mester drenta e stad di refugio antitípico i permanecé ei te n’e morto dje sumo sacerdote? No, pasobra dor di muri nan a paga e pena pa nan estado pecaminoso. (Romanonan 6:7; Hebreonan 9:27) No obstante, e Sumo Sacerdote lo yuda nan alcansá perfeccion. Si nan pasa e prueba final cu éxito despues dje Milenio, Dios lo declará nan tambe hustu cu un garantia di bida eterno riba tera. Naturalmente, keda sin cumpli cu Dios su rekisitonan lo trece huicio condenatorio i destruccion riba cualkier hende cu no pasa e prueba final como wardador di integridad.

18. Relacioná cu Jesus su funcion como rey i sacerdote, kico lo permanecé pa semper cu humanidad?

¹⁸ E sumo sacerdotenan israelita cu tempu a muri. Pero Jesus “a bira un sumo sacerdote segun e manera di Melkísedec pa semper.” (Hebreonan 6:19, 20; 7:3) Pues e terminacion di Jesus su funcion como un Sumo Sacerdote mediador pa cu humanidad no ta finalisá su bida. E bon efectonan di su sirbishi como Rey i Sumo Sacerdote lo permanecé cu humanidad pa semper, i hende lo ta eternamente gradicidu na dje p’e echo cu el a sirbi den e capacidadnan aki. Ademas, atrabes di eternidad Jesus lo hiba delantera den e adoracion puru di Jehova.—Filipensenan 2:5-11.

Lesnan Balioso pa Nos

19. Ki les relacioná cu odio i amor nos por siña for dje percuracion dje stadnan di refugio?

¹⁹ Nos por siña vários les for dje percuracion dje stadnan di refugio. Por ehempel, ningun matador cu odio asesino pa su víctima a ser permití pa biba den un stad di refugio. (Númeronan 35:20, 21) Pues con cualkier hende den e stad di refugio antitípico por permití odio pa un ruman desaroyá den su curason? “Tur cu ta odia su ruman ta un matador,” apostel Juan a skirbi, “i boso sa cu ningun matador tin bida eterno permanente den dje.” P’esei, laga nos “sigui stima otro, pasobra amor ta bin di Dios.”—1 Juan 3:15; 4:7.

20. Pa haña proteccion for dje Vengador di sanger, kico esnan den e stad di refugio antitípico mester haci?

²⁰ Pa proteccion for dje vengador di sanger, matadornan inintencional tabatin cu permanecé den un stad di refugio i no desviá mas ayá cu su sabananan. Kico di esnan den e stad di refugio antitípico? Pa proteccion contra e gran Vengador di sanger, nan no mester bandoná e stad. En berdad, nan tin cu vigilá contra tentacionnan pa bai na rand dje sabananan, na moda di papia. Nan mester tene cuidou pa no laga amor p’e mundu di Satanas desaroyá den nan curason. Esaki por exigí oracion i esfuerso, pero nan bida ta dependé di esei.—1 Juan 2:15-17; 5:19.

21. Ki trabou recompensador ta ser hací dor di esnan den e stad di refugio djawe?

²¹ Matadornan inintencional den e stadnan antiguo di refugio mester tabata trahadornan productivo. Di igual manera, e ‘yunan ungí di Israel’ a pone un ehempel excelente como trahadornan di cosecha i proclamadornan di Reino. (Mateo 9:37, 38; Marco 13:10) Como ‘residentenan stranhero’ i ‘pobladornan’ den e stad di refugio djawe, cristiannan cu prospectonan terenal tin e privilegio pa haci e trabou salbador di bida aki lado a lado cu e ungínan cu ainda ta riba tera. I ki un trabou recompensador esaki ta! Esnan cu ta traha fielmente den e stad di refugio antitípico lo scapa di morto eterno na man dje Vengador di sanger. En bes di esei, nan lo saca beneficionan eterno for di su sirbishi como e gran Sumo Sacerdote di Dios. Lo bo permanecé den e stad di refugio i biba pa semper?

[Notanan]

Con Lo Bo Contestá?

◻ Pakico nos por bisa cu miles di miyones riba tera ta culpabel di sanger?

◻ Ki papelnan Jesucristo ta cumpli cuné relacioná cu humanidad?

◻ Kico ta e stad di refugio antitípico, i con un persona ta drenta den dje?

◻ Na ki tempu hende lo ta librá for dje stad di refugio antitípico?

◻ Ki lesnan balioso nos por siña for dje percuracion dje stadnan di refugio?

[Plachi na página 16]

Bo sa ki papelnan vital Jesucristo ta cumpli cuné?