Jehova, un Dios “Cla pa Pordoná”

“Abo, O Jehova, ta bon i cla pa pordoná.”—SALMO 86:5.

 1. Ki carga pisá Rey David a hiba, i con el a haña consuelo pa su curason afligí?

REY DAVID di Israel di antigwedad tabata sa con pisá e carga di un concenshi culpabel por ta. El a skirbi: “Mi mes erornan a pasa riba mi cabes; manera un carga pisá nan ta demasiado pisá pa mi. Mi a keda lam i aplastá te na un grado extremo; mi a grita manera leon pa causa dje suspiro di mi curason.” (Salmo 38:4, 8) Sin embargo, David a haña consuelo pa su curason afligí. E tabata sa cu aunke Jehova ta odia picá, e no ta odia e pecadó—si e persona ei ta berdaderamente repentí i ta bandoná su curso pecaminoso. (Salmo 32:5; 103:3) Cu pleno fe den Jehova su bon boluntad pa extendé misericordia na hende repentí, David a bisa: “Abo, O Jehova, ta bon i cla pa pordoná.”—Salmo 86:5.

 2, 3. (a) Ora nos peca, ki carga nos por haña nos ta hiba, i pakico esaki ta beneficioso? (b) Ki peliger tin den ser “tragá” pa sintimentu di culpa? (c) Ki siguransa Bijbel ta duna nos tocante Jehova su bon boluntad pa pordoná?

² Ora nos peca, nos tambe por haña nos cu e carga aplastante di un concenshi molestiá. E sintimentu di remordimentu aki ta normal, asta beneficioso. E por move nos pa tuma accionnan positivo pa corigí nos erornan. Sin embargo, algun cristian a keda aplastá pa un sintimentu di culpa. Nan mes curason cu ta condená nan lo por insistí cu maske cuantu nan repentí, Dios lo no pordoná nan completamente. “E pensamentu di cu Jehova kisas no ta stimá bo mas, ta un sintimentu teribel,” un ruman muher a bisa, cordando un eror cu el a cometé. Asta despues cu el a repentí i a aceptá conseho probechoso di ancianonan di congregacion, el a sigui sinti cu e no ta digno dje pordon di Dios. E ta splica: “No ta pasa niun solo dia cu mi no ta pidi Jehova pordoná mi.” Si sintimentu di culpa ‘traga’ nos, Satanas por purba pone nos entregá, i pone nos sinti cu nos no ta digno di sirbi Jehova.—2 Corintionan 2:5-7, 11.

³ Pero esei sigur sigur no ta e manera cu Jehova ta mira asuntunan! Su Palabra ta sigurá nos cu ora nos manifestá berdadero repentimentu di curason, Jehova ta dispuesto, sí cla pa pordoná. (Proverbionan 28:13) P’esei si bo a yega di pensa cu Dios lo no pordoná bo, tal bes loke ta necesario ta un mihó comprendimentu di pakico i con e ta pordoná.

Pakico Jehova Ta “Cla pa Pordoná”?

 4. Kico Jehova ta corda tocante nos naturalesa, i con esaki ta afectá e manera cu e ta trata nos?

⁴ Nos ta lesa: “Mes leu cu salimentu di solo ta for di bahamentu di solo, asina leu for di nos el a pone nos delitunan. Manera un tata ta mustra misericordia na su yunan, Jehova a mustra misericordia na esnan cu ta tem’é.” Pakico Jehova ta dispuesto pa mustra misericordia? E siguiente versículo ta contestá: “Pasobra e mes conocé bon e formacion di nos, cordando cu nos ta stof.” (Salmo 103:12-14) Sí, Jehova no ta lubidá cu nos ta criaturanan di stof, cu tin limitacion, of debilidadnan, como resultado di imperfeccion. E expresion cu e conocé “e formacion di nos” ta recordá nos cu Bijbel ta compará Jehova cu un trahadó di klei i nos cu e pochinan cu e ta forma.a (Jeremías 18:2-6) Un trahadó di klei ta trata di un manera firme pero tog delicado cu su pochinan di klei, semper conciente di nan naturalesa. Asina tambe, Jehova, e Gran Trahador di Klei, ta moderá su trato cu nos segun e limitacion di nos naturalesa pecaminoso.—Compará cu 2 Corintionan 4:7.

 5. Con e buki di Romanonan ta describí e gara poderoso di picá riba nos carni imperfecto?

⁵ Jehova sa con poderoso picá ta. E Scritura ta describí picá como un forsa poderoso cu tin hende den su gara mortífero. Pero con fuerte e gara di picá ta? Den e buki di Romanonan, apostel inspirá Pablo ta splica esaki den términonan bibu: Nos ta “bou di picá,” mescos cu soldatnan ta bou di nan comandante (Romanonan 3:9); el a “goberná” riba humanidad manera un rey (Romanonan 5:21); e ta “biba” den nos (Romanonan 7:17, 20); su “ley” ta traha continuamente den nos, en efecto tratando di controlá nos curso. (Romanonan 7:23, 25) Ki un lucha difícil nos tin pa resistí e gara poderoso di picá riba nos carni imperfecto!—Romanonan 7:21, 24.

 6. Con Jehova ta mira esnan cu ta busca su misericordia cu un curason repentí?

⁶ P’esei, nos Dios misericordioso sa cu no ta posibel pa nos desplegá obedencia perfecto, maske cuantu nos curason lo kier dun’é esei. (1 Reynan 8:46) Amorosamente e ta sigurá nos cu ora nos ta busca su misericordia paternal cu un curason repentí, lo e extendé pordon na nos. E salmista David a bisa: “E sacrificionan na Dios ta un spiritu kibrá; un curason kibrá i aplastá, O Dios, lo bo no despreciá.” (Salmo 51:17) Nunca Jehova lo rechasá un curason cu ta kibrá i aplastá dor dje carga di culpa. Ki bunita esei ta describí con dispuesto Jehova ta pa pordoná!

 7. Pakico nos no por abusá dje misericordia di Dios?

⁷ Pero esaki ta nificá cu nos por abusá dje misericordia di Dios, usando nos naturalesa pecaminoso como un excuus pa cometé picá? Di ningun manera! Jehova no ta laga simpel sentimentalismo gui’é. Su misericordia tin límite. Di ningun manera lo e pordoná esnan kendenan cu un curason duru ta practicá picá malicioso deliberadamente i sin repentí. (Hebreonan 10:26-31) Di otro banda, ora e mira un curason cu ta “kibrá i aplastá,” e ta “cla pa pordoná.” (Proverbionan 17:3) Laga nos considerá algun dje términonan expresivo cu Bijbel ta usa pa describí con completo Jehova su pordon ta.

Con Completo Jehova Ta Pordoná?

 8. En efecto, kico Jehova ta haci ora e ta pordoná nos picánan, i ki efecto esaki mester tin riba nos?

⁸ Rey David repentí a bisa: “Finalmente mi a confesá mi picá na bo, i mi eror mi no a sconde. Mi a bisa: ‘Lo mi haci confesion di mi delitunan na Jehova.’ I bo mes a pordoná e eror di mi picánan.” (Salmo 32:5) E expresion “pordoná” ta traducí di un palabra hebreo cu básicamente ta nificá “hisa,” “hiba, carga.” Su uso aki ta nificá ‘kita culpa, picá, delitu.’ Pues, na moda di papia, Jehova a hisa David su picánan i a hiba nan. (Compará cu Levítico 16:20-22.) Sin duda esaki a suavisá e sintimentu di culpa cu David tabata cargando. (Compará cu Salmo 32:3.) Nos tambe por tin pleno confiansa den e Dios cu ta pordoná picá di esnan cu ta busca su pordon riba base di nan fe den e sacrificio di rescate di Jesucristo. (Mateo 20:28; compará cu Isaías 53:12.) Esnan kende nan picánan Jehova ta lanta asina i hiba, no tin nodi sigui keda cu e carga di sintimentu di culpa pa picánan di pasado.

 9. Kico Jesus su palabranan “Pordoná nos nos debenan” ta nificá?

⁹ Jesus a haci uso dje relacion di creditor i debedó pa ilustrá con Jehova ta pordoná. Por ehempel, Jesus a urgi nos pa pidi: “Pordoná nos nos debenan.” (Mateo 6:12) Asina Jesus a compará ‘picá’ cu ‘debe.’ (Lucas 11:4) Ora nos peca, nos ta bira “debedónan” di Jehova. E verbo griego traducí como “pordoná” por nificá “legumai of pasa por haltu di un debe dor di keda sin exigié.” Den un sentido, ora Jehova ta pordoná, e ta cancelá e debe cu di otro manera lo a ser cargá riba nos cuenta. Pues pecadónan repentí por haña consuelo. Nunca Jehova lo exigí pago pa un debe cu el a cancelá!—Salmo 32:1, 2; compará cu Mateo 18:23-35.

10, 11. (a) Ki idea e frase “ser kitá” na Echonan 3:19 ta duna? (b) Con e echo cu Jehova su pordon ta completo ta ser ilustrá?

¹⁰ Na Echonan 3:19, Bijbel ta usa un otro forma bibu di expresion pa describí e pordon di Dios: “P’esei, repentí i combertí, pa boso picánan ser kitá.” E frase “ser kitá” ta ser traducí di un verbo griego cu, ora us’é simbólicamente, por nificá “veeg, eliminá, cancelá of destruí.” Segun algun erudito, e concepto cu ta ser expresá ta esun di veeg un cos skirbí. Con esaki tabata posibel? E ink cu tabata ser usá generalmente den tempu antiguo tabata ser trahá di un mescla cu a contené carbon, guma i awa. Djis despues cu un persona a caba di skirbi cu un ink asina, e por a coge un spons muhá i veeg loke el a skirbi.

¹¹ Den esei tin un bunita descripcion di con completo Jehova su pordon ta. Ora e ta pordoná nos picánan, ta como si fuera e ta coge un spons i veeg nan. Nos no tin nodi tene miedu cu lo e usa e picánan ei contra nos den futuro, pasobra Bijbel ta revelá algu mas tocante Jehova su misericordia cu ta berdaderamente remarcabel: Ora e pordoná picá, e ta lubidá nan!

“Lo Mi No Corda Nan Picá Mas”

12. Ora Bijbel ta bisa cu Jehova ta lubidá nos picánan, e kier men cu Jehova ta incapas pa corda nan, i pakico bo ta contestá asina?

¹² Mediante profeta Jeremías, Jehova a primintí relacioná cu esnan cu ta den e pacto nobo: “Lo mi pordoná nan eror, i lo mi no corda nan picá mas.” (Jeremías 31:34) Esaki ta nificá cu ora Jehova pordoná e no por corda nos picánan mas? Esei sigur no ta e caso. Bijbel ta conta nos dje picánan di hopi persona cu Jehova a pordoná, incluyendo David. (2 Samuel 11:1-17; 12:1-13) Ta claro cu Jehova ta conciente ainda dje erornan cu nan a cometé, i nos tambe mester ta. E registro di nan picánan, i tambe di nan repentimentu i pordon di parti di Dios, a ser conserbá pa nos beneficio. (Romanonan 15:4) Kico, anto, Bijbel kier men ora e bisa cu Jehova no ta “corda” e picánan di esnan cu e ta pordoná?

13. (a) Kico e nificacion dje verbo hebreo traducí como ‘lo mi corda’ ta encerá? (b) Ora Jehova bisa, “Lo mi no corda nan picá mas,” di kico e ta sigurando nos?

¹³ E verbo hebreo traducí como ‘lo mi corda’ ta implicá mas cu djis recordá e pasado. Segun e Theological Wordbook of the Old Testament, e ta encerá “e implicacion adicional di tuma accion apropiado.” Pues den e sentido aki, “corda” picá ta enbolbé tuma accion contra pecadónan. Ora profeta Oséas a bisa tocante e israelitanan desobediente, “lo e [Jehova] corda nan eror,” e profeta tabata kier men cu Jehova lo a tuma accion contra nan debí na nan falta di repentimentu. P’esei, e resto dje versículo ta agregá: “Lo e duna atencion na nan picánan.” (Oséas 9:9) Di otro banda, ora Jehova bisa, “Lo mi no corda nan picá mas,” e ta sigurando nos cu una bes e pordoná un pecadó repentí, lo e no actua contra dje p’e picánan ei un dia den futuro. (Ezekiel 18:21, 22) Pues e ta lubidá den e sentido cu e no ta keda corda nos di nos picánan pa asina acusá of castigá nos bes tras bes. Dje manera ei Jehova ta pone un ehempel excelente pa nos imitá den nos trato cu otronan. Ora surgi desacuerdonan, ta mihó pa no trece dilanti faltanan di pasado cu abo a bai di acuerdo pa pordoná.

Kico dje Consecuencianan?

14. Pakico pordon no ta nificá cu un pecadó repentí ta ser librá di tur e consecuencianan di su curso robes?

¹⁴ E echo cu Jehova ta cla pa pordoná ta nificá cu un pecadó repentí ta keda liber di tur consecuencia di su curso robes? Di ningun manera. Nos no por cometé picá i scapa castigu. Pablo a skirbi: “Kico cu un hende sembra, esaki lo e cosechá tambe.” (Galationan 6:7) Kisas nos por enfrentá cierto consecuencianan di nos accion of problemanan, pero despues cu Jehova extendé pordon na nos, e no ta manda contratempu riba nos. Ora surgi dificultad, un cristian no mester sinti cu ‘tal bes Jehova ta castigando mi pa erornan di pasado.’ (Compará cu Santiago 1:13.) Di otro banda, Jehova no ta spar nos di tur e efectonan di nos accionnan robes. Divorcio, embaraso indeseá, malesa transmití sexualmente, pérdida di confiansa of respet—tur eseinan por ta e consecuencianan lamentabel di picá, i Jehova lo no protehá nos for di nan. Corda cu aunke el a pordoná David pa su picánan en coneccion cu Bat-seba i Urías, Jehova no a protehá David for dje consecuencianan desastroso cu a bini despues.—2 Samuel 12:9-14.

15, 16. Con e ley registrá na Levítico 6:1-7 a beneficiá tantu e víctima como e ofensor?

¹⁵ Nos picánan por tin otro consecuencianan tambe. Considerá, por ehempel, e relato den Levítico capítulo 6. Aki e Ley di Moises ta trata e situacion den cua un persona ta cometé un malecho serio dor di tuma e propiedad di un co-israelita den su poder mediante robo, extorsion of fraude. Anto e pecadó ta nenga cu e ta culpabel, i ta asta asina prufiá di hura esei falsamente. Esei ta palabra di un persona contra un otro. Sin embargo, mas despues, e concenshi dje ofensor ta molesti’é i e ta confesá su picá. Pa obtené e pordon di Dios, e tin cu haci tres cos mas: debolbé loke el a tuma, paga e víctima un multa di 20 porciento i ofrecé un chubat’i carné como un ofrenda di culpa. Anto, e ley ta bisa: “E sacerdote tin cu haci un expiacion p’e dilanti Jehova, i asina e tin cu ser pordoná di esei.”—Levítico 6:1-7; compará cu Mateo 5:23, 24.

¹⁶ E ley aki tabata un percuracion misericordioso di parti di Dios. El a beneficiá e víctima, kende su propiedad a ser debolbé i sin duda el a sinti su mes hopi aliviá ora esun cu a falta cuné al final a reconocé su picá. Na mésun tempu, e ley a beneficiá esun kende su concenshi finalmente a impuls’é pa admití su culpa i corigí su malecho. Realmente, si el a nenga di haci esei, lo no tabatin pordon p’e di parti di Dios.

17. Ora nos perhudicá otronan cu nos picánan, kico Jehova ta spera pa nos haci?

¹⁷ Aunke nos no ta bou dje Ley di Moises, e ta duna nos un comprendimentu penetrante precioso di Jehova su manera di pensa, incluyendo su punto di bista di pordon. (Colosensenan 2:13, 14) Ora otronan ser perhudicá of bira víctima dor di nos picánan, Jehova ta contentu ora nos haci loke nos por pa ‘corigí e fayo.’ (2 Corintionan 7:11) Esaki ta enbolbé reconocé nos picá, admití nos culpa i asta pidi e víctima despensa. E ora ei nos por suplicá Jehova riba e base di Jesus su sacrificio i experenciá e alivio di un concenshi limpi i e siguransa cu Dios a pordoná nos.—Hebreonan 10:21, 22.

18. Ki disiplina por bini compañá cu Jehova su pordon?

¹⁸ Mescos cu cualkier mayor amoroso, Jehova por ofrecé pordon huntu cu un midí di disiplina. (Proverbionan 3:11, 12) Tal bes un cristian repentí lo tin cu entregá su privilegio di sirbi como anciano, sirbidó ministerial of pionero. Kisas ta doloroso p’e pa perde pa un tempu privilegionan cu tabata precioso p’e. Sin embargo, un disiplina asina no kier men cu el a perde e fabor di Jehova of cu Jehova no a pordon’é. Ademas, nos tin cu corda cu disiplina di parti di Jehova ta prueba di su amor pa nos. Si nos acept’é i aplik’é, ta bon pa nos mes i esei por hiba nos na bida eterno.—Hebreonan 12:5-11.

19, 20. (a) Si bo a cometé malecho, pakico bo no mester sinti cu bo ta fuera dje alcanse dje misericordia di Jehova? (b) Kico lo ser considerá den e siguiente artículo?

¹⁹ Ta ki refrescante pa sa cu nos ta sirbi un Dios cu ta “cla pa pordoná”! Jehova ta mira mas cu nos picánan i erornan. (Salmo 130:3, 4) E sa kico tin den nos curason. Si bo ta sinti cu bo curason ta kibrá i aplastá debí na malecho di pasado, no concluí cu bo ta fuera dje alcanse dje misericordia di Jehova. Apesar di ki eror cu bo por a cometé, si bo a repentí berdaderamente, a dal paso pa corigí e malecho i a pidi Jehova sinceramente pa pordoná bo riba e base dje sanger dramá di Jesus, bo por tin pleno confiansa cu e palabranan di 1 Juan 1:9 ta aplicá na bo: “Si nos confesá nos picánan, e ta fiel i hustu pa pordoná nos nos picánan i haci nos limpi di tur inhusticia.”

²⁰ Bijbel ta animá nos pa imitá e manera cu Jehova ta pordoná den nos trato cu otro. Sin embargo, te na ki grado nos tin cu pordoná i lubidá ora otronan peca contra nos? Esaki lo ser considerá den e siguiente artículo.

[Nota]

Con Lo Bo Contestá?

◻ Pakico Jehova ta “cla pa pordoná”?

◻ Den ki forma Bijbel ta describí con completo e pordon di Jehova ta?

◻ Ora Jehova pordoná, den ki sentido e ta lubidá?

◻ Kico Jehova ta spera pa nos haci ora nos perhudicá otronan cu nos picánan?

[Plachi na página 12]

Ora nos perhudicá otronan cu nos picánan, Jehova ta spera pa nos compensá e daño