Nan A Haci e Boluntad di Jehova

Un Muher Discreto Ta Prevení Desaster

UN MUHER sensato casá cu un homber cu no ta sirbi pa nada—esei tabata e situacion di Abigail cu Nabal. Abigail tabata “bon den discrecion i di bunita forma.” Na contraste, Nabal tabata “severo i malu den su prácticanan.” (1 Samuel 25:3) E drama cu a desaroyá enbolbiendo e pareha aki cu no tabata pas cu otro a laga nan nomber permanentemente grabá den historia di Bijbel. Laga nos mira con.

Un Fabor cu No A Ser Apreciá

Tabata siglo 11 P.E.C. David a ser ungí como e futuro rey di Israel, pero en bes di tabata gobernando e tabata huyendo. E rey reinante, Saul, tabata dicididu pa mat’é. Como resultado, David a ser forsá pa biba como fugitivo. E huntu cu 600 compañero finalmente a haña refugio den e desierto di Paran, sur di Huda i den direccion dje desierto di Sínai.—1 Samuel 23:13; 25:1.

Miéntras cu nan tabata ei, nan a topa cu wardadónan di carné cu tabata traha pa un homber cu yama Nabal. E desendiente ricu aki di Caleb tabatin 3.000 carné i 1.000 cabritu, i e tabata pela su carnénan na Carmelo, un stad sur di Hébron i tal bes un 40 kilometer so for di Paran.a David i su hombernan a yuda e wardadónan di Nabal protehá nan tou contra ladronnan cu tabata pasa dor dje desierto.—1 Samuel 25:14-16.

Miéntras tantu, pelamentu di carné a cuminsá na Carmelo. Esaki tabata un ocasion festivo, similar na tempu di cosecha p’e cunukero. Tabata tambe un tempu di generosidad liberal, ora doñonan di carné tabata recompensá esnan cu a traha pa nan. P’esei David no a haci di mas ora el a manda dies homber n’e stad di Carmelo pa pidi Nabal manda cuminda como pago p’e servicio cu nan a presta na fabor di su tounan.—1 Samuel 25:4-9.

Nabal su reaccion tabata tur cos ménos generoso. “Ken ta David?” el a puntra cu bofon. Anto, implicando cu David i su hombernan tabata simpel criánan cu a hui, el a puntra: “Acaso mi tin cu tuma mi pan i mi awa i mi carni matá cu mi a prepará pa mi peladónan di carné i dun’é na hombernan cu mi ni sikiera sa di unda nan ta?” Ora David a tende di esaki, el a bisa su hombernan: “Tur hende faha nan spada!” Rond di 400 homber a prepará nan mes pa bataya.—1 Samuel 25:10-13.

Abigail Su Discrecion

E palabranan ofensivo di Nabal a yega na orea di su esposa, Abigail. Tal bes esaki no tabata promé biaha cu el a hañ’é ta intermediá i actua como pacificadó pa Nabal. Con cu bai bin, Abigail a actua mesora. Sin bisa Nabal, el a tuma provisionnan—incluyendo cincu carné i un abundancia di cuminda—i a sali pa topa David den e desierto.—1 Samuel 25:18-20.

Ora Abigail a mira David, unbes el a cai na suela dilanti dje. “No laga mi señor fiha su curason riba e homber Nabal aki, cu no ta sirbi pa nada,” el a suplik’é. “Tocante e regalo aki di bendicion cu bo criá a trece pa mi señor, mester dun’é n’e hombernan hóben cu ta canando den e pasonan di mi señor.” El a agregá: “No laga esaki [e situacion relacioná cu Nabal] bira pa bo un causa pa tambaleá ni un piedra di tropieso p’e curason di mi señor.” E palabra hebreo traducí aki como “tambaleá” ta implicá remordimentu di concenshi. Dje manera ei Abigail a spierta David contra tumamentu di accion muchu purá cu lo el a lamentá despues.—1 Samuel 25:23-31.

David a scucha Abigail. “Bendicioná sea bo sensates, i bendicioná sea abo cu a restringí mi riba e dia aki di drenta den culpa di sanger,” el a bis’é. “Si bo no a haci purá pa bo por a bini i topá mi, siguramente lo no a keda pa Nabal te n’e lus di mainta ningun hende cu ta uriná contra muraya.”b—1 Samuel 25:32-34.

Les pa Nos

E relato bíblico aki ta mustra cu siguramente no tin nada malu pa un hende muher piadoso tuma iniciativa apropiado si esei ta necesario. Abigail a actua contra e deseonan di su esposo, Nabal, pero Bijbel no ta censur’é pa esaki. Al contrario, e ta elogi’é como un muher di discrecion i sensates. Dor di tuma e iniciativa den e situacion di crísis aki, Abigail a salba hopi bida.

Aunke por lo general un esposa mester manifestá un spiritu di sumision piadoso, e tin mag di no ta di acuerdo cu su casá ora tin principionan hustu den wega. Naturalmente, e mester trata na mantené un “spiritu ketu i suave” i no mester actua independientemente meramente pa motibu di rencor, orguyo of un spiritu di rebeldia. (1 Pedro 3:4) Sin embargo, un esposa piadoso no mester sinti su mes bou di presion pa haci un cos cu e sa ta sumamente imprudente of ta violá principionan di Bijbel. Berdaderamente, e relato di Abigail ta ofrecé un argumento sólido contra esnan cu ta insistí cu Bijbel ta pinta hende muher como simpel esclabo.

E relato aki ta siña nos tambe tocante dominio propio. Na algun ocasion, David a manifestá e cualidad aki plenamente. Por ehempel, el a nenga di mata e vengativo Rey Saul, maske e tabatin oportunidad amplio pa haci esei i Saul su morto lo a trece pas pa David. (1 Samuel 24:2-7) Na contraste, ora Nabal a despreciá David cu insulto, esei a coge David for di balansa i el a hura vengansa. Esaki ta un spiertamentu cla pa cristiannan, cu ta haci esfuerso pa “no paga malu cu malu na ningun hende.” Den tur circunstancia, nan mester sigui e spiertamentu di Pablo: “Si ta posibel, cuantu cu ta dependé di boso, sea pacífico cu tur hende. No venga boso mes, stimánan, sino duna lugá na rabia.”—Romanonan 12:17-19.

[Nota]

[Plachi na página 15]

Abigail ta trece regalo pa David