Lo Tin Un Resureccion Dje Hustunan
“Mi tin speransa en cuanto Dios . . . cu lo bai tin un resureccion di tantu e hustunan como e inhustunan.”—ECHO 24:15.
1. Ki situacion a enfrentá tur ser humano desde cu Adam i Eva a cai den picá?
“TUR loke bo man haña pa haci, haci cu tur bo forsa mes, pasobra no tin trabou ni formacion di proyecto ni conocimentu ni sabiduria den Sheol, e lugá unda bo ta bayendo.” (Eclesiastes 9:10) Cu e par di palabranan bon scogí aki, sabí Rey Sálomon ta describí un situacion cu a enfrentá tur generacion di humanidad desde cu nos promé mayornan, Adam i Eva, a cai den picá. Sin excepcion, morto cu tempu a traga tur hende—ricu i pober, rey i hende comun, hende cu fe i hende sin fe. Berdaderamente, morto a “reina como rey.”—Romano 5:17.
2. Pakico algun hende fiel kisas a keda decepcioná durante e tempu di fin aki?
2 Apesar dje mas reciente avancenan di ciencia médico, morto ainda ta reina como rey asta awe. Aunke esaki no ta un sorpresa, algun hende kisas a keda un poco decepcioná ora nan finalmente a haña nan mes cara-cara cu e enemigu di hopi tempu aki. Pakico? Wel, aya den añanan di 1920, e Sociedad Watch Tower a proclamá e mensahe “Miyones di hende na bida awor lo no muri nunca.” Ken e miyones di hendenan aki lo ta? E “carnénan” na cua Jesus a referí den su comentarionan tocante carné i cabritu. (Mateo 25:31-46) Esnan semehante di carné aki segun profecia tabatin cu aparecé durante e tempu di fin, i nan speransa lo ta bida eterno den un paradijs riba tera. Segun cu tempu a pasa, e pueblo di Dios a gana un mihó comprendimentu dje posicion di e “carnénan” aki den Jehova su propósito. Nan a realisá cu e personanan obediente aki tabatin cu ser separá for dje “cabritunan” cabesura, i cu despues dje destruccion dje últimonan aki, e carnénan lo heredá e dominio terenal dje Reino cu a ser prepará pa nan.
Recogementu di Esnan Semehante di Carné
3. Riba ki trabou e pueblo di Dios a concentrá desde 1935?
3 Cuminsando na 1935, ‘e esclabo fiel’ a concentrá riba busca esnan semehante di carné i trece nan den Jehova su organisacion. (Mateo 24:45; Juan 10:16) E cristiannan siñabel aki a bin realisá cu Jesus ta reinando awor den Jehova su Reino celestial i cu rápidamente e tempu ta acercando p’e fin dje sistema di cosnan malbado aki i e introduccion di un mundu nobo den cua husticia lo biba. (2 Pedro 3:13; Revelacion 12:10) Den e mundu nobo ei, e palabranan alentador di Isaías lo ser cumplí: “Realmente lo e traga morto pa semper.”—Isaías 25:8.
4. Aunke nan a spera ansiosamente pa mira Jehova su soberania ser vindicá na Armagedon, kico a sosodé cu hopi hende dje otro carnénan?
4 Ya cu e fin dje mundu di Satanas ta asina cerca, cristiannan semehante di carné lo tin masha gana di keda na bida te cu Jehova su soberania ser vindicá durante e binidero tribulacion riba Babilonia e Grandi i e resto dje mundu di Satanas. (Revelacion 19:1-3, 19-21) Pa un gran cantidad di nan, esei no a sosodé asina. Hopi cristian cu a spera di ta entre e “miyones” di hende cu lo no muri nunca en berdad a muri. Algun a bira mártir pa causa dje berdad den prizonnan i camponan di concentracion of na man di fanáticonan religioso. Otronan a muri den accidentenan of debí na asina yamá causanan natural—enfermedad i behes. (Salmo 90:9, 10; Eclesiastes 9:11) Claramente, mas lo muri promé cu e fin yega. Con tal personanan lo mira e cumplimentu dje promesa di un mundu nobo den cua husticia lo biba?
E Speransa di Resureccion
5, 6. Ki futuro ta existí pa esnan cu un speransa terenal cu ta muri promé cu Armagedon?
5 Apostel Pablo a duna e contesta ora e tabata papiando dilanti e gobernador romano Félix. Manera ta pará skirbí na Echo 24:15, Pablo a declará cu curashi: “Mi tin speransa en cuanto Dios . . . cu lo bai tin un resureccion di tantu e hustunan como e inhustunan.” E speransa dje resureccion ta duna nos curashi ora di enfrentá e pió contratempunan. Debí n’e speransa ei, nos rumannan stimá cu ta bira malu i ta sinti cu nan ta bai muri no ta bira demasiado desanimá. Sin importá kico sosodé, nan sa cu nan lo cosechá e recompensa di fieldad. Debí n’e speransa di resureccion, nos rumannan homber i muher balente cu ta enfrentá morto na man di persiguidornan sa cu ta imposibel pa nan persiguidornan gana e victoria. (Mateo 10:28) Ora un persona den e congregacion muri, nos ta tristu pa perde e persona ei. Na mésun tempu, si e ta un dje otro carnénan, nos ta alegrá cu nos compañé creyente a resultá di ta fiel te na fin i awor ta sosegando, sigur di un futuro den Dios su mundu nobo.—1 Tesalonicense 4:13.
6 Sí, e speransa di resureccion ta un rasgo vital di nos fe. Sin embargo, pakico nos creencia den e resureccion ta asina fuerte, i ken ta compartí e speransa ei?
7. Kico ta e resureccion, i cua ta algun texto cu ta expresá cu e ta algu sigur?
7 E palabra griego pa “resureccion” ta a·naʹsta·sis, cu literalmente ta nificá “lanta para.” E ta referí básicamente na un lantamentu for di morto. Interesantemente, e palabra “resureccion” mes no ta aparecé den e Scritura Hebreo, pero e speransa di resureccion ta ser expresá claramente ei den. Nos ta mir’é, por ehempel, den e palabranan expresá dor di Job meimei di su sufrimentu: “O, si den Sheol lo bo a scondé mi, . . . si bo lo a fiha un límite di tempu pa mi i corda riba mi!” (Job 14:13) Di igual manera, na Oséas 13:14, nos ta lesa: “For dje man di Sheol lo mi rescatá nan; for di morto lo mi recobrá nan. O Morto, unda bo puinan ta? O Sheol, unda bo poder destructor ta?” Na 1 Corintio 15:55, apostel Pablo a cita e palabranan aki i a mustra cu e victoria profetisá riba morto ta ser lográ mediante e resureccion. (Naturalmente, den e texto ei Pablo tabata papiando dje resureccion celestial.)
Creyentenan “Declará Hustu”
8, 9. (a) Con sernan humano imperfecto por tene un parti den e resureccion dje hustunan? (b) Cua ta e base di nos speransa den un bida cu lo no ser terminá dor di morto?
8 Den su declaracion na Félix, citá den paragraf 5, Pablo a bisa cu lo tin un resureccion dje hustunan i e inhustunan. Ken ta esnan hustu cu lo ser lantá? Wel, ningun ser humano di naturalesa ta hustu. Nos tur ta pecador di nacementu i nos ta cometé picá durante henter nos bida—locual ta haci nos merecedor di morto riba dos base. (Romano 5:12; 6:23) Sin embargo, den Bijbel nos ta haña e expresion “declará hustu.” (Romano 3:28) Esaki ta referí na sernan humano kendenan, aunke nan ta imperfecto, a ser pordoná di nan picánan dor di Jehova.
9 E expresion ta ser usá principalmente en relacion cu cristiannan ungí, kendenan tin un speransa celestial. Na Romano 5:1, apostel Pablo ta bisa: “Awor cu nos a ser declará hustu como resultado di fe, laga nos disfrutá di pas cu Dios mediante nos Señor Jesucristo.” Tur cristian ungí ta ser declará hustu pa motibu di fe. Fe den kico? Manera Pablo ta splica cu basta detaye den e buki di Romano, esei ta fe den Jesucristo. (Romano 10:4, 9, 10) Jesus a muri como un homber perfecto i despues a ser resucitá for di morto i a subi na cielu pa ofrecé e balor di su bida humano na nos fabor. (Hebreo 7:26, 27; 9:11, 12) Ora Jehova a aceptá e sacrificio ei, Jesus, en efecto, a cumpra e rasa humano for di sclabitud na picá i morto. Esnan cu ta ehercé fe den e areglo aki ta beneficiá masha tantu for di dje. (1 Corintio 15:45) A base di dje homber i muhernan fiel tin e speransa di heredá un bida cu lo no terminá dor di morto, e enemigu implacabel.—Juan 3:16.
10, 11. (a) Ki resureccion ta spera fiel cristiannan ungí? (b) Ki clase di resureccion e adoradornan pre-cristian a spera riba?
10 Gracias n’e sacrificio di rescate di Jesus, e fiel ungínan, siendo declará hustu, tin e speransa sigur di ser resucitá como criaturanan spiritual inmortal, mescos cu Jesus. (Revelacion 2:10) Nan resureccion ta ser mencioná na Revelacion 20:6, cu ta bisa: “Felis i santu ta ken cu ta tene parti den e promé resureccion; e segundo morto no tin ningun autoridad riba esakinan, pero nan lo ta sacerdotenan di Dios i di Cristo, i lo reina como reynan cuné p’e mil añanan.” Esaki ta e resureccion celestial. Sin embargo, tuma nota cu Bijbel ta yam’é “e promé resureccion,” loke ta implicá cu tin mas pa resucitá.
11 Na Hebreo capítulo 11, Pablo a referí na un fila largu di sirbidornan di Dios pre-cristian kendenan a manifestá fe fuerte den Jehova Dios. Esakinan tambe tabatin fe den un resureccion. Na versículo 35 dje capítulo ei, Pablo ta papia di resureccionnan milagroso cu a tuma lugá durante e historia di Israel, bisando: “Muhernan a ricibí nan mortonan mediante resureccion; pero otro hende a ser torturá pasobra nan no kier a aceptá liberacion via algun rescate, pa nan por alcansá un mihó resureccion.” E fiel testigonan ei di ántes por a mira padilanti na un resureccion mihó cu esnan manera, por ehempel, di Elías i Eliseo. (1 Rey 17:17-22; 2 Rey 4:32-37; 13:20, 21) Nan speransa tabata resureccion den un mundu caminda sirbidornan di Dios lo no a ser torturá pa nan fe, un mundu caminda muhernan lo no a perde nan sernan kerí den morto. Sí, nan a mira padilanti na lantamentu for di morto den e mésun mundu nobo cu nos ta spera p’e. (Isaías 65:17-25) Jehova no a revelá na nan mes tantu cu el a revelá na nos tocante e mundu nobo aki. No obstante, nan tabata sa cu e tabata biniendo, i nan kier tabata den dje.
E Resureccion Terenal
12. Fiel personanan pre-cristian a ser declará hustu? Splica.
12 Nos mester pensa dje lantamentu dje fiel homber i muhernan pre-cristian aki den e mundu nobo ei como parti dje resureccion dje hustunan? Evidentemente cu sí, pasobra Bijbel ta referí na nan como hustu. Por ehempel, disipel Santiago ta mencioná un homber i un muher di pasado kendenan a ser declará hustu. E homber tabata Abraham, e antepasado dje rasa hebreo. En cuanto Abraham nos ta lesa: “ ‘Abraham a pone fe den Jehova, i esei a ser contá na dje como husticia,’ i el a yega di ser yamá ‘amigu di Jehova.’ ” E muher tabata Rahab, un no-israelita kende a ehercé fe den Jehova. El a ser “declará hustu” i a bira parti dje nacion hebreo. (Santiago 2:23-25) Asina, homber i muhernan di ántes kendenan a ehercé fe fuerte den Jehova i su promesanan i a keda fiel te na morto a ser declará hustu dor di Jehova riba e base di nan fe, i nan sin duda lo participá den e ‘resureccion dje hustunan.’
13, 14. (a) Con nos sa cu cristiannan cu un speransa terenal por ser declará hustu? (b) Kico esaki ta nificá pa nan?
13 Sin embargo, ki tal di individuonan semehante di carné awe, esnan cu un speransa terenal cu ta dedicá nan mes na Jehova i cu ta muri fiel durante e tempu di fin aki? Nan lo participá den e resureccion dje hustunan? Aparentemente cu sí. Apostel Juan a mira den vision un multitud grandi di hende fiel asina. Nota con e ta describí nan: “Mi a wak, i, mira! un multitud grandi, cu ningun hende por a conta, for di tur nacion i tribu i pueblo i lenga, pará dilanti e trono i dilanti e Lamchi, bistí cu pañanan largu blancu; i tabatin ramanan di palma den nan man. I nan ta sigui sclama cu un bos fuerte, bisando: ‘Salbacion nos ta debe na nos Dios, kende ta sintá riba e trono, i n’e Lamchi.’ ”—Revelacion 7:9, 10.
14 Nota cu e mansunan aki ta firmemente convencí di nan salbacion, i nan ta atribuí esaki na Jehova i Jesus, “e Lamchi.” Ademas, nan ta pará dilanti Jehova i e Lamchi, tur bistí na blancu. Pakico na blancu? Un criatura celestial ta bisa Juan: “Nan a laba nan pañanan largu i a haci nan blancu den e sanger dje Lamchi.” (Revelacion 7:14) Den Bijbel, blancu ta un símbolo di puresa i husticia. (Salmo 51:7; Daniel 12:10; Revelacion 19:8) E echo cu e multitud grandi ta ser mirá cu pañanan blancu bistí ta nificá cu Jehova ta considerá nan como hustu. Con esei ta posibel? Debí cu nan, na moda di papia, a laba nan pañanan largu den e sanger dje Lamchi. Nan ta ehercé fe den e sanger dramá di Jesucristo i p’esei ta ser declará hustu como amigunan di Dios cu speransa di sobrebibí e tribulacion grandi. P’esei, cualkier fiel cristian dedicá cu awor ta un parti dje “multitud grandi” i kende ta muri promé cu e tribulacion grandi por ta sigur di tin un parti den e resureccion terenal dje hustunan.
15. Siendo cu tantu e hustunan como e inhustunan lo ser resucitá, kico ta e bentaha dje resureccion dje hustunan?
15 E resureccion ei ta ser describí na Revelacion capítulo 20, versículo 13, den e palabranan aki: “Laman a entregá esnan morto den dje, i morto i Hádes a entregá esnan morto den nan, i nan a ser husgá individualmente segun nan obranan.” Pues, durante Jehova su gran Dia di Huicio di mil aña, tur esnan den memoria di Dios lo ser resucitá—tantu e hustunan como e inhustunan! (Echo 17:31) Sin embargo, cuantu mas mihó esei lo ta pa e hustunan! Ya caba nan a hiba un bida di fe. Ya caba nan tin un relacion íntimo cu Jehova i confiansa den e realisacion di su propósito. Testigonan hustu di promé cu e Era Cristian lo lanta for di morto ansioso pa haña sa con e promesanan di Jehova en cuanto e Simia a ser cumplí. (1 Pedro 1:10-12) Esnan dje otro carnénan cu Jehova ta considerá como hustu den nos dia lo sali for di graf ansioso pa contemplá e tera paradísico cu nan a papia di dje tempu nan tabata declará e bon nobo den e sistema di cosnan aki. Ki un tempu gososo esei lo ta!
16. Kico nos por bisa tocante e resureccion den e Dia di Huicio di esnan cu ta muri den nos tempu?
16 Durante e Dia di Huicio ei di mil aña, na ki tempu exactamente esnan cu a muri fiel den e añanan final aki dje sistema di cosnan di Satanas lo ser resucitá? Bijbel no ta bisa. Sin embargo, lo no ta razonabel pa pensa cu esnan contá como hustu cu muri den nos tempu lo haña un resureccion trempan i asina por participá cu e multitud grandi di sobrebibiente di Armagedon den e trabou di ricibí generacionnan mas promé bek for di morto? Sí, en berdad!
Un Speransa Cu Ta Duna Consuelo
17, 18. (a) Ki consuelo e speransa di resureccion ta duna? (b) Kico nos ta ser impulsá pa declará tocante Jehova?
17 E speransa di resureccion ta duna fortalesa i consuelo na tur cristian awe. Si nos ta keda fiel, ningun suceso imprevisto ni ningun enemigu por horta nos di nos recompensa! Por ehempel, den e Anuario de los testigos de Jehová para 1992, na página 177, ta aparecé potretnan di cristiannan balente na Etiopia cu a preferá di muri en bes di comprometé nan fe. E texto bou dje potretnan ta bisa: “Caranan cu nos ta spera di mira den e resureccion.” Ki un privilegio lo ta pa por yega di conocé esakinan i numeroso otro rumannan cu a demostrá un fieldad similar ora di a enfrentá morto!
18 Ki tal di nos mes sernan kerí i rumannan cu debí na edad of enfermedad no ta keda na bida pa pasa dor dje tribulacion grandi? Na armonia cu e speransa di resureccion, nan tin un futuro maraviyoso si nan permanecé fiel. I si nos tambe cu curashi ta ehercé fe den e sacrificio di rescate di Jesus, nos tin un futuro maraviyoso. Pakico? Pasobra, mescos cu Pablo, nos ta spera den e “resureccion di tantu e hustunan como e inhustunan.” Cu tur nos curason, nos ta gradicí Jehova p’e speransa aki. Siguramente, esei ta impulsá nos pa ripití e palabranan dje salmista: “Declará entre e nacionnan [Dios su] gloria, entre tur e pueblonan su obranan maraviyoso. Pasobra Jehova ta grandi i mester ser alabá mashá.”—Salmo 96:3, 4.
Bo Por Splica?
◻ Cua textonan ta yuda confirmá nos speransa den un resureccion terenal?
◻ Riba ki base cristiannan ta ser declará hustu awor?
◻ Con e speransa di resureccion ta duna nos curashi i determinacion?
[Plachi na página 9]
Mescos cu Pablo, cristiannan ungí ta spera den e resureccion celestial