E Punto di Bista Bíbliko

Unidat Kristian Ta Nifiká Ku Tur Kristian Mester Ta Meskos?

UN KARAKTERÍSTIKA di religion djawe aparentemente ta desunion. Asta den e hendenan ku ta bai e mesun iglesia por tin un variedat di kreensia kontradiktorio den asuntunan di doktrina i kondukta. Un eskritor a ekspres’é asin’aki: “Ta masha difísil pa haña dos hende ku ta kere den eksaktamente e mesun Dios. Ta parse ku den e dianan aki kada ser humano tin su propio teologia.”

Na kontraste skèrpi ku esaki, apòstel Pablo a spièrta e kristiannan di promé siglo den Korinto pa “papia e mesun kos” i pa “ta perfektamente uní den e mesun mente i den e mesun opinion.” (1 Korintionan 1:10) Awe algun hende ta kritiká e spièrtamentu di Pablo. Nan argumentu ta ku ‘hende ta diferente, i no ta rasonabel pa insistí ku tur kristian mester pensa òf aktua meskos ku otro.’ Pero ta esei Pablo tabata bogando p’e, esta, pa hende ta obediente manera robòt? Beibel ta laga espasio pa hende tin sierto libertat personal?

Unidat, No Uniformidat

Den un otro karta ku Pablo a skirbi, el a apelá n’e kristiannan pa nan sirbi Dios ku nan “fakultat di rasoná.” (Romanonan 12:1, NW) Ta lógiko anto ku e no tabata purba fòrsa miembronan di e kongregashon di Korinto pa aktua manera robòt. Pero pakiko el a bisa nan pa ta “perfektamente uní den e mesun mente i den e mesun opinion”? Pablo a duna e konseho aki pa motibu ku e kongregashon na Korinto tabata pasando den un problema serio. Tabatin divishon, di manera ku algun a mira Apolos komo nan lider miéntras ku otronan a faboresé Pablo òf Pedro. Tabatin algun ku a aseptá Kristu so. Un desunion asina no tabata algu insignifikante, pasobra el a menasá e pas di e kongregashon.

Pablo tabata kier p’e korintionan “preservá e unidat di e spiritu den e vínkulo di pas,” nèt manera el a spièrta e kristiannan na Efeso mas despues. (Efesionan 4:3) El a animá e rumannan pa sigui Hesukristu den union, pa nan no splet den gruponan desuní, òf sekta. Den e manera aki nan tur por tabatin e mesun propósito. (Juan 17:22) Pues, e konseho ku Pablo a duna e korintionan a sirbi pa reahustá nan manera di pensa i promové unidat, no uniformidat.—2 Korintionan 13:9, 11.

Unidat ta importante tambe den asuntunan di doktrina. E siguidónan di Hesus ta realisá ku tin realmente “ún fe,” meskos ku tin “ún Dios i Tata.” (Efesionan 4:1-6) P’esei, kristiannan ta hasi sigur ku loke nan ta kere aden ta na armonia ku e bèrdat ku Dios a revelá den su Palabra tokante su mes i su propósito. Nan ta uní den nan kreensia tokante ken Dios ta i kiko e ta eksigí di nan. Tambe nan ta kumpli ku e normanan moral ku e Palabra di Dios ta trese bon kla dilanti. (1 Korintionan 6:9-11) Den e manera aki kristiannan ta keda uní, tantu den doktrina komo den normanan moral.

Kon pa Trata ku Diferensia di Opinion

Sin embargo, esaki no ta nifiká ku ta bisa kada kristian eksaktamente kon e tin ku pensa ni kiko e tin ku hasi den tur situashon di bida. Mayoria asuntu ta enbolbé desishonnan personal. Pensa riba e ehèmpel aki. Hopi kristian di promé siglo den Korinto no kier a kome karni ku lo por a bini di un tèmpel di ídolo. Algun tabatin e pensamentu firme ku komementu di e karni ei a enserá un akto di adorashon falsu, miéntras ku otronan a haña ku no tabata dje relevante ei di unda e karni a bini. Ora Pablo a trata ku e asuntu delikado aki, e no a traha un regla ku ta bisa e kristiannan kiko nan mester hasi. Mas bien, el a rekonosé ku kada ken kisas ta tuma un otro desishon den e asuntu ei.a—1 Korintionan 8:4-13.

Awe kisas un kristian por tuma un desishon ku ta diferente for di esun ku un otro kristian ta tuma riba asuntunan relashoná ku trabou, salú, rekreo òf otro kos ku tin di haber ku preferensia personal. E variedat lo por molestiá algun persona. Kisas nan ta puntra nan mes si diferensia di opinion lo no hiba na desakuerdo òf divishon den e kongregashon. Sin embargo, no nesesariamente mester ta asina. Pa ilustrá esaki: Kompositornan di músika tin solamente un kantidat limitá di not pa traha kuné, pero e posibilidatnan pa hinka un bunita melodia den otro ta sinfin. Meskos tambe, kristiannan ta tuma desishonnan ku ta dentro di e límitenan di prinsipionan di Dios. Sin embargo, ora nan ta tuma sierto desishonnan basá riba preferensia personal, nan tin un grado di libertat.

Kon nos por konserbá unidat kristian miéntras nos ta respetá e preferensianan personal di nos rumannan kristian? E klave ta amor. Amor pa Dios ta motivá nos pa someté nos di buena gana na su mandamentunan. (1 Juan 5:3) Amor pa próhimo ta motivá nos pa respetá e derecho ku otro hende tin pa tuma desishon segun nan konsenshi den asuntunan personal. (Romanonan 14:3, 4; Galationan 5:13) Pablo a pone un bon ehèmpel den esaki ora el a someté su mes n’e outoridat di e kuerpo gobernante di promé siglo den un asuntu ku tabatin di haber ku doktrina. (Mateo 24:45-47; Echonan 15:1, 2) Na mesun tempu, el a animá tur hende pa respetá e konsenshi di otro kristiannan den asuntunan di índole personal.—1 Korintionan 10:25-33.

Ta bisto anto ku no por kondená niun hende pa motibu ku el a tuma un desishon di konsenshi ku no ta na konflikto ku prinsipionan di Beibel. (Santiago 4:12) Di otro banda, kristiannan leal lo no insistí riba nan derechonan personal i dor di esei perhudiká e konsenshi di otronan òf kousa desunion den e kongregashon. Tampoko nan no mester pretendé ku nan ta liber pa hasi algu ku e Palabra di Dios ta prohibí bon kla. (Romanonan 15:1; 2 Pedro 2:1, 19) Amor pa Dios mester motivá nos pa train nos konsenshi p’e mira kosnan manera Dios ta mira nan. Esaki, na su turno, lo mantené nos uní ku nos rumannan den fe.—Hebreonan 5:14.

[Nota]