Kico Ta Necesario pa un Matrimonio Exitoso?

Abo lo tira cabes den un riu sin siña landa promé? Un bobedad asina lo por ta perhudicial—asta mortal. Pero, pensa riba cuantu hende ta bula den matrimonio sin sa muchu bon con pa asumí e responsabilidadnan cu e ta enbolbé.

JESUS a bisa: “Cua di boso cu kier traha un toren no ta sinta promé i calculá e gastu, pa mira si e tin suficiente pa complet’é?” (Lucas 14:28) Loke ta conta pa construccion di un edificio tambe ta conta pa construccion di un matrimonio. Esnan cu kier casa mester calculá cuidadosamente loke matrimonio ta costa pa haci sigur cu nan por cumpli cu e exigencianan.

Un Bista Riba Matrimonio

Ta un berdadero bendicion pa por tin un partner cu ken bo por compartí goso i tristesa. Matrimonio por yena un bashí causá pa soledad of desesperacion. E por satisfacé nos anhelo natural pa amor, compañerismo i intimidad. Cu bon motibu, despues cu Dios a crea Adam, el a bisa: “No ta bon p’e homber sigui su so. Mi ta bai traha un yudante p’e, como un complemento di dje.”—Génesis 2:18; 24:67; 1 Corintionan 7:9.

Sí, matrimonio por resolvé algun problema. Pero lo e trece algun nobo tambe. Pakico? Pasobra matrimonio ta e mescla di dos personalidad distinto cu tal bes ta compatibel, pero cu no ta idéntico. P’esei, asta parehanan cu ta pas bon cu otro lo haña conflicto de bes en cuando. Apostel cristian Pablo a skirbi cu esnan cu casa lo haña “tribulacion den nan carni”—of manera The New English Bible ta traducié, “dolor i tristesa den e bida corporal aki.”—1 Corintionan 7:28.

Ta pesimista Pablo tabata? Di ningun manera! E tabata urgi esnan cu ta pensa di casa pa ser realista. E sintimentu di euforia di ta atraí na un hende no ta un indicador exacto di loke bida casá lo ta den e lunanan i añanan cu ta sigui despues dje dia di casamentu. Cada matrimonio tin su mes desafio i problemanan único. E pregunta no ta si nan lo surgi, sino con pa enfrentá nan ora nan surgi.

Problemanan ta duna esposo i esposa oportunidad di mustra e sinceridad di nan amor pa otro. Pa ilustrá: Un barcu crusero por parce mahestuoso ora e ta mará na un pier. Sin embargo, ta riba laman grandi, tal bes asta meimei dje olanan brutu di un tormenta, ta caminda su berdadero forsa di nabegá ta sali na cla. Den e mésun sentido, no ta e momentonan pacífico di trankilidad romántico so ta determiná e fortalesa di un laso matrimonial. Tin biaha, esei ta ser demostrá bou di circunstancianan difícil ora cu un pareha ta pasa den tormenta di contratempu.

Pa logra bou dje circunstancianan ei, un pareha casá mester tin un sentido di compromiso, pasobra e propósito di Dios tabata pa homber “pega na su esposa” i pa nan dos “bira un solo carni.” (Génesis 2:24) E idea di compromiso ta spanta hopi hende awe. Tog, ta solamente razonabel pa dos hende cu berdaderamente ta stima otro deseá di haci un promesa solem pa keda huntu. Un sentido di compromiso ta duna e matrimonio dignidad. E ta percurá un base pa confiansa cu, kico cu pasa, esposo i esposa lo apoyá otro.a Si bo no ta cla pa un compromiso asina, bo no ta ègt cla pa matrimonio. (Compará cu Eclesiástes 5:4, 5.) Kisas asta esnan cu ta casá caba mester bira mas conciente di ki vital un sentido di compromiso ta pa un matrimonio duradero.

Un Bista Riba Bo Mes

Sin duda bo por mencioná e cualidadnan cu lo bo kier mira den un partner. Pero ta hopi mas difícil pa wak bo mes i determiná con bo por contribuí na un matrimonio. Ta vital pa scudriñá bo mes, tantu promé como despues cu bo haci e votonan di matrimonio. Por ehempel, haci bo mes e siguiente preguntanan.

• Mi ta dispuesto pa haci un compromiso cu mi partner pa henter mi bida?—Mateo 19:6.

Den e dianan dje profeta Malakías den Bijbel, hopi esposo a bandoná nan casá, tal bes pa casa cu muhernan mas yong. Jehova a bisa cu su altar tabata cubrí cu lágrima dje esposanan bandoná, i el a condená hombernan cu a ‘trata nan casá di un manera traicionero.’—Malakías 2:13-16.

• Si mi ta pensa di casa, mi tin suficiente edad pa no laga sintimentu sexual, cu lo stroba mi di tuma un decision sensato, dominá mi?—1 Corintionan 7:36.

“Ta masha riscante pa casa muchu yong,” segun Nikki, kende tabatin 22 aña dia cu el a casa. E ta spierta: “Bo sintimentu, meta i gustunan lo sigui cambia for dje tempu cu bo ta yegando binti te ora bo ta den yega trinta.” Claro cu bo no por midi cu edad so si bo ta cla pa casa of no. No obstante, pa casa sin cu bo a pasa e etapa hubenil ora sintimentu sexual ta nobo i foral fuerte, esei por bruha bo pensamentu i ciega bo pa posibel problemanan.

• Kico ta mi rasgonan di personalidad cu lo yuda mi contribuí na un matrimonio exitoso?—Galationan 5:22, 23.

Apostel Pablo a skirbi e colosensenan: “Bisti boso cu tierno cariño di compasion, bondad, humildad di mente, suavedad, i gran pacenshi.” (Colosensenan 3:12) E conseho aki ta apropiado pa esnan cu ta pensa di casa i tambe pa esnan cu ta casá caba.

• Mi tin e madures necesario pa apoyá un partner den tempu difícil?—Galationan 6:2.

“Ora surgi problema,” segun un dokter, “e tendencia ta pa culpa e casá. Ken mester culpa no ta e cos mas importante. Mas bien, e punto ta con tantu esposo como esposa por cooperá pa mehorá e relacion matrimonial.” E palabranan dje rey sabí Sálomon ta aplicá na pareha casá. “Dos ta mihó cu unu,” el a skirbi, “pasobra si un di nan mester cai, e otro por lanta su compañero. Pero kico lo para di un so cu ta cai ora cu no tin otro pa lant’é?”—Eclesiástes 4:9, 10.

• Mi ta por lo general alegre i optimista, of mi ta mas parti pesimista i negativo?—Proverbionan 15:15.

Un persona negativo ta mira tur dia como malu. Matrimonio no ta cambia e actitud aki milagrosamente! Un persona soltero, sea homber of muher, cu casi semper ta crítico of pesimista lo simplemente bira un persona casá cu ta mésun crítico of pesimista. Un punto di bista negativo asina por pone un matrimonio bou di tension teribel.—Compará cu Proverbionan 21:9.

• Mi ta keda calmu bou di preshon, of mi ta entregá na expresion di rabia descontrolá?—Galationan 5:19, 20.

Bijbel ta manda cristiannan pa ta “slow pa rabia.” (Santiago 1:19) Promé cu matrimonio i durante matrimonio, un homber of un muher mester cultivá e abilidad di cumpli cu e conseho aki: “Rabia, i tog no peca; no laga solo baha cu boso den un estado provocá.”—Efesionan 4:26.

Un Bista Riba Bo Futuro Partner

“Esun spiertu ta considerá su pasonan,” segun un proverbio bíblico. (Proverbionan 14:15) Esaki sigur mester ta e caso ora di scoge un casá. Scogementu di un casá ta un dje decisionnan di mas importante cu un homber of muher lo tuma. Tog, bo por mira cu hopi hende ta dedicá mas tempu pa dicidí cua auto pa cumpra of cua scol pa bai cu cua persona pa casa cuné.

Den e congregacion cristian, esnan cu ta ser confiá cu responsabilidad ta ser “probá promé en cuanto aptitud.” (1 Timoteo 3:10) Si bo ta pensa di casa, lo ta bon pa bo ta sigur dje “aptitud” dje otro persona. Considerá por ehempel, e siguiente preguntanan. Aunke nan ta ser presentá for dje punto di bista di un hende muher, hopi dje principionan ta aplicá na hende homber tambe. I asta esnan cu ta casá por saca beneficio for di un consideracion dje puntonan aki.

• Ki clase di reputacion e tin?—Filipensenan 2:19-22.

Proverbionan 31:23 ta describí un esposo cu ta “conocí den porta di stad, ora e ta sinta cu e ancianonan dje tera.” E ancianonan dje stad tabata sinta n’e porta dje stad pa husga. Pues, evidentemente, e tabatin un posicion di confiansa público. E manera cu otro hende ta mira un homber, ta bisa algu di su reputacion. Si ta aplicabel, considerá tambe e manera cu esnan cu ta bou di su autoridad ta mir’é. Esaki por indicá con abo, como su casá, cu tempu lo yega na mir’é.—Compará cu 1 Samuel 25:3, 23-25.

• Ki clase di norma moral e tin?

Sabiduria divino ta “na promé lugá decente.” (Santiago 3:17) Bo futuro partner ta mas interesá den su mes gratificacion sexual cu den su posicion i bo posicion dilanti Dios? Si e no ta haciendo esfuerso pa biba segun e normanan moral di Dios awor, ki base tin pa kere cu lo e haci esei despues di matrimonio?—Génesis 39:7-12.

• Con e ta trata mi?—Efesionan 5:28, 29.

E buki bíblico di Proverbionan ta papia di un esposo cu “a pone confiansa” den su esposa. Ademas, e “ta elogi’é.” (Proverbionan 31:11, 28) E no ta demasiado yalurs, ni e no ta irazonabel den loke e ta verwagt di dje. Santiago a skirbi cu e sabiduria djariba ta “pacífico, razonabel, . . . yen di misericordia i bon fruta.”—Santiago 3:17.

• Con e ta trata miembronan di su mes famia?—Exodo 20:12.

Respet pa mayornan no ta un rekisito pa mucha so. Bijbel ta bisa: “Scucha bo tata cu a causa bo nacementu, i no despreciá bo mama simplemente pa motibu cu el a bira bieu.” (Proverbionan 23:22) Interesantemente, Dr. W. Hugh Missildine a skirbi: “E futuro bruid i bruidegom lo por evitá, of por lo ménos premirá, hopi dificultad i incompatibilidad matrimonial si nan ta bishitá otro su cas informalmente i observá e relacion entre e namorado i su mayornan. E manera cu e homber ta mira su mayornan lo influenciá e manera cu e ta mira su esposa. Bo tin cu puntra bo mes: ‘Mi kier p’e trata mi manera e ta trata su mayornan?’ I e manera cu su mayornan ta trat’é lo ta un bon indicacion di con e mes lo trata su mes i con lo e spera pa abo comportá bo cuné—despues di luna di miel.”

• E ta cla pa rabia of pa usa abla ofensivo?

Bijbel ta consehá: “Boso kita tur amargura malicioso i furia i rabia i griteria i abla ofensivo for di boso.” (Efesionan 4:31) Pablo a spierta Timoteo di algun cristian cu “ta mentalmente enfermo riba cuestion i debatenan tocante palabranan” i cu ta habri caminda pa “envidia, pleitu, abla ofensivo, sospecho malicioso, discusion violento tocante cosnan insignificante.”—1 Timoteo 6:4, 5.

Ademas, Pablo a skirbi cu esun cu ta cualificá pa privilegionan special den e congregacion no mester ta “un golpiadó”—segun e palabra griego original, “no unu cu ta manda golpi.” (1 Timoteo 3:3, nota na pia di página) E no por ta un persona cu ta heridá hende físicamente of intimidá nan verbalmente. Un persona cu ta incliná na rabia bira violento no ta un partner matrimonial apropiado.

• Kico ta su metanan?

Algun ta sigui tras di rikesa i lo no keda sin cosechá e consecuencianan. (1 Timoteo 6:9, 10) Otronan ta biba pa biba numa, sin pone ningun meta. (Proverbionan 6:6-11) Pero, un homber deboto na Dios lo mustra e mésun determinacion cu Hosué tabatin, kende a bisa: “En cuanto ami i mi cas, nos lo sirbi Jehova.”—Hosué 24:15.

Recompensa i Responsabilidadnan

Matrimonio ta un institucion divino. Jehova Dios ta esun cu a autoris’é i establec’é. (Génesis 2:22-24) El a designá e areglo matrimonial pa forma un vínculo permanente entre un homber i un muher di manera cu nan por ta mutuamente útil pa otro. Ora esposo i esposa aplicá principionan bíblico, nan por conta cu nan bida lo ta gososo.—Eclesiástes 9:7-9.

Nos tin cu realisá sí cu nos ta bibando den “tempu crítico, duru pa trata cuné.” Bijbel a profetisá cu durante e periodo di tempu aki, hende lo ta “stimadó di nan mes, stimadó di placa, presumido, halsá, . . . desleal, sin cariño natural, no dispuesto na ningun acuerdo, . . . traicionero, cabesura, hinchá cu orguyo.” (2 Timoteo 3:1-4) E característicanan aki por tin un impacto poderoso riba bo matrimonio. Pues, esnan cu ta pensa di casa mester calculá e gastu seriamente. I esnan cu ta casá caba mester sigui traha pa mehorá nan union dor di siña i aplicá guia divino hañá den Bijbel.

Sí, esnan cu ta pensa di casa lo haci bon di wak mas leu cu e dia di casamentu. I nos tur mester considerá no solamente e acto di casa, sino tambe e bida casá. Acudí na Jehova pa guia pa bo por pensa di un manera realista en bes di djis romántico so. Dor di haci esei, lo bo tin mas chens di disfrutá di un matrimonio exitoso.

[Nota]

[Kuadro na página 5]

“E Mihó Descripcion di Amor cu Mi A Yega di Lesa”

“Con bo por sa si di berdad bo ta namorá?” Dr. Kevin Leman ta skirbi. “Tin un buki antiguo cu ta contené un descripcion di amor. E buki ta casi dos mil aña bieu, pero ainda e ta e mihó descripcion di amor cu mi a yega di lesa.”

Dr. Leman tabata referí n’e palabranan dje apostel cristian Pablo den Bijbel na 1 Corintionan 13:​4-8:

“Amor tin gran pacenshi i ta bondadoso. Amor no ta yalurs, e no ta broma, no ta hincha cu orguyo, no ta comportá su mes indecentemente, no ta busca su mes interes, no ta bira provocá. E no ta tene cuenta di daño. E no ta alegrá riba inhusticia, sino ta alegrá cu e berdad. E ta soportá tur cos, ta kere tur cos, ta spera tur cos, ta wanta tur cos. Amor no ta faya nunca.”

[Kuadro na página 8]

Emocion Por Ta Engañoso

E mucha muher sulamita di tempu bíblico aparentemente tabata sa dje poder engañoso di sintimentu romántico. Ora e poderoso Rey Sálomon tabata busk’é pa casa, el a bisa su compañeranan “pa no trata di lanta ni excitá amor den mi te ora e sintié incliná pa esei.” (Cantica di Sálomon 2:7) E mucha muher sabí aki no tabata kier pa su amiganan preshon’é pa laga su emocionnan domin’é. Esaki ta práctico tambe pa esnan cu awe ta pensa di casa. Tene bo sintimentunan bon bou di control. Si bo casa, mester ta pasobra bo ta stima un persona, no djis e idea di ta casá.

[Plachi na página 6]

Asta esnan cu tin hopi tempu casá por fortalecé nan laso matrimonial

[Plachi na página 7]

Con e ta trata su mayornan?