“Pa Boso No Kai den Tentashon”

“Keda vigilá i hasi orashon, pa boso no kai den tentashon.”—MATEO 26:41.

E PRESHON tabata intenso, distinto for di kualke preshon ku Hesukristu, e Yu di Dios, a yega di eksperensiá. Fin di su bida riba tera tabata serka. Hesus a realisá ku pronto nan lo a arest’é, konden’é na morto i klab’é na un staka di tormento. E tabata sa ku tur su desishon- i akshonnan lo a sea halsa òf rebahá e nòmber di su Tata. Tambe Hesus tabata sa ku humanidat su speransa pa bida den futuro tabata den wega. Konfrontá ku tur e preshon aki, kiko el a hasi?

² Hesus a bai na e hòfi di Getsemané ku su disipelnan. Esei tabata Hesus su lugá preferí. Einan el a kita bai un distansia kòrtiku for di su disipelnan. Ora e tabata su so, el a akudí na su Tata selestial pa haña fortalesa, i a ekspresá su sintimentunan di mas profundo den orashon ferviente, no un biaha sino tres biaha. Ounke Hesus tabata perfekto, tòg e no a sinti ku e por a enfrentá e preshon riba su mes forsa.—Mateo 26:36-44.

³ Awe, nos tambe ta bou di preshon. Mas dilanti den e foyeto aki nos a konsiderá prueba ku ta mustra ku nos ta bibando den e dianan final di e sistema malbado aki. Tentashon i preshon di e mundu di Satanas ta bira mas i mas intenso. E desishon- i akshonnan di kualke un di nos ku ta bisa ku nos ta sirbi e Dios berdadero, ta sea halsa òf rebahá Dios su nòmber i tin un efekto profundo riba nos speransa individual di haña bida den su mundu nobo. Nos stima Yehova. Nos ke “perseverá te na fin,” sea ta fin di nos bida òf fin di e sistema aki, esun ku bin promé. (Mateo 24:13) Pero kon nos por sigui tene na mente ku e tempu ta urgente i keda vigilá?

⁴ Hesus tabata sa ku su disipelnan tambe lo ta bou di preshon—tantu den e tempu ayá komo awe—i p’esei el a urgi: “Keda vigilá i hasi orashon, pa boso no kai den tentashon.” (Mateo 26:41) Kiko e palabranan ei ta nifiká pa nos awe? Ki tentashon abo ta konfrontá? I kon bo por “keda vigilá”?

Tentashon pa Hasi Kiko?

⁵ Diariamente nos tur ta konfrontá e tentashon pa entregá na “e trampa di Diabel.” (2 Timoteo 2:26) Beibel ta spièrta nos ku Satanas ta mek spesialmente riba adoradónan di Yehova. (1 Pedro 5:8; Revelashon 12:12, 17) Ku ki meta? No nesesariamente pa kita nos bida. Satanas no ta gana nada si nos muri fiel na Dios. Satanas sa ku Yehova, na Su debido tempu, lo lanta hende for di morto.—Lukas 20:37, 38.

⁶ Satanas ke destruí un kos ku ta asta mas balioso ku nos bida aktual: nos integridat na Dios. Satanas ta hasi tur loke ta den su poder pa proba ku e por kita nos di adorá Yehova. P’esei pa Satanas, si e por pone nos bira infiel—stòp di prediká e bon nobo òf bandoná normanan kristian—esei lo ta un viktoria! (Efesionan 6:11-13) P’e motibu ei “e Tentadó” ta pone tentashon nos dilanti.—Mateo 4:3.

⁷ Satanas su “plannan engañoso” ta bin den vários forma. (Efesionan 6:11, Beibel na papiamentu koriente) Podisé e ta tenta nos ku materialismo, miedu, duda òf buskamentu di plaser. Pero un di su métodonan mas efektivo ta desanimashon. Siendo ku e ta un oportunista tramposo, e sa ku desanimashon por debilitá nos spiritualmente i hasi nos vulnerabel pa tentashon. (Proverbionan 24:10) P’esei spesialmente ora nos ta “masha kibrá” emoshonalmente, e ta tenta nos pa entregá.—Salmo 38:8.

⁸ Segun ku nos ta yega mas serka di e fin di e último dianan, ta parse ku e kosnan ku ta kousa desanimashon ta oumentá, i nos no ta imün pa nan. (Wak e kuadro “Algun Faktor Ku Ta Kousa Desanimashon.”) Sea kual sea e kousa, desanimashon por kaba ku nos energia. Si bo ta físikamente, mentalmente i emoshonalmente agotá, lo ta difísil pa ‘hasi bon uso di bo tempu’ pa kumpli ku obligashonnan spiritual, inkluso pa studia Beibel, asistí na reunionnan kristian i partisipá den sirbishi di vèlt. (Efesionan 5:15, 16) Kòrda ku Satanas, e Tentadó, ke pa bo stòp. Pero aworakí no ta tempu pa bo bai mas trankil òf pèrdè for di bista e urgensia di e tempu den kua nos ta biba! (Lukas 21:34-36) Kon bo por resistí tentashon i keda vigilá? Konsiderá kuater sugerensia ku por yuda bo.

“Hasi Orashon Kontinuamente”

⁹ Dependé riba Yehova mediante orashon. Kòrda Hesus su ehèmpel den e hòfi di Getsemané. Kiko el a hasi ora e tabata bou di tenshon emoshonal intenso? El a akudí na Yehova pa yudansa, hasiendo orashon asina ferviente ku “su sodó a bira manera gotanan di sanger ku tabata kai abou na suela.” (Lukas 22:44) Pensa riba esei un ratu. Hesus tabata konosé Satanas bon. Tempu ku Hesus tabata den shelu el a opservá tur e tentashonnan ku Satanas a usa den su intento pa kue sirbidónan di Dios den trampa. I tòg Hesus no a sinti ku fásilmente lo e por a hèndel kualke tentashon ku Satanas lo por a pone su dilanti. Si e Yu perfekto di Dios a sinti e nesesidat di hasi orashon pa pidi yudansa i fortalesa divino, kuantu mas nos mester hasi esei!—1 Pedro 2:21.

¹⁰ Kòrda tambe ku despues di a urgi su disipelnan pa “hasi orashon kontinuamente” [NW], Hesus a bisa: “E spiritu ta boluntario, ma e karni ta débil.” (Mateo 26:41) Na ken su karni Hesus tabata referí? Ta sigur ku no tabata na esun di dje; no tabatin nada débil den su karni humano perfekto. (1 Pedro 2:22) Pero e situashon di su disipelnan tabata otro. Debí na imperfekshon heredá i inklinashonnan pekaminoso, nan spesialmente lo tabatin mester di yudansa pa resistí tentashon. (Romanonan 7:21-24) Ta p’esei el a urgi nan—i tur kristian berdadero despues di nan—pa hasi orashon i pidi yudansa pa por enfrentá tentashon ku éksito. (Mateo 6:13) Yehova ta kontestá e tipo di orashonnan ei. (Salmo 65:2) Kon? Den por lo ménos dos manera.

¹¹ Na promé lugá, Dios ta yuda nos rekonosé tentashon. Satanas su tentashonnan ta manera trampa ku tin plamá riba un kaminda skur. Si bo no mira nan, bo por kai den nan. Mediante Beibel i publikashonnan basá riba Beibel, Yehova ta tira lus riba e trampanan di Satanas, i asina ta hasi posibel ku nos por evitá di entregá na tentashon. Atraves di añanan, literatura i programanan di kongreso i asamblea bes tras bes a spièrta nos pa peligernan manera miedu di hende, inmoralidat seksual, materialismo i otro tentashonnan satániko. (Proverbionan 29:25; 1 Korintionan 10:8-11; 1 Timoteo 6:9, 10) Bo no ta gradisidu na Yehova ku e ta spièrta nos pa e trikinan di Satanas? (2 Korintionan 2:11) Tur e spièrtamentunan ei ta un kontesta riba bo orashonnan den kua bo ta pidi yudansa pa resistí tentashon.

¹² Na di dos lugá, Yehova ta kontestá nos orashonnan dor di duna nos e fortalesa pa soportá tentashon. Su Palabra ta bisa: “Dios . . . lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe.” (1 Korintionan 10:13) Basta nos sigui dependé riba Dios, nunka lo e permití un tentashon bira asina aplastante ku nos lo no tin e fortalesa spiritual pa resistié. Kon Dios ta “proveé salida” pa nos? E ta “duna e spiritu santu na esnan ku pidié.” (Lukas 11:13) E spiritu ei lo por yuda nos kòrda riba prinsipionan bíbliko ku por fortalesé nos determinashon pa hasi loke ta korekto i por yuda nos tuma desishonnan sabí. (Juan 14:26; Santiago 1:5, 6) Tambe spiritu santu por yuda nos desplegá presis e kualidatnan ku nos tin mester pa nos por vense mal inklinashon. (Galationan 5:22, 23) Dios su spiritu por asta motivá nos kompañeronan den fe pa bira “un enkurashamentu” pa nos. (Kolosensenan 4:11) Bo no ta gradisidu ku Yehova ta reakshoná na maneranan asina amoroso riba bo petishonnan pa yudansa?

Sea Realístiko den Bo Ekspektativanan

¹³ Pa keda vigilá, nos mester ta realístiko den nos ekspektativanan. Debí na e preshonnan di bida, nos tur ta kansa tin ora. Pero nos tin ku kòrda ku Dios nunka a primintí ku nos lo tin un bida sin problema den e sistema bieu aki. Asta den tempu bíbliko, sirbidónan di Dios a konfrontá kalamidat, inkluso persekushon, pobresa, depreshon i enfermedat.—Echonan 8:1; 2 Korintionan 8:1, 2; 1 Tesalonisensenan 5:14; 1 Timoteo 5:23.

¹⁴ Awe tambe nos tin nos problemanan. Podisé nos ta konfrontá persekushon, preokupashonnan finansiero, nos ta lucha ku depreshon, ta bira malu i ta sufri den otro maneranan. Si Yehova lo mester a protehá nos milagrosamente di tur daño, esei lo no a duna Satanas un base pa reprochá Yehova? (Proverbionan 27:11) Yehova ta permití su sirbidónan ser tentá i poné na prueba, den algun kaso asta te na morto prematuro na man di opositor.—Juan 16:2.

¹⁵ Pero ta kiko Yehova a primintí anto? Manera nos a menshoná anteriormente, el a primintí ku lo e yuda nos pa nos por resistí kualke tentashon ku nos topa kuné, basta ku nos ta konfia den dje plenamente. (Proverbionan 3:5, 6) Mediante su Palabra, su spiritu i su organisashon, e ta protehá nos spiritualmente, i ta yuda nos konserbá nos relashon kuné. Si e relashon ei keda intakto nos ta sali ganá, asta si nos muri. Nada—ni sikiera morto—no por stroba Dios di rekompensá su sirbidónan fiel. (Hebreonan 11:6) I den e mundu nobo ku awor ta serka, Yehova sigur lo kumpli ku e restu di su maravioso promesanan di trese bendishon pa esnan ku ta stim’é.—Salmo 145:16.

Kòrda e Kuestionnan Enbolbí

¹⁶ Pa perseverá te na fin, nos tin ku kòrda riba e kuestionnan sumamente importante ku ta enbolbí den e echo ku Dios a permití maldat. Si nos problemanan tin biaha ta parse aplastante i nos ta sinti gana di stòp di sirbi Dios, nos mester rekordá nos mes ku Satanas a kuestioná Yehova su derecho di goberná komo Soberano di universo. Tambe Satanas a kuestioná e deboshon i integridat di e adoradónan di Dios. (Jòb 1:8-11; 2:3, 4) E kuestionnan ei i e manera ku Yehova a skohe pa resolvé nan ta mas importante ku nos propio bida. Kon asina?

¹⁷ E echo ku temporalmente Dios a permití sufrimentu, a duna otro hende tempu pa aseptá e bèrdat. Pensa un ratu riba esaki: Hesus a sufri pa asina nos por haña bida. (Juan 3:16) Nos no ta gradisidu pa esei? Pero nos ta dispuesto pa soportá sufrimentu pa un poko tempu mas ya asina mas hende lo por gana bida? Pa perseverá te na fin, nos tin ku rekonosé ku Yehova su sabiduria ta hopi mas grandi ku di nos. (Isaias 55:9) Yehova lo kaba ku maldat na e tempu ku ta mas mihó pa resolvé e kuestionnan pa semper i ku ta na nos bienestar eterno. Bon mirá, lo por tin un mihó manera pa hasi esei? No tin inhustisia serka Dios!—Romanonan 9:14-24.

“Hala Serka Dios”

¹⁸ Pa mantené nos sentido di urgensia, nos mester keda serka di Yehova. No lubidá nunka ku Satanas ta hasi tur loke ta den su poder pa destruí nos bon relashon ku Yehova. Satanas lo ke pa nos kere ku e fin lo no bin nunka i ku no ta bale la pena prediká e bon nobo òf biba segun normanan bíbliko. Pero e “ta un gañadó i e tata di mentira.” (Juan 8:44) Nos mester ta determiná pa “resistí Diabel.” Nos relashon ku Yehova ta algu ku nunka nos mester konsiderá komo di poko balor. Amorosamente Beibel ta urgi nos: “Hala serka Dios i e lo hala serka boso.” (Santiago 4:7, 8) Kon bo por hala mas serka di Yehova?

¹⁹ Meditashon kompañá ku orashon ta sumamente importante. Ora ku preshonnan di bida ta parse aplastante, ekspresá bo sintimentunan di mas profundo na Yehova. Mas spesífiko bo ta, mas fásil lo ta pa bo mira su kontesta riba bo petishonnan. E kontesta kisas no ta semper presis loke bo tabatin na mente, pero si bo deseo ta pa onra Dios i mantené integridat, lo e perkurá e yudansa ku bo mester pa asina bo por perseverá ku éksito. (1 Juan 5:14) Segun ku bo ta mira su guia den bo bida, lo bo hala mas serka dje. Tambe ta esensial pa bo lesa i meditá riba Yehova su kualidatnan i kamindanan ku Beibel ta revelá. E tipo di meditashon ei ta yuda bo konosé Yehova mihó; e ta konmové bo kurason i ta profundisá bo amor p’e. (Salmo 19:14) I ta e amor ei, mas ku tur otro kos, lo yuda bo resistí tentashon i keda vigilá.—1 Juan 5:3.

²⁰ Pa keda serka di Yehova, ta importante tambe pa nos keda serka di nos kompañeronan den fe. E sekshon final di e foyeto aki lo konsiderá e punto aki.

PREGUNTANAN DI STUDIO

• Kiko Hesus a hasi ora ku e tabata bou di preshon ekstremo na final di su bida, i kiko el a urgi su disipelnan pa hasi? (Par. 1-4)

• Dikon Satanas ta mek riba e adoradónan di Yehova, i den ki maneranan e ta tenta nos? (Par. 5-8)

• Pa por resistí tentashon, dikon nos tin ku hasi orashon kontinuamente (Par. 9-12), ser realístiko den nos ekspektativanan (Par. 13-15), kòrda riba e kuestionnan enbolbí (Par. 16-17) i “hala serka Dios” (Par. 18-20)?

[Kuadro na página 25]

Algun Faktor Ku Ta Kousa Desanimashon

Salú òf edat avansá. Si nos ta sufri di malesa króniko òf si edat avansá ta limitá nos, nos lo por bira deprimí pasobra nos no por hasi mas tantu den nos sirbishi na Dios.—Hebreonan 6:10.

Desepshon. Nos por bira desanimá si tin masha tiki reakshon positivo riba nos esfuerso pa prediká e Palabra di Dios.—Proverbionan 13:12.

Sintimentu di no tin balor. Un persona ku sufri maltrato pa hopi aña, por bira konvensí ku ningun hende no ta stim’é, ni sikiera Yehova.—1 Juan 3:19, 20.

Doló emoshonal. Si un hende ser ofendí profundamente dor di un kompañero den fe, lo e por bira asina desanimá ku e ta sinti gana di stòp di asistí na reunionnan kristian òf di partisipá den sirbishi di vèlt.—Lukas 17:1.

Persekushon. Otro hende ku no ta di bo religion kisas ta bai kontra bo, ta persiguí bo òf hasi bofon di bo.—2 Timoteo 3:12; 2 Pedro 3:3, 4.

[Plachi na página 26]

Hesus a urgi nos pa “hasi orashon kontinuamente” i asina pidi yudansa pa lucha kontra tentashon