Kana pa Medio di Fe, No pa Medio di Bista!
“Nos ta kana pa medio di fe, no pa medio di bista.”—2 KORINTIONAN 5:7.
1. Kiko ta mustra ku apòstel Pablo a kana pa medio di fe, no pa medio di bista?
TABATA aña 55 di nos era. Un 20 aña asina a pasa desde ku e hòmber ku e tempu ei tabata yama Saulo, un persiguidó di kristiannan, a aseptá kristianismo. El a bira konosí komo apòstel Pablo i e no a laga e tempu ku a pasa mengua su fe den Dios. Maske e no por a mira e realidatnan di shelu ku su wowonan literal, tòg e tabatin un fe firme. P’esei ora el a skirbi e kristiannan ungí, esta, personanan ku tabatin e speransa selestial, el a bisa nan: “Nos ta kana pa medio di fe, no pa medio di bista.”—2 Korintionan 5:7.
2, 3. (a) Kon nos ta demostrá ku nos ta kanando pa medio di fe? (b) Kiko ta nifiká kana pa medio di bista?
2 Pa nos kana pa medio di fe nos mester tin pleno konfiansa den Dios su kapasidat pa dirigí nos bida. Nos mester tin e konvikshon kompletu ku e realmente sa kiko ta benefisiá nos mas. (Salmo 119:66) Segun ku nos ta tuma desishon den bida i aktua konforme ku nan, nos ta tene kuenta ku e “realidatnan ku nos no ta mira.” (Hebreonan 11:1, The New English Bible) Esakinan ta inkluí e promesa di “shelunan nobo i un tera nobo.” (2 Pedro 3:13) Di otro banda, kana pa medio di bista ta nifiká hiba un bida ku ta enfoká únikamente riba loke nos wowo ta mira. Esaki ta peligroso pasobra e por pone ku nos ta ignorá e boluntat di Dios kompletamente.—Salmo 81:12; Eklesiastés 11:9.
3 Sea ku nos ta di e “tou chikitu” ku tin e yamada selestial, òf di e “otro karnénan” ku tin e speransa di biba riba tera, kada un di nos mester tuma na pechu e spièrtamentu pa kana pa medio di fe i no pa medio di bista. (Lukas 12:32; Juan 10:16) Laga nos mira kon siguimentu di e konseho inspirá aki lo protehá nos pa nos no bira víktima di “e plasernan pasahero di piká,” pa nos no kai den e trampa di materialismo i kore e peliger di pèrdè for di bista ku e fin di e sistema di kosnan aki ta serka. Tambe nos lo analisá e peligernan di kana pa medio di bista.—Hebreonan 11:25.
Rechasá “e Plasernan Pasahero di Piká”
4. Kiko Moisés a opta p’e, i dikon?
4 Imaginá bo ki tipo di bida Moisés, yu di Amram, lo por tabatin. El a lanta den e yunan di e famia real di Egipto di antigwedat, i lo e por a yega na poder, rikesa i prominensia. Moisés lo por a rasoná: ‘Mi a haña un bon edukashon den e sabiduria prestigioso di Egipto, i mi ta poderoso den palabra i akshon. Si mi keda den e famia real, lo mi por usa mi posishon pa yuda mi rumannan hebreo oprimí!’ (Echonan 7:22) Na lugá di esei, Moisés a preferá di “sufri maltrato huntu ku e pueblo di Dios.” Dikon? Kiko a impulsá Moisés pa bira lomba pa tur loke Egipto tabatin di ofresé? Beibel ta kontestá: “Pa medio di fe [Moisés] a bai for di Egipto, sin tene miedu di e furia di rei; pasobra el a keda firme, komo si fuera e tabata mira Esun ku ta invisibel.” (Hebreonan 11:24-27) E fe ku Moisés tabatin den Yehova su rekompensa garantisá pa hende hustu a yud’é resistí piká i un bida di luho ku su plasernan pasahero.
5. Kon e ehèmpel di Moisés ta animá nos?
5 Hopi bes nos tambe tin ku tuma desishonnan difísil riba asuntunan manera: ‘Mi mester stòp ku sierto práktikanan òf kustumbernan ku no ta kuadra kompletamente ku prinsipionan di Beibel? Mi mester aseptá un trabou ku ta mustra benefisioso den sentido material pero ku por stroba mi progreso spiritual?’ E ehèmpel di Moisés ta animá nos pa no tuma desishon ku ta reflehá e falta di perspikasia di e mundu aki; mas bien nos mester tin fe den e sabiduria di largu alkanse di “Esun ku ta invisibel”—Yehova Dios. Meskos ku Moisés, laga nos balorá nos amistat ku Yehova mas ku kualke kos ku e mundu aki por ofresé.
6, 7. (a) Kon Esau a mustra ku el a preferá di kana pa medio di bista? (b) Ki spièrtamentu nos ta haña den e kaso di Esau?
6 Awor wak e kontraste entre Moisés i Esau, yu di e patriarka Isaak. Esau a preferá satisfakshon inmediato. (Génesis 25:30-34) E ‘no a apresiá kosnan sagrado’ sino a regalá su derechonan komo primogénito “a kambio di un solo kuminda.” (Hebreonan 12:16, NW) E no a pensa mes kon su desishon pa bende su derecho di primogénito lo a afektá su relashon ku Yehova i ki influensia su akshon lo tabatin riba su yunan. E tabata falta vishon spiritual. Esau a sera su wowonan pa e promesanan presioso di Dios i a konsiderá nan komo di poko balor. El a kana pa medio di bista, no pa medio di fe.
7 E kaso di Esau ta un spièrtamentu pa nos awe. (1 Korintionan 10:11) Ora nos tin ku tuma desishon, sea grandi òf chikitu, nos no mester laga e idea di e mundu di Satanas di ku ‘bo mester haña loke bo ke, anto awor,’ engañá nos. Ta bon pa nos puntra nos mes: ‘Mi desishonnan ta manifestá sierto tendensianan manera esnan di Esau? Den mi afan pa haña loke mi ke awor, mi ta pushando interesnan spiritual na di dos lugá? Mi desishonnan ta poniendo mi amistat ku Dios i mi futuro rekompensa na peliger? Ki tipo di ehèmpel mi ta poniendo pa otro hende?’ Si nos desishonnan ta reflehá apresio pa kosnan sagrado, Yehova lo bendishoná nos.—Proverbionan 10:22.
Evitá e Trampa di Materialismo
8. Ki spièrtamentu e kristiannan di Laodisea a risibí, i pakiko esei ta di interes pa nos?
8 Den un revelashon na apòstel Juan na fin di e promé siglo, Hesukristu glorifiká a entregá un mensahe na e kongregashon situá na Laodisea, Asia Menor. Tabata un mensahe di spièrtamentu kontra materialismo. Ounke e kristiannan di Laodisea tabata riku den sentido material, spiritualmente sí nan tabata bankrut. En bes di sigui kana pa medio di fe, nan a laga poseshonnan material siega nan vishon spiritual. (Revelashon 3:14-18) Materialismo tin un efekto similar awe. E ta debilitá nos fe i ta pone nos stòp di ‘kore e kareda pa bida ku perseveransia.’ (Hebreonan 12:1) Si nos no tene kuidou, e “plasernan di bida” por sofoká aktividatnan spiritual asina tantu te ku nan ta keda kompletamente “hogá.”—Lukas 8:14.
9. Si nos ta keda kontentu ku loke nos tin i gradisidu pa alimento spiritual, kon esei ta protehá nos?
9 Un faktor klave pa nos protekshon spiritual ta pa keda kontentu ku loke nos tin, en bes di kohe e mundu aki tene ku nos man i kore tras di rikesa material. (1 Korintionan 7:31; 1 Timoteo 6:6-8) Ora nos ta kana pa medio di fe i no pa medio di bista, nos ta haña goso den e paradeis spiritual aktual. Segun ku nos ta tuma alimento spiritual nutritivo, nos no ta sinti nos impulsá pa “dal gritu di goso ku un kurason kontentu”? (Isaias 65:13, 14) Ademas, ta un plaser di por asosiá ku personanan ku ta manifestá e fruta di spiritu di Dios. (Galationan 5:22, 23) Ta sumamente importante pa nos haña satisfakshon i refreskamentu den Yehova su provishonnan spiritual!
10. Ta bon pa nos hasi nos mes ki pregunta?
10 Ta bon pa nos hasi nos mes algun pregunta: ‘Kon importante kos material ta pa mi? Mi ta usando e poseshonnan material ku mi tin pa hiba un bida di plaser òf pa promové adorashon berdadero? Kiko ta duna mi e mayor satisfakshon? Esei ta estudio di Beibel i asosiashon na reunionnan kristian, òf ora mi por pasa un fin di siman liber di responsabilidat kristian? Mi ta dediká hopi fin di siman na rekreo en bes di usa e tempu ei pa sirbishi di vèlt i otro aktividatnan en konekshon ku adorashon puru?’ Kana pa medio di fe ta nifiká keda okupá den e obra di Reino, ku pleno konfiansa den e promesanan di Yehova.—1 Korintionan 15:58.
No Pèrdè e Fin for di Bista
11. Kon kana pa medio di fe ta yuda nos pa no pèrdè e fin for di bista?
11 Kana pa medio di fe ta yuda nos evitá e punto di bista karnal ku e fin ta leu ainda òf ku e no ta bini mes. Distinto di e personanan sképtiko ku ta hasi chèrchi di profesia di Beibel, nos sí ta diserní kon susesonan di mundu ta kumpli ku loke e Palabra di Dios a profetisá pa nos tempu. (2 Pedro 3:3, 4) Por ehèmpel, e aktitut i komportashon di hende en general no ta duna prueba ku nos ta bibando den “e último dianan”? (2 Timoteo 3:1-5) Ku wowo di fe, nos ta mira ku e susesonan aktual di mundu no ta djis historia ku ta ripití su mes. Mas bien, nan ta forma “e señal di [Kristu su] binida i di e fin di tempu.”—Mateo 24:1-14.
12. Kon e palabranan di Hesus registrá na Lukas 21:20 i 21 a kumpli den e promé siglo?
12 Konsiderá un suseso ku a tuma lugá den e promé siglo di nos era ku tin un paralelo den nos tempu. Tempu ku Hesukristu tabata riba tera, el a spièrta su siguidónan: “Ora boso mira Yerusalèm rondoná dor di ehérsitonan, rekonosé anto ku su desolashon ta serka. E ora ei laga esnan ku ta na Judea hui bai na e serunan, i laga esnan ku ta meimei di e stat sali bai.” (Lukas 21:20, 21) E profesia aki a kumpli ora ku e ehérsito romano bou di mando di Sestio Galo a sitia Yerusalèm na aña 66 di nos era. Pero e ehérsito a retirá abruptamente, lokual tabata e señal i e oportunidat pa e kristiannan einan “hui bai na e serunan.” Na aña 70 di nos era, e ehérsito romano a regresá, ataká e stat di Yerusalèm i a destruí su tèmpel. Hosefo ta informá ku mas ku un mion hudiu a muri, i 97.000 a ser hiba komo koutivo. E huisio di Dios a bini riba e sistema di kosnan hudiu ei. Esnan ku a kana pa medio di fe i a hasi kaso di e spièrtamentu di Hesus a skapa e kalamidat.
13, 14. (a) Kiko lo tuma lugá pronto? (b) Pakiko nos mester ta alerto pa loke ta kumplimentu di profesia di Beibel?
13 Algu similar ta serka di tuma lugá den nos tempu. Miembronan di Nashonnan Uní lo ta enbolbí den ehekushon di huisio divino. Meskos ku e propósito di e ehérsito romano di e promé siglo tabata pa mantené e Pax Romana (Pas Romano), asina Nashonnan Uní djawe ta sirbiendo supuestamente komo un instrumento pa mantené pas. Ounke e ehérsito romano a purba garantisá un siguridat relativo atraves di e mundu konosí di e tempu ei, ta nèt e forsa aki a destruí Yerusalèm. Awe tambe ta meskos; profesia di Beibel ta indiká ku e potensianan militar den Nashonnan Uní lo mira religion komo un estorbo i lo tuma akshon pa destruí e Yerusalèm moderno, esta, kristiandat, i tambe e restu di Babilonia e Grandi. (Revelashon 17:12-17) Sí, henter e imperio mundial di religion falsu lo topa pronto ku su destrukshon.
14 E destrukshon di religion falsu lo marka kuminsamentu di e tribulashon grandi. Den e parti final di e tribulashon grandi, e sobrá elementonan di e mundu malbado aki lo ser destruí. (Mateo 24:29, 30; Revelashon 16:14, 16) Kana pa medio di fe ta mantené nos mes alerta pa loke ta kumplimentu di profesia di Beibel. Nos no ta bai tras di e engaño ku Dios lo usa organisashonnan di hende manera Nashonnan Uní pa trese berdadero pas i siguridat. Pues, anto, nos forma di biba no mester duna muestra ku nos tin e konvikshon ku “e gran dia di SEÑOR ta serka”?—Sofonias 1:14.
Kiko Ta e Peliger di Kana pa Medio di Bista?
15. Apesar ku e nashon di Israel a mira kon Dios a bendishoná nan, den ki trampa nan a kai?
15 E eksperensianan di Israel di antigwedat ta ilustrá e peligernan di kana pa medio di bista ya ku esei lo debilitá bo fe. Apesar ku e israelitanan tabata testigu di e dies plaganan ku a humiá e diosnan falsu di Egipto i despues a eksperensiá e liberashon espektakular atraves di Laman Kòrá, tòg nan a desobedesé Dios dor di traha un bisé di oro i kuminsá ador’é. Nan a pèrdè pasenshi i a kansa di warda riba Moisés, kende “a tarda pa baha for di e seru.” (Eksodo 32:1-4) Debí na nan falta di pasenshi, nan a bai adorá un dios falsu ku nan por a mira. Nan kanamentu pa medio di bista a ofendé Yehova i esei a hiba na e ehekushon di “mas o ménos tres mil hòmber.” (Eksodo 32:25-29) Ta masha tristu ora un adoradó di Yehova awe tuma desishonnan ku ta indiká un falta di konfiansa den Yehova i den su kapasidat pa kumpli ku su promesanan!
16. Kon aparensia di otro hende a afektá e israelitanan?
16 Otro kos ku a afektá e israelitanan negativamente tabata e aparensia di nan enemigunan. Kana pa medio di bista a pone nan tembla dilanti nan. (Numbernan 13:28, 32; Deuteronomio 1:28) Tambe nan a kuminsá desafiá e outoridat ku Moisés a risibí di Dios i keha tokante loke nan a pasa aden. Debí na e falta di fe aki, nan a preferá Egipto ku su influensia di demoño, en bes di e Tera Primintí. (Numbernan 14:1-4; Salmo 106:24) Ora Yehova a mira e gran falta di rèspèt ku su pueblo a mustra pa nan Rei invisibel, lo e mester a sinti su mes sumamente ofendí!
17. Kiko a pone e israelitanan rechasá e guia di Yehova den tempu di Samuel?
17 Den e tempu di profeta Samuel, e nashon faboresí di Israel a bolbe kai den e trampa di kana pa medio di bista. E pueblo a kuminsá deseá un rei ku nan por a mira. Maske Yehova a demostrá ku e tabata nan Rei, esaki no tabata sufisiente pa pone nan kana pa medio di fe. (1 Samuel 8:4-9) Nan a kometé e bobedat di rechasá e guia impekabel di Yehova i a preferá di ta manera e nashonnan rònt di nan, i dor di esei nan a perhudiká nan mes.—1 Samuel 8:19, 20.
18. Ki lès nos por siña tokante e peligernan di kana pa medio di bista?
18 Komo Yehova su sirbidónan di e tempu aktual, nos ta apresiá nos bon relashon ku Dios. Nos ta ansioso pa siña i apliká den nos bida lèsnan balioso for di susesonan di pasado. (Romanonan 15:4) Ora e israelitanan a kana pa medio di bista, nan a lubidá ku Dios tabata dirigí nan via Moisés. Si nos no paga tinu, nos tambe por lubidá ku Yehova Dios i e Moisés Mayor, Hesukristu, ta dirigiendo e kongregashon kristian djawe. (Revelashon 1:12-16) Nos tin ku tene kuidou pa no mira e parti di Yehova su organisashon aki riba tera for di un punto bista humano. Esei lo por pone nos kuminsá keha i pèrdè apresio pa Yehova su representantenan i tambe pa e alimento spiritual ku “e esklabo fiel i prudente” ta perkurá.—Mateo 24:45.
Sea Determiná pa Kana pa Medio di Fe
19, 20. Kiko bo ta determiná pa hasi, i pakiko?
19 Beibel ta deklará: “Nos lucha no ta kontra karni i sanger, sino kontra e gobernantenan, kontra e podernan, kontra e forsanan mundial di e skuridat aki, kontra e forsanan spiritual di maldat den e lugánan selestial.” (Efesionan 6:12) Nos enemigu prinsipal ta Satanas e Diabel. Su meta ta pa kaba ku nos fe den Yehova. Lo e no laga di rekurí na kualke medio ku por pone nos desviá for di nos determinashon pa sirbi Dios. (1 Pedro 5:8) Kiko lo protehá nos di wòrdu engañá pa e aparensia di e mundu di Satanas? Kana pa medio di fe, no pa medio di bista! Konfiansa den Yehova su promesanan lo salbaguardiá nos di ‘noufragio enkuanto nos fe.’ (1 Timoteo 1:19) Sí, laga nos anto ta determiná pa sigui kana pa medio di fe, sigur di Yehova su bendishon. I laga nos sigui pidi den orashon ku nos por skapa di tur e kosnan ku ta bai tuma lugá den futuro serkano.—Lukas 21:36.
20 Segun ku nos ta kana pa medio di fe i no pa medio di bista, nos tin un Ehèmpel magnífiko pa mira ariba. Beibel ta deklará: “Kristu tambe a sufri pa boso, lagando un ehèmpel pa boso, pa boso sigui den su pasonan.” (1 Pedro 2:21) E siguiente artíkulo lo splika kon nos por sigui kana manera é a kana.
Bo Ta Kòrda?
• Kiko bo a siña for di e ehèmpelnan di Moisés i Esau tokante kana pa medio di fe, no pa medio di bista?
• Kiko ta un faktor klave pa evitá materialismo?
• Kon kana pa medio di fe ta yuda nos evitá e punto di bista ku e fin ta leu ainda?
• Pakiko ta peligroso pa kana pa medio di bista?
[Plachi na página 17]
Moisés a kana pa medio di fe
[Plachi na página 18]
Rekreo ta stroba bo hopi biaha di okupá bo mes ku aktividatnan teokrátiko?
[Plachi na página 20]
Ora bo ta presta atenshon na e Palabra di Dios, kon esei ta protehá bo?