E Bèrdat Tokante Piká

SI UN hende ku tin keintura kibra e tèrmometer, e por bisa ku e no tin keintura? Klaru ku no! Meskos tambe, nos no por bisa ku djis pasobra hopi hende ta rechasá Dios su punto di bista di piká, esei ta nifiká ku piká no ta eksistí. Su Palabra, Beibel, ta siña nos masha hopi kos tokante e tópiko akí. Kiko eksaktamente Beibel ta siña tokante piká?

Tur A Peka

Un dos mil aña pasá, apòstel Pablo a ekspresá su frustrashon tokante e echo ku ‘e bon ku e tabata deseá di hasi, e no a hasi; ma e tabata praktiká eksaktamente e maldat ku e no a deseá di hasi.’ (Romanonan 7:19) Si nos ta onesto, nos tin ku atmití ku nos situashon ta meskos. Kisas nos ta deseá di kumpli ku e Dies Mandamentunan òf kualke otro norma di kondukta, pero sea ku nos ke òf no, nos tur ta peka. Nos no ta skohe deliberadamente pa violá un norma. E problema ta ku nos ta débil. Dikon? Pablo mes ta duna e kontesta: “Ma si mi ta hasi eksaktamente loke mi no ta deseá di hasi, anto no ta ami ta esun mas ku ta hasié, sino piká ku ta biba den mi.”​—Romanonan 7:20.

Meskos ku Pablo, tur ser humano a nase ku debilidat ku ta evidensia di piká heredá i imperfekshon. Apòstel Pablo a bisa: “Tur a peka i ta falta e gloria di Dios.” Ta kon bin nos ta den e situashon akí? Pablo a sigui bisa: “Dor di ún hende [Adam] piká a drenta den mundu, i morto dor di piká, i asina morto a pasa pa tur hende, pasobra tur a peka.”​—Romanonan 3:23; 5:12.

Maske hopi hende ta rechasá e idea ku piká di nos promé mayornan a alehá nos for di Dios i a pone nos pèrdè e perfekshon ku tabata eksistí na prinsipio, tòg esaki ta eksaktamente loke Beibel ta siña. E echo ku Hesus a usa e promé kapítulonan di Génesis komo outoridat ta indiká ku e tabata kere den e relato di Adam ku Eva.​—Génesis 1:27; 2:24; 5:2; Mateo 19:​1-5.

Un di e siñansanan fundamental di Beibel ta ku Hesus a bini na tera pa libra esnan ku ehersé fe den dje for di nan kondishon pekaminoso. (Juan 3:16) Nos speransa di biba den futuro ta dependé di si nos ta aseptá Yehova su medio di reskatá humanidat apresiativo for di un kondishon riba kua nan no tin kontròl. Pero si nos no ta komprondé bon kla kon Dios ta mira piká, nos lo no por komprondé ni apresiá e medio ku el a usa pa libra nos for di piká.

Hesus Su Sakrifisio i Dikon Esaki Tabata Nesesario

Yehova a duna e promé hòmber Adam e speransa di biba pa semper. Solamente si el a rebeldia kontra Dios lo el a pèrdè e maravioso speransa ei. Adam a rebeldia, i ora el a hasi esei, el a bira un pekadó. (Génesis 2:​15-17; 3:6) Adam a aktua kontrali na Dios su boluntat, a peka i a daña su relashon ku Dios. Ora el a kibra ku e lei divino i a peka, el a kuminsá bira bieu i finalmente a muri. Lamentablemente, tur Adam su desendientenan, inkluyendo nos, a nase den piká, i dor di esei nos tur ta muri. Dikon?

E motibu ta basta simpel. Mayornan imperfekto no por haña yunan perfekto. Tur desendiente di Adam a nase pekadó, i manera apòstel Pablo a remarká: “Pago di piká ta morto.” (Romanonan 6:23) Pero e di dos parti di e versíkulo ei ta duna nos speransa: “Ma e don di grasia di Dios ta bida eterno den Kristu Hesus, nos Señor.” Ke men ku Hesus a sakrifiká su bida i a hasi posibel pa hende obediente i apresiativo ser librá di e efektonan di e piká ku Adam a kometé.a (Mateo 20:28; 1 Pedro 1:​18, 19) Ki efekto esei mester tin riba bo?

E Amor di Kristu Ta “Obligá Nos”

Bou di inspirashon apòstel Pablo a bisa nos kiko ta Dios su kontesta riba e pregunta ya menshoná. El a skirbi: “E amor di Kristu ta obligá nos, yegando na e konklushon akí, ku ún a muri pa tur . . . i el a muri pa tur, pa esnan ku ta biba no biba mas pa nan mes, ma pa esun ku a muri i ku a resusitá.” (2 Korintionan 5:​14, 15) Si un hende ta komprondé ku e sakrifisio di Hesus por libr’é for di e efekto di piká—i ta deseá di mustra gratitut pa esei—e tin ku hasi esfuerso pa biba manera Dios ke pa e biba. Esaki ta enserá komprondé kiko Dios ta rekerí di dje, entrená su konsenshi na armonia ku normanan bíbliko i hiba un bida di akuerdo ku esei.​—Juan 17:​3, 17.

Ora nos hasi piká, esei ta daña nos relashon ku Yehova Dios. Rei David a kometé adulterio ku Bètsabé i a laga mata e kasá di Bètsabé. No kabe duda ku el a sinti hopi bèrgwensa ora el a rekonosé seriedat di e asuntu ei. Pero manera debe ser loke a preokup’é mas tantu tabata ku el a ofendé Dios. El a atmití sinseramente na Yehova: “Kontra abo, abo so, mi a peka i a hasi loke ta malu den bo bista.” (Salmo 51:4) Meskos tambe, ora Hosé a hañ’é konfrontá ku e tentashon pa kometé adulterio, su bon konsenshi a pon’é puntra su mes: “Kon anto mi por hasi e maldat grandi akí i peka kontra Dios?”​—Génesis 39:9.

Pues, piká no ta djis un asuntu di sinti bèrgwensa pa un echo ku a sali na kla den públiko. E no ta djis un asuntu di duna kuenta i rason na sosiedat pa motibu ku nos no a kumpli ku nan ekspektativanan. Ora nos violá e lei di Dios tokante sèks, onestidat, rèspèt, adorashon, etcetera, nos ta daña nos relashon personal kuné. Si nos praktiká piká deliberadamente, nos ta bira enemigu di Dios. Esaki ta un bèrdat ku nos tin ku pensa seriamente riba dje.​—1 Juan 3:​4, 8.

Pues, ta kiko a pasa ku piká? En realidat, nada no a pasa ku piká. Hende simplemente a dun’é otro nòmber i spera ku e ta parse ménos serio. Hopi hende sea a ignorá òf a mata nan konsenshi. Tur hende ku ke haña Dios su fabor mester resistí e tendensia ei. Manera nos a mira kaba, pago di piká ta morto i no djis un asuntu di sinti bo humiá òf di pasa bèrgwensa. Piká ta un asuntu di bida i morto.

E bon notisia ta ku pordon di piká ta posibel mediante e balor di sakrifisio di Hesus si nos arepentí sinseramente i stòp di praktiká piká. Pablo a skirbi: “Bendishoná ta esnan, kende nan transgreshonnan a wòrdu pordoná, i kende nan pikánan a wòrdu tapá. Bendishoná ta e hende, kende su piká SEÑOR no ta tuma na kuenta.”​—Romanonan 4:​7, 8.

[Nota]

[Plachi na página 9]

Si nos biba na armonia ku e Palabra di Dios, nos por tin un bon relashon ku Dios i hende