Esaki Ta e Dia di Salbacion!

“Mira! Awor ta e tempu specialmente aceptabel. Mira! Awor ta e dia di salbacion.”—2 CORINTIONAN 6:2.

 1. Kico ta necesario pa haña un posicion aprobá cerca Dios i cerca Cristo?

JEHOVA a fiha un dia di huicio pa humanidad. (Echonan 17:31) Pa e ta un dia di salbacion pa nos, nos mester tin un posicion aprobá cerca dje i cerca su Hues nombrá, Jesucristo. (Juan 5:22) Un posicion asina ta rekerí conducta cu ta na armonia cu e Palabra di Dios i fe cu ta impulsá nos pa yuda otronan pa ta berdadero disipel di Jesus.

 2. Pakico e mundu di humanidad ta alehá for di Dios?

² Pa motibu di picá heredá, e mundu di humanidad ta alehá for di Dios. (Romanonan 5:12; Efesionan 4:17, 18) P’esei, esnan na ken nos ta predicá por gana salbacion solamente si nan reconciliá cuné. Apostel Pablo a clarificá e punto aki ora el a skirbi cristiannan na Corinto. Laga nos examiná 2 Corintionan 5:10–6:10 pa mira kico Pablo a bisa tocante huicio, reconciliacion cu Dios i salbacion.

“Nos Ta Sigui Persuadí Hende”

 3. Con Pablo a “sigui persuadí hende,” i pakico nos tin cu haci esaki awe?

³ Pablo a conectá huicio cu e trabou di predicá ora el a skirbi: “Nos tur tin cu ser manifestá dilanti dje asiento di huicio di e Cristo, pa cada un haña su recompensa pa e cosnan hací via e curpa, segun loke el a practicá, sea cu ta cos bon of cos baho. Conociendo, pues, e temor di Señor, nos ta sigui persuadí hende.” (2 Corintionan 5:10, 11) E apostel a “sigui persuadí hende” dor di predicá e bon nobo. Kico di nos? Ya cu nos ta enfrentá e fin dje mal sistema di cosnan aki, nos mester haci nos máximo esfuerso pa persuadí otronan pa dal e pasonan necesario pa gana Jesus su huicio faborabel i e aprobacion dje Fuente di salbacion, Jehova Dios.

 4, 5. (a) Pakico nos no mag broma tocante nos logronan den Jehova su sirbishi? (b) Con Pablo a broma “pa Dios”?

⁴ Sin embargo, si Dios a bendicioná nos ministerio, nos no mag broma. Den Corinto algun tabata hinchá di orguyo pa cu nan mes of pa cu otro hende, causando asina division den e congregacion. (1 Corintionan 1:10-13; 3:3, 4) Refiriendo n’e situacion aki, Pablo a skirbi: “Nos no ta recomendá nos mes atrobe na boso, sino ta duna boso un incentivo pa broma en cuanto nos, pa boso por tin un contesta pa esnan cu ta broma riba aparencia exterior pero no riba e curason. Pasobra si nos a perde nos sano huicio, esei tabata pa Dios; si nos tin sano huicio, esei ta pa boso.” (2 Corintionan 5:12, 13) Esnan halsá no tabata interesá den e congregacion su unidad i bienestar spiritual. Nan tabata kier a broma den aparencia exterior en bes di yuda compañeronan creyente desaroyá un bon curason dilanti Dios. P’esei, Pablo a reprendé e congregacion i a bisa despues: “Esun cu ta broma, lagu’e broma den Jehova.”—2 Corintionan 10:17.

⁵ Pablo mes no a broma? Algun hende por a pensa asina pa motibu di loke el a bisa tocante ser un apostel. Pero e tabatin cu broma “pa Dios.” El a broma tocante su credencialnan como apostel, p’e corintionan no bandoná Jehova. Pablo a haci esaki pa trece nan bek na Dios pasobra apostelnan falsu tabata guia nan den e direccion robes. (2 Corintionan 11:16-21; 12:11, 12, 19-21; 13:10) Tog, Pablo no tabata purba constantemente di impresioná tur hende cu su logronan.—Proverbionan 21:4.

E Amor di Cristo Ta Obligá Bo?

 6. Con e amor di Cristo mester influenciá nos?

⁶ Como un berdadero apostel, Pablo a siña otro hende tocante Jesus su sacrificio di rescate. Esei tabatin un impacto riba Pablo su bida, pasobra el a skirbi: “E amor cu e Cristo tin ta obligá nos, pasobra esaki ta loke nos a husga, cu un solo homber a muri pa tur; pues anto, tur a muri; i el a muri pa tur, afin cu esnan cu ta biba, no biba mas pa nan mes, sino pa esun cu a muri pa nan i a ser lantá.” (2 Corintionan 5:14, 15) Ki un amor grandi Jesus a mustra den duna su bida pa nos! Esei sigur mester ta un forsa motivador den nos bida. Gratitud na Jesus pa a duna su bida na nos fabor mester impulsá nos na actividad celoso den proclamá e bon nobo di salbacion cu Jehova a percurá mediante su Yu stimá. (Juan 3:16; compará cu Salmo 96:2.) “E amor cu e Cristo tin ta” obligá bo pa participá celosamente den e trabou di predicá e Reino i haci disipel?—Mateo 28:19, 20.

 7. Kico kier men “no conocé ningun hende segun carni”?

⁷ Dor cu e ungínan ta usa nan bida den un manera cu ta mustra gratitud pa loke Cristo a haci na fabor di nan, nan ‘no ta biba mas pa nan mes, sino p’e.’ “P’esei,” Pablo a bisa, “djawor padilanti nos no conocé ningun hende segun carni. Asta si nos a conocé Cristo segun carni, sigur ya nos no conoc’é asina mas.” (2 Corintionan 5:16) Cristiannan no tin cu mira hende den un manera carnal, tal bes faboreciendo hudiu riba gentil of hende ricu riba pober. Esnan ungí “no conocé ningun hende segun carni,” pasobra loke ta importante ta nan relacion spiritual cu nan compañeronan creyente. Esnan cu ‘tabata conocé Cristo segun carni’ no tabata djis e hendenan cu a mira Jesus ora e tabata riba tera. Asta si algun cu tabata spera riba e Mesías a yega di mira Cristo djis como hende, nan no mester a mir’é asina mas. El a duna su curpa como rescate i a resucitá como un spiritu dunador di bida. Otronan lantá na bida celestial lo entregá nan curpa carnal sin cu nan a yega di mira Jesucristo den carni.—1 Corintionan 15:45, 50; 2 Corintionan 5:1-5.

 8. Con algun hende a yega di ta “den union cu Cristo”?

⁸ Papiando ainda cu esnan ungí, Pablo ta agregá: “Si un hende ta den union cu Cristo, e ta un creacion nobo; e cosnan bieu a pasa bai, mira! cos nobo ta existí.” (2 Corintionan 5:17) Ser “den union cu Cristo” ta nificá gosa di unidad cuné. (Juan 17:21) E relacion aki a cuminsá existí p’e persona ora Jehova a atra’é na su Yu i a ungi e persona ei cu spiritu santu. Como un yu di Dios ungí cu spiritu, e tabata “un creacion nobo” cu e prospecto di participá cu Cristo den e Reino celestial. (Juan 3:3-8; 6:44; Galationan 4:6, 7) E cristiannan ungí ei a haña un magnífico privilegio di sirbishi.

“Reconciliá cu Dios”

 9. Kico Dios a haci pa reconciliacion cuné bira posibel?

⁹ Cuantu Jehova a faborecé e “creacion nobo”! Pablo ta bisa: “Tur cos ta bini di Dios, kende a reconciliá nos cu su mes mediante Cristo i a duna nos e ministerio di reconciliacion, esta, cu Dios, mediante Cristo, tabata reconciliá un mundu cu su mes, sin tuma nan ofensanan na cuenta, i a confia na nos e palabra di reconciliacion.” (2 Corintionan 5:18, 19) Humanidad tabata alehá for di Dios desde e momento cu Adam a peca. Pero Jehova a tuma e iniciativa amorosamente pa habri e caminda di reconciliacion mediante e sacrificio di Jesus.—Romanonan 5:6-12.

10. Na ken Jehova a encargá e ministerio di reconciliacion, i kico nan a haci pa cumpli cuné?

¹⁰ Jehova a confia e ministerio di reconciliacion n’e ungínan. P’esei Pablo por a bisa: “P’esei, nos ta embahador substituto pa Cristo, como si Dios tabata haci súplica mediante nos. Como substituto di Cristo nos ta roga: ‘Reconciliá cu Dios.’” (2 Corintionan 5:20) Den tempu antiguo, tabata despachá embahadornan principalmente durante periodo di hostilidad pa mira si por a evitá guera. (Lucas 14:31, 32) Ya cu e mundu pecaminoso di humanidad ta alehá for di Dios, el a manda su embahadornan ungí pa informá hende di su condicionnan pa reconciliá cuné. Como substituto di Cristo, e ungínan ta roga: “Reconciliá cu Dios.” E súplica aki ta un rogamentu misericordioso pa busca pas cu Dios i aceptá e salbacion cu e ta haci posibel mediante Cristo.

11. Ken finalmente ta alcansá un posicion hustu dilanti Dios mediante fe den e rescate?

¹¹ Tur hende cu ehercé fe den e rescate por reconciliá cu Dios. (Juan 3:36) Pablo ta bisa: “Esun [Jesus] cu no a conocé picá, [Jehova] a haci picá pa nos, pa nos por bira Dios su husticia pa medio di dje.” (2 Corintionan 5:21) E homber perfecto Jesus tabata e ofrenda di picá pa tur yu di Adam cu ta ser librá for di picá heredá. Nan ta bira “Dios su husticia” pa medio di Jesus. E husticia aki, of posicion hustu dilanti Dios, ta bini promé pa Cristo su 144.000 co-herederonan. Durante su Reinado di Mil Aña, un posicion hustu como hende perfecto lo bini p’e yunan terenal dje Tata Eterno, Jesucristo. Lo e elevá nan na un posicion hustu den perfeccion pa nan por proba cu nan ta fiel na Dios i ricibí e don di bida eterno.—Isaías 9:6; Revelacion 14:1; 20:4-6, 11-15.

“E Tempu Specialmente Aceptabel”

12. Ki ministerio importante Jehova su embahador i mensaheronan ta efectuá?

¹² Pa nos haña salbacion, nos tin cu actua na armonia cu Pablo su palabranan: “Trahando huntu cuné [Jehova], nos tambe ta suplicá boso pa no aceptá e bondad inmerecí di Dios i keda sin cumpli cu su propósito. Pasobra e ta bisa: ‘Den un tempu aceptabel mi a tendé bo, i den un dia di salbacion mi a yudá bo.’ Mira! Awor ta e tempu specialmente aceptabel. Mira! Awor ta e dia di salbacion.” (2 Corintionan 6:1, 2) Jehova su embahadornan ungí i su mensaheronan, e “otro carnénan,” no ta aceptá e bondad inmerecí di nan Tata celestial i keda sin cumpli cu su propósito. (Juan 10:16) Dor di nan conducta recto i ministerio celoso den e “tempu aceptabel” aki, nan ta busca fabor divino i ta informá habitante dje tera cu esaki ta “e dia di salbacion.”

13. Kico ta e idea principal di Isaías 49:8, i con el a haña su promé cumplimentu?

¹³ Pablo ta cita Isaías 49:8, cu ta bisa: “Esaki ta loke Jehova a bisa: ‘Den un tempu di bon boluntad mi a contestá bo, i den un dia di salbacion mi a yudá bo; i mi a sigui salbaguardiá bo pa mi por duná bo como pacto p’e pueblo, pa rehabilitá e tera, pa recobrá e posesionnan hereditario desolá.’” E profecia aki a haña su promé cumplimentu ora a libra e pueblo di Israel for di cautiverio den Babilonia i despues ora cu nan a regresá nan patria desolá.—Isaías 49:3, 9.

14. Con Isaías 49:8 a cumpli den e caso di Jesus?

¹⁴ Den un di dos cumplimentu dje profecia di Isaías, Jehova a duna su “sirbidó” Jesus como “un lus dje nacionnan, pa [Dios su] salbacion por yega te na extremidad dje tera.” (Isaías 49:6, 8; compará cu Isaías 42:1-4, 6, 7; Mateo 12:18-21.) Ta evidente cu e “tempu di bon boluntad,” of “tempu aceptabel,” a aplicá na Jesus ora e tabata riba tera. El a haci oracion, i Dios a ‘contest’é.’ Esei a resultá di ta “un dia di salbacion” pa Jesus pasobra el a mantené integridad perfecto i asina “a bira responsabel pa e salbacion eterno di tur esnan cu ta obedec’é.”—Hebreonan 5:7, 9; Juan 12:27, 28.

15. Desde ki tempu israelitanan spiritual a haci esfuerso pa duna prueba cu nan ta digno dje bondad inmerecí di Dios, i cu ki obhetivo?

¹⁵ Pablo ta aplicá Isaías 49:8 na cristiannan ungí, suplicando nan ‘pa no keda sin cumpli cu e propósito dje bondad inmerecí di Dios’ dor di keda sin busca su bon boluntad durante e “tempu aceptabel” i e “dia di salbacion” cu e ta percurá. Pablo ta agregá: “Mira! Awor ta e tempu specialmente aceptabel. Mira! Awor ta e dia di salbacion.” (2 Corintionan 6:2) Desde Pentecoste 33 E.C., israelitanan spiritual a haci esfuerso pa duna prueba cu nan ta digno di Dios su bondad inmerecí pa e “tempu aceptabel” por tabata “un dia di salbacion” pa nan.

‘Recommending Ourselves as God’s Ministers’

16. Bou di ki circunstancianan difícil Pablo a recomendá su mes como minister di Dios?

¹⁶ Algun homber asociá cu e congregacion corintio no tabata duna prueba cu nan ta digno dje bondad inmerecí di Dios. Nan a calumniá Pablo den un intento pa destruí su autoridad como apostel, aunke el a evitá di “duna un motibu pa tropieso.” E sigur a recomendá su mes como minister di Dios “dor di wanta hopi, dor di tribulacion, dor di casonan di necesidad, dor di dificultad, dor di golpi, dor di prizon, dor di desordu, dor di trabou pisá, dor di anochinan sin drumi, dor di tempu sin cuminda.” (2 Corintionan 6:3-5) Mas despues, Pablo a razoná cu si su opositornan tabata minister, e tabata “unu mas sobresaliente” dor cu el a sufri mas encarcelacion, mas golpi, mas peliger i mas privacion.—2 Corintionan 11:23-27.

17. (a) Ki cualidadnan nos mester desplegá pa por recomendá nos mes como minister di Dios? (b) Kico ta “e armanan di husticia”?

¹⁷ Mescos cu Pablo i su compañeronan, nos por recomendá nos mes como minister di Dios. Con asina? “Dor di puresa,” of decencia, i dor di actua na armonia cu conocimentu exacto di Bijbel. Nos por recomendá nos mes “dor di gran pacenshi,” wantando cu pacenshi loke ta inhustu of provocacion, i “dor di bondad” ora nos ta haci cosnan útil pa otro hende. Ademas, nos por recomendá nos mes como minister di Dios dor di aceptá guia pa medio di su spiritu, desplegá “amor liber di hipocresia,” papia e berdad i dependé riba dje pa poder pa cumpli cu e ministerio. Ta interesante cu Pablo a duna prueba tambe di su posicion como minister “mediante e armanan di husticia na man drechi i na man robes.” Den gueranan di pasado, generalmente tabata manehá e spada cu man drechi, miéntras cu tabata tene e escudo cu man robes. Den su guera spiritual contra maestro falsu, Pablo no a usa arma dje carni pecaminoso: maña, triki, engaño. (2 Corintionan 6:6, 7; 11:12-14; Proverbionan 3:32) El a usa ‘arma,’ of medionan, hustu pa promové adoracion berdadero. Asina nos tambe mester haci.

18. Si nos ta minister di Dios, con nos lo comportá nos mes?

¹⁸ Si nos ta minister di Dios, nos lo comportá nos mescos cu Pablo i su co-trahadónan. Nos lo actua manera cristian, sea hende ta onra nos of ta falta respet pa nos. Mal informe tocante nos lo no stop nos trabou di predicá, ni nos lo no bira halsá si nos haña un informe faborabel. Nos lo papia e berdad i kisas gana reconocimentu pa obranan di debocion. Ora nos ta den peliger di morto debí na atake di enemigu, nos lo confia den Jehova. I nos lo aceptá disiplina cu gratitud.—2 Corintionan 6:8, 9.

19. Con ta posibel pa ‘haci hopi hende ricu’ den sentido spiritual?

¹⁹ Finalisando su consideracion tocante e ministerio di reconciliacion, Pablo a papia di su mes i su socionan “como tristu pero semper alegrando, como hende pober pero haciendo hopi hende ricu, como hende cu no tin nada nada i tog tin tur cos.” (2 Corintionan 6:10) Miéntras e ministernan ei tabatin motibu pa sinti nan tristu debí na nan afliccion, nan tabatin goso interno. Nan tabata pober den sentido material, pero nan a ‘haci hopi hende ricu’ den sentido spiritual. De echo, nan ‘tabatin tur cos’ pasobra nan fe a duna nan rikesa spiritual, asta e prospecto di bira yu celestial di Dios. I nan tabatin un bida ricu i felis como minister di Dios. (Echonan 20:35) Mescos cu nan, nos por ‘haci hopi hende ricu’ dor di participá den e ministerio di reconciliacion awor aki mes—den e dia aki di salbacion!

Confia den Salbacion di Parti di Jehova

20. (a) Kico tabata Pablo su deseo sincero, i pakico no tabatin tempu di perde? (b) Kico ta marca e dia di salbacion den cua nos ta bibando awor?

²⁰ Ora Pablo a skirbi su di dos carta n’e corintionan rond di 55 E.C., e sistema di cosnan hudiu tabatin 15 aña so mas pa bai. E apostel a deseá sinceramente p’e hudiu i gentilnan reconciliá cu Dios mediante Cristo. Tabata un dia di salbacion, i no tabatin tempu di perde. Wel, desde 1914 nos ta den un conclusion di sistema di cosnan similar. E trabou mundial di predicá e Reino cu ta tumando lugá awor ta marca esaki como e dia di salbacion.

21. (a) Ki texto di aña a scoge pa 1999? (b) Kico nos mester ta haciendo den e dia aki di salbacion?

²¹ Hende di tur nacion tin cu tende tocante Dios su percuracion pa salbacion mediante Jesucristo. No tin tempu di perde. Pablo a skirbi: “Mira! Awor ta e dia di salbacion.” E palabranan ei di 2 Corintionan 6:2 lo ta e texto di aña di Testigonan di Jehova pa 1999. E ta hopi apropiado, pasobra nos ta enfrentá algu muchu mas pió cu e destruccion di Jerusalem i su tempel! E fin di henter e sistema di cosnan aki ta djis tras di porta, i ta enbolbé tur hende riba tera. Awor—no mañan—ta tempu pa actua. Si nos ta kere cu salbacion ta pertenecé na Jehova, si nos ta stim’é, i si nos ta balorá bida eterno, nos lo no keda sin cumpli cu e propósito dje bondad inmerecí di Dios. Cu un deseo di curason pa onra Jehova, nos lo proba cu palabra i accion cu di berdad nos ta sincero ora nos sclama: “Mira! Awor ta e dia di salbacion.”

Con Lo Bo Contestá?

◻ Pakico reconciliacion cu Dios ta di importancia vital?

◻ Ken ta e embahadornan i e mensaheronan cu ta participá den e ministerio di reconciliacion?

◻ Con nos por recomendá nos mes como minister di Dios?

◻ Kico e texto di aña di Testigonan di Jehova pa 1999 ta nificá pa abo?

[Plachinan na página 17]

Abo ta predicá celosamente i ta yuda otro hende reconciliá cu Dios mescos cu Pablo a haci?

Merca

Francia

Côte d’Ivoire

[Plachi na página 18]

Den e dia aki di salbacion, abo ta entre e multitudnan cu ta reconciliá cu Jehova Dios?