Pastoreando E Tao Di Dios Cu Amor

“Pastorea e tao di Dios bao di boso cuido.”​—⁠1 PEDRO 5:⁠2.

DEN tur parti dje Scritura Santo, ta ser hací claro cu amor ta e calidad dominante di Dios. Segun 1 Juan 4:8: “Dios ta amor.” Siendo cu su amor ta ser expresá den accion, 1 Pedro 5:7 ta bisa cu Dios “ta interesá den boso.” Den e Bijbel e manera cu Jehova ta cuida su pueblo ta ser compará cu e manera cu un wardador amoroso ta atende tiernamente ne carnénan: “Mira! Señor Soberano Jehova mes . . . lo pastoreá su mes tao. Cu su braza lo e hunta e lamchinan; i lo e híbanan den su pecho. Lo e guia cu cuidao esnan criando na pecho.” (Isaías 40:​10, 11) Ki consolá David a keda pe por bisa: “Jehova ta mi Wardador. Lo mi no falta nada”!​—⁠Salmo 23:⁠1.

² Ta apropiado cu e Bijbel ta compara hende cu Dios ta favorece como carné, pasobra carné ta pacífico, sumiso, i obediente na nan wardador amoroso. Como un Wardador amoroso, Jehova ta interesá profundamente pa su pueblo semehante di carné. E ta manifesta esei percurando pa nan materialmente i spiritualmente i guiando nan através dje “último dianan” trabahoso dje mundo malbado aki den direccion di su binidero husto mundo nobo.​—⁠2 Timoteo 3:​1-5, 13; Mateo 6:​31-34; 10:​28-31; 2 Pedro 3:⁠13.

³ Ripara e cuido amoroso di Jehova pe carnénan: “E wowo di Jehova ta den direccion di hende husto, i su orea ta den direccion di nan grito pa yudanza. . . . Nan a sclama, i Jehova mes a tende, el a líbranan for di tur nan angustia. Jehova ta cerca esnan kibrá di curazón; i ta salba esnan cu ta aplastá den spiritu. Hopi ta e calamidadnan di hende husto, pero Jehova ta líbranan for di nan tur.” (Salmo 34:​15-19) Ki consuelo grandi e Wardador Universal ta percura pa su pueblo semehante di carné!

Ehempel dje Wardador Excelente

⁴ Jesús, e Yiu di Dios, a siña bon for di su Tata, pasobra e Bijbel ta yama Jesús “e wardador excelente.” (Juan 10:​11-16) Su sirbishi vital pe tao di Dios ta ser mencioná den Revelacion capítulo 7. Den versículo 9, sirbidor di Dios di nos dia ta ser yamá “un multitud grandi . . . di tur nacion i tribu i pueblo i lenga.” Anto versículo 17 ta bisa: “E Lamchi [Jesús] . . . lo pastoreánan, i lo guíanan te na fontein di awa di bida. I Dios lo seca tur lágrima di nan wowo.” Jesús ta guia carné di Dios te ne awa di berdad cu ta hiba na bida eterna. (Juan 17:⁠3) Ripara cu Jesús ta ser yamá “e Lamchi,” indicando calidad semehante di carné di e mes, siendo cu e ta ehempel principal di sumision na Dios.

⁵ Riba tera Jesús a biba cu e pueblo i a mira nan estado lastimoso. Con el a reacciona na nan situacion? “El a compadecénan, pasobra nan tabata soyá i plamá manera carné sin wardador.” (Mateo 9:36) Carné sin wardador ta sufri mashá for di bestia salbahe, mescos cu carné cu tin wardador sin amor. Pero, Jesús tabata mashá interesá, pasobra el a bisa: “Bini cerca mi, boso tur cu ta afaná i cargá, i lo mi refresca boso. Tuma mi yugo riba boso i siña di mi, pasobra mi ta di genio suave i humilde di curazón, i boso lo haya refrescamento pa boso alma. Pasobra mi yugo ta suave i mi carga ta lihé.”​—⁠Mateo 11:​28-30.

⁶ Profecía bíblico a profetiza cu Jesús lo trata amorosamente cu hende: “Jehova a ungími . . . pa verband hende kibrá di curazón, . . . pa consola tur hende den lamentacion.” (Isaías 61:​1, 2; Lucas 4:​17-21) Jesús nunca a menospreciá hende pober i desafortuná. Mas bien, el a cumpli cu Isaías 42:3: “Lo e no kibra ningun caña aplastá; i en cuanto mecha di linen swak, lo e no pagué.” (Compara cu Mateo 12:​17-21.) Hende afligí tabata manera caña aplastá, manera mecha di lampi cu tabata cerca di paga pa falta di azeta. Reconociendo nan estado lastimoso, Jesús a manifesta compasion i a dúnanan fortaleza i speranza, curando nan spiritualmente i físicamente.​—⁠Mateo 4:⁠23.

⁷ Hende semehante di carné a reacciona na Jesús na gran cantidad. Su siñanza tabata asina atractivo cu funcionario cu tabata mandá pa arresté a bisa: “Nunca otro hende a papia manera esei.” (Juan 7:46) Sí, lider religioso hipócrita a keha: “E mundo a bai tras di dje”! (Juan 12:19) Pero, Jesús no a deseá onor i gloria pa su mes. El a dirigi hende na su Tata. El a síñanan sirbi Jehova motivá pa amor pa Su calidadnan admirable: “Bo mester stima Jehova bo Dios cu tur bo curazón i cu tur bo alma i cu tur bo forza i cu tur bo mente.”​—⁠Lucas 10:​27, 28.

⁸ Jehova ta gusta pa su pueblo semehante di carné apoya su soberanía universal, fundá riba nan amor pe. Nan ta decidi boluntariamente pa sirbié pa causa di nan conocimento di su calidadnan amable. Ki diferente esei tá di lider di mundo kende nan pueblo ta obedece motivá pa miedu, of cu mala gana, of pa motibo cu nan tin un motibo secreto! Hende nunca por bisa di Jehova Dios of di Jesús loke nan a bisa di un papa dje Iglesia católico romano: “Hopi hende a admira [e papa], tur hende tabatin miedu di dje, pero ningun hende a stimé.”​—⁠Vicario di Cristo​—⁠aspecto desagradabel dje papado, (na inglés) di Peter de Rosa.

Wardador cruel di Israel

⁹ Distinto di Jesús, lider religioso di Israel den su dia no tabatin ningun amor pe carnénan. Nan tabata mescos cu gobernante anterior den Israel di locual Jehova a bisa: “Ai di wardador di Israel, cu a bira alimentador di nan mes! No ta e tao cu wardador mester alimenta? . . . Esnan enfermo boso no a fortalece, i esnan malu boso no a cura, i esun kibrá boso no a verband, i esnan plamá boso no a trece bek, i esnan perdí boso no a purba di haya, sino cu severidad boso a ténenan abao, asta cu tiranía.”​—⁠Ezekiel 34:​2-4.

¹⁰ Mescos cu tal wardador político, lider religioso hudío dje promé siglo tabatin curazón duro. (Lucas 11:​47-52) Pa ilustra esei, Jesús a conta di un hudío cu tabata hortá, golpeá, i lagá mitá morto cant’i camina. Un sacerdote israelita a pasa, pero ora el a mira e hudío, el a pasa na otro banda dje camina. Un levita a haci mescos. Anto un homber no israelita, un samaritano despreciá, a pasa i a compadece e víctima. El a verband su herida, a hibé riba un burrico na un posada, i a atende na dje. El a paga e doño dje posada i a bisa cu lo e bolbe pa paga cualkier otro gasto.​—⁠Lucas 10:​30-37.

¹¹ Lider religioso dje dia di Jesús tabata asina corrupto cu ora Jesús a resusita Lázaro for di morto, sacerdote principal i fariseo a reuni e Sanedrín i a bisa: “Kico nos por haci, pasobra e homber [Jesús] ta haci hopi siñal? Si nos lagué asina, nan tur lo pone fe den dje, i romano lo bini i kita tanto nos lugar como nos nacion.” (Juan 11:​47, 48) Nan no tabata interesá den e bon obra cu Jesús a haci pe homber morto. Nan tabata preocupá tocante nan puesto. Pues, “dje dia ei padilanti nan a consulta hunto pa mata [Jesús].”​—⁠Juan 11:⁠53.

¹² Pa aumenta nan maldad, sacerdote principal e ora ei “a consulta hunto pa mata Lázaro també, pasobra pa causa di dje hopi hudío tabata bai ei i a pone fe den Jesús.” (Juan 12:​10, 11) Nan esfuerzo egoísta pa proteha nan puesto tabata por nada, pasobra Jesús a bísanan: “Boso cas ta bandoná.” (Mateo 23:38) Na cumplimento dje palabra ei, den e mesun generacion, romano a bini i a kita ‘nan lugar i nan nacion,’ i també nan bida.

Wardador amoroso den e congregacion cristian

¹³ En bez di wardador cruel i egoísta, Jehova Dios a lanta e Wardador Excelente, Jesús, pa atende na Su tao. També, el a priminti di lanta subwardador amoroso pa cuida e carnénan: “Lo mi lanta riba nan wardador cu realmente lo pastoreánan; i nan lo no tene miedu mas.” (Jeremías 23:⁠4) Pues, mescos cu den congregacion cristian dje promé siglo, asina ta awe, “nombramento di anciano den stad tras stad” ta ser hací. (Tito 1:⁠5) Tal homber di mayor edad spiritualmente, cu ta cumpli cu requisito bíblico tin cu “pastoreá e tao di Dios.”​—⁠1 Pedro 5:2; 1 Timoteo 3:​1-7; Tito 1:​7-9.

¹⁴ Den nan cuidamento dje carnénan, anciano mester “sobre todo” tene “amor intenso” pa nan. (1 Pedro 4:⁠8) Pero disípel di Jesús, kedando demasiado ocupá tocante prestigio i puesto, tabatin cu siña esei. Pues, ora e mama di dos disípel a pidi Jesús: “Duna palabra pa esakinan mi dos yiu por sinta, un na bo man drechi i un na bo man robez, den bo reino,” e otro disípelnan a indigna. Jesús a bísanan: “Gobernante dje nacionan ta dominánan i hende grandi ta eherce autoridad riba nan. No ta asina den boso; ma ken cu kier bira grandi den boso mester ta boso sirbidor, i ken cu kier ser promé den boso mester ta boso esclabo.”​—⁠Mateo 20:​20-28.

¹⁵ Na un otro ocasion, despues cu e disípelnan “a discuti cu otro cua tabata mayor,” Jesús a bísanan: “Si uno kier bira promé, e mester bira e último di tur i sirbidor di tur.” (Marco 9:​34, 35) Humildad di mente i bon gana pa sirbi tabatin cu bira un parti di nan personalidad. Pero, e disípelnan a sigi tene dificultad cu tal idea, pasobra net anochi promé cu Jesús a muri, na su último cena, “un discusion intenso” a lanta entre nan riba e cuestion di cua tabata mayor! Esei a sosode apesar cu Jesús a mústranan con anciano tin cu sirbi e tao; Jesús a humiya su mes i a laba nan pia. El a bisa “Si ami, aunque mi ta Señor i Maestro, a laba boso pia, boso també tin deber di laba pia di otro. Pasobra mi a pone modelo pa boso, pa, net manera mi a haci cu boso, boso mester haci també.”​—⁠Lucas 22:24; Juan 13:​14, 15.

¹⁶ Testigo di Jehova semper a siña cu anciano tin cu ser mescos. Casi cien aña pasá, The Watch Tower di 1 di April di 1899, a tuma nota dje palabra di Pablo den 1 Corintio 13:​1-8, anto a bisa: “E apóstol a indica claramente cu conocimento i oratorio no ta e prueba di mas vital, sino cu amor yenando e curazón i extendiendo através di henter e moda di biba, i impulsando i conmoviendo nos curpa mortal, ta e berdadero prueba​—⁠e berdadero prueba di nos relacion divino. . . . E característica principal pa ser buscá den tur hende cu ta ser aceptá como un sirbidor dje iglesia, pa ministrá cosnan santo, mester tá sobre todo e spiritu di amor.” E revista a bisa cu homber cu no ta sirbi humildemente motivá pa amor “ta maestro insigur, i probablemente lo perhudica mas cu nan ta yuda.”​—⁠1 Corintio 8:⁠1.

¹⁷ P’sei, anciano no mag ‘domina’ e carnénan. (1 Pedro 5:⁠3) Mas bien, nan tin cu hiba delantera mustrando “bondad un na otro, tiernamente compasivo.” (Efesio 4:32) Pablo a enfatizá: “Bisti boso cu e tierno cariño di compasion, bondad, humildad di mente, suavidad, i gran pacenshi. . . . Pero, además di tur e cosnan ei, bisti boso cu amor, pasobra esei ta e enlace perfecto di union.”​—⁠Colosense 3:​12-14.

¹⁸ Pablo a siña haci esei, bisando: “Nos a bira amable den boso, manera ora mama cu yiu na pecho ta cariciá su mes yiunan. Pues, teniendo tierno cariño pa boso, cu mucho agrado nos a comparti cu boso, no solamente e bon nobo di Dios, sino també nos alma mes, pasobra boso a bira e stimánan di nos.” (1 Tesalonicense 2:​7, 8) Na armonía cu esei, el a bisa: “Papia palabra di consuelo cu alma deprimí, apoya esnan swak, tene gran pacenshi pa cu tur.” (1 Tesalonicense 5:14) Apesar dje clase di problema cu e carnénan por trece cerca anciano, nan mester corda Proverbio 21:13: “En cuanto cualkier hende cu ta tapa su oído pe sclamacion kehoso di hende humilde, e mes també lo sclama i lo no recibi respondi.”

¹⁹ Anciano cu ta pastorea e tao amorosamente ta un bendicion pe carnénan. Isaías 32:2 a profetiza: “Cada un mester resulta di ser un lugar di sconde for di bientu i un lugar di sconde for di tempestad di awa, manera rio di awa den un tera secu, manera sombra di barranca den un tera gastá.” Nos ta keda contentu pa sa cu hopi anciano di nos djawe ta anda di acuerdo cu tal detaye bonita di Isaías 32:2 di refrescamento. Nan a siña aplica e sigiente principio: “Den amor fraternal tene tierno cariño un pa otro. Hiba delantera mustrando onor un na otro.” (Romano 12:10) Ora anciano ta manifesta tal clase di amor i humildad, e carnénan ta reacciona dunando nan “mas cu extraordinario consideracion den amor pa causa di nan trabao.”​—⁠1 Tesalonicense 5:​12, 13.

Respeta e uso di boluntad liber

²⁰ Jehova Dios a crea hende cu un boluntad liber pa nan tuma nan mes decision. Aunque anciano ta duna conseho i asta disiplina, nan no mag domina e bida of fe di otro hende. Pablo a bisa: “No cu nos ta doño di boso fe, sino nos ta colaborador pa boso gozo, pasobra ta door di boso fe cu boso ta firme.” (2 Corintio 1:24) Sí, “cada un lo hiba su mes carga.” (Galatio 6:⁠5) Jehova a dúnanos hopi libertad den e límite di su ley i principionan. P’sei, anciano mester evita di pone regla ora cu no tin violacion di principio bíblico. I nan mester resisti cualkier inclinacion di ofrece opinion personal como dogma of laga nan mes arrogancia ser un obstáculo si un otro persona no ta di acuerdo cu nan punto di bista.​—⁠2 Corintio 3:17; 1 Pedro 2:⁠16.

²¹ Ripara con Pablo, mientras cu e tabata den prisón den Roma, a trata cu Filemón, un doño cristian di esclabo den Colosas den Asia Menor. Onésimo, esclabo di Filemón cu a hui na Roma, a bira cristian, i tabata yuda Pablo. Pablo a skirbi Filemón: “Mi kier retenele pa mi mes pa cu, den lugar di bo e por sigi sirbími den mi cadena di prisón cu mi ta wanta pa causa dje bon nobo. Pero sin bo consentimento mi no kier haci nada, pa bo bon acto no sea como bao di obligacion, sino cu bo mes boluntad liber.” (Filemón 13, 14) Pablo a debolbe Onésimo, pidiendo Filemón pa traté manera un ruman cristian. Pablo tabata sa cu e tao no tabata di dje; e tabata di Dios. Pablo no tabata su doño sino su sirbidor. Pablo no a dicta na Filemón; el a respeta su boluntad liber.

²² Mientras cu e organizacion di Dios ta crece, mas anciano ta ser nombrá. Tanto eseinan como anciano cu mas experencia, mester comprende cu nan puesto ta pa sirbishi humilde. Dje manera ei, mientras cu Dios ta hiba su organizacion mas cerca e mundo nobo, lo e sigi crece manera Dios kier​—⁠bon organizá pero sin sacrifica amor i compasion pa eficiencia. Asina, su organizacion lo bira cada bez mas atractivo pa hende semehante di carné cu lo mira den dje evidencia di cu “Dios ta haci tur su obranan coopera hunto pe bienestar di esnan cu ta stima Dios.” Esei ta di spera di un organizacion fundá riba amor, pasobra “amor no ta faya nunca.”​—⁠Romano 8:28; 1 Corintio 13:⁠8.

[Study Questions]

1, 2. Cua ta e calidad dominante di Jehova, i con e ta manifesta su mes?

3. Ki detaye e salmista a duna dje manera cu Jehova ta atende na su carnénan?

4. Cua papel Jesús ta hunga atendiendo ne tao di Dios?

5. Con Jesús a sintié tocante hende?

6. Cua consideracion Jesús a mustra pa hende abusá?

7. Unda Jesús a dirigi hende cu a sigié?

8. Di ki manera obedencia di hende na Dios ta diferente cu obedencia di hende na gobernante di mundo?

9, 10. Detayá lider di Israel di antigua i dje promé siglo.

11, 12. (a) Con e maldad di lider religioso a yega un culminacion den e dia di Jesús? (b) Kico romano a haci finalmente cu lider religioso?

13. Jehova a priminti di manda ken pa pastorea su tao?

14, 15. (a) E disípelnan a haya cu tabata difícil pa desaroya cua actitud? (b) Kico Jesús a haci pa mústranan cu anciano tin cu ser sirbidor humilde?

16. Cua comentario The Watch Tower a haci na 1899 tocante e calidad di mas importante di anciano?

17. Con e Bijbel ta enfatiza calidad cu anciano mester tin?

18. (a) Pablo a pone cua ehempel excelente tratando cu e carnénan? (b) Pakico anciano no mag ignora necesidad dje carnénan?

19. Pakico anciano amoroso ta un bendicion, i con e carnénan ta reacciona na tal amor?

20. Pakico anciano tin cu respeta boluntad liber?

21. Kico nos por siña for dje actitud di Pablo en cuanto Filemón?

22. (a) Anciano tin cu comprende cu nan ta ocupa cua puesto? (b) Jehova Dios ta desaroya cua clase di organizacion?

[Caption on page 16]

Jesús, e “wardador excelente,” a demonstra compasion

[Caption on page 17]

Lider religioso corrupto a conspira pa mata Jesús

[Caption on page 20]

Con bo ta contesta?

◻ Ki detaye e Bijbel ta duna dje manera cu Jehova ta atende na su pueblo?

◻ Cua papel Jesús ta hunga atendiendo ne tao di Dios?

◻ Anciano mester tin cua característica principal?

◻ Pakico anciano tin cu tuma na cuenta e boluntad liber dje carnénan?