Sigui Edifiká e Kongregashon
“Enkurashá otro i edifiká otro.”—1 TES. 5:11.
1. (a) Ki bendishonnan nos ta risibí komo miembro di e kongregashon kristian? (b) Menshoná algun problema ku nos por haña nos kuné.
KOMO miembro di e kongregashon kristian, nos ta disfrutá di hopi bendishon. Pa kuminsá, nos tin un bon relashon ku Yehova. I e echo ku nos ta sigui e guia di su Palabra ta protehá nos di e mal konsekuensianan di un estilo di bida ku Dios ta desaprobá. Ademas, nos tin berdadero amigunan ku ke nos bon. No tin duda, e bendishonnan ta hopi. Pero apesar di esei, mayoria di kristian ta lucha ku un òf otro problema. Algun kisas tin mester di yudansa pa komprondé e kosnan profundo di e Palabra di Dios. Otronan tin problema ku salú òf ta deprimí òf ta sufri e konsekuensianan di desishonnan robes ku nan a tuma. Ademas, nos tur tin ku biba den un mundu alehá for di Dios.
2. Kiko nos mester hasi ora nos rumannan tin problema, i dikon?
2 Niun di nos no gusta mira nos rumannan sufri. Sí, ta manera apòstel Pablo a bisa ora el a kompará e kongregashon ku un kurpa: “Si un miembro ta sufri, tur e miembronan ta sufri huntu kuné.” (1 Kor. 12:12, 26) Ora nos rumannan ta sufri, nos tin ku hasi esfuerso pa yuda nan. P’esei, ta bon pa nos konsiderá vários relato bíbliko ku ta mustra kon miembronan di kongregashon a yuda nan rumannan trata ku problema i vense esakinan. I segun ku nos ta konsiderá e relatonan ei, pensa kon abo lo por ofresé yudansa similar. Puntra bo mes: ‘Kon mi por yuda mi rumannan sigui sirbi Yehova i asina edifiká e kongregashon?’
“Nan A Hal’é un Banda”
3, 4. Den ki manera Akila i Prisila a yuda Apolos?
3 Ora Apolos a bai biba na (Erratum: nan) Efeso, e tabata un evangelisadó zeloso kaba. Manera e relato den e buki di Echonan ta bisa: “Siendo ferviente den spiritu, e tabata papia i siña eksaktamente e kosnan tokante di Hesus, ounke ku e tabata konosé solamente e boutismo di Juan.” Pero Apolos no tabata sa di e boutismo “den nòmber di e Tata i di e Yu i di e spiritu santu.” Kon bin? Probablemente ta e disipelnan di Juan Boutista a dun’é testimonio òf e disipelnan di Hesus promé ku Pentekòste di aña 33 di nos era. Pues, ounke Apolos tabata un predikadó zeloso, tabatin algun kos importante ku e no tabata komprondé. Pero kon su amistat ku kompañeronan den fe a benefisi’é?—Echo. 1:4, 5; 18:25; Mat. 28:19.
4 Wèl, despues ku e pareha kristian, Akila i Prisila, a tende Apolos papia ku kurashi den e snoa, nan a hal’é un banda, òf manera e idioma original ta bisa, nan a bai nan kas kuné i a dun’é mas splikashon. (Lesa Echonan 18:24-26.) Esei tabata un akto di amor. I ta klaru ku Akila i Prisila lo a aserká Apolos ku takto i na un manera bondadoso pa e no kere ku ta kritiká nan ta kritik’é. Su úniko problema tabata ku e no tabata sa kon e kongregashon kristian a kuminsá. I sin duda, Apolos lo a keda masha gradisidu ku su kompañeronan nobo a kompartí e detayenan importante akí kuné. Despues ku Apolos a haña e komprondementu ei, e “tabata di gran ayudo” pa su rumannan na Akaya i a duna un testimonio poderoso.—Echo. 18:27, 28.
5. Ki yudansa amoroso míles di publikadó di Reino ta duna, i ku ki resultado?
5 Awendia, hopi kristian ta masha gradisidu na e personanan ku a yuda nan komprondé loke Beibel ta siña. P’esei, vários studiante i maestro a bira bon amigu di otro. Den mayoria di kaso, e maestronan mester a programá seshonnan di estudio regular durante vários luna pa yuda e studiantenan komprondé e bèrdat. Sinembargo, nan ta dispuesto pa hasi e sakrifisionan ei pasobra nan ta rekonosé ku bida di hende ta enbolbí. (Juan 17:3) I ta un goso pa mira hende komprondé e bèrdat, bib’é i usa nan bida pa sirbi Yehova.
Nan “Tabata Duna Bon Testimonio di Dje.”
6, 7. (a) Dikon Pablo a skohe Timoteo komo su kompañero di biahe? (b) Kon esaki a yuda Timoteo progresá?
6 Durante apòstel Pablo su segundo biahe di misionero, e ku Silas a bishitá Listra. Einan, nan a topa un yònkuman ku yama Timoteo, kende tabatin mas o ménos 20 aña. “E rumannan ku tabata na Listra i Ikonio tabata duna bon testimonio di dje.” Timoteo su mama, Eunise, i su wela Loida tabata kristiannan dediká, pero su tata sí no. (2 Tim. 1:5) Kisas Pablo a konosé e famia akí algun aña promé, durante su promé bishita den e área akí. Pero awor, e apòstel a mustra interes spesial den Timoteo pasobra e tabata parse un hóben eksepshonal. P’esei, ku aprobashon di e kuerpo di ansiano lokal, Timoteo a kuminsá kompañá Pablo den su trabou di misionero.—Lesa Echonan 16:1-3.
7 Timoteo tabatin hopi kos di siña for di su kompañero mas grandi kuné. I el a siña asina bon ku, despues, Pablo tabatin e konfiansa di mand’é bai represent’é den e kongregashonnan. Durante e periodo di mas o ménos 15 aña ku Timoteo a disfrutá di Pablo su asosiashon, el a progresá bon. E yònkuman sin eksperensia i kisas tímido a bira un ekselente superintendente.—Fil. 2:19-22; 1 Tim. 1:3.
8, 9. Kiko miembronan di kongregashon por hasi pa animá hóbennan? Duna un ehèmpel.
8 Hopi hóben den kongregashon awe, tantu hòmber komo muhé, tin bon abilidat. Si nan haña animashon i apoyo di nan kompañeronan ku ta fuerte spiritualmente, e hóbennan akí por hasi esfuerso pa haña mas responsabilidat den e pueblo di Yehova. Tira un bista den bo kongregashon! Bo ta mira algun hóben ku por pone nan mes disponibel meskos ku Timoteo a hasi? Ku bo yudansa i animashon, kisas nan por bira pionero, bètelita, misionero òf superintendente biahero. Awor kiko bo por hasi pa yuda nan pone e metanan ei i hasi esfuerso pa alkansá nan?
9 Martin, kende ta sirbi na Bètel pa 20 aña kaba, ta masha gradisidu na un superintendente di sirkuito ku 30 aña pasá a mustra interes den dje ora nan tabata den sirbishi di vèlt. E superintendente a papia ku entusiasmo tokante su sirbishi na Bètel, kaminda el a traha ora e tabata hóben. El a animá Martin pa pensa riba e posibilidat di pone su mes disponibel pa sirbi den e organisashon di Yehova den e mesun manera. Martin ta kere ku e kòmbersashon inolvidabel ei tabatin un bon efekto riba dje, ya ku esei a yud’é mashá ora di tuma desishon despues. Ken sa, kisas abo tambe por tin un bon influensia riba hóbennan ku bo papia kuné tokante metanan relashoná ku nan sirbishi na Yehova.
“Enkurashá Esnan Ku Ta Falta Ánimo”
10. Kon Epafrodito a sintié, i dikon?
10 Epafrodito a hasi un biahe largu i agotante for di Filipos te na Roma pa bishitá apòstel Pablo, kende tabata den prizòn pa motibu di su fe. Epafrodito a sirbi komo un representante di e kristiannan na Filipos. El a bai hiba e regalo ku nan a dun’é pa Pablo i a plania tambe pa keda einan pa yuda Pablo den su situashon difísil. Sinembargo, ora Epafrodito tabata na Roma, el a bira “malu pa muri.” I debí na esei, el a sinti ku el a frakasá i a bira deprimí.—Fil. 2:25-27.
11. (a) Dikon nos no mester keda sorprendí si algun di nos rumannan ta deprimí? (b) Kiko Pablo a rekomendá den kaso di Epafrodito?
11 Awendia tin vários motibu pakiko hende ta sufri di depreshon. Segun estadístika di Organisashon Mundial di Salú, 1 di kada 5 hende por haña nan ku depreshon na sierto momento den bida. I Testigunan di Yehova no ta un eksepshon. Kosnan ku por desanimá hende ta, entre otro, problema pa perkurá materialmente pa famia, malesa i erornan ku nan a kometé. Kiko e filipensenan por a hasi pa animá, òf enkurashá, Epafrodito? Pablo a skirbi: ‘Risibié den Señor ku tur goso i trata hòmbernan asina ku gran apresio, pasobra el a hera di muri pa e por a sirbi mi.’—Fil. 2:29, 30.
12. Kon nos por animá rumannan deprimí?
12 Nos tambe mester enkurashá nos rumannan ku ta desanimá òf deprimí. Sin duda, tin kosnan positivo tokante nan sirbishi na Yehova ku nos por menshoná. Podisé nan a hasi kambionan grandi den nan bida pa por a bira kristian òf pa sirbi den sirbishi di tempu kompletu. Nos por laga nan komprondé ku nos ta balorá nan esfuersonan i sigurá nan ku Yehova tambe ta hasi esei. Asta si edat avansá òf malesa ta stroba algun kristian fiel di hasi loke nan tabata hasi ántes, nan meresé nos rèspèt pa nan añanan di sirbishi. Sea kual sea e kousa di e situashon, Yehova ta konsehá tur su sirbidónan fiel: “Enkurashá esnan ku ta falta ánimo, yuda e débilnan, tene pasenshi ku tur hende.”—1 Tes. 5:14.
“Pordon’é i Konsol’é”
13, 14. (a) Ki medida serio e kongregashon di Korinto a tuma, i pakiko? (b) Kiko tabata resultado di e ekspulshon?
13 Den e kongregashon di Korinto di promé siglo tabatin un hòmber ku tabata kometé fornikashon i ku no a demostrá repentimentu. Su kondukta tabata un menasa pa e puresa di e kongregashon i a shòk asta e personanan ku no tabata kristian. P’esei, korektamente Pablo a duna instrukshon pa ekspuls’é for di e kongregashon.—1 Kor. 5:1, 7, 11-13.
14 E disiplina ei a duna bon resultado. El a protehá e kongregashon di un influensia dañino, i e pekadó a rekonosé su fayo i a repentí sinseramente. Debí ku e hòmber su obranan a demostrá ku el a repentí, Pablo, den su di dos karta na e kongregashon ei, a instruí e ansianonan pa restor’é. Sinembargo, esei so no tabata sufisiente. Kiko mas nan mester a hasi? Pablo a instruí e kongregashon pa ‘pordoná i konsolá e hòmber pa, di un òf otro manera, un hende asina no keda desesperá dor di demasiado tristesa.’—Lesa 2 Korintionan 2:5-8.
15. Kon nos mester mira pekadónan ku a repentí i a ser restorá den kongregashon?
15 Kiko nos ta siña for di e relato akí? Nos ta bira tristu ora un persona ser ekspulsá. Podisé el a trese reproche riba e nòmber di Dios i e kongregashon. Kisas el a asta perhudiká nos personalmente. Sinembargo, ora e ansianonan enkargá ku e kaso a determiná—a base di Yehova su prinsipionan—ku un pekadó ku a repentí mester ser aseptá atrobe den kongregashon, esei ta indiká ku Yehova a pordon’é. (Mat. 18:17-20) Siendo ku Yehova mes a pordon’é, nos tambe no tin ku hasi esei? Si nos keda sin pordon’é, en realidat, nos ta bai kontra di Yehova. Pues, si nos ke kontribuí na pas i union den e kongregashon di Dios, nos tin ku ‘konfirmá nos amor’ pa pekadónan ku a repentí di bèrdat i a ser restorá.—Mat. 6:14, 15; Luk. 15:7.
“E Ta Útil pa Mi”
16. Dikon Marko a desepshoná Pablo?
16 Un otro relato bíbliko ta mustra ku nos no mester karga renkor kontra esnan ku a desapuntá nos. E ta konta di Juan Marko, kende a desepshoná apòstel Pablo masha tantu mes. Kon bin? Wèl, ora Pablo a kuminsá su promé biahe di misionero huntu ku Barnabas, Marko a bai ku nan. Pero na dado momento, pa un motibu ku Beibel no ta menshoná, Juan Marko a bandoná nan i a bai kas bèk. Esaki a desepshoná Pablo asina tantu ku ora e tabata plania su di dos biahe, e ku Barnabas tabatin un desakuerdo tokante Marko. Dikon? En bista di loke a pasa durante e promé biahe, Pablo no tabata ke pa Marko biaha huntu ku nan, miéntras ku Barnabas sí tabata ke esei.—Lesa Echonan 13:1-5 i 13; 15:37 i 38.
17, 18. Kon bin Pablo i Marko por a resolvé e problema ku tabatin entre nan, i kiko nos por siña for di esaki?
17 Pero evidentemente, Marko no a laga Pablo su rechaso desanim’é asina tantu ku e no a sigui progresá. Mas bien, el a sigui den su trabou di misionero den un otro teritorio huntu ku Barnabas. (Echo. 15:39) I loke Pablo a skirbi tokante dje algun aña despues a mustra ku el a demostrá di ta un persona fiel i konfiabel. Ora Pablo tabata den prizòn na Roma, el a skirbi Timoteo un karta den kua el a pidié pa bini serka dje. Den e mesun karta ei, Pablo a bisa: “Buska Marko i tres’é huntu ku bo, pasobra e ta útil pa mi pa e sirbishi.” (2 Tim. 4:11) Manera nos por mira, Pablo a rekonosé ku Marko a hasi progreso.
18 Ki lès nos por siña for di e relato akí? Marko no a laga Pablo su rechaso pon’é trompeká. Mas bien, el a kultivá e kualidatnan di un bon misionero. I debí ku tantu Marko komo Pablo tabatin un bon relashon ku Yehova, nan no a keda hopi tempu rabiá ku otro. Al kontrario, despues Pablo a rekonosé ku Marko ta un bon ayudante. Pues, ora ruman hòmbernan resolvé nan problemanan, e mihó kos pa hasi ta di sigui padilanti, yudando otronan progresá den e bèrdat. Sí, ora nos ta rekonosé bon kualidatnan di otro, nos ta edifiká e kongregashon.
E Kongregashon i Abo
19. Kon tur miembro di e kongregashon kristian por yuda otro?
19 Den e “tempunan trabahoso” akí, bo tin mester di yudansa di bo rumannan den kongregashon, i nan tin mester di esun di bo. (2 Tim. 3:1) Ounke no ta tur biaha un kristian sa kon pa trata ku un situashon difísil òf resolvé un problema, Yehova sí sa. P’esei, e por usa diferente miembro di e kongregashon—inkluso abo—pa yuda otronan keda riba e kaminda korekto. (Isa. 30:20, 21; 32:1, 2) Pues, laga nos tur hasi kaso di e konseho di apòstel Pablo! Sí, laga nos sigui ‘enkurashá otro i edifiká otro, manera nos ta hasiendo.’—1 Tes. 5:11.
Kon Lo Bo Kontestá?
• Dikon tur miembro di e kongregashon kristian mester edifiká otro?
• Ki problemanan bo por yuda un ruman trata kuné?
• Dikon nos mester di yudansa di otronan den nos kongregashon?
[Plachi na página 15]
Nos por yuda un ruman ku ta den un situashon difísil
[Plachi na página 16]
Hopi hóben, hòmber i muhé, den e kongregashon kristian tin bon abilidat