Odiá pa Motibu di Nan Fe

“Boso lo ta obheto di odio di parti di tur hende pa causa di mi nomber.”—MATEO 10:22.

 1, 2. Bo por conta algun experencia di bida real cu Testigonan di Jehova a pasa aden dor cu nan a practicá nan religion?

NAN ta arestá e doño onesto di un pacus riba isla di Creta na masha hopi ocasion i ta hib’é dilanti corte griego bes tras bes. Na tur, e ta pasa mas cu seis aña den prizon, leu for di su esposa i cincu yunan. Na Hapon nan ta kita un studiante di 17 aña for di scol, aunke e tin un bon conducta i ta entre e mihónan di su klas di 42 studiante. Na Francia nan ta kita un cantidad di hende gewoon asina for di trabou, maske nan tin un bon reputacion como trahadó diligente i conciencial. Kico e experencianan di bida real aki tin en comun?

² Tur e personanan enbolbí ta Testigo di Jehova. Ki “crímen” nan a cometé? Simplemente, nan a practicá nan religion. Pa obedecé e siñansanan di Jesucristo, e doño di pacus tabata compartí su fe cu otro hende. (Mateo 28:19, 20) Nan a conden’é principalmente a base di un ley griego anticuá cu ta yama proselitismo un crímen. A kita e studiante for di scol pa motibu cu su concenshi bíblicamente entrená lo no a permitié participá den ehercicionan obligatorio di kendo (e arte hapones di manehá spada). (Isaías 2:4) I na Francia a informá esnan kitá for di trabou cu e único motibu di nan retiro ta cu nan a identificá nan mes como Testigo di Jehova.

 3. Pakico ta masha poco Testigo di Jehova ta sufri pisá na man di otro hende?

³ Experencianan cruel asina ta típico di loke Testigonan di Jehova den algun pais a pasa aden recientemente. Pero, ta masha poco Testigo di Jehova ta sufri pisá na man di otro hende. Jehova su pueblo ta conocí rond mundu pa nan conducta excelente, un reputacion cu no ta duna ningun motibu válido pa niun hende deseá di haci nan daño. (1 Pedro 2:11, 12) Nan no ta trama complot ni comportá nan mes malu. (1 Pedro 4:15) Al contrario, nan ta purba biba na armonia cu e conseho di Bijbel pa ta sumiso promé na Dios, i despues na gobiernu seglar. Nan ta paga e impuestonan cu ley ta exigí i ta trata pa ta “pacífico cu tur hende.” (Romanonan 12:18; 13:6, 7; 1 Pedro 2:13-17) Den nan trabou di siña hende Bijbel, nan ta fomentá respet pa ley, pa balornan di famia i pa moralidad. Hopi gobiernu a encomendá nan como ciudadano cu ta cumpli cu ley. (Romanonan 13:3) Tog, manera e promé paragraf ta indicá, tin biaha nan tabata blanco di oposicion, i den algun pais, gobiernu a asta imponé prohibicion riba nan. Esei mester sorprendé nos?

E “Gastunan” di Ta un Disipel

 4. Segun Jesus, kico un hende por spera ora e bira un disipel di dje?

⁴ Jesucristo no a laga duda tocante kico lo a encerá ser su disipel. El a bisa su siguidónan: “Un esclabo no ta mayor cu su doño. Si nan a persiguí mi, nan lo persiguí boso tambe.” Hende a odia Jesus “sin motibu.” (Juan 15:18-20, 25; Salmo 69:4; Lucas 23:22) Su disipelnan por spera mescos: oposicion inhustificá. Na mas cu un ocasion, el a spierta nan: “Boso lo ta obheto di odio.”—Mateo 10:22; 24:9.

 5, 6. (a) Pa ki motibu Jesus a urgi prospectivo siguidónan pa “calcula e gastunan”? (b) Pakico anto, nos no mester keda strañá ora nos haña oposicion?

⁵ P’esei, Jesus a urgi prospectivo siguidónan pa “calcula e gastunan” di ser disipel. (Lucas 14:28, E Testament Nobo) Pakico? No pa nan dicidí si nan kier bira su siguidó of no, sino pa nan ta dicididu pa cumpli cu loke esei ta enbolbé. Nos mester ta prepará pa wanta cualkier prueba of dificultad cu ta bini huntu cu e privilegio. (Lucas 14:27) Ningun hende ta forsa nos sirbi Jehova como siguidó di Cristo. Esei ta un decision boluntario; e ta tambe un decision basá riba conocimentu. Nos sa delantá cu ademas dje bendicionnan cu nos lo ricibí dor di drenta den un relacion dedicá cu Dios, nos lo ta “obheto di odio.” Di manera cu nos no ta keda strañá ora nos haña oposicion. Nos a “calcula e gastunan,” i nos ta completamente prepará pa paga nan.—1 Pedro 4:12-14.

⁶ Pakico algun persona, incluso cierto autoridad gubernamental, lo kier oponé cristiannan berdadero? Pa haña e contesta, ta bon pa examiná dos grupo religioso den e promé siglo E.C. Hende a odia tur dos, pero pa motibunan masha distinto.

Odioso i Odiá

 7, 8. Ki siñansanan a reflehá desprecio pa hende gentil, i ki actitud a desaroyá den hudiunan como resultado?

⁷ Den promé siglo E.C., Israel tabata bou di mando romano, i por lo general hudaismo, e sistema religioso hudiu, tabata den e gara opresivo di lidernan manera fariseo i escriba. (Mateo 23:2-4) E lidernan fanático aki a tuma e preceptonan dje Ley di Moises relacioná cu separacion for dje nacionnan i a troce nan pa pone hende despreciá no-hudiu. Haciendo esei, nan a producí un religion cu a engendrá odio contra hende gentil i, en buelta, a lanta odio di parti dje gentilnan.

⁸ No tabata difícil p’e lidernan hudiu fomentá desprecio pa hende gentil, ya cu n’e tempu ei hudiu tabata considerá gentil como criaturanan repugnante. E lidernan religioso a siña cu hamas un muher hudiu mag di ta so cu gentil, pasobra tin “sospecho cu nan ta indecente.” Un homber hudiu no tabatin mag di “keda so cu gentil siendo cu tabatin sospecho cu nan ta drama sanger.” No por a usa lechi cu gentil a hala, a ménos cu un hudiu tabata presente pa vigilá e proceso. Dor dje influencia di nan lidernan, e hudiunan a desaroyá un actitud di keda leu i estrictamente apartá for di gentil.—Compará cu Juan 4:9.

 9. Kico tabata e efecto dje siñansa di lidernan hudiu pa cu hende no-hudiu?

⁹ E siñansanan ei relacioná cu no-hudiu no a yuda promové bon relacion entre hudiu i gentil. E gentilnan a bin considerá hudiu como hende cu ta odia henter humanidad. Historiadó romano Tácito (cu a nace rond di 56 E.C.) a bisa di hudiu cu “nan tabatin odio profundo contra e resto di humanidad.” Tambe Tácito a declará cu a siña e gentilnan cu a bira prosélito hudiu pa nenga nan pais i pa considerá nan famia i amigunan como hende sin balor. Por lo general, e romanonan a tolerá e hudiunan; pa nan e hudiunan tabata un pueblo formidabel dor cu nan tabata bastante na cantidad. Pero un rebelion hudiu na 66 E.C. a provocá e romanonan pa tuma represaya cruel, loke a hiba n’e destruccion di Jerusalem na 70 E.C.

10, 11. (a) Ki trato e Ley di Moises a manda e israelitanan duna stranhero? (b) Ki les nos ta siña for di loke a sosodé cu hudaismo?

¹⁰ Con e punto di bista ei di stranhero ta na comparacion cu e forma di adoracion describí den e Ley di Moises? Ta berdad cu e Ley a promové separacion for dje nacionnan, pero esaki tabata pa protehá e israelitanan, particularmente nan adoracion puru. (Hosué 23:6-8) Pero tog e Ley a rekerí pa trata stranhero cu husticia i imparcialidad i pa ricibí nan hospitalariamente, tanten cu nan no a desobedecé e leynan di Israel abiertamente. (Levítico 24:22) Dor di bandoná e spiritu razonabel claramente bisto den e Ley pa cu stranhero, e lidernan religioso hudiu den tempu di Jesus a producí un forma di adoracion cu a fomentá odio di tur dos banda. Al final, e nacion hudiu di promé siglo a perde e fabor di Jehova.—Mateo 23:38.

¹¹ Tin un les den esaki pa nos? Sigur cu sí. Un actitud superior i hustu den bo mes bista i di ta despreciá esnan cu no ta compartí nos creencianan religioso no ta representá e adoracion puru di Jehova corectamente, ni no ta agrad’é. Tuma, por ehempel, e cristiannan fiel den e promé siglo. Nan no a odia hende no-cristian, ni no a rebelá contra Roma. Tog, nan tabata “obheto di odio.” Pakico? I di parti di ken?

E Promé Cristiannan—Ken A Odia Nan?

12. Den ki manera e Scritura ta mustra claramente cu Jesus kier pa su siguidónan tin un punto di bista balansá di hende no-cristian?

¹² Jesus su siñansanan a mustra claramente cu e tabata kier pa su disipelnan tin un punto di bista balansá di hende no-cristian. Di otro banda, el a bisa cu su siguidónan lo ta separá for di mundu, esta, cu nan lo rechasá actitud i conducta cu tabata na conflicto cu Jehova su camindanan hustu. Nan lo permanecé neutral den asuntunan di guera i política. (Juan 17:14, 16) Di otro banda, en bes di boga pa mustra desprecio pa hende no-cristian, Jesus a bisa su siguidónan pa ‘stima nan enemigunan.’ (Mateo 5:44) Apostel Pablo a urgi cristiannan: “Si bo enemigu tin hamber, dun’é cuminda; si e tin sed, dun’é algu di bebe.” (Romanonan 12:20) Tambe el a bisa cristiannan pa “obra loke ta bon pa cu tur.”—Galationan 6:10.

13. Pakico e lidernan religioso hudiu tabata asina contra dje disipelnan di Cristo?

¹³ Pero, pronto e disipelnan di Cristo a bira “obheto di odio” di parti di tres fuente. Promé tabata e lidernan religioso hudiu. Nada straño cu e cristiannan a capta nan atencion masha lihé! E cristiannan tabatin principionan haltu di moralidad i integridad, i cu celo ardiente nan a proclamá un mensahe cu a inspirá confiansa. Miles di hende a bandoná hudaismo i a aceptá cristianismo. (Echonan 2:41; 4:4; 6:7) P’e lidernan religioso hudiu, Jesus su disipelnan hudiu no tabata nada mas cu apóstata! (Compará cu Echonan 13:45.) E lidernan hostiná aki a haña cu cristianismo a invalidá nan tradicionnan. Imaginá bo, cristianismo a asta descartá nan punto di bista di hende gentil! For di 36 E.C. padilanti, hende gentil por a bira cristian, i compartí e mésun fe i disfrutá dje mésun privilegionan cu cristian hudiu.—Echonan 10:34, 35.

14, 15. (a) Pakico adoradónan pagano a odia cristiannan? Duna un ehempel. (b) E promé cristiannan a bira “obheto di odio” di parti di cua di tres grupo?

¹⁴ Di dos, adoradónan pagano a odia e cristiannan. Por ehempel, den antiguo Efeso, trahamentu di relikia di plata dje diosa Artémis tabata un negoshi lucrativo. Pero ora Pablo a predicá ei, un cantidad basta grandi di efesio a respondé i a bandoná e adoracion di Artémis. Ora e platénan a mira cu nan negoshi tabata den peliger, nan a causa un disturbio. (Echonan 19:24-41) Algu similar a sosodé despues cu cristianismo a plama drenta Bitinia (awor nortwest di Turkia). No hopi tempu despues cu a completá e Scritura Griego Cristian, e gobernadó di Bitinia, Plinio e Menor, a informá cu tempelnan pagano a keda bandoná i cu benta di alimento pa animalnan di sacrificio a cai drásticamente. A culpa i a persiguí cristiannan ya cu nan adoracion no a permití sacrificio di animal ni ídolo. (Hebreonan 10:1-9; 1 Juan 5:21) Claramente, e plamamentu di cristianismo a afectá cierto interesnan financiero conectá cu adoracion pagano, i esei a disgustá esnan cu a perde tantu nan negoshi como nan placa.

¹⁵ Di tres, cristiannan a bira “obheto di odio” di parti dje romanonan nacionalista. Na promé instante, e romanonan tabata conocé cristiannan como un grupo religioso chikitu i tal bes fanático. Pero, cu tempu, djis profesá di ta un cristian a bira un delitu castigabel cu morto. Pakico hende a mira net ciudadanonan onesto cu ta hiba un bida cristian como e víctimanan indicá pa persecucion i morto?

E Promé Cristiannan—Pakico Odiá den e Mundu Romano?

16. Den ki maneranan cristiannan a keda separá for di mundu, i pakico esaki a haci nan impopular den e mundu romano?

¹⁶ E mundu romano a odia cristiannan principalmente pa motibu cu nan a practicá nan religion. Por ehempel, nan a keda separá for di mundu. (Juan 15:19) Pues, nan no a ocupá funcionnan político, i nan a nenga servicio militar. Como resultado, “a describí nan como hende sin ningun interes den e mundu aki, i inútil pa tur asuntu di bida,” segun historiadó Augusto Neander. No ser parti di mundu a nificá tambe evitá e camindanan malbado dje mundu corumpí di Roma. “Cu nan debocion i decencia, e comunidadnan cristian chikitu tabata molestiá concenshi dje mundu pagano loco pa placer,” historiadó Will Durant ta splica. (1 Pedro 4:3, 4) Dor di persiguí i ehecutá cristiannan, e romanonan lo a trata na silenciá e bos molestoso di concenshi.

17. Kico ta mustra cu e trabou di predicá dje cristiannan di promé siglo tabata eficas?

¹⁷ Cristiannan di promé siglo a predicá e bon nobo dje Reino di Dios cu un celo sin vacilacion. (Mateo 24:14) Pa rond di 60 E.C., Pablo por a bisa cu e bon nobo a ser “predicá den tur creacion cu ta bou di shelu.” (Colosensenan 1:23) Pa fin dje promé siglo, Jesus su siguidónan a haci disipel rond e Imperio Romano: na Asia, Europa i Africa! Asta algun miembro di “e famia di cas di César” a bira cristian.a (Filipensenan 4:22) E predicacion celoso aki a lanta rencor. Neander ta bisa: “Cristianismo a haci progreso constante entre hende di tur rango, i a menasá di caba cu e religion di estado.”

18. Con debocion exclusivo na Jehova a pone e gobiernu romano haña rabia riba e cristiannan?

¹⁸ Jesus su siguidónan a rindi debocion exclusivo na Jehova. (Mateo 4:8-10) Kisas e aspecto aki di nan adoracion ta esun cu mas a pone e romanonan haña rabia riba nan. E romanonan a tolerá otro religion, tanten cu nan apoyadónan a participá tambe den adoracion dje emperador. E promé cristiannan simplemente no por a participá den e adoracion ei. Nan a haña cu nan tabatin cu duna cuenta na un autoridad mas haltu cu esun dje Estado Romano, esta, Jehova Dios. (Echonan 5:29) Como resultado, sin importá con bon ciudadano un cristian tabata den tur otro sentido, nan a consider’é un enemigu di Estado.

19, 20. (a) Ken tabata principalmente responsabel p’e calumnia malicioso cu a plama tocante cristiannan fiel? (b) Ki acusacion falsu a lanta contra cristiannan?

¹⁹ Tabatin un motibu mas pakico cristiannan fiel a bira “obheto di odio” den e mundu romano: Hende tabata cla pa kere calumnia malicioso tocante nan, i e lidernan religioso hudiu tabata esnan principalmente responsabel p’e acusacionnan cu a plama. (Echonan 17:5-8) Rond di 60 of 61 E.C., tempu Pablo tabata na Roma sperando huicio di Emperador Nero, lidernan hudiu a bisa di cristiannan: “Berdaderamente, pa loke ta e secta aki, ta conocí pa nos cu tur caminda hende ta papia contra dje.” (Echonan 28:22) Sin duda Nero a tende storianan difamatorio tocante nan. Na 64 E.C., ora a culpa Nero p’e candela cu a causa desaster na Roma, segun informe el a tira e culpa riba e cristiannan mal mirá caba. Esaki aparentemente a acelerá un ola di persecucion violento dirigí pa exterminá e cristiannan.

²⁰ Hopi bes e acusacionnan falsu contra cristiannan tabata un mescla di puru falsedad i un trocementu di nan creencianan. Dor cu nan tabata monoteista i no a adorá e emperador, hende a catalogá nan como ateista. Siendo cu algun miembro di famia no-cristian a oponé nan parientenan cristian, hende a acusá cristiannan di ta kibra famia. (Mateo 10:21) A clasificá hende cristian como canibal, un acusacion cu, manera algun fuente ta bisa, tabata basá riba un deformacion di Jesus su palabranan expresá n’e Cena di Señor.—Mateo 26:26-28.

21. Pa ki dos motibu hende cristian tabata “obheto di odio”?

²¹ P’esei, cristiannan fiel tabata “obheto di odio” di parti dje romanonan pa dos motibu básico: (1) nan creencia i prácticanan basá riba Bijbel, i (2) e acusacionnan falsu contra nan. Sea cual sea e motibu, e opositornan tabatin un solo obhetivo: caba cu cristianismo. Claro cu e berdadero instigadónan dje persecucion di cristiannan tabata opositornan sobrehumano, mal forsanan spiritual invisibel.—Efesionan 6:12.

22. (a) Ki ehempel ta mustra cu Testigonan di Jehova ta haci esfuerso pa “obra loke ta bon pa cu tur”? (Mira cuadro na página 11.) (b) Kico nos lo considerá den e siguiente artículo?

²² Mescos cu e promé cristiannan, Testigonan di Jehova den nos tempu ta “obheto di odio” den vários pais. Tog nan no ta odia hende cu no ta Testigo; ni hamas nan tabata un fuente di lantamentu contra gobiernu. Al contrario, nan ta conocí rond mundu pa nan amor genuino cu ta surpasá tur barera social, racial i étnico. Pakico anto, nan ta ser persiguí? I con nan ta reaccioná na oposicion? Nos lo considerá e preguntanan aki den e siguiente artículo.

[Nota]

Con Lo Bo Contestá?

◻ Pakico Jesus a urgi prospectivo siguidónan pa calculá e gastunan di ser su disipel?

◻ Con e manera di mira hende no-hudiu a afectá hudaismo, i kico nos ta siña for di esaki?

◻ For di ki tres fuente cristiannan fiel di promé siglo a enfrentá oposicion?

◻ Pa ki motibunan básico e promé cristiannan tabata “obheto di odio” di parti dje romanonan?

[Kuadro na página 11]

“Obra Loke Ta Bon pa cu Tur”

Testigo di Jehova ta haci esfuerso pa haci caso dje spiertamentu pa “obra loke ta bon pa cu tur.” (Galationan 6:10) Den tempu di necesidad, amor pa próhimo ta motivá nan pa yuda esnan cu no ta compartí nan punto di bista religioso. Por ehempel, durante e situacion calamitoso na Ruanda na 1994, Testigonan for di Europa a ofrecé nan mes boluntariamente pa bai Africa pa yuda den programanan di auxilio. Rápidamente nan a lanta campamentu i hospitalnan di emergencia bon organisá pa duna yudansa. Nan a trece cu avion gran cantidad di alimento, paña i klechi. E cantidad di refugiado cu a beneficiá for dje programanan di auxilio aki tabata mas cu tres bes e cantidad di Testigo den e área.

[Plachi na página 9]

E cristiannan di promé siglo a predicá e bon nobo cu celo ardiente