E Nomber Cu Ta Hiba na Berdadero Fe

“BOSO no ta kere den Jesus ni den su sanger redentor,” un señora a bisa un Testigo di Jehova. Un homber a bisa: “Boso ta yama boso mes Testigo di Jehova, pero ami ta un testigo di Jesus.”

E opinion di cu Testigonan di Jehova no ta kere den Jesus of cu nan no ta dun’é suficiente prominencia ta basta comun. Pero, kico echonan ta mustra?

Ta cierto cu Testigonan di Jehova tin sintimentu fuerte tocante e nomber di Dios, Jehova.a Itamar, un Testigo na Brazil, ta conta: “E punto crucial den mi bida a bini ora mi a siña e nomber di Dios. Ora mi a les’é pa promé bes, tabata como si fuera mi a lanta for di un soño profundo. E nomber Jehova a sagudí mi i a conmové mi; el a toca e parti mas profundo di mi alma.” No obstante, e ta agregá: “Mi stima Jesus tambe di henter mi curason.”

Sí, Testigonan di Jehova ta reconocé cu pa gana bida eterno, nan tin cu pone fe “den e nomber dje Yu di Dios,” Jesus. (1 Juan 5:13) Pero kico e expresion ‘den e nomber di Jesus’ ta nificá?

Loke Jesus Su Nomber Ta Para P’e

Bo ta haña e expresion ‘den e nomber di Jesus’ i otro expresionnan similar den henter e Scritura Griego Cristian, of “Testament Nobo.” De facto, uso dje palabra “nomber” pa referí na Jesus su papel, ta aparecé mas cu 80 biaha, rond di 30 bes den e buki di Echonan so. E cristiannan di promé siglo a bautisá den e nomber di Jesus, a cura den su nomber, a siña den su nomber, a inbocá su nomber, a sufri pa su nomber i a engrandecé su nomber.—Echonan 2:38; 3:16; 5:28; 9:14, 16; 19:17.

Segun un diccionario di Bijbel, cu frecuencia Bijbel ta usa e palabra griego pa “nomber,” pa “tur loke un nomber ta implicá, di autoridad, personalidad, rango, mahestad, poder, excelencia, etc., di tur loke e nomber ei ta cubri.” P’esei, Jesus su nomber ta para p’e inmenso autoridad ehecutivo mahestuoso cu Jehova Dios a confia na dje. Jesus mes a declará: “Tur autoridad a ser duná na mi den shelu i riba tera.” (Mateo 28:18) Despues cu Pedro i Juan a cura un homber coho, e lidernan religioso hudiu a reclamá: “Cu ki poder of den nomber di ken boso a haci esaki?” E ora ei cu curashi Pedro a expresá su fe den e autoridad i poder cu Jesus su nomber ta representá ora el a laga nan sa cu ta “den e nomber di Jesucristo e nazareno, . . . pa medio di esun aki e homber aki ta pará sano dilanti boso.”—Echonan 3:1-10; 4:5-10.

Fe den Jesus of den César?

Sin embargo, lo no tabata fácil pa profesá un fe asina den Jesus su nomber. Manera Jesus a profetisá, su disipelnan lo ta ‘obheto di odio di parti di tur nacion pa causa di su nomber.’ (Mateo 24:9) Pakico? Pasobra e nomber di Jesus ta representá su posicion como Dios su Gobernante nombrá, e Rey di reynan, na ken tur nacion mester buig den sumision, algu cu nan no ta cla ni dispuesto pa haci.—Salmo 2:1-7.

E lidernan religioso dje tempu di Jesus tampoco no kier a buig den sumision na Jesus. Nan a declará: “Nos no tin mas rey cu César,” rechasando asina e Yu di Dios. (Juan 19:13-15) Mas bien, nan a pone nan fe den e nomber—e poder i autoridad—di César i su gobiernu imperial. Asta nan a dicidí cu Jesus mester a muri pa nan por a keda cu nan posicion i rango.—Juan 11:47-53.

Den e siglonan despues di morto di Jesus, hopi di esnan cu a pretendé di ta cristian a adoptá un actitud similar na esun dje lidernan hudiu. E asina yamá cristiannan aki a pone nan fe den e poder i autoridad di Estado i a mete den su conflictonan. Por ehempel, den siglo 11, despues cu iglesia a organisá guereronan inactivo den e militia Christi, of cabayeronan cristian, “a eliminá e responsabilidad pa hiba guera hustu for dje podernan seglar di cristiandad i, na lugá di esei, iglesia a asumí e responsabilidad pa haci esei mediante e agencia di su cabayeronan cristian.” (The Oxford History of Christianity) E relato ta agregá cu cierto declaracionnan papal a pone mayoria dje cabayeronan kere cu dor di tuma parti den crusada, “nan a cera un contract cu Dios i a sigurá pa nan mes un lugá den Paradijs.”

Algun hende lo por razoná cu ta posibel pa bo ta leal na Jesus i na mésun tempu participá den asuntunan político, i tambe den guera dje nacionnan. Nan por haña cu un cristian tin deber di combatí maldad tur caminda cu e topa esei i cu esaki ta incluí recurí na guera si ta necesario. Pero e promé cristiannan tabatin e mésun punto di bista aki?

Segun un artículo den e revista The Christian Century, “e promé-promé cristiannan no a sirbi den forsanan armá.” E ta splica cu te n’e década di 170 pa 180 E.C., no tin ningun evidencia cu cristiannan a sirbi den ehército. Anto e artículo ta agregá: “Ta gradualmente cristiannan a bandoná nan oposicion na servicio militar.”

Kico tabata e consecuencianan? E artículo den The Christian Century ta bisa cu “tal bes no tin nada cu a desacreditá cristianismo mas cu su custumber di tuma un posicion relacioná cu guera cu no tabata diferente for di esun di hende no-cristian. E echo cu di un banda cristiannan ta pega n’e fe dje Salbador mansu, miéntras cu di otro banda nan ta apoyá gueranan religioso of nacionalista fervientemente, a haci hopi daño na nan fe.”

Esnan Cu Awe Ta Imitá e Promé Cristiannan

Ta posibel pa cristiannan awe imitá e ehempel sobresaliente dje promé cristiannan? Testigonan di Jehova den e siglo aki a demostrá cu esei ta posibel. Papiando di nan, e editor di Holocaust Educational Digest a remarcá: “Ningun Testigo di Jehova hamas lo bai guera. . . . Si tur hende na mundu den posicion di poder tabata dje fe aki, hamas [Guera Mundial II] lo a tuma lugá.”

Nos por bisa mescos di conflictonan regional mas recien, manera esun cu tabata andando na Nort Irlanda. Algun aña pasá, un Testigo di Jehova tabata predicá di cas pa cas den un área protestant den e stad di Belfast. Despues cu un doño di cas a haña sa cu ántes e Testigo tabata católico, el a puntr’é: “Tempu bo tabata católico, bo a apoyá IRA [Ehército Republicano Irlandes]?” E Testigo a realisá cu e homber por a bira violento pasobra nan a yega di encarcel’é despues cu a gar’é armá cu un revolver na caminda pa bai mata un católico. Ta caba el a caba di sali liber. Di manera cu e Testigo a contest’é: “Awor aki mi no ta católico. Mi ta un Testigo di Jehova. Como cristian berdadero, ami hamas lo mata ningun hende pa ningun gobiernu ni ningun persona.” E ora ei e doño di cas a dun’é man i a bis’é: “Tur matamentu ta malu. Boso ta haciendo un bon trabou. Dal bai cuné.”

Loke Fe den Jesus Su Nomber Ta Nificá

Pero, fe den Jesus su nomber ta nificá mas cu djis keda sin participá den guera. E ta nificá obedecé tur mandamentu di Cristo, ya cu Jesus a declará: “Boso ta mi amigunan si boso haci loke mi ta manda boso,” i un di su mandamentunan ta pa nos “stima otro.” (Juan 15:14, 17) Amor ta busca pa haci bon na otronan. E ta core cu tur prehuicio racial, religioso i social. Jesus a demostrá con.

E hudiunan den tempu di Jesus tabatin sintimentu fuerte contra e samaritanonan. Na contraste, Jesus a papia cu un muher samaritano, i como resultado, e muher i hopi otro samaritano mas a pone fe den su nomber. (Juan 4:39) Tambe Jesus a declará cu su disipelnan lo ta testigo di dje “tantu den Jerusalem como den henter Hudea i Samaria i te na e parti mas lehano dje tera.” (Echonan 1:8) No mester a limitá su mensahe dunadó di bida n’e hudiunan so. P’esei mes, Pedro a haña instruccion pa bishitá e centurion romano Cornelio. Aunke no tabata legal pa un hudiu bishitá un hende di otro rasa, Dios a mustra Pedro cu e “no mester yama ningun hende contaminá of impuru.”—Echonan 10:28.

Mescos cu Jesus, Testigonan di Jehova ta yuda tur hende di buena gana siña dje salbacion cu ta bini mediante Jesus su nomber, sin importá nan antecedente racial, religioso of económico. Fe den Jesus su nomber ta impulsá nan pa ‘declará públicamente cu Jesus ta Señor.’ (Romanonan 10:8, 9) Nos ta urgí bo pa aceptá nan yudansa di manera cu abo tambe por siña pone fe den e nomber di Jesus.

E nomber di Jesus di berdad mester inspirá sintimentu di onor, respet i obedencia. Apostel Pablo a declará: “Den e nomber di Jesus tur rudia mester dobla, di esnan den shelu i di esnan cu ta riba tera i di esnan bou di tera, i tur lenga mester reconocé abiertamente cu Jesucristo ta Señor p’e gloria di Dios e Tata.” (Filipensenan 2:10, 11) Aunke mayoria habitante dje tera no ta dispuesto pa someté nan n’e gobernacion di Jesus, Bijbel ta mustra cu e tempu ta cerca ora cu tur hende lo tin cu haci esei of perecé. (2 Tesalonicensenan 1:6-9) P’esei, awor ta e tempu pa pone fe den e nomber di Jesus dor di warda tur su mandamentunan.

[Nota]

[Plachi na página 6]

Den nomber di Jesus, miyones di hende a mata i a ser matá

[Plachi na página 7]

Jesus no tabatin prehuicio racial. Kico di abo?