Casamentunan Gososo Cu Ta Onra Jehova

Na 1985, Welsh Cu Elthea A Casa Na Soweto, Sur Africa. De Bes En Cuando Nan Ta Wak Nan Album Di Casamentu Huntu Cu Nan Yu Muher Zinzi, I Nan Ta Rebiba E Dia Gososo Ei. Zinzi Ta Gusta P’e Bisa Ta Ken E Huespednan Di Casamentu Ta I E Ta Gusta Wak Foral E Potretnan Caminda E Ta Mira Su Mama Bistí Masha Bunita Mes.

E CASAMENTU a cuminsá cu un discurso di matrimonio den un centro di bario na Soweto. Despues un koor di hóbennan cristian a canta canticanan di alabansa na Dios na armonia di cuater stem. Siguientemente, e invitadonan a gosa di un cuminda miéntras den fondo tabatin melodianan di Reino ta toca suavemente. Nan no a sirbi bebida alcohólico, ni no tabatin música duru ni bailamentu. En bes di esei, e invitadonan a disfrutá di asociá cu otro i felicitá e pareha. Na tur, e procedura a tuma mas o ménos tres ora. “E tabata un casamentu cu semper lo trece recuerdonan grato,” Raymond, un anciano cristian ta corda.

Tempu cu Welsh cu Elthea a casa, nan tabata trahadó boluntario n’e sucursal di Watch Tower Bible and Tract Society di Sur Africa. Nan no por a aford mas cu un casamentu modesto. Algun cristian a scoge pa bandoná e ministerio di tempu completo i bai traha trabou seglar pa nan por cubri e gastunan di un casamentu elaborá. Sin embargo, Welsh cu Elthea no ta sinti duele cu nan a scoge pa un casamentu modesto, pasobra esei a permití nan sigui sirbi Dios como minister di tempu completo te ora Zinzi a nace.

Pero, kico si un pareha scoge pa nan tin música seglar i bailamentu na nan casamentu? Kico si nan dicidí di parti biña i bebida alcohólico? Kico si nan por aford un casamentu grandi i elaborá? Con nan por haci sigur cu e evento lo bira un ocasion felis cu ta beneficiá adoradónan di Dios? Mester considerá pregunta asina cuidadosamente, ya cu Bijbel ta manda: “Sea cu boso ta comiendo of bebiendo of haciendo cualkier otro cos, haci tur cos pa e gloria di Dios.”—1 Corintionan 10:31.

Con pa Evitá Diberticion Desenfrená

Ta difícil pa imaginá un casamentu sin alegria. Tin mas chens cu e ta bai n’e otro extremo i cu bo ta haña diberticion desenfrená. Na hopi casamentu di hende cu no ta Testigo ta sosodé cosnan cu ta desonrá Dios. Por ehempel, ta masha normal pa hende bebe alcohol te bira burachi. Lamentablemente, esaki a sosodé asta na algun casamentu cristian.

Bijbel ta spierta cu “bebida intoxicante ta bochinchero.” (Proverbionan 20:1) E palabra hebreo traducí como “bochinchero” ta nificá “saca zonido fuerte.” Si alcohol por haci un persona bochinchero, imaginá bo kico e por haci cu un multitud di hende cu bini huntu i bebe demasiado! Ta obvio cu ocasionnan asina por degenerá fácilmente den “buracheria, paranda i semehante cosnan,” cu Bijbel ta mencioná como “obranan di carni.” Prácticanan asina ta descualificá tur cu no repentí, como heredero di bida eterno bou dje gobernacion dje Reino di Dios.—Galationan 5:19-21.

A usa e palabra griego pa “paranda” pa describí un procesion bochinchero riba caya caminda hóbennan casi burachi a canta, baila i toca música. Si na un casamentu ta parti alcohol pa loco, i tin música duru i bailamentu desenfrená, tin hopi chens cu e ocasion lo bira algu manera un paranda. Den un atmósfera asina, por ta fácil pa esnan swak cai den tentacion i cometé otro obranan di carni manera “fornicacion, impuresa, conducta inmoral, [of sucumbí na] atake di rabia.” Kico por haci pa evitá cu tal obranan di carni ta ruiná e goso di un casamentu cristian? Pa contestá e pregunta ei, laga nos considerá loke Bijbel ta bisa tocante un cierto casamentu.

Un Casamentu na Cua Jesus A Asistí

Jesus i su disipelnan a haña invitacion pa un casamentu na Cana di Galilea. Nan a aceptá e invitacion, i Jesus a asta contribuí n’e goso dje ocasion. Ora biña tabata cabando, el a producí milagrosamente un suministro extra di e mihó cualidad. Despues dje casamentu, loke a sobra sin duda a yena necesidad dje bruidegom gradicidu i su famia pa algun tempu.—Juan 2:3-11.

Tin vários les cu nos por siña for dje casamentu na cua Jesus a asistí. Di promé, Jesus i su disipelnan no a bai e bankete di matrimonio sin cu nan a haña invitacion. Bijbel ta declará specíficamente cu nan a ser invitá. (Juan 2:1, 2) Asina tambe den dos ilustracion tocante matrimonio, Jesus a papia bes tras bes di huéspednan cu tabata presente pasobra nan a ser invitá.—Mateo 22:2-4, 8, 9; Lucas 14:8-10.

Den algun pais ta custumber cu tur miembro dje comunidad ta sinti nan liber pa asistí na un fiesta di casamentu sea cu nan ta invitá of no. Sin embargo, esaki por hiba na problema financiero. Un pareha cu no tin masha moda por hinca nan mes den debe pa nan por haci sigur cu tin suficiente cos di come i bebe pa un multitud sin límite. P’esei, si un pareha cristian dicidí di tene un recepsi moderá cu un cantidad specífico di huésped, compañeronan cristian cu no ta invitá mester comprendé i respetá esaki. Un homber cu a casa na Cape Town, Sur Africa, ta corda cu el a invitá 200 hende na su casamentu. Sin embargo, 600 huésped a bini, i cuminda a caba lihé. Entre e personanan cu no tabata invitá tabatin un bus yen di bishitante cu pa casualidad tabata riba un tour na Cape Town durante e fin di siman cu e casamentu a tuma lugá. E guia dje bus di tour tabata un famia leu dje bruid i el a pensa cu e tabatin derecho di bini cu henter e grupo sin sikiera consultá cu e bruid i bruidegom!

Si no bisa bon cla cu un recepsi ta habrí pa tur hende, un berdadero siguidó di Jesus ta evitá di asistí na un recepsi caminda e no ta invitá i tuma di cuminda i bebida cu a ser percurá pa huéspednan invitá. Esnan cu tin gana di bai sin cu nan a haña invitacion mester puntra nan mes: ‘Si mi asistí n’e fiesta di casamentu aki, e no ta mustra un falta di amor pa e pareha recien casá? Lo mi no causa problema i kita e goso dje ocasion?’ En bes di sintié ofendí pasobra e no a ser invitá, un cristian cu comprendimentu amorosamente por manda un mensahe di felicitacion p’e pareha i deseá nan Jehova su bendicion. Kisas e por asta pensa riba yuda e pareha dor di manda un regalo pa aumentá e felicidad di nan dia di casamentu.—Eclesiástes 7:9; Efesionan 4:28.

Ken Ta Responsabel?

Den algun parti di Africa, ta un custumber cu ta famianan di mas edad ta haci e areglonan pa casamentu. Kisas parehanan ta gradicidu pa esaki, ya cu e ta aliviá nan dje obligacionnan financiero. Por ta nan ta pensa cu e ta aliviá nan tambe dje responsabilidad di kico cu por sosodé. Sin embargo, promé cu nan aceptá cualkier yudansa for di famianan cu bon intencion, un pareha mester haci sigur cu nan deseonan personal lo ser respetá.

Aunke Jesus tabata e Yu di Dios cu “a baha for di shelu,” no tin ningun indicacion cu el a tuma over i a dirigí mayoria asuntu n’e casamentu na Cana. (Juan 6:41) En bes di esei, e relato bíblico ta conta nos cu un otro persona tabata asigná pa fungi como “e director dje fiesta.” (Juan 2:8) Na su turno, e homber aki mester a rindi cuenta na e cabes di famia nobo, esta, e bruidegom.—Juan 2:9, 10.

Famianan cristian mester respetá e cabes di famia nobo cu Dios a nombra. (Colosensenan 3:18-20) E ta esun cu mester asumí responsabilidad pa loke ta tuma lugá na su casamentu. Claro cu un bruidegom mester ta razonabel i, si ta posibel, tene cuenta cu deseo di su bruid, su mayornan i su suegronan. Sin embargo, si famianan ta insistí pa regla asuntunan contrario cu deseonan dje pareha, e ora ei kisas e pareha lo tin cu usa tacto pa nenga nan yudansa i paga pa nan mes casamentu modesto. Dje manera ei lo no sosodé nada cu ta laga e pareha cu recuerdonan desagradabel. Por ehempel, na un casamentu cristian na Africa, un famia no-creyente cu a fungi como maestro di ceremonia a haci un bríndis na onor di antepasadonan morto!

Sa sosodé cu un pareha cristian ta sali bai nan luna di miel promé cu e celebracion di casamentu caba. Den un caso asina, e bruidegom mester haci areglo pa hendenan responsabel haci sigur cu ta cumpli cu normanan bíblico i cu e celebracion ta caba na un ora razonabel.

Planeamentu Cuidadoso i Ekilibrio

Evidentemente, tabatin un abundancia di bon cuminda n’e casamentu caminda Jesus a asistí, pasobra Bijbel ta yam’é un bankete di matrimonio. Manera a ser mencioná, tabatin un abundancia di biña. Sin duda, tabatin música apropiado i bailamentu decente pasobra esaki tabata un rasgo comun di bida social hudiu. Jesus a mustra esaki den su famoso ilustracion di e yu perdí. E tata ricu dje relato ei tabata asina felis cu e regreso di su yu repentí cu el a bisa: “Laga nos come i gosa.” Segun Jesus, e celebracion a encerá “un concierto di música i bailamentu.”—Lucas 15:23, 25.

Sin embargo, ta interesante cu Bijbel no ta referí specíficamente na música i bailamentu n’e casamentu na Cana. De facto, ningun relato bíblico di casamentu no ta mencioná bailamentu. Ta parce cu bailamentu tabata algu incidental entre Dios su sirbidónan fiel di tempu bíblico, i no e rasgo principal di nan casamentunan. Nos por siña algu for di esaki?

Na algun casamentu cristian na Africa, nan ta usa sistemanan electrónico di zonido cu hopi potencia. E música por ta asina duru cu e huéspednan no por combersá cómodamente cu otro. Tin bes ta obvio cu tin scarcedad di cuminda pero bailamentu cu ta bira desenfrená masha lihé sí no ta falta. En bes di ta un bankete di matrimonio, ocasionnan asina kisas ta djis un excuus pa pone un fiesta di bailamentu. Ademas, música duru hopi bes ta atraé hende buscadó di problema, stranheronan cu ta drenta gewoon sin invitacion.

Ya cu registro bíblico tocante casamentu no ta pone énfasis riba música i bailamentu, esaki no mester sirbi como guia pa un pareha cu ta planea un casamentu cu lo onra Jehova? Tog, como preparacion pa vários casamentu recien na Sur Africa, hóbennan cristian cu a ser scogé pa sirbi den casamentu, a pasa oranan largu ta entrená pasonan di baile complicá. Pa lunanan largu nan a usa un gran cantidad di nan tempu pa esei. Pero cristiannan mester ‘cumpra tempu’ pa “cosnan mas importante,” manera e trabou di evangelisá, studio personal i asistencia na reunionnan cristian.—Efesionan 5:16; Filipensenan 1:10.

N’e cantidad di biña cu Jesus a percurá ta parce cu e casamentu na Cana tabata unu grandi i elaborá. Sin embargo, nos por ta sigur cu e ocasion ei no tabata bochinchero i cu e huéspednan no a abusá di alcohol manera tabata e caso na algun casamentu hudiu. (Juan 2:10) Con nos por ta sigur di esaki? Pasobra Señor Jesucristo tabata presente. Di tur hende, Jesus lo tabata esun cu lo a tene mas cuidou pa cumpli cu e mandamentu di Dios relacioná cu mal asociacion: “No yega di ta entre bebedónan di demasiado biña.”—Proverbionan 23:20.

P’esei, si un pareha dicidí cu lo parti biña i otro bebida alcohólico na nan casamentu, nan tin cu haci areglo pa esaki sosodé bou di control estricto di personanan responsabel. I si nan dicidí di pone música, nan tin cu scoge melodianan apropiado i pone un hende responsabel pa controlá e volúmen. No mester permití huéspednan tuma over i introducí música cuestionabel of lanta e volúmen na nivelnan irazonabel. Si ta bai tin bailamentu, lo por introducié den un manera digno i modesto. Si famianan no-creyente of cristiannan inmadurá ta baila den un forma vulgar of sensual, e bruidegom kisas tin cu cambia e tipo di música of cu tacto e por pidi pa para e bailamentu. Di otro manera, e casamentu lo por para bira un bochincha i pone hende trompecá.—Romanonan 14:21.

Debí n’e peligernan enbolbí den algun tipo di bailamentu moderno, música duru i partimentu di alcohol pa loco, un cantidad di bruidegom cristian a dicidí cu nan no ta incluí esakinan den nan casamentu. Algun a ricibí crítica pa esaki, pero mas bien mester encomendá nan deseo di evitá tur cos cu lo por trece reproche riba Dios su nomber santu. Na otro banda, algun bruidegom ta haci areglo pa música apropiado, un ratu pa baila i pa sirbi alcohol cu moderacion. Den tur dos caso e bruidegom ta responsabel pa loke e ta permití sosodé na su casamentu.

Na Africa algun cristian inmadurá ta menospreciá casamentunan dignificá i ta bisa cu nan ta manera belorio. Sin embargo, esei no ta un punto di bista balansá. Obranan pecaminoso di carni por trece excitacion temporal, pero nan ta laga cristiannan cu un concenshi cu ta molestiá nan i ta trece reproche riba e nomber di Dios. (Romanonan 2:24) Na e otro banda, Dios su spiritu santu ta producí berdadero goso. (Galationan 5:22) Hopi pareha cristian ta mira bek cu orguyo riba nan dia di casamentu, sabiendo cu e tabata un ocasion felis i no un “motibu pa tropieso.”—2 Corintionan 6:3.

Ainda Welsh cu Elthea ta corda e hopi comentarionan bunita di famianan no-creyente cu a asistí na nan casamentu. Un di nan a bisa: “Nos ta cansá dje casamentunan bochinchero cu ta tuma lugá e dianan aki. Tabata hopi dushi pa un cambio asistí na un casamentu decente.”

Mas importante, casamentunan cristian cu ta gososo i dignificá ta onra e Originador di matrimonio, Jehova Dios.

[Kuadro/Plachi na página 22]

LISTA DI CONTROL PA UN RECEPSI DI CASAMENTU

• Si bo ta invitá un famia no-creyente pa duna un spich, bo a haci sigur cu lo e no introducí cierto tradicion no-cristian?

• Si ta bai tin música, bo a scoge solamente canticanan apropiado?

• Lo toca bo música na un volúmen razonabel?

• Si ta permití bailamentu, lo e tuma lugá na un manera digno?

• Lo sirbi alcohol solamente den un manera moderá?

• Hende responsabel lo controlá su distribucion?

• Bo a pone un ora razonabel p’e recepsi caba?

• Lo tin hende responsabel presente pa haci sigur cu tur cos ta bai na ordu te final?