Beibel Por Yuda Bo Eduká Bo Yunan?

ORKIDIA tin flor masha bunita mes, pero e no ta un mata fásil pa kuida. Pa kuid’é bon, bo mester regulá e temperatura i lus, anto tambe bo tin ku tene kuenta ku e tamaño di e pòchi di mata. Si e tera no ta bon i e fertilisante ta muchu fuerte esaki por afektá orkidia fásilmente, anto malesa i insekto por kaba kuné mashá lihé. Pues no ta nada straño ora ku un hende pa promé bes ta purba kuida un orkidia ku esaki ta muri na su man.

Kriamentu di yu ta un asuntu hopi mas kompliká i difísil, i ta rekerí e debido atenshon. Kier men ku ta normal ku mayornan ta sinti ku nan no sa muchu bon kon pa eduká yu. Hopi di nan ta sinti ku nan mester di yudansa, meskos ku un hende ku ta kultivá orkidia ta sinti ku e mester di konseho di un eksperto. Ta mas ku klaru ku tur mayor ta deseá di haña e mihó guia. Na unda nan por haña e guia ei?

Maske Beibel no ta un buki ku ta papia solamente di kriamentu di yu, e Kreadó a inspirá eskritornan pa inkluí hopi konseho práktiko relashoná ku e tópiko aki. Beibel ta enfatisá ku ta nesesario pa hasi esfuerso pa kultivá kualidatnan deseabel, algu ku segun hopi hende ta ser pasá por haltu. (Efesionan 4:22-24) Pa loke ta trata e asuntu aki, konseho bíbliko ta un aspekto masha importante di edukashon balansá. Ya kaba tal konseho a benefisiá miónes di hende ku a aplik’é, sin importá e era den kua nan a biba òf e kultura ku nan a lanta aden. Pues konseho bíbliko por yuda bo eduká bo yunan ku éksito.

Ehèmpel di e Mayornan Ta e Mihó Edukashon

“Anto abo, ku ta siña un otro, bo no ta siña bo mes? Abo ku ta prediká ku hende no mester hòrta, bo mes ta hòrta? Abo ku ta bisa ku hende no mester kometé adulterio, bo mes ta kometé adulterio?”—Romanonan 2:21, 22.

Presidente di e Hunta di Edukashon di Seul a bisa: “Ehèmpel den palabra i akshon ta e mihó edukashon ku un yu por risibí.” Si mayornan duna nan yu instrukshon spesífiko pero no ta pone bon ehèmpel den loke nan ta bisa i hasi, no ta dura hopi ku e yu ta kuminsá suponé ku e mayornan ta hipókrita. E palabranan di e mayornan lo no tin efekto. Por ehèmpel, si e mayornan ke siña nan yu onestidat, e ora ei nan mes mester ta onesto. Algun mayor ta haña ku ta masha normal ora ku nan no kier atendé un yamada di telefon, pa manda nan yu bisa: “Tata (òf mama) no t’ei.” Un mucha ku haña e instrukshon ei lo sintié inkómodo i konfundí. Ku tempu, ora e hañ’é den pèrtá e por kuminsá gaña sin sinti remordimentu. P’esei si e mayornan sinseramente ta deseá pa nan yu ta un persona onesto, nan mes mester papia bèrdat i aktua na armonia ku esei.

Bo ke entrená bo yu pa papia ku rèspèt? Anto bo tin ku pone un bon ehèmpel. Bo yu lo imitá bo masha lihé mes. Sung-sik, un tata di kuater yu, ta bisa: “Ami ku mi esposa a disidí pa no papia brutu ku otro. Nos a mustra rèspèt na otro i no tabata halsa bos ni ora nos tabata ofendí òf rabiá. Un bon ehèmpel tabata hopi mas efektivo ku palabranan so. Nos ta sinti un satisfakshon ora ku nos yunan ta papia ku otro hende, ya ku nan ta hasi esei ku rèspèt i ku bon manera.” Beibel ta bisa na Galationan 6:7: “Loke un hende sembra, esaki tambe e lo kosechá.” Mayornan ku ke pa nan yunan tin normanan moral haltu mester demostrá promé ku nan mes ta biba na armonia ku tal normanan.

Mantené e Liña di Komunikashon Habrí

“Siña [e mandamentunan di Dios] ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.”—Deuteronomio 6:7.

E tendensia di traha overtaim ta oumentando. Ora ku tantu esposo komo esposa ta traha, esei ta afektá nan yunan seriamente. E kantidat di tempu ku hopi mayor ta pasa huntu ku nan yunan ta menguando. Ora mayornan ta na kas, nan tin ku hasi trabou di kas i otro keaséres, pues probablemente nan lo ta kansá. Bou di tal sirkunstansia, kon bo por mantené un bon komunikashon ku bo yunan? Si abo ku bo yunan hasi trabou di kas huntu, esei lo duna boso un chèns pa papia ku otro. Un kabes di famia a asta deshasí di e televishon, prinsipalmente pa e por tin mas tempu pa kòmbersá ku su yunan. El a nota: “Na promé instante e yunan tabata sinti nan laf, pero ora mi tabata hunga weganan di charada i otro weganan por estilo i tabata konsiderá bukinan interesante ku nan, nan a kuminsá kustumbrá ku e kambio.”

Ta importante pa yunan kustumbrá komuniká ku nan mayornan for di chikí. Sino, ora e yunan bira adolesente i haña nan ku problema, nan lo no kòrda riba nan mayornan komo amigu ku nan por papia kuné. Di ki manera bo por yuda nan pa nan habri nan kurason? Proverbionan 20:5 ta bisa: “Plan den kurason di un hende ta manera awa hundu, ma un hende di komprondementu ta saka esaki afó.” Mayornan por animá nan yunan pa ekspresá nan pensamentunan i sintimentunan dor di usa preguntanan di punto di bista, manera “Kiko bo ta pensa?”

Kiko lo bo hasi si bo yu kometé un fout grandi? Esei ta e momentu pa di un manera bondadoso bo mustra konsiderashon na dje. Dominá bo emoshonnan ora bo ta skucha bo yu. Un tata ta bisa lo siguiente relashoná ku su manera di trata ku e tipo di situashon ei: “Ora mi yunan hasi un fout, mi ta purba di no hasi un pieu bira un baka. Mi ta sinta i skucha loke nan tin di bisa. Mi ta purba komprondé e situashon. Ora mi ta sinti ku ta difísil pa mi dominá mi rabia, mi ta warda te ora mi kalma.” Si bo dominá bo emoshonnan i skucha, lo ta mas fásil pa nan aseptá e korekshon ku bo duna.

Disiplina Basá Riba Amor Ta Esensial

“Boso, tatanan, no provoká boso yunan na rabia, ma lanta nan den e disiplina i instrukshon di Señor.”—Efesionan 6:4.

Pa logra bon resultado, ta importante pa duna disiplina ku amor. Kon asina mayornan por ‘provoká nan yunan’? Si nan no disipliná e yunan segun e seriedat di e fout òf si nan disipliná nan dor di kritiká nan muchu fuerte, e yunan lo resistí. Bou di tur sirkunstansia mester duna e disiplina ku amor. (Proverbionan 13:24) Si bo rasoná ku bo yunan, nan lo ripará ku bo ta disipliná nan pasobra bo ta stima nan.—Proverbionan 22:15; 29:19.

Di otro banda, ta bon pa laga e yunan sinti e konsekuensianan indeseabel di mal kondukta. Por ehèmpel, si un yu hasi algu malu kontra un hende, bo por insistí pa e pidi despensa. Ora e kibra regla di famia, bo por kita sierto privilegio for di dje pa mustr’é e importansia di mantené su mes na regla.

Ta mas mihó pa duna disiplina promé ku ta lat. Eklesiastés 8:11 ta indiká: “Pasobra sentensia kontra un echo di maldat no ta wòrdu ehekutá lihé; p’esei kurason di e yunan di hende den nan ta kompletamente dispuesto pa hasi maldat.” Di igual manera, hopi yu lo purba pa wak te kon leu nan por yega sin haña straf. Pues unabes ku bo a spièrt’é ku lo e haña straf si e hasi un kos di mala mucha, perkurá pa straf e.

Rekreo Sano Tin Su Lugá

‘Tin un tempu pa hari, i un tempu pa baila.’—Eklesiastés 3:1, 4.

Tempu liber i rekreo sano i balansá ta masha importante pa e desaroyo mental i físiko di mucha. Ora mayornan ta rekreá huntu ku nan yunan, e lasonan di famia ta bira mas fuerte i e yunan ta sinti nan mas sigur. Ki klase di rekreo e famia por hasi huntu? Si bo tuma tempu pa pensa, lo bo ripará ku tin hopi kos agradabel ku por hasi huntu. Tin deportenan na aire liber, por ehèmpel, kore baiskel, weganan manera tènis, badminton i fòli. I imaginá kon dushi lo por ta si e famia toka instrumentonan musikal huntu. Tambe nan por keda ku grato rekuerdo di e momentunan ku nan a bishita lugánan serka di kas pa disfrutá di naturalesa.

Na e okashonnan ei, mayornan por yuda nan yunan haña un punto di bista balansá di rekreo. Un hòmber kristian ku tin tres yu hòmber a bisa: “Si ta posibel mi ta enbolbé mi mes den e rekreo di mi yunan. Por ehèmpel, ora nan ta hunga weganan riba kòmpiuter, mi ta puntra nan ta kon ta hunga e weganan aki. Ora nan splika na un manera entusiasmá ta kon ta hunga e weganan aki, mi ta hasi uso di e oportunidat pa papia riba e peligernan di entretenimentu ku no ta sano. Mi a ripará ku nan ta legumai entretenimentu ku no ta bon.” Sí, yunan ku ta satisfecho ku e rekreo di e famia ta ménos inkliná pa wak programanan di televishon, vidio, pelíkula i weganan riba Internet ku ta presentá violensia, inmoralidat i uso di droga.

Yuda Bo Yunan Haña Bon Amigu

“Esun ku anda ku hende sabí lo ta sabí, ma un kompañero di hende bobo lo sufri daño.”—Proverbionan 13:20.

Un tata kristian ku a logra kria su kuater yunan ku éksito a bisa: “Ta masha importante pa nan skohe bon amigu. Un mal amigu por daña tur e bon trabou ku bo a hasi.” Pa yuda su yunan haña bon amigu, sabiamente e tabata hasi nan preguntanan manera: Ken ta bo mihó amigu? Dikon bo ta gust’é? Kiko bo ke hasi meskos kuné? Un otro mayor tabata laga su yunan trese nan bon amigunan kas. Asina e tabata haña chèns di opservá nan i duna su yunan e guia nesesario.

Tambe ta importante pa siña yunan ku nan por haña tantu amigu grandi komo amigu di nan mes edat. Bum-sun, un tata di tres yu hòmber, ta bisa: “Mi ta yuda mi yunan komprondé ku amigunan no nesesariamente mester ta hende di nan mes edat, manera e historia bíbliko di David ku Jonatan ta indiká. Loke mi ta hasi ta invitá kristiannan di diferente edat pa pasa un ratu plasentero huntu ku mi yunan. Komo resultado, mi yunan ta asosiá ku hopi hende ku no ta di nan edat.” Asosiashon ku adultonan ehemplar ta duna yunan e bentaha di siña hopi kos.

Bo Por Logra Eduká Bo Yu ku Éksito

Segun un enkuesta ku nan a hasi na Merka, hopi mayor ku a purba inkulká kualidatnan manera dominio propio, disiplina i onestidat den nan yunan no tabatin muchu éksito. Dikon ta asina difísil pa logra esei? Un mama ku a partisipá den e enkuesta a bisa: ‘E kos tristu ta ku e úniko manera pa protehá nos yunan ta dor di será nan na yabi den un kamber i nunka laga nan sali bai den mundu.’ Loke e tabata ke men ta ku e ambiente den kua yunan ta lanta awendia ta mas pió ku nunka. Den e kondishon aki, ta realmente posibel pa eduká yunan ku éksito?

Si bo ta deseá di kuida un orkidia pero ta preokupá ku e por marchitá, probablemente lo bo desanimá i legumai. Si un hende ku sa bon di orkidia duna bo un par di tep i bisa ku konfiansa, “Lo bo logra si bo hasi tal i tal,” esta un alivio lo bo sinti! Yehova, e Outoridat Supremo riba komportashon humano, ta duna konseho relashoná ku e mihó manera pa lanta yu. E ta bisa: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.” (Proverbionan 22:6) Ora bo entrená yu na armonia ku konseho bíbliko, probablemente lo bo tin e goso di mira bo yunan bira adultonan responsabel, mustra konsiderashon na otro hende i desplegá desensia i rèspèt. E ora ei no ta hende so lo stima nan sino prinsipalmente Yehova, nos Tata selestial.