Alegrá Den Jehova!

“Semper alegrá den Señor. Una bez mas mi ta bisa, Alegrá!”​—⁠FILIPENSE 4:⁠4.

DEN e dia djawe, por parce cu tin mashá poco motibo pa alegrá. Hende trahá di stof, asta cristian berdadero por contra cu situacion cu ta causa tristeza​—⁠tal como desempleo, malu di salud, e morto di ser stimá, problema cu personalidad, of oposicion di miembro di famía no creyente of amigo di antes. Pues, con nos mester comprende e conseho di Pablo, “Semper alegrá”? Den bista di circunstancia desagradabel i dificultoso cu locual nos tur tin cu lucha, esei ta sikiera posibel? Un consideracion di contexto dje palabra por yuda aclara e asunto.

Alegrá​—⁠pakico i di ki manera?

² “Semper alegrá den Señor. Una bez mas mi ta bisa, Alegrá!” Esei por hácinos corda e palabra dirigí na israelita mas cu 24 siglo den pasado: “E gozo di Jehova ta boso fortaleza,” of segun e traduccion di Version Moderna: “E gozo di Jehova ta duna boso forza.” (Nehemías 8:10) Gozo ta duna forza i ta manera un fortaleza den locual hende por retira pa consuelo i proteccion. Gozo tabata instrumental pa yuda asta e homber perfecto Jesús wanta. “Pe gozo cu tabata poní dilanti dje el a wanta e staca di tormento, despreciando e bergüenza, i a sinta na man drechi dje trono di Dios.” (Hebreo 12:⁠2) Claramente, e posibilidad di alegrá enfrentá cu dificultad ta vital pa salbacion.

³ Promé cu israelita a drenta den e Tera Primintí, Dios a mándanan: “Bo mester alegrá riba tur cos bon cu Jehova bo Dios a dunábo i bo famía, abo i e levita i residente stranhero cu ta cerca bo.” E consecuencia di no sirbi Jehova cu alegría tabata severo. “Tur maldicion ei siguramente lo bini riba bo i persigíbo i alcanzábo te cu bo a ser exterminá . . . debí ne echo cu bo no a sirbi Jehova bo Dios cu alegría i gozo di curazón pe abundancia di tur cos.”​—⁠Deuteronomio 26:11; 28:​45-47.

⁴ P’sei ta necesario pe resto ungí djawe i nan compañénan e “otro carnénan” alegrá! (Juan 10:16) Pablo, cu su repeticion dje conseho, “una bez mas mi ta bisa,” a enfatiza e importancia di alegrá riba tur cos bon cu Jehova Dios a haci pa nos. Nos ta haci esei? Of nos ta bira asina enbolbí den e rutina diario di bida cu tin bez cu nos ta lubida e cantidad di motibo cu nos tin pa alegrá? Problema ta montona asina halto cu nan ta tapa nos bista dje Reino i bendicion di dje? Nos ta permiti otro cos​—⁠desobedencia na ley di Dios, ignoracion di principio divino, of negligencia di tarea cristian​—⁠hórtanos di nos gozo?

⁵ “Laga tur hende sa cu boso ta razonabel. Señor ta cerca.” (Filipense 4:⁠5) Hende cu no ta razonabel ta falta equilibrio. Tal bez e no ta cuida su salud apropiadamente, innecesariamente sometiendo su curpa na indebido tension of ansiedad. Kizás e no a siña acepta su limitacionan i biba conforme cu nan. E por pone meta mucho halto anto purba di alcanzánan cueste loke cueste. Of e por usa su limitacion como excuus pa floha of bira menos diligente. Faltando equilibrio, i siendo irrazonabel e ta haya cu ta difícil pa alegrá.

⁶ Aunque hende opositor ta considerános como fanático, semper mester ta posibel pa otro hende cristian mira cu nos ta hende razonabel. I nan lo haci esei si nos ta balanzá i no ta spera perfeccion for di nos mes ni for di otro hende. Sobre todo, nos mester frénanos di impone riba otronan carga pisá un cu ta bai mas ayá cu loke e Palabra di Dios ta exigi. Apóstol Pablo a bisa: “No cu nos ta doño di boso fe, sino nos ta colaborador pa boso gozo.” (2 Corintio 1:24) Como un ex-fariseo, Pablo tabata sa mashá bon cu regla stijf decretá i imponí pa hende cu autoridad por sofoca gozo, mientras cu sugerencia útil cu colaborador a ofrece por aumenta gozo. E echo cu “Señor ta cerca” mester haci hende razonabel corda cu nos no mag ‘huzga criá di otro hende. Nan ta para of nan ta cai, bao di nan mes doño.’​—⁠Romano 14:⁠4.

⁷ “No keda ansioso riba nada, sino den tur cos via oracion i súplica hunto cu agradicimento, duna di conoce boso peticion na Dios.” (Filipense 4:⁠6) Awendia nos ta experimenta “tempo crítico duro pa trata cuné” cu Pablo a mencioná. (2 Timoteo 3:​1-5) P’sei, hende cristian mester spera pa problema enfrentánan. E palabra di Pablo di “semper alegrá” no ta nenga e posibilidad cu hende cristian leal no por tin encuentro de bez en cuando cu desconsuelo of desanimacion. Den su mes caso, Pablo a admiti na moda realista: “Nos ta ser oprimi di tur manera, pero no pretá di tal manera cu nos no por move; nos ta keda confundí, pero no absolutamente sin salida; nos ta ser persigí, pero no lagá sin yudanza; nos ta tumbá, pero no destruí.” (2 Corintio 4:​8, 9) Sin embargo, e gozo di hende cristian ta suaviza periodo temporario di ansiedad i tristeza i cu tempo ta véncenan. E ta duna e fortaleza necesario pa sigi forza padilanti, i nunca perde bista dje cantidad di motibo pa alegra.

⁸ Ora problema ta presenta, sea loke sea nan carácter, hende cristian gozoso ta pidi humildemente e yudanza di Jehova Dios den oracion. Nan nunca ta entrega na ansiedad extremo. Despues di haci loke nan mes por haci razonablemente pa resolve e problema, nan ta laga e resultado den man di Jehova Dios na armonía cu e invitacion: “Tira bo carga riba Jehova mes, i e mes lo sostenébo.” Entretanto, hende cristian ta sigi agradici Jehova Dios pa tur Su bondad.​—⁠Salmo 55:22; mira també Mateo 6:​25-34.

⁹ “E paz di Dios cu ta surpasa tur pensamento lo warda boso curazón i boso facultad mental mediante Cristo Jesús.” (Filipense 4:⁠7) Conocimento di berdad bíblico ta libra e mente di hende cristian di falsedad i ta yúdanan desaroya un modelo di pensamento saludable. (2 Timoteo 1:13) Asina nan ta ser yudá pa evita conducta malu of imprudente cu por pone relacion pacífico cu otronan den peliger. En bez di laga inhusticia i maldad frústranan, nan ta pone nan confianza den Jehova Dios pa resolve problema di humanidad mediante e Reino. Tal trankilidad mental ta protehá nan curazón, ta mantene nan intencion puro, i ta guía nan pensamento den e camina di husticia. Intencion puro i pensamento drechi, en buelta, ta percura motibonan incontable pa alegra, apesar di problema i presion cu e mundo caótico ta causa.

¹⁰ “Finalmente, rumanan, cuanto cos cu ta berdadero, cuanto cu ta di consideracion serio, cuanto cu ta husto, cuanto cu ta decente, cuanto cu ta amable, cuanto cu tin bon nomber, cualkier birtud cu tin i cualkier cos cu tin cu ta digno di alabanza, sigi considera e cosnan ei.” (Filipense 4:⁠8) Hende cristian no ta haya placer den papiamento i pensamento riba cosnan malu. Esei automáticamente ta elimina hopi dje diverticion cu e mundo ta percura. Ningun hende por mantene nan gozo cristian si nan ta yena nan mente i curazón cu mentira, chasco bobo, i asunto cu ta inhusto, inmoral, sin birtud, despreciabel, i repugnante. Bisá bon cla, ningun hende por haya berdadero gozo si nan ta yena nan mente i curazón cu sushidad. Den e mundo corrupto di Satanás, ta ki edificante pa sa cu hende cristian tin tanto bon cosnan pa pensa i considera!

Motibo incontable pa alegrá

¹¹ Ora nos ta papia tocante motibo pa alegrá, láganos no lubida nos hermandad internacional. (1 Pedro 2:17) Mientras cu grupo mundano nacional i racial ta expresa odio intenso un pa otro, e pueblo di Dios ta hala mas cerca otro den amor. Nan unidad ta specialmente bisto den nan asamblea internacional. Un delegado americano a skirbi tocante e asamblea celebrá den Kiev, Ucrania: “Lágrima di gozo, wowo briyante, i abrazamento continuo na moda di rumanan, i grupo mandando saludo di un banda dje stadión pa otro cu nan wayamento di parasol i lenso di color ta duna evidencia claro di unidad teocrático. Nos curazón ta yená cu orguyo den loke Jehova a haci milagrosamente den e hermandad mundial. Esei a toca mi esposa i ami profundamente i a agrega un nificacion nobo na nos fe.”

¹² Ta ki fortalecedor di fe pa hende cristian djawe mira profecía bíblico cumplí dilanti nan mes wowo! Por ehempel, considera e palabra di Isaías 60:22: “E chikito mes lo bira mil, i esun di tamaño insignificante lo bira un nacion fuerte. I ami mes, Jehova, lo aceleré na su propio tempo.” Ne nacimento dje Reino na 1914, 5.100 so​—⁠un chikito​—⁠tabata activamente predicando. Pero durante e último cinco aña, e tamaño dje hermandad mundial a aumenta ne promedio di 5.628 Testigo recién bautizá tur siman! Na 1993, un máximo di 4.709.889 predicador activo tabata alcanzá. Imaginábo! Esei kier men cu “e chikito” di 1914 literalmente ta cerca di bira “mil”!

¹³ Desde 1914 e Rey Mesiánico a sali dominando meimei di su enemigonan. Su gobernacion tin e apoyo di sigidor humano boluntario cu ta contribui tempo, forza, i placa pa cumpli cu e trabao di predicacion mundial i també un campaña internacional di construccion. (Salmo 110:​2, 3) Testigo di Jehova ta alegrá cu contribucion di placa ta ser hací pa completá tal actividad, aunque nan casi nunca ta menciona placa den nan reunion.a (Compara cu 1 Crónica 29:⁠9.) Berdadero hende cristian no tin cu ser forzá pa contribuí; nan ta considera cu ta un privilegio pa apoya nan Rey te ne grado cu nan circunstancia ta permiti, cada un “net manera el a determiná den su curazón, no cu mala gana ni bao di obligacion.”​—⁠2 Corintio 9:⁠7.

¹⁴ E restoracion profetizá dje adoracion berdadero den e pueblo di Dios a resulta den e creacion di un paradijs spiritual. Desde 1919 el a extende progresivamente su frontera. (Salmo 14:7; Isaías 52:​9, 10) Cu ki resultado? Cristian berdadero ta experimenta “hubileo i alegría.” (Isaías 51:11) E bon fruta cu ta resulta di esei ta duna evidencia di loke e spiritu santo di Dios ta capaz pa haci usando hende imperfecto. Tur mérito i onor ta pa Jehova Dios, pero cua privilegio tin cu ta mayor cu e privilegio di bira colaborador cu Dios? (1 Corintio 3:⁠9) Jehova Dios tin e poder di haci piedra grita, si ta necesario, e mensahe dje berdad. No obstante, el a decidi di no usa tal moda sino, mas bien, pa motiva persona boluntario trahá di stof pa cumpli cu su boluntad.​—⁠Lucas 19:⁠40.

¹⁵ Yen di asombro, sirbidor di Jehova Dios ta wak awor suceso di mundo en cuanto con nan ta relacioná cu profecía bíblico sobresaliente. E nacionan ta purba duro​—⁠pero en bano​—⁠pa alcanza un paz firme. Suceso ta obligánan pidi e organizacion di Nacion Uní entremete den conflicto di mundo. (Revelacion 13:​15-17) Entretanto, e pueblo di Dios ta mira padilanti caba cu gran anticipacion na un suceso di mas gozoso cu hamás ta tuma lugar, un suceso cu ta yegando mas cerca dia pa dia. “Láganos alegrá i pasa over cu gozo, i láganos duné gloria, pasobra e casamento dje Lamchi a yega i su esposa a prepara su mes.”​—⁠Revelacion 19:⁠7.

Predicacion ​—⁠un carga pisá of un gozo?

¹⁶ “Loke boso a siña i també a acepta i a tende i a mira relacioná cu mi, practica esei; i e Dios di paz lo ta cu boso.” (Filipense 4:⁠9) Door di practica loke nan a siña, hende cristian por spera di recibi e bendicion di Dios. Un cos di mas importante cu nan a siña ta e necesidad di predica e bon nobo na otro hende. En berdad, ken por goza trankilidad mental of ser gozoso si nan ta nenga di duna informacion na hende di curazón onrado kende nan bida ta depende di tendimento di dje?​—⁠Ezekiel 3:​17-21; 1 Corintio 9:16; 1 Timoteo 4:⁠16.

¹⁷ Ta ki un gozo pa contra cu hende semehante di carné cu ta dispuesto pa siña tocante Jehova Dios! Realmente, hende cu ta sirbi cu e motibo correcto semper lo haya cu e sirbishi di Reino ta un fuente di gozo. Ta asina pasobra e motibo principal pa ser un Testigo di Jehova ta di alaba Su nomber i defende Su puesto como Gobernante soberano. (1 Crónica 16:31) Hende cu ta reconoce tal echo por alegra asta ora otro hende ta rechaza imprudentemente e bon nobo cu nan ta trece. Nan sa cu e predicacion na hende no creyente lo termina un dia; e alabanza dje nomber di Jehova Dios lo sigi pa semper.

¹⁸ E religion berdadero ta motiva hende cu ta practiqué pa nan cumpli cu requisito di Jehova Dios, no pa motibo cu nan ta keda obligá, sino pa motibo cu nan kier. (Salmo 40:8; Juan 4:34) Hopi hende ta haya cu esei ta difícil pa comprende. Un biaha un señora a bisa un Testigo cu a bishité: “Bo sa, boso ta merece encomendacion. Ami siguramente nunca lo bai di cas pa cas pa predica tocante mi religion manera boso ta haci.” Cu un sonrisa, e Testigo a contesta: “Mi ta comprende con bo ta sintíbo. Promé cu mi a bira un Testigo di Jehova, bo no por a forzámi di bai cerca otro hende pa papia tocante religion. Pero awor mi kier hacié.” E señora a pensa un rato, anto a conclui: “Claramente bo religion tin algo pa ofrece cu mi religion no tin. Kizás mi mester investiga.”

¹⁹ E texto di aña di 1994, desplegá prominentemente den nos Salón di Reino, ta hácinos corda continuamente: “Confia den Jehova cu tur bo curazón.” (Proverbio 3:⁠5) Por tin un mayor motibo cu esei pa alegrá di cu nos por pone nos confianza den Jehova Dios, nos fortaleza den locual nos ta tuma refugio? Salmo 64:10 ta splica: “Hende husto lo alegrá den Jehova i en berdad tuma refugio den dje.” Awor no ta tempo pa vacila of entrega. Cada luna cu ta pasa ta híbanos mas cerca e realidad di loke sirbidor di Jehova Dios a anhela di mira desde e tempo di Abel. Awor ta e tempo pa confia den Jehova Dios cu tur nos curazón, sabiendo cu nunca na antes nos tabatin tanto motibo pa alegrá!

[Footnotes]

[Study Questions]

1. Pakico nos por puntra kico Pablo kier men ora el a bisa cu hende cristian mester semper alegrá?

2, 3. Kico ta e importancia di gozo, segun cu tabata ilustrá den e caso di Jesús i di israelita di antigua?

4. Pakico nos por keda sin alegrá?

5. Pakico hende irrazonabel ta haya cu ta difícil pa alegrá?

6. (a) Kico otro hende cristian mester mira den nos, i na ki tempo so esei lo ta e caso? (b) Con e palabra di Pablo den 2 Corintio 1:24 i Romano 14:4 ta yúdanos ser razonabel?

7, 8. Pakico hende cristian mester spera di haya problema, pero, pakico ta posibel pa nan sigi alegrá?

9. Con un conocimento dje berdad ta duna hende trankilidad mental, i cua bon efecto esei tin riba hende cristian?

10. Bo por experimenta berdadero gozo solamente door di papia of pensa riba kico?

11. (a) Nos nunca mester pensa cu kico ta di poco balor, i pakico no? (b) Ki efecto asistencia na un asamblea internacional tabatin riba un delegado i su esposa?

12. Con Isaías 60:22 ta ser cumplí dilanti nos wowo mes?

13 (a) Kico tabata sosode desde 1914 padilanti? (b) Con Testigo di Jehova ta cumpli cu e principio dje palabra di Pablo den 2 Corintio 9:⁠7?

14. Cua situacion den e pueblo di Dios a bira visibel desde 1919, dunando nan cua motibo pa alegrá?

15. (a) Cua suceso djawe nos ta sigi cu interés? (b) Nos ta spera cu gozo cua sosodimento?

16. Ilustra con hende cristian por perde nan gozo si nan no ta practica loke nan ta siña.

17. Pakico nos trabao di predica por ta semper un fuente di gozo?

18. Kico ta motiva hende cristian pa haci e boluntad di Jehova?

19. Pakico awor ta e tempo pa alegrá como nunca na antes?

[Caption on page 16]

Testigo di Jehova ruso i alemán ta alegrá pa ser parti di un hermandad internacional

[Caption on page 17]

Compartimento dje berdad cu otro hende ta un motibo pa alegría

[Caption on page 18]

Con bo ta contestá?

◻ Segun Nehemías 8:​10, pakico nos mester alegrá?

◻ Con Deuteronomio 26:11 i 28: 45-47 ta mustra e importancia di alegrá?

◻ Con Filipense 4:​4-9 por yúdanos semper alegrá?

◻ E texto di aña di 1994 ta dúnanos cua motibo pa alegrá?