Evita bromamento

AWENDIA hopi hende ta considera bromamento como un birtud. Hacimento di manifestacion di bo forza, bo aptitud, i logramento ta na moda awor. Algun hende ta kere cu bromamento ta necesario pa logramento. Otro hende ta kere cu esei ta aumenta bo dignidad. Segun e revista Time: “E ideal di modestia, cu ta apenas morto, a cuminza parce casi anticuado.” Autora Jody Gaylin a comenta: “Desafortunadamente, bromamento desenfrená . . . ta e último moda. Conbersacion cu amigo of conocir tin un compañé nobo: elogio di bo mes.”

Modelo profesional a establece e norma. Tal bez bo a tende e palabra di un excampeón boxista: “No ta pa casualidad cu mi ta e homber mas importante den mundo ne punto aki di historia.” E palabra di un miembro dje grupo musical yamá Beatles també ta bon conocí: “Awor nos ta mas popular cu Jesucristo.” Aunque algun hende ta considera tal comentario como algo inocente, otro hende ta considerá hende cu a bisa esei como modelo profesional di halzamento di nan mes cu ta bale la pena pa sigi.

E prevalencia di bromamento ta lanta e pregunta: Ta saludable pa gaba bentaha of capacidad cu bo tin? Naturalmente, ta normal pa sintíbo orguyoso tocante bo logramento i asta compartínan cu amigo íntimo i famía. Pero, kico di hende cu ta sigi e lema den nan bida: “Si bo tiné, demonstré?” Además, kico di hende cu, aunque nan no ta broma abiertamente, na moda scondí ta percura pa otro hende yega di sa di nan forza i logramento? Tal propaganda personal ta saludable, asta necesario, manera algun hende ta bisa?

Efecto riba relacion cu otro

Considera efecto cu bromamento di otro hende ta tene riba bo. Por ehempel, con bo ta reacciona ne sigiente palabra?

“Buki cu mi no a skirbi ta mihor cu buki cu otro hende sí a skirbi.”​—⁠Un autor bon conocí.

“Si mi tabata presente ne creacion, mi por a duna algun idea útil pa un mihor ordenacion dje universo.”​—⁠Rey Alfonso X di Spaña.

“No por existi un Dios pasobra, si e ta existi, mi no por kere cu mi no ta É.”​—⁠Filósofo di siglo 19.

Comentario di hende asina ta atraébo na nan? Bo ta kere cu bo por gusta nan compañía? Probablemente cu no. Generalmente, bromamento, sea cu sinceridad of asta na chanza​—⁠ta haci otro hende bira nervioso, molestiá, of kizás envidioso. Esei ta e efecto cu bromamento tabatin riba salmista Asaf, cu a admiti: “Mi a bira envidioso di hende bromador.” (Salmo 73:⁠3) Siguramente, ningun di nos kier bira e causa di rencor den nos amigonan i asociado! Promé Corintio 13:4 ta bisa: “Amor . . . no ta gaba.” Amor divino i aprecio pa sintimento di otro hende por impulsános pa evita di demonstra aptitud of bentaha cu nos supuestamente tin.

Ora hende ta domina nan mes i ta papia cu modestia, nan ta haci hende rond di nan síntinan trankilu i bon tocante nan mes. Esei ta un aptitud di balor incalculable. Podisé e político británico Lord Chesterfield tabatin esei den mente ora el a conseha su yiu: “Sea mas sabí cu otro hende si bo por; pero no bísanan esei.”

Tur hende no tin e mesun don. Loke ta fácil pa un hende simplemente no ta un punto fuerte pa otronan. Amor por conmove un hende pa usa simpatía den su tratamento cu otro cu no tin don pa haci loke e por haci. Probablemente, otro hende tin don den otro campo. Apóstol Pablo a bísanos: “Mediante e bondad inmerecida duná na mi, mi ta bisa cada hende ei den boso pa no pensa mas di nan mes cu ta necesario pa pensa; sino pa pensa di tal manera di tene un huicio sano, cada un segun cu Dios a partí pa nan un midí di fe.”​—⁠Romano 12:⁠3.

Bromamento ta producto di debilidad

Aunque algun hende por apartá foi bromador, sintiendo nan mes inferior den nan presencia, otronan ta reacciona na otro moda. Nan ta conclui cu bromador ta síntinan insigur. Autor Frank Trippett a splica pakico hende cu ta toca nan mes trompet por, irónicamente, rebaha nan mes balor den bista di otro hende: “Tur hende sa den nan curazón cu bromamento ta indica algun debilidad lastimoso privá.” Siendo cu hopi hende ta mira tras dje máscara dje bromador, no ta mas sabí pa bromador keda sin elogio propio bombástico?

“Pero ta berdad!”

Esei ta e manera cu algun hende ta purba di hustifica nan glorificacion di nan mes. Nan ta kere cu siendo cu nan berdaderamente tin don den cierto aspecto, pa pretende di no tin ta hipócrita.

Pero, nan bromamento realmente ta berdad? Evaluacion propio tin tendencia di ser fundá riba opinion i sintimento personal. Loke nos ta mira como un forza sobresaliente den nos mes por parce un cos gewoon pa otro hende. E echo cu un persona ta sintié obligá di demonstra su aptitud por sugeri cu tal persona no ta tanto fuerte en todo caso​—⁠no ta suficiente fuerte pa demonstra su balor sin haci bromamento. E Bijbel ta reconoce tendencia humano di hende di gaña nan mes ora e ta conseha: “Laga ken cu ta kere cu e ta pará tene cuidao pe no cai.”​—⁠1 Corintio 10:⁠12.

Aunque un persona tin un talento extraordinario den un cierto campo, esei ta hustifica nan bromamento? No, pasobra bromamento ta glorifica hende, pero cualkier talento cu nos tin ta bini di Dios. Dios mester recibi e gloria. Pakico nos mester recibi mérito pa algo cu locual nos a nace? (1 Corintio 4:⁠7) Además, mescos cu nos tin forza, nos també tin debilidad. Onradez ta exigi pa nos hala atencion na nos falta i defecto? Ta parce cu mashá poco bromador ta kere esei. Tal bez Herodes Agripa I berdaderamente tabatin e don di papia. Pero su falta di modestia a resulta den un morto mashá desagradable. Tal incidente mahós ta refleha ki repugnante orguyo ta pa Dios, i també pa hopi hende.​—⁠Echo 12:​21-23.

Talento i forza generalmente ta sali na cla sin e hacimento di indebido propaganda propio. Ora otro hende ta reconoce i ta encomenda calidad i logramento cu bo tin, esei ta refleha mas gentilosamente riba bo. Proverbio 27:2 ta bisa sabiamente: “Laga un hende straño, i no bo mes boca, elogiábo; laga un stranhero, i no bo mes lip, haci esei.”

Necesario pa logramento?

Algun hende ta kere cu promocion propio cu confianza ta necesario pa logramento den e mundo di competencia djawe. Nan ta preocupá cu si nan no ta broma i propaga nan forza, nan lo pasa sin cu hende tuma nota di nan of apreciánan. Un ehempel di tal preocupacion ta e sigiente comentario dje revista Vogue: “Nan a síñanos den e pasado cu modestia ta un birtud, awor nos ta siña cu silencio por ta un handicap.”

Pa hende cu kier usa norma di mundo pa haci progreso, tal preocupacion por ta válido. Pero e situacion di hende cristian ta diferente. Nan sa cu Dios ta interesá den hende humilde i ta scoge di usa hende asina, cu no ta soberbe. P’sei, hende cristian no tin cu usa e recurso di táctica egotísta. Ta cierto cu hende cu tin demasiado confianza por gana prestigio temporal door di ser agresivo of manipulativo. Pero, cu tempo nan ta ser desenmascará i asta humiyá. Ta manera Jesucristo a bisa: “Ken cu ta halza su mes lo ser humiyá, i ken cu ta humiya su mes lo ser halzá.”​—⁠Mateo 23:12; Proverbio 8:13; Lucas 9:⁠48.

Bentaha di modestia

Ralph Waldo Emerson a skirbi: “Tur hende cu mi ta encontra ta superior di mi di algun manera. Asina, mi ta siña foi dje.” Su comentario ta di acuerdo cu e conseho di apóstol Pablo inspirá divinamente pa hende cristian “no haci nada debí na pleitamento ni debí na halzamento, sino considera cu humildad di mente cu e otronan ta superior cu boso.” (Filipense 2:⁠3) Tal punto di bista modesto ta pone hende na posicion pa siña for di otro.

P’sei, vigila pa bo forza no bira bo debilidad. No rebaha bo aptitud i logramento cu bromamento. Agrega e calidad di modestia na birtud cu bo tin. Esei ta loke realmente ta aumenta bo balor den e bista di otro hende. Esei ta yudábo disfruta di mihor relacion cu otro hende i ta resulta den e aprobacion di Jehova Dios.​—⁠Miqueas 6:8; 2 Corintio 10:⁠18.