Kiko Yehova Lo Laga Bo Bira?

 1. Kiko Yehova por hasi pa kumpli ku su propósito?

YEHOVA por bira loke sea ta nesesario pa kumpli ku su propósito. Na algun okashon, Yehova a bira Maestro, Konsolador i Predikador. Eseinan ta djis algun ehèmpel di loke Yehova a bira. (Isa. 48:17; 2 Kor. 7:6; Gal. 3:8) Asina mes, hopi biaha e ta usa hende pa kumpli ku su propósito. (Mat. 24:14; 28:19, 20; 2 Kor. 1:3, 4) I Yehova por duna kualke un di nos e sabiduria i poder ku nos tin mester pa bira loke sea ta nesesario pa kumpli ku su boluntat. Segun algun eksperto, nifikashon di Yehova su nòmber ta enserá tur e kosnan ei.

 2. (a) Dikon tin biaha nos ta duda si ainda Yehova ta usa nos? (b) Kiko nos lo trata den e artíkulo akí?

² Nos tur ke ta útil pa Yehova, pero algun di nos kisas ta duda si ainda e ta usa nos. Dikon? Pasobra kisas nos ta haña ku nos edat, sirkunstansia, abilidat òf kapasidat ta limitá nos. Di otro banda, tin ruman ta satisfecho ku loke nan ta hasiendo i no ta mira e nesesidat pa sigui progresá. Den e artíkulo akí, nos lo mira kon Yehova por kapasitá nos pa kumpli ku su propósito. Despues, nos lo trata algun relato bíbliko di hende hòmber i hende muhé ku Yehova a duna tantu e deseo komo e poder pa hasi tur loke ta agrad’é. Finalmente, nos lo analisá kon nos por permití Yehova yuda nos.

 3. Di akuerdo ku Filipensenan 2:13, kon Yehova por duna nos e deseo pa hasi loke ta agrad’é?

³ Lesa Filipensenan 2:13.b Yehova por duna nos e deseo pa hasi tur loke ta agrad’é. Kon e ta hasi esei? Kisas nos ta haña sa di un nesesidat spesífiko den nos kongregashon. Òf, e ansianonan ta lesa un karta di sukursal ku ta bisa ku un otro kongregashon mester di yudansa. Nos por puntra nos mes: ‘Kiko mi por hasi pa yuda?’ Òf, kisas nan a ofresé nos un asignashon difísil i nos ta puntra nos mes si nos por kumpli kuné. Òf, despues di a lesa algun versíkulo den Beibel, nos por puntra nos mes: ‘Kon mi por usa loke mi a lesa pa yuda otro hende?’ Yehova nunka ta obligá nos pa hasi nada. Pero, ora e ta mira ku nos ta dispuesto pa hasi mas, e ta duna nos e deseo pa kumpli ku loke nos a pensa pa hasi.

 4. Kon Yehova por duna nos e poder pa hasi tur loke ta agrad’é?

⁴ Yehova por duna nos e poder tambe pa hasi tur loke ta agrad’é. (Isa. 40:29) E por usa spiritu santu pa mehorá e abilidatnan i kapasidatnan ku nos tin kaba. (Éks. 35:30-35) Yehova por usa su organisashon pa siña nos kon pa hasi sierto tarea. Si sosodé ku bo no sa kon pa kumpli ku un asignashon, buska yudansa. Ademas di esei, sinti bo liber pa pidi Yehova “e poder ku ta surpasá esun di hende.” Nos Tata ta generoso i lo e yuda bo. (2 Kor. 4:7; Luk. 11:13) Beibel tin hopi ehèmpel di e manera ku Yehova a kapasitá hende hòmber i muhé dunando nan e deseo i e poder pa hasi tur loke ta agrad’é. Segun ku nos ta analisá e ehèmpelnan ei, purba di pensa kon Yehova por usa bo na un manera similar.

 5. Kiko nos ta siña for di e manera ku Yehova a usa Moises pa libra Su pueblo?

⁵ Yehova a laga Moises bira un libertadó pa e israelitanan. Na ki momento Yehova a hasi uso di dje? Akaso tabata ora Moises a pensa ku e tabata kapas despues ku “nan a [eduk’é] den tur e sabiduria di e egipsionan”? (Echo. 7:22-25) Nò. Yehova a us’é despues di a siñ’é ku e mester tabata humilde i di genio suave. (Echo. 7:30, 34-36) Yehova a duna Moises kurashi pa papia ku e gobernante di mas poderoso den Egipto. (Éks. 9:13-19) Kiko nos ta siña for di e manera ku Yehova a usa Moises? Yehova ta usa su sirbidónan ku ta purba di imitá su kualidatnan i ku ta dependé riba dje pa forsa.—Flp. 4:13.

 6. Kiko nos ta siña for di e manera ku Yehova a usa Barzilai pa yuda Rei David?

⁶ Algun siglo despues, Yehova a usa Barzilai pa proveé pa e nesesidatnan di Rei David. E tempu ei, David tabata hui pa su yu, Absalon. David i e pueblo ku tabata kompañ’é tabatin ‘hamber, tabata morto kansá i tabatin set.’ E ora ei, Barzilai i algun otro hòmber a riska nan bida pa proveé pa David i e pueblo. Barzilai ya tabata di edat, pero esei no a lag’é pensa ku e no ta útil mas pa Yehova. Mas bien, Barzilai tabata generoso i a usa loke e tabatin pa perkurá pa e nesesidatnan di otro hende. (2 Sam. 17:27-29) Kiko esei ta siña nos? Sin importá nos edat, Yehova por usa nos pa yuda nos rumannan den nesesidat, tantu den nos region komo na otro pais. (Pro. 3:27, 28; 19:17) Den algun kaso nos por yuda e rumannan personalmente. Ma, si esei no ta posibel, nos por kontribuí na e obra mundial. Asina ei, e organisashon tin fondo pa yuda e rumannan rònt mundu ora esei ta nesesario.—2 Kor. 8:14, 15; 9:11.

 7. Kon Yehova a usa Simeon, i dikon esei ta animá nos?

⁷ Simeon tabata un hòmber fiel di edat na Herúsalèm. Yehova a primintié ku lo e no muri promé ku e mira e Mesías. E promesa ei lo a animá Simeon mashá. E tabatin hopi aña ta warda riba e binida di e Mesías. Yehova a rekompensá Simeon pa su fe i perseveransia. Un dia, “guiá pa spiritu santu,” Simeon a drenta den tèmpel, i einan el a mira e bebi, Hesus. E ora ei, Yehova a usa Simeon pa duna un profesia tokante e yu ei ku lo a bira Kristu. (Luk. 2:25-35) Aunke Simeon a muri, probablemente promé ku Hesus a kuminsá su sirbishi riba tera, el a sintié masha gradisidu pa e privilegio ku e tabatin. I tin algu mihó ta spera e hòmber fiel ei. Ora Simeon ser resusitá, lo e mira kon e gobièrnu di Hesus realmente a bira un bendishon pa tur famia riba tera. (Gén. 22:18) Nos tambe por ta gradisidu pa kualke privilegio ku Yehova duna nos den su sirbishi.

 8. Kon Yehova por usa nos manera el a usa Bárnabas?

⁸ Den promé siglo, un hòmber generoso ku yama Hose tabata dispuesto pa laga Yehova us’é. (Echo. 4:36, 37) Probablemente e tabatin kustumber di konsolá otro hende, pasobra e apòstelnan a dun’é e nòmber Bárnabas ku ta nifiká “Yu di Konsuelo.” Por ehèmpel, despues ku Saulo a bira kristian, hopi ruman tabatin miedu di dje pasobra nan tabata sa ku el a persiguí e kongregashonnan. Pero, Bárnabas a sali na su yudansa. Sin duda Saulo tabata masha gradisidu pa su bondat. (Echo. 9:21, 26-28) Na un otro okashon, e kristiannan na Antiokia di Siria tabatin mester di animashon. Pues, e ansianonan na Herúsalèm a disidí di manda un hende pa bishitá nan. Bo sa ken nan a manda? Bárnabas! Esei tabata un bon desishon. Beibel ta bisa ku Bárnabas “a animá nan tur pa keda fiel na Señor ku un determinashon di kurason.” (Echo. 11:22-24) Awe tambe, Yehova por yuda nos bira un “yu di konsuelo” pa nos rumannan. Por ehèmpel, e por usa nos pa konsolá e rumannan ku a pèrdè un ser kerí. Òf, e por motivá nos pa bishitá òf yama un ruman ku ta malu òf deprimí i bis’é algu ku ta anim’é. Abo ta dispuesto pa laga Yehova usa bo manera el a usa Bárnabas?—1 Tes. 5:14.

 9. Kiko nos ta siña for di e manera ku Yehova a entrená Vasily pa bira un bon wardadó den kongregashon?

⁹ Yehova a yuda un ruman ku yama Vasily bira un bon wardadó den kongregashon. Vasily tabatin 26 aña ora el a bira ansiano. El a sinti ku e no tabata masha kualifiká pa yuda e kongregashon, foral pa yuda e rumannan ku tabata pasa den difikultat. Pero, el a haña bon entrenamentu serka e ansianonan eksperensiá i el a asistí na Skol di Ministerio di Reino. Vasily a hasi esfuerso pa mehorá. Por ehèmpel, el a traha un lista di meta chikitu ku e kier a alkansá. Segun ku e tabata alkansá kada un di nan, e tabata vense su miedu. Awor e ta bisa: “Loke ántes tabata duna mi miedu, awor ta hasi mi masha felis. Ora Yehova yuda mi haña e teksto korekto pa konsolá un ruman den kongregashon, mi ta bira masha kontentu.” Ruman hòmbernan, boso tambe por siña for di e ehèmpel di Vasily. Sea dispuesto pa laga Yehova usa boso. Si boso hasi esei, Yehova por yuda boso pa atendé mas responsabilidat den kongregashon.

10. Kiko Abigail a hasi, i kiko bo ta siña for di su ehèmpel?

¹⁰ Un biaha, Rei Saul tabata persiguí David i e hòmbernan ku tabata leal na dje, i nan tabatin mester di yudansa. Na un okashon, nan a pidi un israelita riku ku yama Nabal un tiki kuminda. David i e hòmbernan ku tabata kompañ’é no a mira un problema pa pidié kuminda pasobra nan tabata protehá e tou di Nabal den desierto. Pero, Nabal tabata egoista i no kier a duna nan nada. David a rabia asina tantu ku el a disidí di bai mata Nabal i tur e hòmbernan di su kas. (1 Sam. 25:3-13, 22) Abigail, kasá di Nabal, a bin haña sa esei. Abigail tabata bunita di aparensia i masha inteligente. Ku hopi kurashi, el a bai serka David, tira su kurpa abou dilanti di dje i a rog’é pa no tuma vengansa. Ku takto Abigail a bisa David ku esei lo a trese kulpa di sanger riba David i ku ta mihó pa e laga e asuntu den man di Yehova. Loke Abigail a bisa i hasi a demostrá ku e tabata humilde i prudente. Esei a konmové David su kurason, i el a realisá ku ta Yehova mes a manda Abigail. (1 Sam. 25:23-28, 32-34) Abigail a kultivá kualidat ku a hasié útil pa Yehova. Di mes manera, ora un ruman muhé kultivá takto i disernimentu, Yehova por us’é pa fortalesé su famia i e kongregashon.—Pro. 24:3; Tito 2:3-5.

11. Kiko e yu muhénan di Salum a hasi, i ken awendia ta imitá nan?

¹¹ Hopi siglo despues, Yehova a usa e yu muhénan di Salum pa rekonstruí e muraya di Herúsalèm. (Neh. 2:20; 3:12) Aunke nan tabata yu di prens, nan tabata dispuesto pa hasi un trabou difísil i peligroso. (Neh. 4:15-18) Esta diferente for di e hòmbernan prominente di e tekoitanan, kendenan no kier a rebahá nan mes pa “apoyá e trabou”! (Neh. 3:5) Imaginá kon kontentu e yu muhénan di Salum a keda ora e trabou a keda kla den apénas 52 dia! (Neh. 6:15) Awendia, hopi ruman muhé ta mustra e mesun disposishon. Nan ta sinti nan kontentu pa yuda den un área spesial di sirbishi sagrado: konstrukshon i mantenshon di edifisio dediká na Yehova. E abilidat, entusiasmo i lealtat di e rumannan ei ta kontribuí mashá na e éksito di e trabou ei.

12. Kon Yehova por usa nos na e mesun manera ku el a usa Tabita?

¹² Un otro hende muhé ku tabata masha útil pa Yehova tabata Tabita. Beibel ta bisa ku el a hasi “hopi bon obra” i a “duna regalo di miserikòrdia.” (Echo. 9:36, nota) Tabita tabata konosí pa su generosidat i bondat, spesialmente na e biudanan. P’esei, ora el a muri, hopi biuda a yora. Pero, ora apòstel Pedro a resusit’é, nan a bira masha kontentu. (Echo. 9:39-41) Ki lès nos ta siña for di Tabita? Nos tur, sea ku nos ta hóben òf di edat, hòmber òf muhé, por duna yudansa práktiko na nos rumannan.—Heb. 13:16.

13. Kon Yehova a usa Ruth apesar ku e tabata tímido, i na ki konklushon el a yega?

¹³ Ruth tabata un ruman masha tímido ku kier a bira misionero. Ora e tabata chikitu, lihé lihé e tabata bai di un kas pa otro pa parti tratado. El a bisa: “Mi tabata gusta e trabou ei masha tantu.” Pero, no tabata fásil pa e papia personalmente ku hende na porta tokante e Reino di Dios. Apesar di Ruth su timides, el a bira pionero regular ku 18 aña. Na 1946, el a asistí na Skol Bíbliko di Galaad di Watchtower i mas despues el a sirbi na Hawai i Hapon. Yehova a usa Ruth pa hiba e bon notisia na hopi hende den e paisnan ei. Despues di kasi 80 aña den e sirbishi ei, Ruth a yega na e siguiente konklushon: “Yehova a duna mi hopi forsa i a yuda mi vense mi timides. Mi ta firmemente konvensí ku Yehova por usa kualke un di nos ku ta pone su konfiansa den dje.”

14. Segun Kolosensenan 1:29, kiko nos tin ku hasi si nos ke pa Yehova usa nos?

¹⁴ Durante henter historia, Yehova a usa su sirbidónan den hopi manera. I kiko di abo? Kiko Yehova lo laga bo bira? Esei ta dependé di kuantu esfuerso bo ke hasi. (Lesa Kolosensenan 1:29.) Si bo pone bo mes disponibel, Yehova por laga bo bira un publikadó zeloso, un bon maestro, un konsoladó ábil, un trahadó diligente, un amigu komprensivo òf loke sea ta nesesario pa kumpli ku su propósito.

15. Segun 1 Timoteo 4:12 i 15, kiko e ruman hòmbernan hóben mester roga Yehova p’e?

¹⁵ Bo ta un hóben ku ta serka di bira adulto? E organisashon mester di hopi ruman hòmber yen di energia ku por bira sirbidó ministerial i atendé ku mas responsabilidat. Hopi kongregashon tin mas ansiano ku sirbidó ministerial. Si bo ta un hóben, bo por kultivá e deseo di hasi mas den kongregashon? Tin biaha algun ruman hòmber ta bisa: “Publikadó manera mi ta aki mes ta masha bon.” Si bo ta sinti asina, roga Yehova yuda bo kultivá e deseo pa kualifiká komo sirbidó ministerial i pa e duna bo e poder pa hasi tur loke bo por den su sirbishi. (Ekl. 12:1) Nos mester di bo yudansa!—Lesa 1 Timoteo 4:12, 15.

16. Kiko nos mester pidi Yehova, i dikon?

¹⁶ Yehova por laga bo bira loke sea ta nesesario pa kumpli ku su propósito. P’esei, pidié duna bo e deseo di traha p’e, anto pidié duna bo e poder ku bo mester. Sin importá bo edat, usa bo tempu, energia, abilidat, kapasidat i pertenensia pa onra Yehova awor. (Ekl. 9:10) Nunka laga oportunidat presioso di hasi tur loke bo por den Yehova su sirbishi pasa bo bai pa motibu di miedu òf sintimentu di inkapasidat. Ta un gran privilegio pa nos hasi tur loke nos por pa duna nos Tata amoroso e onor ku e meresé.