“Alegrá Bo den e Esposa di Bo Hubentut”

“Alegrá bo den e esposa di bo hubentut. Mi yu, pakiko bo mester ta enkantá ku un adúltera?”—PROVERBIONAN 5:18, 20.

1, 2. Dikon nos por bisa ku e amor romántiko entre un esposo i esposa ta bendishoná?

BEIBEL ta papia abiertamente tokante relashon seksual. Na Proverbionan 5:18 i 19 nos ta lesa: “Laga bo fuente ta bendishoná, i alegrá bo den e esposa di bo hubentut. Manera un biná amabel i un gazèl grasioso, laga su pechunan satisfasé bo tur ora; sea semper enkantá ku su amor.”

² Aki e ekspreshon “fuente” ta referí na e fuente di satisfakshon seksual. E ta bendishoná den e sentido ku e sintimentu di amor romántiko i ékstasis ku parehanan kasá ta disfrutá di dje ta un regalo di Dios. Sin embargo, e intimidat aki mester ser eksperensiá solamente denter di e areglo matrimonial. P’esei Rei Salomon di antiguo Israel, un eskritor di Proverbionan, a hasi un pregunta retóriko: “Mi yu, pakiko bo mester ta enkantá ku un adúltera, i brasa pechu di un muhé stranhero?”—Proverbionan 5:20.

 3. (a) Kiko ta e tristu realidat di hopi matrimonio? (b) Kon Dios ta mira adulterio?

³ Riba dia di kasamentu, un hòmber i un muhé ta hasi e promesa solèm di stima otro i keda fiel na otro. Sin embargo, adulterio ta destruí hopi matrimonio. De echo, despues di a analisá mas ku dos dozein di estudio, un investigadó a konkluí ku “25 porshento di esposa i 44 porshento di esposo tabatin relashon seksual pafó di matrimonio.” Apòstel Pablo a deklará: “No laga nan gaña boso; ni fornikadó, ni adoradó di dios falsu, ni adúltero, ni sodomita, ni homoseksual . . . lo no heredá e reino di Dios.” (1 Korintionan 6:9, 10) Pues no tin duda tokante esaki. Adulterio ta un piká serio den bista di Dios, i adoradónan berdadero tin ku tene kuidou pa nan no kometé infidelidat matrimonial. Kiko lo yuda nos tene nos ‘matrimonio onorabel, i e kama matrimonial sin mancha’?—Hebreonan 13:4.

Tene Kuidou ku un Kurason Engañoso

 4. Kua ta algun manera ku un kristian kasá lo por hañ’é enbolbí den un relashon romántiko pafó di matrimonio sin ku ta su intenshon?

⁴ Den e ambiente moralmente degradá djawe, tin hopi hende “ku wowo yen di adulterio i ku nunka ta stòp di hasi piká.” (2 Pedro 2:14) Deliberadamente nan ta buska relashonnan romántiko pafó di matrimonio. Den algun pais, un kantidat grandi di hende muhé a drenta e forsa laboral, i awor ku hende di ámbos sekso ta traha huntu esei a krea un ambiente fértil pa romansenan inapropiá desaroyá na trabou. Ademas, via ‘chat room’ riba Internet a bira masha fásil pa asta e personanan di mas tímido sera amistatnan íntimo via kòmpiuter. Hopi persona kasá ta kai den e trampanan aki sin ku nan ta realisá kiko ta pasando.

5, 6. Kon un ruman muhé kristian a haña su mes den un situashon peligroso, i kiko nos ta siña for di esaki?

⁵ Konsiderá kon un kristian ku nos lo yama Maria a hañ’é enbolbí den un situashon ku kasi a pon’é kometé inmoralidat seksual. Su esposo, ku no ta un Testigu di Yehova, tabata mustra masha tiki kariño pa e famia. Maria ta kòrda kon algun aña pasá el a topa un kolega di su kasá. E hòmber tabata masha kortes, i na un otro okashon el a asta ekspresá interes den Maria su kreensianan religioso. Maria a konta: “E tabata un persona masha amabel, kompletamente otro for di mi kasá.” Poko despues Maria ku e kolega di su kasá a desaroyá sintimentunan romántiko pa otro. Maria a rasoná: “Mi no a kometé adulterio, i e hòmber ta interesá den Beibel. Podisé mi por yud’é.”

⁶ Promé ku Maria su laso romántiko a hiba na adulterio, el a realisá den ki peliger e tabata. (Galationan 5:19-21; Efesionan 4:19) Su konsenshi a kuminsá funshoná, i el a dal paso pa rektifiká e asuntu. Maria su eksperensia ta ilustrá ku “e kurason ta mas engañoso ku tur kos i ta totalmente korupto.” (Jeremias 17:9) Beibel ta konsehá nos: “Warda bo kurason riba tur kos.” (Proverbionan 4:23) Kon nos por hasi esei?

‘E Hende Prudente Ta Skonde’

 7. Aplikando kua konseho bíbliko ta un protekshon ora di yuda un persona ku tin difikultat matrimonial?

⁷ Apòstel Pablo a skirbi: “Laga esun ku ta kere ku e ta pará tene kuidou pa e no kai.” (1 Korintionan 10:12) Anto Proverbionan 22:3 ta deklará: “Un hende prudente ta mira maldat [òf, “kalamidat,” NW] i ta skonde.” En bes di tin demasiado konfiansa den bo mes i pensa: ‘Ai nò, nada lo no pasa ku mi,’ lo ta sabí di bo parti pa antisipá situashonnan ku lo por hiba na problema. Por ehèmpel, evitá di bira e úniko persona di konfiansa di un hende di e sekso opuesto ku ta pasando dor di difikultatnan kompliká den su matrimonio. (Proverbionan 11:14) Bisa e persona ku ta mihó p’e papia tokante su problemanan matrimonial sea ku su kasá, ku un kristian maduro di su mes sekso ku ta deseá pa su matrimonio funshoná òf ku e ansianonan. (Tito 2:3, 4) E ansianonan den e kongregashonnan di Testigunan di Yehova ta pone un bon ehèmpel den esaki. Ora ku un ansiano tin ku papia den privá ku un ruman muhé kristian, e ta hasi esei den un ambiente públiko, manera na Salòn di Reino.

 8. Ki prekoushon ta esensial na trabou?

⁸ Na trabou i otro lugánan, tene kuidou ku situashonnan ku lo por stimulá intimidat. Por ehèmpel, trahando oranan èkstra den estrecho kompania di un persona di e sekso opuesto por hiba na tentashon. Komo un hòmber òf muhé kasá, lo bo kier mustra bon kla na bo manera di papia i na bo komportashon ku definitivamente bo no ta disponibel pa ningun relashon romántiko. Komo un persona ku ta sigui tras di deboshon na Dios, sigur lo bo no ke atraé indebido atenshon dor di flirt òf dor di bisti òf areglá bo mes na un manera inmoderá. (1 Timoteo 4:8; 6:11; 1 Pedro 3:3, 4) Ta bon pa pone potrètnan di bo kasá i di bo yunan na bo trabou pa sirbi komo un rekordatorio visual tantu pa bo komo pa otro hende, ku bo famia ta importante pa bo. Sea determiná pa nunka stimulá—ni sikiera tolerá—proposishonnan romántiko di otro hende.—Jòb 31:1.

‘Gosa di Bida ku e Muhé Ku Bo Ta Stima’

 9. Ki seri di akontesimentu por hasi un relashon romántiko nobo parse masha atraktivo?

⁹ Protehá nos kurason ta eksigí mas ku djis evitá situashonnan peligroso. Atrakshon romántiko pa un persona pafó di e matrimonio lo por ta un indikashon ku un esposo i esposa no ta prestando atenshon na e nesesidatnan di otro. Podisé un hòmber ta ignorá su esposa kontinuamente òf un muhé ta kritiká su esposo konstantemente. Diripiente un otro persona—sea na trabou òf asta den e kongregashon kristian—ta parse di tin nèt e kualidatnan ku ta falta den bo kasá. Den poko tempu un banchi ta forma, i e relashon nobo ta bira kasi iresistiblemente atraktivo. E seri di akontesimentunan sutil aki ta konfirmá e bèrdat di e deklarashon bíbliko: “Kada un ta wòrdu tentá ora ku e wòrdu atraí i sedusí dor di su mes pashon.”—Santiago 1:14.

10. Kon esposo- i esposanan por hasi nan relashon mas firme?

¹⁰ Esposo- i esposanan mester traha pa fortalesé e relashon amoroso ku nan mes kasá en bes di buska pafó di nan matrimonio pa satisfasé nan deseonan, sea ta nan deseo pa kariño, amistat òf pa sosten durante un situashon difísil. Pues, hasi tur boso esfuerso pa pasa tempu huntu, i hala mas serka di otro. Reflekshoná riba loke a pone boso enamorá di otro. Purba eksperensiá di nobo e kariño ku bo a sinti pa e persona ku a bira bo kasá. Pensa riba e tempunan bon ku boso a pasa huntu. Hasi orashon na Dios tokante e asuntu. E salmista David a roga Yehova: “Krea den mi un kurason limpi, o Dios, i renobá un spiritu rekto den mi.” (Salmo 51:10) Sea desididu pa ‘gosa di bida ku e esposa òf esposo ku bo ta stima tur e dianan di bo bida ku Dios a duna bo bou di solo.’—Eklesiastés 9:9.

11. Ki papel konosementu, sabiduria i disernimentu ta hunga den fortalesé e banchi matrimonial?

¹¹ Un kos ku nos no mester pasa por haltu ora di fortalesé e banchi matrimonial ta e balor di konosementu, sabiduria i disernimentu. Proverbionan 24:3 i 4 ta deklará: “Ku sabiduria un kas ta wòrdu trahá, i ku komprondementu e ta wòrdu establesí. I ku konosementu e kambernan ta wòrdu yená ku tur rikesa presioso i agradabel.” Entre e kosnan presioso ku ta yena un kas felis ta kualidatnan manera amor, lealtat, temor di Dios i fe. Pa atkerí e kualidatnan aki nos mester di e konosementu di Dios. Pues, parehanan kasá mester ta studiantenan serio di Beibel. Anto kon importante sabiduria i disernimentu ta? Pa nos por trata ku éksito ku e problemanan di bida diario nos mester tin sabiduria, esta, e kapasidat di pone konosementu bíbliko na práktika. Un persona ku tin disernimentu por komprondé e pensamentunan i sintimentunan di su kasá. (Proverbionan 20:5) Mediante Salomon, Yehova a bisa: “Mi yu, paga atenshon na mi sabiduria, inkliná bo orea na mi komprondementu.”—Proverbionan 5:1.

Ora Ku Tin “Tribulashon”

12. Dikon no ta un sorpresa ku parehanan kasá ta eksperensiá problema?

¹² Ningun matrimonio no ta perfekto. Beibel asta ta bisa ku esposo i esposa lo tin “tribulashon den e bida aki.” (1 Korintionan 7:28) Inkietut, malesa, persekushon i otro faktornan por kousa tenshon den un matrimonio. Sin embargo, ora problemanan surgi boso tin ku buska solushon huntu, komo kasánan leal ku ta buska pa agradá Yehova.

13. Den ki áreanan un esposo i un esposa por analisá nan mes?

¹³ Kiko si tin tenshon den e matrimonio debí na e manera ku e pareha ta trata otro? Pa buska un solushon ta rekerí esfuerso. Por ehèmpel, kisas pokopoko un patronchi di papia malu ku otro a drenta den nan matrimonio i awor ta un parti regular di nan matrimonio. (Proverbionan 12:18) Manera nos a trata den e artíkulo anterior, esaki por tin efektonan devastador. Un proverbio bíbliko ta bisa: “Mihó biba den desierto, ku biba huntu ku un muhé pleitadó i rabiadó.” (Proverbionan 21:19) Si bo ta un esposa den un matrimonio asina, puntra bo mes: ‘Ta mi karakter ta pone ku ta difísil pa mi esposo keda den mi kompania?’ Beibel ta bisa esposonan: “Stima boso esposanan, i no sea amargá kontra nan.” (Kolosensenan 3:19) Si bo ta un esposo, puntra bo mes: ‘Mi komportashon ta friu i sin amor, i ta hinka mi kasá den tentashon pa buska konsuelo otro kaminda?’ Klaru ku no tin ningun èksküs pa inmoralidat seksual. Sin embargo, e echo ku un tragedia asina por sosodé ta bon motibu pa papia frankamente tokante problemanan ku tin.

14, 15. Dikon buskamentu di konsuelo pafó di matrimonio no ta e kontesta pa problemanan matrimonial?

¹⁴ Buska konsuelo den un romanse pafó di matrimonio no ta e kontesta pa problemanan matrimonial. Na unda un relashon asina lo por hiba? Na un matrimonio nobo i mas mihó? Tin hende ta pensa ku sí. Nan ta argumentá: ‘Kon ku bai bin, e otro persona aki tin presis e kualidatnan ku mi tin mester den un kasá.’ Pero tal rasonamentu ta falsu, pasobra ken ku bandoná su kasá—òf ku ta animá bo pa bandoná bo kasá—tin un falta di rèspèt serio pa e santidat di matrimonio. Ta apsurdo pa ferwagt ku e relashon ei sí lo resultá den un mihó matrimonio.

¹⁵ Maria, menshoná anteriormente, a pensa seriamente riba e konsekuensianan di su proseder, inkluso riba e posibilidat ku e ta pone su mes òf un otro hende pèrdè Dios su aprobashon. (Galationan 6:7) El a bisa: “Segun ku mi a kuminsá analisá mi sintimentunan pa e kolega di mi kasá, mi a bin realisá ku si tabatin un chèns ku e hòmber aki lo por a yega na un konosementu di e bèrdat, mi tabata strob’é di hasi esei. Inmoralidat lo a afektá tur hende enbolbí i trompeká otronan!”—2 Korintionan 6:3.

E Motivashon di Mas Fuerte

16. Menshoná algun konsekuensia di impuresa moral.

¹⁶ Beibel ta spièrta: “Lepnan di un adúltera ta gotia miel, i su boka ta mas suave ku zeta; ma na final e ta marga manera apsintio, skèrpi manera spada di dos fila.” (Proverbionan 5:3, 4) E konsekuensianan di impuresa moral ta doloroso i nan por ta mortal. Nan ta entre otro, un mal konsenshi, malesanan transmití seksualmente i e daño emoshonal kousá na e kasá di e persona infiel. E kosnan aki sigur ta bon motibu pa no sigui un rumbo ku por hiba na infidelidat matrimonial.

17. Kua ta e motibu di mas fuerte pa mantené fieldat den matrimonio?

¹⁷ Pero e motibu fundamental pakiko infidelidat matrimonial ta malu ta pasobra Yehova, e Originadó di matrimonio i e Dunadó di e kapasidat seksual, ta kondená esaki. Mediante profeta Malakias, Yehova a bisa: “Lo mi hala serka boso pa huisio; i lo mi ta lihé pa testifiká kontra . . . kibradónan di matrimonio.” (Malakias 3:5) Relashoná ku loke Yehova ta mira, Proverbionan 5:21 ta deklará: “E kamindanan di un hende ta den bista di SEÑOR, i e ta vigilá tur su bereanan.” Sí, “tur kos ta habrí i bisto dilanti di wowo di Esun ku nos tin di haber kuné.” (Hebreonan 4:13) Pues anto, e motivashon di mas fuerte pa mantené fieldat den matrimonio ta e realisashon ku kualke akto di impuresa seksual ta daña nos relashon ku Yehova, pa skondí ku un infidelidat por ta i pa chikitu ku su konsekuensianan físiko òf sosial lo por parse.

18, 19. Kiko nos ta siña for di e eksperensia di Hosé ku e esposa di Potifar?

¹⁸ E ehèmpel di Hosé, yu di patriarka Jakòb, ta mustra ku e deseo pa keda na pas ku Dios ta un motivashon poderoso. Debí ku Hosé tabatin fabor den bista di Potifar, un ofisial di palasio di Fárao, el a bin haña un posishon privilegiá den Potifar su kas. Ademas, Hosé tabatin “bon tipo i bon aparensia,” i e kasá di Potifar a tuma nota di esei. Tur dia e muhé tabata purba sedusí Hosé, pero su esfuersonan no a duna resultado. Kiko a pone Hosé resistí tur su proposishonnan inmoral? Beibel ta bisa nos: “Hosé a nenga i a bisa esposa di su shon: ‘Mira, ku mi akinan mi shon . . . no a nenga mi nada sino abo so, pasobra abo ta su esposa. Kon anto mi por hasi e maldat grandi aki i peka kontra Dios?’”—Génesis 39:1-12.

¹⁹ Siendo soltero, Hosé a mantené puresa moral dor di nenga di drenta den un relashon ku esposa di un otro hòmber. Proverbionan 5:15 ta bisa hòmbernan kasá: “Bebe awa for di bo mes renbak, i awa fresku for di bo mes pos.” Tene kuidou pa bo no forma lasonan romántiko pafó di matrimonio asta sin ku ta bo intenshon. Hasi esfuerso pa fortalesé e banchi di amor den bo propio matrimonio, i traha duru pa resolvé kualke difikultat matrimonial ku boso ta konfrontá. En todo kaso, “alegrá bo den e esposa [òf esposo] di bo hubentut.”—Proverbionan 5:18.

Kiko Bo A Siña?

• Kon un kristian lo por bira enbolbí den un relashon romántiko sin ku ta su intenshon?

• Ki prekoushonnan por yuda un persona p’e no forma un laso romántiko pafó di matrimonio?

• Kiko un pareha kasá mester hasi ora nan ta konfrontá problema?

• Kua ta e motivashon di mas fuerte pa mantené fieldat den matrimonio?

[Plachi na página 26]

Lamentablemente, e lugá di empleo por ta un ambiente fértil pa un romanse inapropiá desaroyá

[Plachi na página 28]

‘Ku konosementu e kambernan ta wòrdu yená ku kosnan agradabel’