LÈS 15
Ken Hesus Ta?
Hesus ta un di e personanan di mas famoso ku a yega di eksistí. Hopi hende a yega di tende di Hesus, pero nan no sa hopi kos tokante dje. Ademas, hopi hende tin vários opinion tokante ken Hesus ta realmente. Pero, kiko Beibel ta bisa tokante Hesus?
1. Ken Hesus ta?
Hesus ta un spiritu poderoso ku ta biba den shelu. Yehova Dios a krea Hesus promé ku tur otro kos. P’esei, Beibel ta bisa ku Hesus ta “e promé di tur kreashon.” (Kolosensenan 1:15) Ademas, Beibel ta referí na Hesus komo Dios su “Yu unigénito” pasobra Hesus ta e úniko persona ku Dios so a krea. (Huan 3:16) Hesus i su Tata, Yehova, ta masha será ku otro i nan a traha huntu pa krea tur otro kos. (Lesa Proverbionan 8:30.) Hesus i Yehova tabatin i semper lo tin un bon relashon ku otro. Beibel ta yama Hesus “e Palabra” komo ku e ta bosero di Dios. Lealmente e ta kumpli ku e título ei i ta hiba Dios su mensahe- i instrukshonnan pa otro persona.—Huan 1:14.
2. Dikon Hesus mester a bini na tera?
Mas o ménos 2.000 aña pasá, Yehova a hasi un milager. Yehova a usa su spiritu santu pa manda bida di Hesus for di shelu den barika di un bírgen hóben ku tabata yama Maria. Debí na e milager ei, Hesus por a nase komo hende aki riba tera. (Lesa Lukas 1:34, 35.) Hesus a bini na tera pa e ta e Mesías primintí, òf Kristu, i pa e salba humanidat.a Tur e profesianan ku Yehova a laga skirbi den Beibel tokante e Mesías a kumpli. Debí na esei, hende por a identifiká Hesus komo e Mesías, esta, “Kristu, Yu di e Dios bibu.”—Mateo 16:16.
3. Unda Hesus ta aworakí?
Despues ku Hesus a muri, Dios a resusit’é komo spiritu i el a bolbe na shelu. Den shelu, “Dios a hals’é na un puesto mas haltu.” (Filipensenan 2:9) Awor, Hesus ta un spiritu masha poderoso den shelu. E úniko persona ku ta mas poderoso kuné ta Yehova.
KIKO MAS NOS POR SIÑA?
Laga nos siña mas tokante Hesus i wak dikon ta asina importante pa siña tokante dje.
4. Hesus no ta Dios Todopoderoso
Beibel ta mustra ku aunke Hesus ta un spiritu poderoso den shelu, e ta obedesé su Dios i Tata, Yehova. Dikon? Pasa e VIDIO pa wak kon Beibel ta mustra ku Hesus i Dios Todopoderoso no ta igual na otro.
E siguiente tekstonan lo mustra ku Hesus i Yehova Dios ta dos persona distinto. Despues di lesa kada teksto, analisá e preguntanan ku ta sigui:
Lesa Lukas 1:30-32.
Kon loke e angel a bisa ta mustra ku Hesus i Yehova, “e Haltísimo,” ta diferente for di otro?
Lesa Mateo 3:16, 17.
Ora Hesus a batisá, kiko e stèm for di shelu a bisa?
Ken su stèm bo ta kere esei tabata?
Lesa Huan 14:28.
Ken ta mas grandi i ken tin mas outoridat, un tata òf su yu?
Hesus a yama Yehova su Tata. Kiko esei ta siña nos?
Lesa Huan 12:49.
Hesus ta pensa ku e i su Tata ta igual? Na ki konklushon bo ta yega?
5. Ki prueba tin ku Hesus tabata e Mesías?
Den Beibel, tin hopi profesia ku a yuda hende haña sa ken tabata e Mesías, esta, e persona ku Yehova a skohe pa salba humanidat. Pasa e VIDIO. Wak algun profesia tokante Hesus ku a kumpli tempu e tabata riba tera.
Lesa algun profesia tokante e Mesías i analisá e preguntanan ku ta sigui:
Lesa Mikéas 5:2 i wak unda Beibel ta bisa ku e Mesías mester a nase.b
E profesia akí a kumpli? Unda Hesus a nase?—Mateo 2:1.
Lesa Salmo 34:20 i Zakarías 12:10 pa wak algun detaye ku Beibel a profetisá tokante morto di e Mesías.
E profesianan akí a kumpli?—Huan 19:33-37.
Dikon Hesus no por a influensiá asuntu pa e profesianan akí kumpli?
Ki prueba e profesianan ei ta duna nos tokante Hesus?
6. Nos ta benefisiá hopi ora nos ta siña tokante Hesus
Beibel ta bisa ku ta masha importante pa nos siña tokante Hesus i tokante e trabou ku Dios a dun’é pa hasi. Lesa Huan 14:6 i 17:3. Despues, analisá e siguiente pregunta:
Dikon ta asina importante pa siña tokante Hesus?
Hesus a habri kaminda pa nos bira amigu di Dios. El a siña hende e bèrdat tokante Yehova i pa medio di dje nos por haña bida eterno
LOKE HENDE SA BISA: “Testigunan di Yehova no ta kere den Hesus.”
Kiko lo bo bisa un persona ku bisa bo esei?
RESÚMEN
Hesus ta un spiritu poderoso. E ta Yu di Dios i e ta e Mesías.
Repaso
Dikon Beibel ta yama Hesus “e promé di tur kreashon”?
Kiko Hesus tabata hasi promé ku el a bini na tera?
Ki prueba tin ku Hesus ta e Mesías?
MAS INFORMASHON INTERESANTE
Wak ki prueba mas tin ku Hesus ta e Mesías.
“E Profesianan Tokante e Mesías Ta Mustra Ku Hesus Tabata e Mesías?” (artíkulo riba jw.org)
Wak segun Beibel den ki manera Dios ta tata di Hesus.
“Dikon Hesus Ta Ser Yamá Yu di Dios?” (artíkulo riba jw.org)
Wak dikon Trinidat no ta un siñansa di Beibel.
“Hesus Ta Dios?” (E Toren di Vigilansia di 1 di aprel 2009, na spañó)
Lesa kon un señora su bida a kambia despues ku el a analisá loke Beibel ta bisa tokante Hesus.
“Un Señora Hudiu Ta Splika Dikon El A Bolbe Analisá Su Kreensianan” (Spièrta! di mei 2013)